Hibalua Kon Paano Ka Dapat Magsabat

ANG pila ka pamangkot kaangay sang nagalutaw nga binukid sang yelo. Ang daku nga bahin sini natago sa idalom sang tubig. Masami nga mas importante pa sangsa pamangkot ang hulusayon sa likod sini.

Bisan pa luyag gid sang nagapamangkot nga sabton sia, ang pagkahibalo mo kon paano ka dapat magsabat mahimo maglakip sing paghantop kon daw ano kadamo ang ihambal kag kon sa ano nga paagi dapat mo sabton ang iya pamangkot. (Juan 16:12) Sa pila ka kahimtangan, subong sang ginpakita ni Jesus sa iya mga apostoles, ang isa ka tawo mahimo mamangkot sing impormasyon nga wala sia sing kinamatarong ukon indi gid sia makabenepisyo sa sini.​—Binu. 1:​6, 7.

Ang Kasulatan nagalaygay sa aton: “Magpamulong kamo pirme nga may kaayo, nga natimplahan sing asin, agod mahibaluan ninyo kon paano kamo dapat maghatag sing sabat sa tagsatagsa.” (Col. 4:6) Busa, antes kita magsabat, dapat naton binagbinagon indi lamang kon ano ang aton ihambal kundi kon paano naton ini ihambal.

Hantupa ang Pagtamod Sang Nagapamangkot

Gintinguhaan sang mga Saduceo nga siuron si Jesus paagi sa isa ka pamangkot tuhoy sa pagkabanhaw sang isa ka babayi nga nagpamana sing pila ka beses. Apang, nahibaluan ni Jesus nga wala gid sila nagapati sa pagkabanhaw. Busa sa iya sabat, ginsabat niya ang ila pamangkot sa paagi nga nagabinagbinag sang sayop nga pagtamod nga amo gid ang rason sa sina nga pamangkot. Nagagamit sing sampaton nga pagpangatarungan kag sing pamilyar nga kasaysayan sa Kasulatan, ginpatalupangod ni Jesus ang isa ka butang nga wala gid nila anay mahunahuna​—ang maathag nga pamatuod nga banhawon gid sang Dios ang mga patay. Natingala gid sa iya sabat ang mga nagapamatok sa iya amo nga nahadlok na sila sa pagpamangkot liwat sa iya.​—Luc. 20:27-40.

Agod mahibaluan kon paano ka dapat magsabat, dapat mahantop mo man ang mga pagtamod kag mga kabalaka sang mga nagapamangkot sa imo. Halimbawa, ang isa ka kabutho ukon ang isa ka kaupod sa trabaho mahimo mamangkot sa imo kon ngaa wala ka nagasaulog sang Krismas. Ngaa namangkot sia? Luyag gid bala niya mahibaluan ang rason, ukon nagapalibog lamang sia kon bala ginatugutan ikaw nga maglingawlingaw? Agod mahibaluan ini, mahimo mo ipamangkot kon ngaa namangkot sia. Nian magsabat sing nagakahisuno. Mahimo mo man gamiton ang kahigayunan sa pagpakita kon paano nga ang pagsunod sa mga panuytoy sang Biblia nagaamlig sa aton gikan sa mga bahin sang piesta opisyal nga nangin kalugaw-an kag pabug-at sa mga tawo.

Halimbawa gin-agda ikaw sa pagpamulongpulong tuhoy sa mga Saksi ni Jehova sa isa ka grupo sang mga estudyante. Pagkatapos sang imo presentasyon, mahimo nga may mga pamangkot sila. Kon ang mga pamangkot daw sinsero kag maathag, ang mga sabat nga simple kag direkta mahimo nga amo ang pinakamaayo. Kon ang mga pamangkot nagapabanaag sang pagkamaynadampigan sa komunidad, ayhan mas maayo kon antes mo ini sabton magkomento ka anay sing malip-ot tuhoy sa mga butang nga makaimpluwensia sa kinaandan nga mga pagtamod sa sining mga hulusayon kag kon ngaa ang mga Saksi ni Jehova namat-od nga magpatuytoy sa talaksan sang Biblia. Sing masunson, maayo nga tamdon ina nga mga pamangkot subong mga butang nga ginakabalak-an, indi subong isa ka hangkat​—bisan pa nga ini mahimo nga ginpresentar sa sina nga paagi. Nian, ang imo sabat nagahatag sa imo sing kahigayunan nga mapasangkad ang pagtamod sang imo mga tagpalamati, nagahatag sa ila sing sibu nga impormasyon, kag nagapaathag sang Makasulatanhon nga sadsaran para sa aton mga pagpati.

