Wala sing ‘Makapugong sa Gugma sang Dios’

1. Ano ang negatibo nga ginabatyag sang madamo nga tawo, bisan sang pila ka matuod nga mga Cristiano?

GINAHIGUGMA ka bala ni Jehova nga Dios? Ang iban nagapati nga ginahigugma sang Dios ang mga tawo sa kabilugan, pareho sang ginasiling sang Juan 3:16. Pero, ang matuod, amo sini ang ila ginabatyag: ‘Indi gid ako mahigugma sang Dios bilang indibiduwal.’ Bisan gani ang matuod nga mga Cristiano mahimo nga amo man sini ang ginabatyag kon kaisa. Ang isa ka lalaki nga ginluyahan sing buot nagsiling: “Indi gid ako makapati nga nagaulikid ang Dios.” Amo man bala sini kon kaisa ang imo ginabatyag?

2, 3. Sin-o ang gusto magpapati sa aton nga wala kita sing pulos ukon indi nagakabagay nga palanggaon ni Jehova, kag paano naton mabatuan ini nga pagpati?

² Gusto gid kita ni Satanas nga papatihon nga wala kita ginahigugma ukon ginapabaloran ni Jehova nga Dios. Matuod, masami nga ginahaylo ni Satanas ang mga tawo paagi sa pagpukaw sa ila bugal. (2 Corinto 11:3) Pero nalipay man sia nga madula ang kompiansa sa kaugalingon sang mga maluya. (Juan 7:47-49; 8:13, 44) Ginahimo gid niya ini sa sining makahalanguyos nga “katapusan nga mga adlaw.” Subong, madamo ang nagdaku sa pamilya nga “indi mapinalanggaon.” Mahimo upod nila sa ila balay ang mga tawo nga mapintas, sakon, kag matig-a sing ulo. (2 Timoteo 3:1-5) Bangod sining malawig nga pagpamintas, diskriminasyon sa rasa, ukon dumot mahimo nga nagapati sila nga wala sila sing pulos kag indi nagakabagay palanggaon.

³ Kon amo sini ang imo ginabatyag, indi madulaan sang paglaum. Madamo sa aton kon kaisa ang nagabatyag sing negatibo sa aton kaugalingon. Pero dumduma nga ang Pulong sang Dios gindesinyo “sa pagtadlong” kag “sa pagtumba sang bisan ano nga butang nga natukod sing malig-on.” (2 Timoteo 3:16; 2 Corinto 10:4) Ang Biblia nagasiling: “Mapasalig naton ang aton tagipusuon sang iya gugma tuhoy sa bisan ano nga ginapakamalaut kita sang aton tagipusuon, bangod ang Dios labaw pa sa aton tagipusuon kag nakahibalo sang tanan nga butang.” (1 Juan 3:19, 20) Binagbinagon naton ang apat ka paagi nga ginabuligan kita sang Kasulatan nga “mapasalig naton ang aton tagipusuon” sang gugma ni Jehova.

Ginapabaloran Ka ni Jehova

4, 5. Paano ang ilustrasyon ni Jesus parte sa mga maya nagapakita nga may balor kita para kay Jehova?

⁴ Una, ang Biblia direkta nga nagatudlo nga ang kada isa sa mga alagad sang Dios may balor sa iya. Halimbawa, si Jesus nagsiling: “Indi bala ang duha ka maya ginabaligya sa isa ka sensilyo nga diutay sing balor? Apang, wala sing isa sa ila nga mahulog sa duta nga indi mahibaluan sang inyo Amay. Bisan ang buhok sa inyo ulo naisip niya tanan. Gani, indi kamo magkahadlok, mas importante pa kamo sangsa madamo nga maya.” (Mateo 10:29-31) Ano ang epekto sang ginsiling ni Jesus sa mga tawo nga nagpamati sa iya sang unang siglo?

