Hamili Ikaw sa mga Mata sang Dios!
“Ginhigugma ko ikaw sa gugma nga dayon. Busa sa mahigugmaon nga kalulo ginbuyok ko ikaw.”—JEREMIAS 31:3.
1. Paano ang panimuot ni Jesus sa kinaandan nga mga tawo sang iya adlaw tuhay sa ginpakita sang mga Fariseo?
MAMUTIKAN nila ini sa iya mga mata. Ining tawo nga si Jesus indi gid kaangay sang ila relihioso nga mga lider; nagaulikid sia. Nagbatyag sia sing kaluoy para sa sining mga tawo kay sila “ginpanitan kag nag-alaplaag kaangay sang mga karnero nga wala sing manugbantay.” (Mateo 9:36) Ang ila relihioso nga mga lider dapat kuntani mangin mahigugmaon nga mga manugbantay nga nagatiglawas sa isa ka mahigugmaon kag maluluy-on nga Dios. Sa baylo, gintamay nila ang kinaandan nga mga tawo subong mga indi salapakon—kag sinumpa!a (Juan 7:47-49; ipaanggid ang Ezequiel 34:4.) Sing maathag, ang subong sina ka maihig-ihigon kag dimakasulatanhon nga pagtamod tuhay gid sa pagtamod ni Jehova sa iya katawhan. Ginsilingan niya ang iya pungsod nga Israel: “Ginhigugma ko ikaw sa gugma nga dayon.”—Jeremias 31:3.
2. Paano nagtinguha ang tatlo ka kaupod ni Job nga kumbinsihon sia nga walay pulos sia sa mga mata sang Dios?
2 Apang, indi ang mga Fariseo ang una nga nagtinguha sa pagkombinse sa hinigugma nga mga karnero ni Jehova nga sila mga wala sing pulos. Binagbinaga ang kaso ni Job. Para kay Jehova sia matarong kag himpit, apang ginpahangop sang tatlo ka “manuglugpay” nga si Job isa ka imoral kag malaut nga apostata nga mapatay nga wala sing ibilin nga ebidensia nga nagluntad sia. Nagsiling sila nga indi pagpabilihan sang Dios ang bisan anong pagkamatarong sa bahin ni Job, kay ang Dios wala magsalig bisan gani sa iya kaugalingon nga mga anghel kag gintamod ang langit mismo subong dimatinlo!—Job 1:8; 4:18; 15:15, 16; 18:17-19; 22:3.
3. Ano nga paagi ang ginagamit karon ni Satanas sa pagtinguha nga kumbinsihon ang katawhan nga sila walay pulos kag indi hiligugmaon?
3 Sa karon, ginagamit gihapon ni Satanas ining ‘malalangon nga buhat’ sa pagtinguha nga kombinsihon ang katawhan nga sila wala ginahigugma kag wala sing pulos. (Efeso 6:11, footnote) Matuod, masami niya ginahaylo ang mga tawo paagi sa pagpukaw sang ila bugal. (2 Corinto 11:3) Apang nagakalipay man sia nga dulaon ang pagtahod sa kaugalingon sang mga maluya. Amo gid sini labi na sa sining makahalanguyos nga “katapusan nga mga adlaw.” Madamo karon ang nagadaku sa mga pamilya diin “wala sing kinaugali nga gugma”; madamo ang dapat makig-atubang sa adlaw-adlaw sa mga tawo nga mabangis, makagod, kag batinggilan. (2 Timoteo 3:1-5) Ang tinuig sang pagpamintas, rasismo, dumot, ukon pag-abuso mahimo nga nagkombinse sa subong sina nga mga tawo nga wala sila sing pulos kag indi takus higugmaon. Ang isa ka tawo nagsulat: “Wala ako sing ginahigugma kag wala man sing nagahigugma sa akon. Nabudlayan gid ako sa pagpati nga ang Dios nagaulikid sa akon.”
4, 5. (a) Ngaa ang ideya sang pagkawalay pulos sang kaugalingon batok sa Kasulatan? (b) Ano ang isa sang makatalagam nga mga resulta sang aton pagpati nga wala sing bisan ano sa mga panikasog naton ang may kapuslanan?
4 Ang ideya nga ang isa wala sing pulos nagasumpakil sa kamatuoran sang Pulong sang Dios, ang panudlo tuhoy sa gawad. (Juan 3:16) Kon ang Dios nagbayad sing tuman ka daku nga bili—ang hamili nga kabuhi sang iya mismo Anak—agod baklan kita sing kahigayunan nga mabuhi sing dayon, pat-od gid nga ginahigugma Niya kita; pat-od gid nga may bili kita sa Iya mga mata!
