Paghanda Sang mga Asaynment Subong Estudyante sa Eskwelahan
ANG tagsa ka asaynment sa eskwelahan nagahatag sing kahigayunan nga mag-uswag. Ukuri gid ini, kag amat-amat nga makita mo kag sang iban man ang imo pag-uswag. (1 Tim. 4:15) Ang eskwelahan magabulig sa imo sa pagpauswag sing labi pa sang imo mga ikasarang.
Ginakulbaan ka bala sa paghunahuna nga maghambal sa atubangan sang kongregasyon? Kinaandan lang ini, bisan pa madugaydugay ka na nga estudyante sa eskwelahan. Apang, may pila ka butang nga makabulig sa pagbuhin sang imo kakulba. Sa puluy-an, ugalia nga magbasa pirme sing matunog. Sa mga miting sa kongregasyon, magkomento sing masunson, kag kon isa ikaw ka manugbantala, makigbahin sing regular sa pag-alagad sa latagon. Magahatag ini sa imo sing eksperiensia sa paghambal sa atubangan sang iban. Dugang pa, abanse nga ihanda sing maayo ang imo mga asaynment subong estudyante, kag maghanas sa paghatag sini sing mabaskog. Dumduma nga magahambal ka sa atubangan sang mainabyanon nga mga tagpalamati. Antes maghatag sing bisan ano nga pamulongpulong, mangamuyo anay kay Jehova. Malipayon sia nga nagahatag sang balaan nga espiritu sa mga alagad niya nga nagapangayo sa iya.—Luc. 11:13; Fil. 4:6, 7.
Mangin makatarunganon sa imo mga ginapaabot. Nagakinahanglan sing tion ang pagtigayon sing eksperiensia subong isa ka humalambal kag mangin isa ka epektibo nga manunudlo. (Miq. 6:8) Kon bag-uhan ka nga estudyante sa eskwelahan, indi pagpaabuta nga makahatag ka gilayon sing maayo gid nga presentasyon. Sa baylo, pangabudlayi ang isa ka bahin sang speech counsel sa isa ka tion. Tun-i ang seksion sa sining libro nga nagabinagbinag sini. Kon posible, himua ang mga pag-ensayo nga ginpanugda didto. Magahatag ini sa imo sing eksperiensia sa mga butang nga may kaangtanan sa lalaygayan nga punto antes mo ihatag ang imo asaynment sa kongregasyon. Ang pag-uswag magaabot.
Kon Paano Maghanda Sing Asaynment sa Pagbasa
Ang paghanda para sa pagbasa sa publiko wala lamang nagalakip sang paghambal sing mga tinaga sa gin-asayn nga materyal. Panikasugi nga mahangpan mo sing maathag ang kahulugan sang materyal. Pagbaton mo gid sang imo asaynment, basaha ini upod ang amo sina nga tulumuron. Tinguhai nga mahangpan ang punto sang tagsa ka dinalan kag ang ideya nga ginapadaku sa tagsa ka parapo agod mapaalinton mo sing sibu ang mga ideya kag upod ang nagakaigo nga balatyagon. Kon posible, tan-awa ang diksionaryo para sa husto nga pagmitlang sa indi pamilyar nga mga tinaga. Hibalua sing maayo ang materyal. Ayhan kinahanglan buligan sang mga ginikanan ang ila lamharon nga kabataan sa paghimo sini.
Ginaasayn na bala ikaw sa pagbasa sing isa ka bahin sang Biblia ukon ayhan sing mga parapo sang isa ka artikulo sa Ang Lalantawan? Kon ang mga audiocassette sina nga materyal matigayon sa imo lenguahe, makabulig gid kon mamati ka sa pagbasa sini kag talupangdon ang mga butang subong sang pagmitlang, pagprase sing mga tinaga, pagpadaku, kag pagbulubag-o sa tono sang tingog. Nian tilawi nga iaplikar ining mga kalidad sa imo pagbasa.
Kon magsugod ka na sa paghanda sang imo asaynment, pat-ura nga tun-an sing maayo ang leksion nga nagabinagbinag sa kalidad sang paghambal nga gin-asayn sa imo. Kon posible, repasuha ini pagkatapos nga maensayo mo sing pila ka beses ang pagbasa sing mabaskog sang gin-asayn nga materyal. Panikasugi nga iaplikar ining nasulat nga laygay sing bug-os tubtob posible.
