Mga Manugtatap nga Nagapanguna—Ang Manugtatap Sang Teokratikong Eskwelahan sa Pagministro
1 Ang manugtatap sang Teokratikong Eskwelahan sa Pagministro isa ka gulang sa espirituwal nga nagapangabudlay sing lakas sa paghambal kag sa pagtudlo kag takus sang aton pagpadungog kag kooperasyon. (1 Tim. 5:17) Ano ang iya mga salabton?
2 Ginatatap niya ang librarya sang Teokratikong Eskwelahan sa Pagministro sa Kingdom Hall. Interesado gid sia nga palig-unon ang tanan nga kalipikado nga magpalista sa eskwelahan. Ginapat-od niya nga may yara husto nga rekord agod ang mga asaynment ginatangdo sing mahim-ong sa dimagkubos sing abanse sing tatlo ka semana sa tagsa ka sesyon sang eskwelahan. Dapat nga kilala niya sing maayo ang kongregasyon, ginadumdom ang tagsa ka estudyante kag ang iya mga ikasarang. Bisan may isa ka utod nga lalaki nga nagabulig sa iya sa paghanda sing iskedyul sang eskwelahan, ang nagakaigo nga pagtangdo sing mga bahin ginadumalahan sing personal sang manugtatap.
3 Agod makatudlo sing epektibo sa eskwelahan, ang manugtatap dapat maghanda sing maukod kada semana, nagatuon sing maid-id sang gintangdo nga materyal. Nagabulig ini sa iya nga mapapagsik ang kongregasyon tuhoy sa ginatun-an, mahibaluan kon bala natuptupan sing husto ang gintangdo nga materyal, kag mapadaku ang importante nga mga punto nga nalakip sa nasulat nga mga repaso.
4 Pagkatapos sang tagsa ka pamulongpulong sang estudyante, ang manugtatap magahatag sing komendasyon sa estudyante kag magapaathag kon ngaa ang isa ka kinaiya sa paghambal maayo ukon kon ngaa kinahanglan ini pauswagon. Kon may isa nga nagakinahanglan sing dugang pa nga bulig sa paghanda sang iya asaynment sa eskwelahan, ang manugtatap ukon ang isa nga gintangdo niya sarang makabulig sing personal.
5 Agod makabenepisyo sing bug-os gikan sa lakas nga pagpangabudlay sang manugtatap sang Teokratikong Eskwelahan sa Pagministro kag sang iban pa nga mga manuglaygay nga nagaalagad sa idalom sang iya pagdumala, dapat naton tambungan sing tayuyon ang eskwelahan. Dapat man naton ihatag ang aton mga asaynment kag sundon ang laygay nga ginahatag sa aton kag sa iban man nga mga estudyante. Sa sining paagi, progresibo naton nga mapauswag ang aton ikasarang sa pagtanyag sing mensahe sang Ginharian sa publiko kag sa pamalaybalay.—Binu. 20:20; 1 Tim. 4:13, 15.