Pagpanginpulos sing Bug-os Gikan sa Teokratikong Eskwelahan sa Pagministro
1 Ang Teokratikong Eskwelahan sa Pagministro nagahanas sa aton sa “arte sang pagpanudlo” agod matudlo naton ang mga kamatuoran sang Biblia sa epektibo nga paagi. (2 Tim. 4:2) Nagabaton kita sing mga paghangop sa lainlain nga mga topiko sa Biblia kada semana. Paano kita makapanginpulos sing bug-os gikan sa panudlo nga ginaaman sini nga eskwelahan?
2 Pamatii sing maayo ang nagabukas nga mga komento sang manugtatap sang eskwelahan samtang ginapatalupangod niya ang mga punto nga sarang ninyo matun-an sa miting. Hunahunaa ang mga pamangkot nga mahimo niya ipautwas kag kon paano ninyo ini masabat sa inyo ministeryo.
3 Ang pamulongpulong sa pagpanudlo indi lamang isa ka repaso sang materyal. Personal nga ginapatalupangod sini ang praktikal nga balor sang impormasyon sa imo. Ang abanse nga paghanda magabulig sa imo sa pagkonsentrar sing mas maayo sa pangunang mga punto kag sa pagpakigbahin sa oral nga repaso nga nagasunod.
4 Ang pagdungan sa semanal nga pagbasa sa Biblia magapadalom sang imo apresasyon sa Pulong sang Dios. Ang dugang nga pagpanalawsaw magasugid sang madamong makawiwili nga mga detalye nga magapasangkad sang inyo paghangop sa kamatuoran. Ang mga Bible highlight indi lamang isa ka pagsulit sang kasaysayan sa Biblia. Pagkatapos sang malip-ot nga pagrepaso, ginapatalupangod sang humalambal ang talalupangdon nga mga punto kag ginapakita kon paano ini nagahilabot sa aton kabuhi kag pagsimba. Mamati sing maayo agod makatuon kon paano iaplikar ang mga panudlo sang Biblia.—Sal. 119:105.
5 Kon gintangdo ikaw sa isa ka pamulongpulong sang estudyante, talupangda ang punto nga imo pangabudlayan. Basaha ang mga panugda sa School Guidebook tuhoy sa sinang kinaiya sa paghambal, kag tinguhai nga iaplikar ini. Kon nagapili sing materyal, ipadaku ang mga punto nga sarang magamit sa latagon.—sg-E p. 96-9.
6 Kon ikaw isa ka utod nga babayi nga gintangdo sa paghatag sing Talk No. 3 ukon Talk No. 4, ipresentar ang materyal sa isa ka matuodtuod nga danyag. Ang tagbalay mahimo ukon indi mahimo nga mag-ugyon sa tanan nga ginasiling mo; ipakita kon paano nimo buligan ang indibiduwal sa pagpangatarungan sa mga prinsipio sa Biblia. (sg-E p. 153-8) Nagabulig ini sa tumalambong sa pag-atubang sa kaanggid nga mga pamatok nga masumalang sa pag-alagad sa latagon. Ihanda kag ensayuha ang pamulongpulong sing abanse. Indi kinahanglan nga mag-ensayo kon nag-umpisa na ang miting.
7 Ang mga estudyante nga nagahatag sing mga bahin ginapalig-on nga maglingkod malapit sa atubangan sang tilipunan. Nagakinot ini sang tion kag nagapaposible nga mahatag sang manugtatap sang eskwelahan ang iya mga komento sa mas personal nga paagi. Ang tanan sarang makabenepisyo gikan sa malulo, espesipiko nga mga panugda nga ginahatag niya pasad sa School Guidebook. Indi niya mahimo pagasundon ang pagpasunod sa Speech Counsel slip; magapili sia sang isa ka punto nga pagatan-awon sa imo pasad sa kon ano karon ang ginakinahanglan mo agod labing maayo nga mag-uswag.
8 Ini tanan maayong mga rason agod handaan naton kag tambungan ang Teokratikong Eskwelahan sa Pagministro kada semana. Ang panudlo nga mabaton naton magabulig sa aton nga magmaalam kag magmalantipon sa aton ministeryo.—Hulu. 1:5.