Ini nga paghanas magabulig gid sa imo sa ministeryo. Samtang nagapakigbahin ka sa pag-alagad sa latagon, madamo ikaw sing kahigayunan sa pagbasa sa iban. Bangod ang Pulong sang Dios may gahom sa pagbag-o sang kabuhi sang mga tawo, importante nga basahon mo ini sing maayo. (Heb. 4:12) Indi magpaabot nga mangin batid sa tanan nga bahin sang epektibo nga pagbasa sa isa ukon duha lamang ka asaynment. Sa isa ka Cristianong gulang nga may tinuig na nga eksperiensia, si apostol Pablo nagsulat: “Mag-ukod ka sa pagbasa sa dayag.”—1 Tim. 4:13.
Paghanda Para sa Tema kag Danyag
Kon makabaton ka sing isa ka asaynment sa eskwelahan nga nagadalahig sang isa ka danyag (setting), paano mo ini himuon?
Tatlo ka panguna nga butang ang kinahanglan binagbinagon: (1) ang gin-asayn sa imo nga topiko, (2) ang imo danyag kag ang tawo nga imo hambalon, kag (3) ang lalaygayan nga punto nga gin-asayn sa imo.
Kinahanglan nga tipunon mo ang materyal para sa topiko nga gin-asayn sa imo. Apang antes ka maghugod gid sa sina, hunahunaa sing maayo ang imo danyag subong man ang tawo nga imo hambalon, kay ini nga mga butang may kahilabtanan sa sahi sang materyal nga imo tuptupan kag sa paagi sang imo pagpresentar sini. Ano nga danyag ang imo gamiton? Ipasundayag mo bala kon paano ipresentar ang maayong balita sa isa nga kilala mo? Ukon ipakita mo bala kon ano ang mahimo matabo kon makighambal sa isa ka tawo sa nahauna nga tion? Mas magulang bala ang tawo sa imo ukon mas manghod? Ano ayhan ang iya panimuot tuhoy sa topiko nga ginahunahuna mo nga hinun-anunan? Ano na ayhan kadamo ang iya nahibaluan tuhoy sini? Ano nga tulumuron ang imo ginalauman nga matigayon sa inyo paghambalanay? Ang mga sabat sa sining mga pamangkot magahatag sa imo sing importante nga mga panuytoy sa kon ano ang pangabudlayan.
Diin mo pangitaon ang materyal tuhoy sa topiko nga gin-asayn? Sa pahina 33 tubtob 38 sini nga libro, ginabinagbinag ang tuhoy sa “Kon Paano Himuon ang Pagpanalawsaw.” Basaha ini, kag nian gamita ang mga galamiton sa pagpanalawsaw nga sarang mo matigayon. Sa kalabanan nga kaso madali mo makita ang kapin pa nga materyal sangsa magamit mo. Magbasa sing madamo agod mahibaluan mo ang mahimo gamiton nga sarang matigayon. Apang, samtang ginahimo mo ini, hunahunaa ang danyag nga imo gamiton para sa imo presentasyon subong man ang tawo nga imo mangin kahambal. Markahi ang mga punto nga nagakabagay gamiton.
Antes mo organisahon ang imo presentasyon kag himuon ang katapusan nga pagpili sing mga detalye, maghinguyang sing tion nga basahon ang ginabinagbinag sa lalaygayan nga punto nga gin-asayn sa imo. Ang pagsunod sina nga laygay amo ang isa sang panguna nga mga rason para sa imo asaynment.
Paagi sa pagtuptop sang imo materyal suno sa gintalana nga tion, malipay ikaw sa paghatag sing konklusion, bangod ang sinyales ihatag kon matapos na ang gintalana nga tion. Apang sa aton ministeryo sa latagon, wala pirme nadalahig ang kalawigon sang tion. Gani samtang nagahanda ikaw, hunahunaa ang kalawigon sang magamit nga tion, apang hatagi sing igtalupangod ang epektibo nga pagpanudlo.
