Paano Kita Nagabenepisyo sa Teokratikong Eskwelahan Para sa Ministeryo

¹ Ang katawhan ni Jehova may pinasahi nga pribilehiyo nga makabaton sing teokratikong edukasyon. (Isa. 54:13; Juan 6:45) Apang ang benepisyo nga matigayon naton gikan diri nagadepende sing daku sa aton panikasog. Nahantop mo bala ang maayo nga mga epekto sa aton espirituwalidad sang Teokratikong Eskwelahan Para sa Ministeryo?

² Positibo nga mga Komento: Madamong mga manugtatap sa eskwelahan ang nagsiling nga ang komprehensibo nga pagtuon sa mga kalidad sa paghambal nagpauswag sang pagkaepektibo sang ila kongregasyon sa ministeryo sa latagon. Dugang pa, nasapwan sang isa pa ka manugtatap sang eskwelahan nga bangod makapakigbahin na sa talalupangdon nga mga punto sa Biblia ang tumalambong, madamo ang nagasunod sa iskedyul sang pagbasa sa Biblia. Nahanungod sa Asaynment Num. 2, madamo nga kauturan ang nagkomento sa kaayuhan sang pagsentro lamang sa materyal nga wala nagahanda sang introduksion kag konklusion. Ang mga ginahatagan sining bahin makakonsentrar karon sing mas maayo sa pagpauswag sang ila ikasarang sa pagbasa.—⁠1 Tim. 4:⁠13.

³ Ang Tanan Makapanginpulos: Ang pagsabat sa mga miting makalilipay gid. (Hulu. 15:23) Ang abanse nga pagbaton sang mga pamangkot sa oral nga repaso nagpaposible sa aton nga makahanda kag makapakigbahin sa tion sang repaso. Dugang pa, sang Enero 1, 2004, nga gua sang Ang Lalantawan, masapwan ang talalupangdon nga mga punto sa mga tulun-an sang Biblia nga nagasigo man sa naasayn nga pagabasahon sa Teokratikong Eskwelahan Para sa Ministeryo. Ini nga mga artikulo nakabulig sa madamo sa pagkomento sing makapalig-on sa tion sang talalupangdon nga mga punto sa Biblia. Ang palaabuton nga mga artikulo sa Ang Aton Ministeryo sa Ginharian magaunod sing mga pamangkot sa oral nga repaso pasad sa sining mga artikulo sang Ang Lalantawan.

⁴ Ang mga nakapalista sa sini nga eskwelahan may pinasahi nga pribilehiyo sa paghanda kag paghatag sing mga asaynment. Tanan kita makabenepisyo sa positibo nga mga komento sang manugtatap sang eskwelahan gikan sa plataporma. Ang mga estudyante makapanginpulos pa gid sa iya pribado nga laygay pagkatapos sang miting. Ang mga pag-ensayo sa katapusan sang kada kapitulo sang Magbenepisyo sa Pagpanudlo Sang Teokratikong Eskwelahan Para sa Ministeryo nga nagabinagbinag sang kalidad sa paghambal isa pa ka bulig.

⁵ Kon may matalupangdan ka nga praktikal kag Makasulatanhon nga mga punto sa tion sang miting, isulat ini sa sululatan sang nota sa imo libro nga Eskwelahan Para sa Ministeryo. Pamalandungi ang imo natun-an, kag binagbinaga kon paano ginapauswag sining diosnon nga edukasyon ang imo espirituwalidad.