5 Dugang pa, daw ano ka makapaluya batyagon nga kita indi kalahamut-an sa Dios, nga wala sing bisan ano sa mga panikasog naton ang may kapuslanan! (Ipaanggid ang Hulubaton 24:10.) Sa sining negatibo nga pagtamod, bisan ang maayo sing katuyuan nga pagpalig-on, nga ginatuyo sa pagbulig sa aton nga pauswagon ang aton pag-alagad sa Dios kon posible, mahimo nga para sa iban mangin kaangay sang pagpakamalaut. Mahimo nga ginapalanog sini ang aton ginabatyag nga bisan ano man ang himuon naton kulang gihapon.
6. Ano ang labing maayo nga solusyon sa sobra ka negatibo nga mga panghunahuna tuhoy sa aton kaugalingon?
6 Kon mabatyagan mo inang negatibo nga mga balatyagon sa imo kaugalingon, indi pagdulaa ang imo paglaum. Madamo sa aton kon kaisa ang dimakatarunganon nga wala nagapakita sing pagkamaluluy-on sa aton kaugalingon. Kag dumduma, ang Pulong sang Dios gintuyo sa “pagtadlong sang mga butang” kag sa “pagrumpag sang mga butang nga napasad sing malig-on.” (2 Timoteo 3:16; 2 Corinto 10:4) Si apostol Juan nagsulat: “Sa sini mahibaluan naton nga kita naghalin sa kamatuoran, kag mahatagan naton sing pasalig ang aton mga tagipusuon sa atubangan niya nahanungod sa bisan ano man nga ginapakamalaut kita sang aton mga tagipusuon, kay ang Dios daku pa sa aton mga tagipusuon kag nakahibalo sang tanan nga butang.” (1 Juan 3:19, 20) Binagbinagon naton, nian, ang tatlo ka paagi nga sa amo ginatudluan kita sang Biblia nga kita hamili kay Jehova.
Ginapabilihan Ikaw ni Jehova
7. Paano gintudluan ni Jesus ang tanan nga Cristiano nahanungod sa ila kabilihanan sa mga mata sang Dios?
7 Una, talangkod nga ginatudlo sang Biblia nga ang tagsatagsa sa aton may kabilihanan sa mga mata sang Dios. Si Jesus nagsiling: “Ang lima ka magamay nga pispis ginabaligya sa duha ka sensilyo nga may diutay nga bili, indi bala? Walay sapayan wala sing isa sa ila ang ginakalipatan sa atubangan sang Dios. Apang bisan ang mga buhok sa inyo ulo naisip na tanan. Dili kamo mahadlok; mas hamili kamo sangsa madamo nga magamay nga pispis.” (Lucas 12:6, 7) Sadtong mga adlaw, ang magamay nga pispis amo ang pinakabarato sa mga pispis nga ginabaligya subong kalan-on, apang wala sing isa sini ang wala matalupangdi sang iya Manunuga. Sa amo ang sadsaran ginapasad para sa isa ka makatalandog nga kinatuhayan: Kon tuhoy sa mga tawo—nga may kapin nga kabilihanan—nahibaluan sang Dios ang tanan nga detalye. Daw subong bala nga ang mga buhok sa aton ulo naisip na tanan!
8. Ngaa realistiko hunahunaon nga sarang maisip ni Jehova ang mga buhok sa aton ulo?
8 Ang mga buhok naisip na? Kon nagaduhaduha ikaw nga ini nga bahin sang ilustrasyon ni Jesus indi realistiko, binagbinaga ini: Madumduman sang Dios ang iya matutom nga mga alagad sing bug-os gid sa bagay nga sarang niya mabanhaw sila—tugahon sila liwat sa tagsa ka detalye, lakip ang ila masibod nga mga genetic code kag ang tanan nila nga tinuig sang memorya kag mga eksperiensia. Ang pag-isip sa aton buhok (nga sa promedyo mga 100,000) mangin isa ka simple lamang nga buhat kon ipaanggid!—Lucas 20:37, 38.
Ano ang Kabilihanan Naton sa mga Mata ni Jehova?
9. (a) Ano ang pila sang mga kinaiya nga ginapabilihan ni Jehova? (b) Ngaa sa banta mo hamili sa iya ina nga mga kinaiya?