Panugda Tuhoy sa mga Danyag. Usisaa ang mga panugda sa pahina 82, kag pilia ang isa nga mangin praktikal sa inyo ministeryo kag magatugot sa imo nga gamiton sing realistiko ang gin-asayn nga materyal. Kon madugaydugay ka na sa eskwelahan, tamda ini subong isa ka kahigayunan nga matigayon kag mapauswag ang dugang nga mga kalantip para sa imo ministeryo.
Kon ang manugtatap sa Teokratikong Eskwelahan Para sa Ministeryo amo ang nagahatag sing danyag, batuna ang hangkat. Ang kalabanan nga danyag nagalakip sang pagpanaksi. Kon wala pa gid ikaw makapanaksi sa ginlaragway nga kahimtangan, magkuha sing mga ideya paagi sa pagpakighambal sa mga manugbantala nga nakahimo na sini. Kon posible, tilawi nga hambalan ang gin-asayn sa imo nga topiko sa isa ka danyag nga kaanggid sa imo pagagamiton sa eskwelahan. Magabulig ini sa imo nga matigayon ang isa ka importante nga tulumuron sang imo paghanas.
Kon ang Bahin Isa ka Pamulongpulong
Kon lalaki ka, mahimo ka hatagan sing asaynment nga maghatag sing isa ka malip-ot nga pamulongpulong sa kongregasyon. Sa paghanda sining mga pamulongpulong, ang sadsaran nga mga punto nga dapat binagbinagon kaanggid sa mga ginlista na para sa mga asaynment sang estudyante sa porma sang mga demonstrasyon. Ang panguna nga mga kinatuhayan amo ang tagpalamati kag ang paagi sang pagpresentar.
Maayo nga ihanda pirme ang imo materyal agod ang tanan nga tagpalamati makabenepisyo sa sini. Ang kalabanan sa mga tumalambong nakahibalo na sang sadsaran nga mga kamatuoran sa Biblia. Mahimo nga nahibaluan na nila sing maayo ang topiko nga gin-asayn sa imo nga ipamulongpulong. Binagbinaga ang nahibaluan na nila tuhoy sa imo topiko. Panikasugi nga makabenepisyo sila sa pila ka paagi sa imo presentasyon. Pamangkuta ang imo kaugalingon: ‘Paano ko magamit ang akon topiko agod mapatudok sa akon kag sa akon mga tagpalamati ang apresasyon kay Jehova subong isa ka persona? Ano ang yara sa materyal nga magabulig sa amon nga mahangpan ang kabubut-on sang Dios? Paano ining materyal makabulig sa amon nga makahimo sing maayo nga mga desisyon sa tunga sang isa ka kalibutan nga ang mga kailigbon sa unod amo ang nagapangibabaw?’ (Efe. 2:3) Ang makaalayaw nga mga sabat sa sining mga pamangkot nagakinahanglan sing pagpanalawsaw. Kon nagagamit sing Biblia, tinguhai nga indi lamang magbasa sing mga teksto. Mangatarungan sa mga kasulatan nga imo ginagamit, kag ipakita kon paano ini nagaaman sing sadsaran sa paghimo sing mga konklusion. (Binu. 17:2, 3) Indi pagtinguhai nga tuptupan ang tuman kadamo nga materyal. Ipresentar ang imo materyal sa paagi nga mahapos madumduman.
Ang paghanda dapat maglakip man sa paghatag sing igtalupangod sa imo pagpresentar. Indi ini pagpasapayani. Ensayuha ang paghatag sang imo pamulongpulong sing matunog. Ang imo pagpanikasog sa pagtuon kag pag-aplikar sang laygay sa nanuhaytuhay nga kalidad sa paghambal magabulig sing daku sa imo pag-uswag. Bag-uhan ka man nga humalambal ukon eksperiensiado na, maghanda sing maayo agod makahambal ka nga may kombiksion kag balatyagon nga nagakaigo sa imo materyal. Samtang ginahimo mo ang tagsa ka asaynment sa eskwelahan, dumduma ang tulumuron nga gamiton ang imo hatag-Dios nga dulot sa paghambal sa pagpadungog kay Jehova.—Sal. 150:6.