Isa ka Eskwelahan nga Nagasangkap sa Aton Para sa Labing Importante nga Hilikuton

¹ Nagaeskwela ang mga tawo agod makatigayon sing instruksion nga makabulig sa ila nga malab-ot ang mga tulumuron nila sa kabuhi. Apang, ano pa ang mas importante nga tulumuron sangsa dayawon mismo ang Manughatag sang kabuhi kag buligan ang iban nga makatuon sang iya mga katuyuan kag sang iya mga dalanon? Wala. Ang tulumuron sang Teokratikong Eskwelahan Para sa Ministeryo amo ang paghanda sa aton nga makatudlo sang aton pagtuo sa iban. Sa amo, samtang nagatambong kita sa eskwelahan kada semana, ginabuligan kita agod mangin lantip para sa labing importante nga mga hilikuton sa aton kabuhi.

² Ang “Iskedyul sang Teokratikong Eskwelahan para sa Ministeryo sa 2003” ginlakip sang nagligad nga bulan sa isyu sang Ang Aton Ministeryo sa Ginharian. Ang iskedyul may mga detalye kon paano dumalahan ang eskwelahan. Masapwan mo nga praktikal kon taguon mo ini nga iskedyul upod sa imo kopya sang Magbenepisyo sa Pagpanudlo sang Teokratikong Eskwelahan Para sa Ministeryo, nga dapat mo dalhon kada semana sa Teokratikong Eskwelahan Para sa Ministeryo. Binagbinaga ang pila ka bahin sang Teokratikong Eskwelahan Para sa Ministeryo sa 2003.

³ Kalidad sa Paghambal: Sugod sa Enero, ang tagsa ka sesyon sang Teokratikong Eskwelahan para sa Ministeryo magasugod paagi sa lima ka minuto nga pamulongpulong tuhoy sa isa ka kalidad sa paghambal ukon isa ka bahin sang pagbasa, pagtuon, ukon pagtudlo. Ipresentar sang manugtatap sang eskwelahan ining nagabukas nga mga pamulongpulong, ukon mahimo niya i-asayn ini sa isa ka kalipikado nga gulang. Mahimo ipaathag sang humalambal ang kahulugan kag importansia sang kalidad sa paghambal. Nian mapasangkad niya ang materyal paagi sa pagbinagbinag sang Makasulatanhon nga mga halimbawa kag ipasundayag kon paano gamiton ining kalidad sa paghambal, nagasentro sing igtalupangod sa kon paano ang paghimo sini magapauswag sang aton ministeryo.

⁴ Asaynment Num. 1: Ang mga kauturan nga lalaki nga gin-asayn sa paghatag sing pamulongpulong sa pagtudlo ginapahanumdom liwat sa ‘pagtalupangod sa praktikal nga kapuslanan sang ginabinagbinag nga impormasyon.’ Ini nagakahulugan nga ipakita sa kongregasyon kon paano gamiton ang impormasyon. Kon amo sini ang imo asaynment, tan-awa ang pahina 48-9 sang Eskwelahan Para sa Ministeryo nga tulun-an nga libro para sa mga panugda kon paano maghanda, kag tun-i ang mga reperensia nga ginpakita sa indese sang libro sa idalom sang “Praktikal nga pag-aplikar.”

⁵ Iskedyul sa Pagbasa sang Biblia: Kon sang nagligad, wala mo mapadayon ang semanal nga pagbasa sang Biblia, ngaa indi mamat-od nga sundon ang iskedyul karon nga tuig? Yadtong magahimo sini makatapos sang Cristianong Griegong Kasulatan sa katapusan sang tuig. Ang mga benepisyo sang pagsugod sang isa ka programa sa pagbasa sing Biblia sa Cristianong Griegong Kasulatan ginabinagbinag sa pahina 10, parapo 4, sang Eskwelahan Para sa Ministeryo nga libro.

⁶ Talalupangdon nga mga Punto Gikan sa Pagbasa sa Biblia: Ini nga bahin ginhimo nga dies minutos agod ang mga tumalambong makakomento sa mga kapitulo nga gin-asayn sa sina nga semana. Ang ginhatagan sini nga bahin dapat magsunod sa gintalana nga tion. Ipresentar ini kada semana, lakip ang semana sang oral nga repaso. Samtang ginabasa mo ang gin-asayn nga mga kapitulo, mangita sing mga punto nga magamit mo sa pagtuon sang imo pamilya, sa imo ministeryo, ukon sa imo pagkabuhi. Ano nga mga kinaiya ni Jehova ang ginpadayag sa iya mga pagpakig-angot sa katawhan kag sa mga pungsod? Ano ang imo natun-an nga nagpabakod sang imo pagtuo kag nagpauswag sang imo apresasyon kay Jehova? Mangin handa sa pagkomento sa bisan diin nga punto sa gin-asayn nga mga kapitulo, bisan sa mga bersikulo nga pagabasahon sa Asaynment Num. 2, kay ang utod nga magahatag sini indi magkomento sa mga bersikulo.