9 Ikaduha, ginatudluan kita sang Biblia kon ano ang ginapabilihan ni Jehova sa aton. Sa simple lamang nga mga pulong, nagakalipay sia sa aton positibo nga mga kinaiya kag sa aton mga panikasog. Si Hari David nagsiling sa iya anak nga si Solomon: “Si Jehova nagausisa sang tanan nga tagipusuon, kag nagahangop sang tanan nga huyog sang mga panghunahuna.” (1 Cronica 28:9) Samtang ginausisa sang Dios ang binilyon ka tagipusuon sang tawo sa sining masingki, puno sing dumot nga kalibutan, pat-od gid nga nagakalipay sia kon masapwan niya ang isa ka tagipusuon nga nagahigugma sang paghidait, kamatuoran, kag pagkamatarong! (Ipaanggid ang Juan 1:47; 1 Pedro 3:4.) Ano ang nagakatabo kon ang Dios makasapo sing isa ka tagipusuon nga puno sing gugma para sa iya, nga nagatinguha sa pagtuon tuhoy sa iya kag nagapaambit sa iban sina nga ihibalo? Sa Malaquias 3:16, ginasugiran kita ni Jehova nga nagapamati sia sa mga nagapakighambal sa iban tuhoy sa iya kag may yara pa gani sia “isa ka tulun-an nga handumanan” para sa tanan “nga nagakahadlok kay Jehova kag para sa mga nagahunahuna sang iya ngalan.” Ina nga mga kinaiya hamili sa iya!
10, 11. (a) Paano ginasikway sang iban ang ebidensia nga ginapabilihan ni Jehova ang ila maayong mga kinaiya? (b) Paano ang halimbawa ni Abias nagapakita nga ginapabilihan ni Jehova ang bisan ano nga kadamuon sang maayong mga kinaiya?
10 Apang, ang nagapakamalaut sa kaugalingon nga tagipusuon, mahimo nga magapamatok sa sina nga ebidensia sang aton kabilihanan sa mga mata sang Dios. Mahimo nga ini wala nagauntat sa paghutik sing, ‘Apang madamo pa ang mas huwaran sa sina nga mga kinaiya sangsa akon. Pat-od gid nga nagakalugaw-an si Jehova kon ginapaanggid niya ako sa ila!’ Wala ginapaanggid ni Jehova ang iya mga alagad, kag indi man sia matig-a sing buot ukon isa nga estrikto nga nagapatuman sing bug-os nga mga talaksan. (Galacia 6:4) Upod ang daku nga pagkamahinantupon, ginabasa niya ang mga tagipusuon, kag ginapabilihan niya ang maayong mga kinaiya sa tanan nga kadakuon sini.
11 Halimbawa, sang ginsugo ni Jehova nga ang bug-os nga apostata nga dinastiya ni Hari Jeroboam pamatyon, silhigon kaangay sang “ipot,” ginmando Niya nga isa lamang sa mga anak nga lalaki sang hari, nga si Abias, ang hatagan sing desente nga lubong. Ngaa? “Kay sa iya nakit-an ang pila ka maayong butang ayon kay Jehova nga Dios sang Isael.” (1 Hari 14:10, 13) Nagkahulugan bala ini nga si Abias isa anay ka matutom nga sumilimba ni Jehova? Indi naman, kay napatay sia, subong sang nabilin nga bahin sang iya malaut nga panimalay. (Deuteronomio 24:16) Walay sapayan, ginpabilihan ni Jehova ang “maayong butang” nga iya nakit-an sa tagipusuon ni Abias kag naghikot sia nahisuno sa sini. Ang Matthew Henry’s Commentary on the Whole Bible nagasiling: “Bisan pa diutay lamang ang maayong kinaiya, makit-an gid ini: Ang Dios nga nagapangita sini, makakita sini, bisan pa daw ano ka diutay sini, kag nagakahamuot sa sini.” Kag indi pagkalipati nga kon ang Dios makasapo sing bisan diutay lamang sang maayong kinaiya sa imo, sarang niya ini mapatubo tubtob nagatinguha ikaw nga alagaron sia sing matutom.
12, 13. (a) Paano ginapakita sang Salmo 139:3 nga ginapabilihan ni Jehova ang aton mga panikasog? (b) Sa anong kahulugan sarang masiling nga ginaayag ni Jehova ang aton mga hilikuton?