⁵ Mahimo matingala kita kon ngaa may mabakal sing isa ka maya. Sang panahon ni Jesus, ang maya amo ang pinakabarato nga pispis nga ginabaligya para kaunon. Ang isa ka manubo sing balor nga sensilyo makabakal sing duha ka maya. Pero nagsiling si Jesus sang ulihi nga kon ang tawo magbayad sing duha ka sensilyo, lima ka maya ang iya mabakal imbes nga apat lang. Kay ang ikalima nga maya paaman na lang. Mahimo wala sing balor sa mga tawo ini nga mga pispis, pero ano ang pagtan-aw sang Manunuga sa ila? Si Jesus nagsiling: “Wala sing isa sa ila [bisan ang paaman lang nga pispis] ang malipatan sang Dios.” (Lucas 12:6, 7) Naintiendihan na naton subong ang buot silingon ni Jesus. Kon ginapabaloran ni Jehova ang isa ka maya, mas may balor sa iya ang isa ka tawo! Pareho sang ginpaathag ni Jesus, kilala gid kita ni Jehova. Bisan gani ang mga buhok sa aton ulo naisip niya!

6. Ngaa sigurado kita nga indi imposible ang ginsiling ni Jesus nga naisip ang mga buhok sa aton ulo?

⁶ Naisip ang aton mga buhok? Mahimo para sa iban daw imposible ang ginsiling ni Jesus. Pero, pamensara ang ginahulat naton nga pagkabanhaw. Sigurado nga kilala gid kita ni Jehova para matuga niya kita liwat! Importante gid kita para sa iya amo nga madumduman niya ang tanan nga detalye parte sa aton, pati ang aton genetic code kag ang tanan naton nga memorya kag mga eksperiensia.a Kon ikumparar sa sini, mas simple lang ang pag-isip sa buhok sang aton ulo, nga sa average may kadamuon nga mga 100,000.

Ngaa Ginapabaloran Kita ni Jehova?

7, 8. (a) Samtang ginausisa ni Jehova ang tagipusuon sang mga tawo, ano nga mga kinaiya ang gusto niya makita? (b) Ano ang pila ka hilikuton nga ginahimo naton ang ginapabaloran ni Jehova?

⁷ Ikaduha, ginatudlo sa aton sang Biblia kon ano ang ginapabaloran ni Jehova sa iya mga alagad. Sa simple nga hambal, nalipay sia sa aton maayo nga mga kinaiya kag sa aton mga panikasog. Ginsilingan ni Hari David ang iya anak nga si Solomon: “Ginausisa ni Jehova ang tanan nga tagipusuon, kag nahantop niya ang tanan nga huyog sang panghunahuna.” (1 Cronica 28:9) Ginausisa sang Dios ang binilyon ka tagipusuon sang tawo sa sining mapintas kag puno sing dumot nga kalibutan. Sigurado nga nalipay gid sia kon makakita sia sang tawo nga nanamian sang paghidait kag kamatuoran kag gusto maghimo sang insakto. Ano ang ginahimo sang Dios kon makakita sia sang tawo nga nagapalangga sa iya, nagatinguha nga makilala sia, kag nagasugid sa iban parte sa iya? Ginasugiran kita ni Jehova nga ginatalupangod niya gid ini nga klase sang tawo. May ara pa gani sia “isa ka libro nga nagaunod sang mga ngalan nga ginadumdom sang Dios” para sa tanan nga “nagakahadlok kay Jehova kag tuhoy sa mga nagapamalandong sa iya ngalan.” (Malaquias 3:16) Importante gid sa iya ini nga mga kinaiya.

⁸ Ano ang maayo nga mga buhat nga ginapabaloran ni Jehova? Amo ini ang aton mga panikasog nga sundon ang iya Anak, si Jesucristo. (1 Pedro 2:21) Ang isa ka importante nga hilikuton nga ginapabaloran sang Dios amo ang pagbantala sang maayong balita sang iya Ginharian. Sa Roma 10:15, aton mabasa: “Matahom ang mga tiil sang nagabantala sing maayong balita tuhoy sa maayo nga mga butang!” Mahimo nga para sa aton indi matahom ang aton mga tiil. Pero, ginalaragway diri ang mga panikasog sang mga alagad ni Jehova para mabantala ang maayong balita. Matahom kag importante ini tanan para sa iya.—Mateo 24:14; 28:19, 20.