Paano mo sabton ang isa ka amo nga indi magtugot sa imo nga magbakasyon sa trabaho agod magtambong sa isa ka kombension? Una, binagbinaga ang mga butang gikan sa iya pagtamod. Makabulig bala kon magtanyag ka nga mag-overtime sa iban nga tion? Makabulig bala kon ipaathag mo sa iya nga ang instruksion nga ginahatag sa aton mga kombension nagabulig sa aton nga mangin bunayag kag masaligan nga mga trabahador? Kon ginapakita mo nga ginahunahuna mo ang iya mga kaayuhan, ayhan hatagan man niya sing maayo nga konsiderasyon ang mga butang nga nahibaluan niya nga importante sa imo kabuhi. Apang ano abi kon luyag niya nga maghimo ikaw sing di-bunayag nga buhat? Ang maathag nga pagpangindi upod ang pagpangatarungan gikan sa Kasulatan makapahayag sang imo panindugan. Apang mas maayo bala kon mangatarungan ka anay sa iya nga ang isa ka tawo nga handa magbutig ukon magpangawat para sa iya mahimo man magbutig sa iya ukon magpangawat gikan sa iya?

Sa pihak nga bahin, ayhan isa ikaw ka estudyante nga indi luyag makigbahin sa pila ka di-makasulatanhon nga mga aktibidades sa eskwelahan. Dumduma, ang manunudlo mahimo nga wala nagaugyon sa imo mga pagtamod, kag responsabilidad niya nga dumalahan ang klase. Ang mga hangkat nga imo atubangon amo (1) ang pagpasunaid sa iya ginakabalak-an, (2) ang matinahuron nga pagpaathag sang imo panindugan, kag (3) ang mangin malig-on sa imo nahibaluan nga magapahamuot kay Jehova. Para sa labing maayo nga mga resulta, mahimo nga indi lamang isa ka simple, direkta nga paghambal tuhoy sa imo ginapatihan ang kinahanglan. (Hulu. 15:28) Kon bata pa ikaw, wala sing duhaduha nga buligan ka sang imo amay ukon iloy sa paghanda sang imo ihambal.

Kon kaisa, mahimo nga kinahanglan mo pamatud-an nga sayop ang mga panumbungon batok sa imo sang isa nga may awtoridad. Mahimo nga pangabayon ikaw sang isa ka pulis, isa ka opisyal sang gobierno, ukon isa ka huwes nga sabton mo ang mga pamangkot tuhoy sa pagtuman sa isa ka kasuguan, sa imo panindugan sa Cristianong neutralidad, ukon sa imo panimuot tuhoy sa pagpakigbahin sa patriotiko nga mga seremonya. Paano mo ini sabton? Upod ang “kalmado nga buot kag daku nga pagtahod,” laygay sang Biblia. (1 Ped. 3:15) Subong man, pamangkuta ang imo kaugalingon kon ngaa ginakabalak-an ini nga mga hulusayon, kag matinahuron nga kilalaha ini nga pagkabalaka. Nian ano ang masunod? Ginpatuhuyan ni apostol Pablo ang proteksion sang Romano nga kasuguan, busa mahimo mo man patuhuyan ang legal nga mga kinamatarong nga naaplikar sa imo kahimtangan. (Binu. 22:25-29) Ayhan ang matuod nga mga hitabo tuhoy sa panindugan nga ginhimo sang una nga mga Cristiano kag sang mga Saksi ni Jehova sa bug-os nga kalibutan magapasangkad sa pagtamod sang opisyal. Ukon mahimo mo ipatalupangod kon paano ang pagkilala sa awtoridad sang Dios nagapahulag gid sa mga tawo nga magmatinumanon sa nagakaigo nga kasuguan sang mga tawo. (Roma 13:1-14) Paagi sa sina nga impormasyon, ang pagpangatarungan sa Makasulatanhon nga mga rason para sa imo panindugan mahimo batunon sing paborable.

