Paano Mo Sabton?
1. Ngaa dapat naton usisaon ang pamaagi ni Jesus sa pagsabat sa mga pamangkot?
1 Tubtob karon, ginadayaw gihapon sang mga tawo ang epektibo nga pamaagi ni Jesus sa pagsabat sang mga pamangkot kag mga pangabay sa iya. Kon makasumalang kita sing lainlain nga pamangkot sa aton pagministeryo, ginatinguhaan gid naton nga ilugon ang pamaagi ni Jesus sa pagsabat sa mga tawo.—1 Ped. 2:21.
2. Ano ang makabulig sa aton agod makahatag sing mas epektibo nga sabat?
2 Mamati Anay: Ginabinagbinag ni Jesus kon ngaa nagapamangkot ang tawo. Kon kaisa nagapahangop ini nga dapat mo pamangkuton ang nagapamangkot agod mahibaluan kon ano ang iya ginahunahuna. Ang isa nga nagapamangkot sing, “Nagapati ka bala kay Jesus?” mahimo natingala kon ngaa wala kita nagaselebrar sang Krismas. Kon mahibaluan mo ang ginapaligban sang nagapamangkot, mahimo ka makapangatarungan sa iya sing mas epektibo.—Luc. 10:25-37.
3. Ano ang makabulig sa aton nga makasapo sing epektibo nga mga sabat gikan sa Kasulatan?
3 Gamita ang Pulong sang Dios sa Pagsabat: Labing maayo gid kon gamiton mo ang Biblia sa pagsabat sa isa ka pamangkot. (2 Tim. 3:16, 17; Heb. 4:12) Ang Reasoning nga libro kag ang “Mga Topiko sa Biblia nga Mahambalan” sa Bag-ong Kalibutan nga Badbad sang Cristianong Griegong Kasulatan makabulig gid sa paghatag sing husto nga sabat. Bisan pa ang nagapamangkot wala nagapati sa Biblia, mahimo mo gihapon mapaambit sing mataktikanhon ang ginatudlo sang Kasulatan. Palig-una sia nga binagbinagon sing maayo ang masaligan nga kaalam nga masapwan sa Biblia. Paagi sa imo pag-ilog kay Jesus, ang imo mga sabat mangin dungganon, matahom, kag mapuslanon “kaangay sang mga mansanas nga bulawan sa pinuna nga pilak.”—Hulu. 25:11.
4. Sa ano nga mga kahigayunan nga mas maayo nga indi naton tinguhaan nga sabton ang mga pamangkot?
4 Dapat Bala Naton Sabton ang Tanan nga Pamangkot? Kon indi mo mahibaluan ang sabat, indi magkahuya sa pagsiling: “Wala ko kabalo, pero manalawsaw ako bahin sini kag balikan ta ka agod sabton ko ang imo pamangkot.” Ining mapainubuson kag personal nga interes mahimo magpahulag sa tagbalay nga pabalikon ka. Kon mahantop mo nga luyag lang niya makigbais sa imo, iluga ang pamaagi ni Jesus sa pagsabat. (Luc. 20:1-8) Sing kaanggid, kon luyag lamang makigdebate sang isa nga wala sing interes sa kamatuoran, matinahuron nga untata ang pag-istoryahanay kag gamita ang imo tion sa pagpangita sang mga interesado.—Mat. 7:6.
5. Anong halimbawa ang ginpahamtang ni Jesus sa pagsabat sa mga pamangkot?
5 Nahibaluan ni Jesus nga ang pagsalig kay Jehova importante sa pagtuman sang iya asaynment nga ‘pagpanaksi sa kamatuoran,’ nga nagalakip sa pagsabat sa sinsero nga mga pamangkot. (Juan 18:37) Isa gid ka pribilehiyo nga ilugon naton si Jesus sa pagsabat sa mga tawo nga “husto nga nahuyog para sa kabuhi nga walay katapusan.”—Binu. 13:48.