⁷ Asaynment Num. 2: Ang una nga asaynment sang estudyante kada semana amo ang pag-ensayo sa pagbasa sa publiko. Ang tanan magluwas sa katapusan nga pagbasa kada bulan kuhaon gikan sa semanal nga pagbasa sa Biblia. Ang katapusan nga pagbasa sa bulan pagakuhaon gikan sa Ang Lalantawan. Basahon sang estudyante ang gin-asayn nga materyal nga wala sing introduksion ukon konklusion. Sa sini nga paagi, masentro niya ang iya igtalupangod sa iya ikasarang sa pagbasa.​​—⁠1 Tim. 4:⁠13.

⁸ Mga Asaynment Num. 3 kag Num. 4: Ang pila sining asaynment may kapin nga materyal nga makuha sa Reasoning nga libro; ang pila may tema lamang. Ang ginhatagan sing asaynment nga limitado lamang ang reperensia ukon tema lamang may kahigayunan nga mapasangkad ang ila presentasyon paagi sa pagpanalawsaw sa aton Cristianong mga publikasyon. Bangod sini mas mahapos nga ibagay sang mga utod nga babayi kon ano ang isiling nila sa ila mga kaupod sa presentasyon.

⁹ Mga Danyag: Subong sang ginpakita sa pahina 45 sang Eskwelahan Para sa Ministeryo nga libro, sarang makaasayn ang manugtatap sang eskwelahan sing isa ka danyag. Kon indi sia maghatag, nian ang mga utod nga babayi sarang makapili sing danyag gikan sa listahan sa pahina 82. Kon ang isa ka utod nga babayi ginahatagan sing bahin kada duha ka bulan, ang 30 ka danyag bastante nga mapilian niya sa sulod sang lima ka tuig. Kon pilion sang mga utod nga babayi ang Num. 30, nga amo ang, “Isa pa ka danyag nga bagay sa inyo duog,” dapat nila isulat ang danyag sa ubos ukon sa likod sang ila pormas sang asaynment (S-89). Isulat sang manugtatap sang eskwelahan ang petsa sang bahin sang estudyante sa pahina 82 sang iya libro sa tupad sang danyag nga iya gingamit. Mahimo niya ini sa tion nga ginasulatan man niya ang pormas para sa laygay sang estudyante.

¹⁰ Pormas Para sa Laygay: Yara sa libro ang imo pormas para sa laygay. Makita ini sa pahina 79-​81. Sa amo, kinahanglan mo ipresentar ang imo libro sa manugtatap sang eskwelahan pagkatapos sang imo bahin. Kinahanglan maghupot sang isa ka rekord ang manugtatap sang eskwelahan kon ano nga lalaygayan nga mga punto ang ginapangabudlayan sang mga estudyante.

¹¹ Oral nga Repaso: Mangin oral ang repaso sa Teokratikong Eskwelahan Para sa Ministeryo. Himuon ini kada duha ka bulan kag magadugay sing 30 minutos. Ang mga pamangkot nga pagabinagbinagon sa tion sang repaso padayon nga magaguwa sa Ang Aton Ministeryo sa Ginharian. Kon ang semana para sa oral nga repaso magdungan sa semana sang sirkito nga asambleya ukon sang pagduaw sang manugtatap sa sirkito, ang mga pamulongpulong sa masunod nga semana dapat ihatag sa sina nga semana kag ang oral nga repaso dapat ihatag sa masunod nga semana.

¹² Dugang nga mga Klase: Sa mga kongregasyon nga kapin sa 50 ang estudyante sang eskwelahan, mahimo binagbinagon sang mga gulang nga dugangan ang mga klase. “Ini nga kahimusan mahimo gamiton sa tanan nga presentasyon sang estudyante ukon sa katapusan nga duha ka bahin lamang.” (Eskwelahan Para sa Ministeryo, p. 285) Ang naulihi nga panugda ginhimo para sa mga kongregasyon nga madamo sing utod nga babayi apang pila lang ka utod nga lalaki ang mahimo mahatagan sing mga asaynment sa pagbasa. Dapat pilion sang mga gulang ang kalipikado nga mga kauturan nga lalaki nga magadumala sini nga mga klase.