9, 10. (a) Ngaa makasalig kita nga ginapabaloran ni Jehova ang aton pagbatas sa sarisari nga mga kabudlayan? (b) Ano ang wala ginahimo ni Jehova kon ginausisa niya ang tagipusuon sang iya matutom nga mga alagad?

⁹ Ginapabaloran man ni Jehova ang aton pagbatas. (Mateo 24:13) Dumduma nga gusto ni Satanas nga talikdan mo si Jehova. Kon nagapabilin ka nga matutom kay Jehova, ginapamatud-an mo kada adlaw nga sala ang akusasyon ni Satanas. (Hulubaton 27:11) Kon kaisa, indi mahapos nga magbatas. Ang mga problema sa panglawas, kapigaduhon, stress, kag ang iban pa nga mga kabudlayan nagatilaw sa aton kada adlaw. Makapaluya man sang buot kon wala pa natabo ang aton mga ginapaabot. (Hulubaton 13:12) Pero nalipay gid si Jehova kon ginabatas naton ini nga mga kabudlayan. Gani, ginpangabay ni Hari David si Jehova nga isulod ang iya mga luha sa “panit nga suludlan,” kag nagsiling pa gid sia: “Indi bala nga nasulat ini sa imo libro?” (Salmo 56:8) Huo, ginapabaloran gid ni Jehova ang tanan nga luha kag kabudlayan nga ginabatas naton samtang nagapabilin kita nga matutom sa iya. Kag wala gid niya ini ginakalimtan.

¹⁰ Bisan pa nga madamo sang pamatuod nga importante kita kay Jehova, puede gihapon kita magbatyag nga wala kita sang pulos. Mahimo magpensar kita: ‘Mas madamo ang mas maayo sangsa akon. Sigurado nga wala nalipay si Jehova kon ikumparar niya ako sa ila!’ Pero, wala nagakumparar si Jehova, kag wala man sia nagapaabot nga himuon ta ang indi naton masarangan. (Galacia 6:4) Kon ginausisa ni Jehova ang aton tagipusuon, makita niya ang tanan bisan ang magagmay nga mga detalye, kag ginapabaloran gid niya ang makita niya nga maayo sa aton.

Ginapain ni Jehova ang Maayo sa Malain

11. Ano ang matun-an naton kay Jehova sa iya ginhimo para kay Abias?

¹¹ Ikatlo, kon ginausisa kita ni Jehova, ginapangita gid niya kon ano ang maayo kag ginapain ini. Halimbawa, sang ginmando ni Jehova nga pamatyon ang tanan nga lalaki sa apostata nga panimalay ni Hari Jeroboam, ginmando Niya nga hatagan sing disente nga lubong ang isa sa mga anak sang hari nga si Abias. Ngaa? “May maayo nga nakita si Jehova nga Dios sang Israel” sa iya. (1 Hari 14:1, 10-13) Daw pareho lang nga gin-usisa ni Jehova ang tagipusuon sining pamatan-on nga lalaki kag “may maayo” sia nga nakita sa sini. Bisan pa daw ano ini kagamay ukon daw indi ini salapakon, ginpasulat gid ini ni Jehova sa Biblia. Ginpadyaan pa gani niya si Abias kag nagpakita sia sing kaluoy sa sining miembro sang isa ka apostata nga panimalay.

12, 13. (a) Paano ginapakita sang natabo kay Hari Jehosapat nga ginapangita ni Jehova ang maayo sa aton bisan pa kon makasala kita? (b) Kon parte sa aton maayo nga mga binuhatan kag mga kinaiya, paano ginapakita ni Jehova nga isa sia ka mapinalanggaon nga Ginikanan?