Ang Pagtamod Sang Nagapamangkot sa Kasulatan

Kon nagapamat-od kon paano magsabat, dapat mo man binagbinagon ang pagtamod sang nagapamangkot sa Balaan nga Kasulatan. Ginhimo ini ni Jesus sang ginsabat niya ang pamangkot sang mga Saduceo tuhoy sa pagkabanhaw. Nakahibalo nga ginabaton lamang nila ang mga sinulatan ni Moises, nangatarungan si Jesus tuhoy sa hitabo nga ginsambit sa Pentateuko, nagasugod sang iya komento paagi sa pagsiling: “Apang nga ang mga patay ginabanhaw bisan gani si Moises nagpahayag.” (Luc. 20:37) Mahimo masapwan mo man nga mapuslanon ang pagkutlo gikan sa mga bahin sang Biblia nga ginabaton sang imo tagpalamati kag pamilyar sia.

Apang ano abi kon ang imo tagpalamati wala nagatamod sang Biblia subong may awtoridad? Talupangda kon ano ang ginhimo ni apostol Pablo sa iya pamulongpulong sa Areopago, subong narekord sa Binuhatan 17:22-31. Ginpaambit niya ang Makasulatanhon nga mga kamatuoran nga wala nagakutlo sing direkta gikan sa Biblia. Kon kinahanglanon, mahimo mo man ini. Sa iban nga duog mahimo nga kinahanglan mo anay maghinun-anon sing pila ka butang sa isa ka tawo antes mo himuon ang direkta nga pagpatuhoy sa Biblia. Kon gamiton mo na ang Biblia, ayhan mangin maalamon kon ihatag mo anay ang pila ka rason kon ngaa takus ini binagbinagon sa baylo nga ihambal sing malig-on nga ini Pulong sang Dios. Apang, ang imo tulumuron amo ang pagpanaksi sing maathag tuhoy sa katuyuan sang Dios kag, sa ulihi, ang makita mismo sang imo tagpalamati kon ano ang ginasiling sang Biblia. Ang Biblia labi pa nga makabuluyok sangsa bisan ano nga butang nga mahimo naton ihambal.​—Heb. 4:12.

‘Pirme May Kaayo’

Daw ano ka nagakaigo nga ang mga alagad ni Jehova, subong nga sia mismo mainayuhon, ginsilingan nga ang ila pagpamulong dapat “pirme nga may kaayo, nga natimplahan sing asin”! (Col. 4:6; Ex. 34:6) Nagakahulugan ini nga dapat kita maghambal sing malulo, bisan pa daw indi ini nagakadapat. Ang aton pinamulong dapat sa maayo nga paagi, indi maparas ukon masakit.

Madamo nga tawo ang yara sa daku nga pag-ipit, kag adlaw-adlaw napaidalom sila sa berbal nga pag-abuso. Kon makigsugilanon kita sa sini nga mga tawo, mahimo nga maparas sila maghambal. Paano naton sila sabton? Ang Biblia nagasiling: “Ang sabat, kon kalmado, nagapatahaw sang kasingkal.” Ina nga sabat makapahumok man sa balatyagon sang isa nga may tuhay nga pagtamod. (Hulu. 15:1; 25:15) Sa mga tawo nga nagaeksperiensia sing kasingki kada adlaw, ang maayo nga batasan kag malulo nga tingog mangin makagalanyat gid amo nga mahimo mamati sila sa maayong balita nga aton ginadala.

Indi kita interesado nga makigbais sa mga wala nagatahod sa kamatuoran. Sa baylo, handum naton nga mangatarungan gikan sa Kasulatan sa mga tawo nga magatugot sa aton sa paghimo sini. Walay sapayan sang kahimtangan nga aton maatubang, dumdumon naton nga dapat kita magsabat sing mainayuhon kag upod ang kombiksion nga ang hamili nga mga saad sang Dios masaligan.​—1 Tes. 1:5.

