Epektibo nga Laygay

ANG Cristianong mga gulang dapat ‘makasarang sa paglaygay paagi sa panudlo nga makapapagros.’ (Tito 1:9) Kon kaisa dapat ini himuon samtang nagaatubang sang tuman kabudlay nga mga kahimtangan. Importante ang paghatag sing laygay nga nahisanto sa mga panuytoy sang Kasulatan. Busa, dapat sundon sang mga gulang ang laygay: “Mag-ukod ka . . . sa paglaygay.” (1 Tim. 4:13) Bisan pa ang aton ginahambalan diri panguna nga nagapatuhoy sa mga gulang ukon sa mga nagapanikasog nga malab-ot ini nga pribilehiyo, may mga tion nga dapat laygayan sang mga ginikanan ang ila kabataan ukon kinahanglan laygayan sang mga nagadumala sing mga pagtuon sa Biblia ang ila mga estudyante sa Biblia. Sa sini nga mga kahimtangan, maaplikar ang amo man nga mga panuytoy.

Mga Kahimtangan nga Nagakinahanglan Sini. Agod mahibaluan kon san-o kinahanglan ang laygay, makabulig kon binagbinagon ang mga kahimtangan nga ginsulat sa Biblia diin ginhatag ang laygay. Ginpalig-on ni apostol Pedro ang mga gulang nga talupangdon ang ila responsabilidad subong mga manugbantay sang panong sang Dios. (1 Ped. 5:​1, 2) Ginlaygayan ni Pablo si Tito nga palig-unon ang lamharon nga mga lalaki nga “mangin maligdong sa hunahuna.” (Tito 2:6) Ginpalig-on ni Pablo ang mga masigka-Cristiano nga “maghambal nga may paghilisugot” kag likawan ang mga nagtinguha sa pagtuga sing pagbinahinbahin sa tunga sang mga kauturan. (1 Cor. 1:​10; Roma 16:17; Fil. 4:2) Bisan pa gindayaw ni Pablo ang mga katapo sang kongregasyon sa Tesalonica tungod sa ginahimo nila nga maayong mga butang, ginlaygayan niya sila nga iaplikar sing labi pa ang instruksion nga ila nabaton. (1 Tes. 4:​1, 10) Ginpangabay ni Pedro ang mga masigka-Cristiano nga “maglikaw sa mga kailigbon nga unudnon.” (1 Ped. 2:11) Ginlaygayan ni Judas ang iya mga kauturan nga “makig-away sing lakas para sa pagtuo” bangod sang impluwensia sang mga di-diosnon nga nagapatuyang sa lugak nga paggawi. (Jud. 3, 4) Ang mga Cristiano sa kabilugan ginapalig-on nga maglinaygayay sa isa kag isa agod nga wala sing magtig-a bangod sa madaya nga gahom sang sala. (Heb. 3:13) Ginlaygayan ni Pedro ang mga Judiyo nga wala pa magtuo kay Cristo: “Panginluwas kamo sa sining tiko nga kaliwatan.”​—Binu. 2:40.

Ano nga mga kinaiya ang kinahanglan agod mangin epektibo ang laygay sa sini nga mga kahimtangan? Paano ang isa nga nagalaygay makahimo sang iya laygay nga hilingagawon apang wala sia nagapamilit ukon maparas?

“Pasad sa Gugma.” Kon ang aton laygay wala ginahatag “pasad sa gugma,” mahimo nga matigdas ini pamatian. (Filem. 9) Matuod, kon kinahanglan ang madagmit nga paghulag, ang pamulongpulong sang manughambal dapat magpaalinton sang pagkahilingagawon sang kahimtangan. Ang malulo nga paghambal mahimo nga daw nagapang-uloulo pamatian. Sa amo man nga tion, ang laygay dapat himuon sing hanuot kag may tudok nga balatyagon. Ang mahigugmaon nga laygay mahimo gid nga makapahulag sa mga tagpalamati. Sang nagahambal para sa iya kaugalingon kag sa iya mga kaupod, ginsilingan ni Pablo ang mga taga-Tesalonica: “Nahibaluan ninyo sing maayo kon paano, subong sang ginahimo sang isa ka amay sa iya mga anak, padayon kami nga nagalaygay sa kada isa sa inyo.” (1 Tes. 2:11) Yadtong Cristianong mga manugtatap mahigugmaon nga nag-alungay sa mga kauturan. Tuguti nga ang imo mga ekspresyon resulta sang matuod nga kabalaka sa imo mga tagpalamati.