¹² Ang isa pa ka mas maayo nga halimbawa amo ang natabo sa maayo nga hari nga si Jehosapat. Sang nakahimo ang hari sang serioso nga sala, ginsilingan sia sang manalagna ni Jehova: “Bangod sini, naakig si Jehova sa imo.” Mabug-at gid ini nga mensahe! Pero indi lang amo sina ang mensahe ni Jehova. Nagpadayon ini: “Apang, may maayo nga nakita ang Dios sa imo.” (2 Cronica 19:1-3) Gani bisan pa may rason si Jehova nga maakig, wala niya malipatan ang maayo kay Jehosapat. Lain gid sia sa indi perpekto nga mga tawo! Kon akig kita sa iban, mahimo nga ginakalipatan naton ang maayo sa ila. Kag kon makasala kita, nagabatyag kita sang kapaslawan, kahuya, kag ginakonsiensia, gani mahimo nga indi na naton madumduman ang maayo sa aton kaugalingon. Pero, dumduma nga kon maghinulsol kita sa aton mga sala kag magtinguha gid nga indi ini pagliwaton, patawaron kita ni Jehova.

¹³ Samtang ginausisa ka ni Jehova, ginakuha niya ini nga mga sala. Daw pareho sia sa nagapamulawan nga nagaayag sang balas para magpain ang bulawan dayon ginahaboy ang indi mapuslan nga balas. Amo man sina ang pagtan-aw ni Jehova sa imo maayo nga mga kinaiya kag binuhatan. Ginapain niya ini kag ginatago. Natalupangdan mo bala kon paano ginapabaloran sang mapinalanggaon nga mga ginikanan ang mga drowing ukon mga proyekto sa eskwelahan sang ila mga bata? Kon kaisa, ginatago nila ini sing madamo nga tinuig bisan nga nalipatan na ini sang ila mga bata. Si Jehova amo ang pinakamapinalanggaon nga Ginikanan. Basta padayon kita nga matutom sa iya, wala gid niya ginakalipatan ang aton maayo nga mga binuhatan kag mga kinaiya. Kay man, para sa iya, indi sia matarong kon kalimtan niya ini, kag indi gid ina matabo kay matarong sia nga Dios. (Hebreo 6:10) Ginausisa man niya kita sa isa pa ka paagi.

14, 15. (a) Ngaa wala gid ginakalipatan ni Jehova ang maayo sa aton bisan pa indi kita perpekto? Iilustrar. (b) Ano ang himuon ni Jehova sa maayo nga mga kinaiya nga makita niya sa aton, kag ano ang iya pagtan-aw sa iya matutom nga katawhan?

¹⁴ Kon ginatan-aw kita ni Jehova, wala sia nagapokus sa aton mga kakulangan kundi sa aton masarangan himuon. Sa pag-ilustrar: Ang mga tawo nga mahilig sa art magapangabudlay gid para makay-o ang naguba nga mga painting ukon iban pa nga klase sang art. Halimbawa, sang gintiro sang isa ka tawo ang drowing ni Leonardo da Vinci sa National Gallery sa London, England, nga nagabili sing mga $30 ka milyon, wala sing bisan sin-o nga nagsiling nga ihaboy na lang ini kay guba na. Kundi, ginkay-o dayon ining halos 500 ka tuig na nga masterpiece. Ngaa? Kay importante gid ini sa mga mahilig sa art. Indi bala nga mas mahal ka pa sangsa drowing nga chalk kag charcoal? Bisan pa kon kaisa nagabatyag ka nga wala ka sing pulos kay indi ka perpekto, importante ka gid para kay Jehova. (Salmo 72:12-14) Si Jehova nga Dios ang nagtuga sang pamilya sang mga tawo. Gani, himuon niya ang bisan ano nga kinahanglanon para mangin perpekto liwat ang tanan nga nagapalangga kag nagatuman sa iya.—Binuhatan 3:21; Roma 8:20-22.