¹³ Kabulig nga Manuglaygay: Subong ginpakita sang iskedyul sang Teokratikong Eskwelahan Para sa Ministeryo, dapat magtangdo ang hubon sang mga gulang sing kabulig nga manuglaygay nga magahatag sing pribado nga laygay sa mga gulang kag ministeryal nga mga alagad nga nagapresentar sing talalupangdon nga mga punto sa Biblia kag nagahatag sing mga pamulongpulong sa pagtudlo. Ang utod nga gin-asayn sa paghimo sini dapat eksperiensiado, isa nga ang laygay ginatahod sang iban nga mga gulang. Ang iya laygay dapat makabulig, nga nagahatag sing komendasyon sa maayo nga mga paagi sa paghambal kag pagtudlo kag nagapanugda sing isa ukon duha ka punto nga palauswagon. Indi kinahanglan nga magpanugda sa isa ka utod nga lalaki nga pirme nagahatag sing bahin. Apang, dapat mahantop kag mahangpan sang kabulig nga manuglaygay nga bisan ang mga kauturan nga lalaki nga nagahatag na sing mga pamulongpulong publiko sarang gihapon mabuligan agod padayon nga mag-uswag.​​—⁠1 Tim. 4:⁠15.

¹⁴ Kon Ano ang Dapat Bantayan: Ano ang makabulig sa manuglaygay nga mabinagbinag ang presentasyon? Ang ikatlo nga kahon sa kalabanan sang 53 ka may numero nga mga kapitulo sang Eskwelahan Para sa Ministeryo nga libro nagaunod sing isa ka malip-ot nga sumaryo sang kon ano ang dapat bantayan. Dapat man talupangdon sang manugtatap sang eskwelahan ang iban nga mga pahanumdom ukon mga panugda sa libro nga makabulig sa iya agod madali niya mahibaluan kon bala maayo ang pagbalay kag epektibo ang presentasyon. Halimbawa, talupangda ang mga pamangkot sa ibabaw sang pahina 55 kag ang mga ideya sa katapusan nga parapo sa pahina 163.

¹⁵ Pagsulat sa mga Blangko: Dugang sa masangkad nga marhin sini, ang Eskwelahan Para sa Ministeryo nga libro may pila ka blangko nga mga bahin nga masulatan mo sing dugang nga mga nota kon nagatuon ka sing personal kag kon nagatambong ka sa Teokratikong Eskwelahan Para sa Ministeryo. (Tan-awa ang pahina 77, 92, 165, 243, 246, kag 250.) Dalha ang imo libro kada semana. Sundi sa imo libro samtang ginahatag ang nagabukas nga pamulongpulong. Hupti nga bukas ang imo libro tubtob matapos ang eskwelahan. Pamatii ang mga panugda sang manugtatap sang eskwelahan. Talupangda ang mga metodo sa pagtudlo, mga pamangkot, mga halimbawa, malaragwayon nga mga ekspresyon, mga ilustrasyon, makita nga mga bulig, kag ang mga pagpatuhay nga gingamit sang mga humalambal. Paagi sa pagkuha sing mapuslanon nga mga nota, sarang mo madumduman kag magamit ang ekselente nga mga punto nga nabatian mo gikan sa eskwelahan.

¹⁶ Nahibaluan ni Jesucristo nga ang pagbantala sing maayong balita sang Ginharian sang Dios amo ang labing daku nga pribilehiyo nga sarang mahatag kay bisan sin-o. Amo ini ang iya panguna nga komisyon. (Mar. 1:38) Sia nagsiling: “Dapat ko ibantala ang maayong balita sang ginharian sang Dios, kay sa sining katuyuan ginpadala ako.” (Luc. 4:43) Bangod ginbaton naton ang pangagda nga sundon sia, kita man masako gid sa pagbantala sing maayong balita, kag pirme kita nagapanikasog nga pauswagon ang kalidad sang aton “halad sang pagdayaw.” (Heb. 13:15) Agod mahimo ini, kabay nga mangin determinado kita nga makigbahin sing regular sa Teokratikong Eskwelahan Para sa Ministeryo, isa ka eskwelahan nga magabulig sa aton sa paghimo sang labing importante nga hilikuton sa kabuhi.