Personal nga mga Desisyon kag Konsiensia

Kon ang isa ka estudyante sa Biblia ukon isa ka masigkatumuluo mamangkot kon ano ang iya himuon sa isa ka kahimtangan, paano mo ini sabton? Ayhan nahibaluan mo kon ano ang imo himuon. Apang ang tagsa ka tawo dapat manabat sa iya mga desisyon sa kabuhi. (Gal. 6:5) Ginpaathag ni apostol Pablo nga ginpalig-on niya ang “pagkamatinumanon paagi sa pagtuo” sa tunga sang katawhan nga iya ginpanaksihan. (Roma 16:26) Isa ini ka maayo nga halimbawa para sundon naton. Ang isa ka tawo nga nagahimo sing mga desisyon agod lamang pahamut-an ang nagatudlo sa iya sing Biblia ukon ang iban nga tawo nagaalagad sa mga tawo, kag wala nagakabuhi sa pagtuo. (Gal. 1:10) Busa ang isa ka simple kag direkta nga sabat mahimo nga indi maayo para sa isa nga nagapamangkot.

Kon amo, paano ka makasabat sa paagi nga nahisanto sa mga panuytoy sang Biblia? Mahimo mo mapatalupangod ang nagakaigo nga mga prinsipio sang Biblia kag ang mga halimbawa nga nalakip sa rekord sang Biblia. Sa pila ka kaso, mahimo mo ipakita sa iya kon paano magpanalawsaw agod makita niya mismo ini nga mga prinsipio kag mga halimbawa. Mahimo mo pa gani mahinun-anunan ang mga prinsipio kag mga kabilihanan sang mga halimbawa apang wala ini ginaaplikar sa amo nga mga kahimtangan. Pamangkuta sia kon nakita niya sa sini ang pila ka butang nga makabulig sa iya sa paghimo sing maalamon nga desisyon. Palig-una sia nga binagbinagon pasad sa sini nga mga prinsipio kag mga halimbawa kon ano nga dalanon ang makapahamuot kay Jehova. Sa amo, ginabuligan mo sia nga ‘hanason ang iya mga ikasarang sa paghantop nga makilala ang husto kag sayop.’​—Heb. 5:14.

Pagkomento sa mga Miting sa Kongregasyon

Ang mga miting sa Cristianong kongregasyon masunson nga nagahatag sa aton sing mga kahigayunan nga mapahayag sing dayag ang aton pagtuo. Ang isa ka paagi nga ginahimo naton ini amo ang pagkomento bilang sabat sa mga pamangkot. Paano kita magkomento? Upod ang handum nga pakamaayuhon si Jehova, ukon maghambal sing maayo tuhoy sa iya. Amo sina ang ginhimo sang salmista nga si David sang yara sia “sa tunga sang nagtipon nga katilingban.” (Sal. 26:12) Dapat man kita magkomento sa paagi nga nagapalig-on sa mga masigkatumuluo, nagapukaw sa ila “sa gugma kag sa maayong mga buhat,” subong sang ginpalig-on ni apostol Pablo. (Heb. 10:23-25) Ang abanse nga pagtuon sa mga tulun-an makabulig sa aton nga himuon ini.

Kon ginatukso sa pagkomento, himua ang imo mga sabat nga simple, maathag, kag malip-ot. Indi pagtuptupi ang bug-os nga parapo; patuhuyi lamang ang isa ka punto. Kon isa lang ka bahin sang sabat ang imo ihatag, makahatag ini sing kahigayunan sa iban nga magkomento sing dugang. Ilabi na nga mapuslanon kon ipadaku ang ginkutlo nga mga kasulatan sa materyal. Sa paghimo sini, tinguhai nga ipatalupangod ang bahin sang teksto nga naaplikar sa punto nga ginabinagbinag. Tun-i nga magkomento sa imo kaugalingon nga mga tinaga sa baylo nga magbasa sing direkta sa parapo. Indi matublag kon ang imo komento wala mapabutyag sing sibu gid. Nagakatabo ina kon kaisa kay bisan sin-o nga nagakomento.

Maathag gid nga ang pagkahibalo kon paano kita dapat magsabat wala lamang nagalakip sing paghibalo sa sabat. Nagakinahanglan ini sing paghantop. Apang daw ano ka makaalayaw kon maghatag ka sing sabat nga gikan sa imo tagipusuon kag nagatandog sa tagipusuon sang iban!​—Hulu. 15:23.