¹⁵ Huo, makita ni Jehova ang maayo sa aton nga posible indi naton makita sa aton kaugalingon. Kag samtang nagaalagad kita sa iya, buligan niya kita nga mapakita ang maayo nga mga kinaiya asta nga mangin perpekto na kita sa ulihi. Bisan ano pa ang pagtratar sa aton sang kalibutan ni Satanas, malahalon para kay Jehova ang iya matutom nga mga alagad.—Hageo 2:7.

Aktibo nga Ginapakita ni Jehova ang Iya Gugma

16. Ano ang pinakadaku nga pamatuod sang gugma ni Jehova para sa aton, kag paano naton nahibaluan nga ini nga regalo para gid sa aton?

¹⁶ Ikap-at, madamo sang ginahimo si Jehova para pamatud-an ang iya gugma sa aton. Ang halad-gawad sang Cristo amo ang pinakamabakod nga sabat sa binutig ni Satanas nga wala kita sing pulos ukon indi kita nagakabagay palanggaon. Indi gid naton pagkalipatan ang masakit nga kamatayon nga gin-antos ni Jesus sa usok sang pag-antos kag ang grabe nga kasakit nga ginbatas ni Jehova samtang ginatan-aw niya ang kamatayon sang iya hinigugma nga Anak. Pamatuod gid ini sang ila gugma sa aton. Makapasubo nga madamo nga tawo ang indi makapati nga ini nga regalo para gid sa ila mismo. Nagabatyag sila nga indi sila bagay sa sini. Dumduma, nga ginahingabot sang una ni apostol Pablo ang mga sumulunod sang Cristo. Pero, nagsulat sia: ‘Ang Anak sang Dios naghigugma sa akon kag nagtugyan sang iya kaugalingon para sa akon.’—Galacia 1:13; 2:20.

17. Paano kita ginabuyok ni Jehova sa iya kag sa iya Anak?

¹⁷ Ginapamatud-an ni Jehova ang iya gugma sa aton paagi sa pagbulig sa kada isa sa aton nga makabenepisyo sa halad sang Cristo. Si Jesus nagsiling: “Wala sing tawo nga makakari sa akon kon indi sia pagbuyukon sang Amay nga nagpadala sa akon.” (Juan 6:44) Huo, si Jehova mismo ang nagabuyok sa aton sa iya Anak kag sa paglaum nga kabuhi nga wala sing katapusan. Paano? Paagi sa pagbantala nga hilikuton, natun-an naton ang maayong balita. Ginagamit man niya ang iya balaan nga espiritu para maintiendihan naton ang Biblia kag masunod ang ginasiling sini bisan pa indi kita perpekto. Gani, masiling ni Jehova sa aton ang ginsiling niya sa Israel: “Ang akon gugma sa imo wala sing katapusan. Bangod sang akon mainunungon nga gugma, ginpapalapit ko ikaw sa akon.”—Jeremias 31:3.

18, 19. (a) Paano ginapakita ni Jehova ang iya gugma sa aton sa personal gid nga paagi, kag ngaa masiling naton nga nagaulikid gid sia? (b) Paano kita ginapasalig sang Pulong sang Dios nga si Jehova isa ka manugpamati nga may empatiya?

¹⁸ Ginatugutan ni Jehova nga mangamuyo kita sa iya kag kon mangamuyo kita, ginapakita niya sa aton ang iya gugma sa personal gid nga paagi. Ginaagda kita sang Biblia nga ‘padayon nga magpangamuyo’ sa Dios. (1 Tesalonica 5:17) Nagapamati sia. Ginatawag pa gani sia nga “Manugpamati sang pangamuyo.” (Salmo 65:2) Wala niya gintugyan ini nga posisyon sa iban, bisan sa iya Anak. Pensara ini: Ginapalig-on kita sang Manunuga sang uniberso nga magpalapit sa iya sa pangamuyo, kag isugid sa iya ang tanan naton nga ginabatyag. Kag ano sia nga klase sang manugpamati? Wala bala sing balatyagon, daw wala nagasapak, kag wala nagaulikid? Indi gid.