Mangin mataktikanhon. Indi pagpaakiga ang mga ginapanikasugan mo nga mapahulag sa pagpanghikot. Sa amo man nga tion, indi pagpunggi ang paghambal sa imo mga tagpalamati sing “tanan nga laygay sang Dios.” (Binu. 20:27) Ang mga mainapresyahon sa laygay indi masaklaw ukon maghigugma na sa imo sing kubos bangod mainayuhon nga ginlaygayan mo sila nga himuon ang husto.​—Sal. 141:5.

Sa masami, maayo nga sugdan ang laygay paagi sa espesipiko kag sinsero nga komendasyon. Hunahunaa ang maayong mga butang nga ginahimo sang imo mga kauturan​—mga butang nga nahamuot gid si Jehova: ang pagtuo nga makita sa ila hilikuton, ang gugma nga nagapahulag sa ila nga manikasog, kag ang ila pagbatas sa atubangan sang mabudlay nga mga kahimtangan. (1 Tes. 1:​2-8; 2 Tes. 1:​3-5) Magabulig ini sa imo mga kauturan nga magbatyag nga ginapabaloran kag nahangpan sila, kag magabulig ini sa ila nga mangin mabinatunon sa laygay nga magasunod.

“Nga May Bug-os nga Pagkamainantuson.” Ang laygay dapat ihatag “nga may bug-os nga pagkamainantuson.” (2 Tim. 4:2) Ano ang nadalahig sa sini? Ang pagkamainantuson nagalakip sang mapailubon nga pagbatas sa sayop ukon pagpaakig. Ang isa nga mainantuson nagahupot sang paglaum nga ang iya mga tagpalamati magaaplikar sang iya ginasiling. Ang paghatag sing laygay sa sini nga panimuot magapugong sa imo mga tagpalamati sa paghunahuna nga ginahaumhaum mo ang pinakamalain tuhoy sa ila. Ang imo pagsalig nga luyag sang imo mga kauturan nga alagdon si Jehova sa bug-os nila nga masarangan magapabaskog sang ila handum nga himuon kon ano ang husto.​—Heb. 6:9.

“Paagi sa Panudlo nga Makapapagros.” Paano ang isa ka gulang ‘makalaygay paagi sa panudlo nga makapapagros’? Paagi sa ‘pagpanguyapot sing malig-on sa matutom nga pulong may kaangtanan sa iya arte sa pagpanudlo.’ (Tito 1:9) Sa baylo nga ipabutyag ang imo personal nga opinyon, pabakura ang imo laygay paagi sa Pulong sang Dios. Tuguti nga buligan ka sang Biblia sa paghangop kon ano ang dapat isiling. Ilista ang mga benepisyo sang pag-aplikar sa ginasiling sang Biblia tuhoy sa butang nga imo ginakabalak-an. Hunahunaa sing maayo ang mga resulta​—karon kag sa palaabuton—​sang indi pagsunod sa Pulong sang Dios, kag gamita ini sa pagkumbinsi sa imo mga tagpalamati sa kinahanglanon nga maghulag sing nagakaigo.

Pat-ura nga napaathag mo sing maayo sa imo mga tagpalamati kon ano ang dapat nila himuon kag kon paano nila himuon ini. Ipakita sing maathag nga ang imo pangatarungan napasad sing malig-on sa Kasulatan. Kon ang Kasulatan nagatugot sing pila ka kahilwayan sa bisan ano nga desisyon nga pagahimuon, ipaathag ang kasangkaron sini nga kahilwayan. Nian, sa imo konklusion, himua ang katapusan nga laygay nga magapabakod sa determinasyon sang imo mga tagpalamati nga maghulag.

Upod ang “Kahilwayan sa Paghambal.” Agod makalaygay sing epektibo sa iban, ang isa dapat may “kahilwayan sa paghambal sa pagtuo.” (1 Tim. 3:13) Ano ang nagabulig sa isa ka tawo sa paghambal sing hilway? Ang katunayan nga ang iya “huwaran sa maayong mga buhat” nagahisanto sa kon ano ang iya ginalaygay nga himuon sang iya mga kauturan. (Tito 2:​6, 7; 1 Ped. 5:3) Kon amo sini, marealisar sang mga ginapalig-on sa pagpanghikot nga ang isa nga nagalaygay sa ila wala nagapaabot sa ila nga himuon ang wala niya mismo ginahimo. Makita nila nga mahimo nila mailog ang iya pagtuo subong nga ginapanikasugan niya nga ilugon si Cristo.​—1 Cor. 11:1; Fil. 3:17.

Ang laygay nga ginapasad sa Pulong sang Dios kag ginahatag sing mahigugmaon makahimo sing daku nga kaayuhan. Ang mga gintulinan sing responsabilidad sa paghatag sini nga laygay dapat mag-ukod sa paghimo sini sing maayo.​—Roma 12:8.