¹⁹ Si Jehova may empatiya. Ano ang empatiya? Ang isa ka matutom, tigulang na nga alagad ni Jehova nagsiling anay: “Ang empatiya amo ang pagbakho sang akon tagipusuon sa imo pag-antos.” Apektado gid bala si Jehova sang aton kasakit? Talupangda ang iya ginbatyag sang nag-antos ang iya katawhan nga Israel: “Sa tanan nila nga pag-antos, nag-antos man sia.” (Isaias 63:9) Nakita ni Jehova ang ila kabudlayan kag nabatyagan niya ang ila pag-antos. Para ipakita ang iya empatiya, sia nagsiling: “Ang nagatandog sa inyo nagatandog sa tawotawo sang akon mata.”b (Zacarias 2:8) Masakit gid ini! Huo, ginabatyag ni Jehova ang aton ginabatyag. Kon nasakitan kita, nasakitan man sia.

20. Ano ang aton likawan kon gusto naton tumanon ang laygay sa Roma 12:3?

²⁰ Wala sing hamtong nga Cristiano ang nagabatyag nga bangod palangga kag ginapabaloran sia ni Jehova, mas maayo sia sangsa iban. Si apostol Pablo nagsulat: “Paagi sa wala tupong nga kaayo nga ginhatag sa akon ginasilingan ko ang tagsatagsa sa inyo nga indi kamo magpakataas sa inyo kaugalingon, kundi ipakita ninyo nga may maligdong kamo nga panghunahuna suno sa pagtuo nga ginhatag sang Dios sa tagsatagsa sa inyo.” (Roma 12:3) Ang isa pa ka translation nagasiling: “Ginasiling ko sa kada isa sa inyo nga indi pagpabaloran ang iya kaugalingon sing sobra sangsa iya matuod nga balor, kundi maghimo sing realistiko nga pagpabalor sa iya kaugalingon.” (A Translation in the Language of the People, ni Charles B. Williams) Gani apresyahon naton ang pagpalangga sang aton Amay sa langit, kag dumdumon naton nga bisan ano man ang aton himuon, si Jehova lang ang may kinamatarong nga hatagan kita sini nga pagpalangga.—Lucas 17:10.

21. Ano nga mga kabutigan ni Satanas ang dapat indi gid naton pagpatihan, kag ano nga pasalig halin kay Jehova ang dapat naton saligan?

²¹ Kabay nga himuon naton ang tanan nga masarangan naton para sikwayon ang tanan nga kabutigan ni Satanas. Nalakip sa sini ang kabutigan nga wala kita sing pulos ukon indi kita nagakabagay palanggaon. Mahimo nga bangod sang imo mga inagihan nagabatyag ka nga indi ka pagpalanggaon sang Dios. Mahimo nagapati ka man nga ang imo mga hinimuan gamay kaayo kag indi niya ini matalupangdan. Ukon posible nakahimo ka sang mabug-at nga sala kag para sa imo indi ini matabunan bisan sang kamatayon sang iya hamili nga Anak. Kon amo sini ang imo pagpati, kabutigan gid ini. Indi gid magpati sa sini nga mga kabutigan! Pasaliga pirme ang imo tagipusuon sang kamatuoran nga ginpabutyag sa gingiyahan nga mga pulong ni Pablo: “Kumbinsido ako nga bisan ang kamatayon ukon ang kabuhi ukon ang mga anghel ukon ang mga panguluhan ukon ang mga butang karon ukon ang mga butang nga maabot ukon ang mga kagamhanan ukon ang kataason ukon ang kadalumon ukon ang iban pa nga tinuga indi makapugong nga mabaton naton ang gugma sang Dios nga ginapakita man ni Cristo Jesus nga aton Ginuo.”—Roma 8:38, 39.