12 Ginapabilihan ni Jehova ang aton mga panikasog sa kaanggid man nga paagi. Sa Salmo 139:1-3, aton mabasa: “O Jehova, nausisa mo ako, kag nakilala ako. Nakilala mo ang akon paglingkod kag ang akon pagtindog. Nahangpan mo kutob sa malayo ang akon hunahuna. Ikaw nagausisa sang akon paglakbay kag sang akon paghigda, kag nakakilala sang tanan ko nga dalanon.” Gani nahibaluan ni Jehova ang tanan nga ginahimo naton. Apang indi lamang nga nahibaluan niya. Sa Hebreo ang dinalan nga ‘ikaw nakakilala sang tanan ko nga dalanon’ mahimo man nagakahulugan sing ‘ginapakabahandi mo ang tanan ko nga dalanon’ ukon ‘ginapakamahal mo ang tanan ko nga dalanon.’ (Ipaanggid ang Mateo 6:19, 20.) Apang, paano ni Jehova pakamahalon ang aton mga dalanon samtang tuman kita ka dihimpit kag makasasala?
13 Sing makawiwili, suno sa pila ka eskolar, sang ginsulat ni David nga si Jehova ‘nag-usisa’ sang iya mga paglakbay kag mga pagpahuway, ang Hebreo literal nga nagkahulugan sing “pag-ayag” ukon “pagtahop.” Ang isa ka reperensia nagsiling: “Nagakahulugan ini . . . sa pagpain sang tanan nga upa, kag ibilin ang tanan nga uyas—sa pagtipig sang tanan nga bilidhon. Gani nagakahulugan ini nga ang Dios, sa malaragwayon nga pulong, nag-ayag sa iya. . . . Ginlapta niya ang tanan nga upa, ukon ang tanan nga wala sing pulos, kag ang ginbilin amo ang matuod kag may kapuslanan.” Ang nagapakamalaut sa kaugalingon nga tagipusuon mahimo nga magaayag sang aton mga ginahimo sa baliskad nga paagi, wala kaluoy nga ginabasol kita sa nahimo nga mga sala kag ginapakawalay pulos ang aton mga nahimuan. Apang ginapatawad ni Jehova ang aton mga sala kon kita sinsero nga nagahinulsol kag nagatinguha sing maukod nga indi na pagsuliton ang aton mga sala. (Salmo 103:10-14; Binuhatan 3:19) Ginaayag niya kag ginadumdom ang aton maayong mga binuhatan. Sa kamatuoran, ginadumdom niya ini sing dayon tubtob nagapabilin kita nga matutom sa iya. Tamdon niya nga indi pagkamatarong ang pagkalipat sini, kag indi gid sia dimatarong!—Hebreo 6:10.
14. Ano ang nagapakita nga ginapabilihan ni Jehova ang aton hilikuton sa Cristianong ministeryo?
14 Ano ang pila sang maayong mga buhat nga ginapabilihan sang Dios? Halos tanan nga butang nga ginahimo naton bilang pag-ilog sa iya Anak, nga si Jesucristo. (1 Pedro 2:21) Sa pagkamatuod ang isa ka tuman ka importante nga hilikuton, nian, amo ang pagpalapnag sa maayong balita sang Ginharian sang Dios. Sa Roma 10:15, aton mabasa: “Daw ano katahom sang mga tiil sang mga nagabantala sing maayong balita sang maayong mga butang!” Samtang mahimo nga sa kinaandan indi naton paghunahunaon ang aton ordinaryo nga mga tiil subong “matahom,” ang tinaga nga gingamit diri ni Pablo pareho sa tinaga nga gingamit sa Greek Septuagint nga bersion sa paglaragway kay Rebecca, kay Raquel, kag kay Jose—sila nga tatlo kilala sa ila katahom. (Genesis 26:7; 29:17; 39:6) Gani ang aton pagpakigbahin sa pag-alagad sa aton Dios, nga si Jehova, tuman katahom kag hamili sa iya mga mata.—Mateo 24:14; 28:19, 20.
15, 16. Ngaa ginapabilihan ni Jehova ang aton pagbatas, kag paano ginapadaku sang mga pulong ni Hari David sa Salmo 56:8 ining kamatuoran?
15 Ang isa pa ka kinaiya nga ginapabilihan sang Dios amo ang aton pagbatas. (Mateo 24:13) Dumduma, luyag ni Satanas nga magtalikod kamo kay Jehova. Ang tagsa ka adlaw nga nagapabilin kamo nga matutom kay Jehova isa ka dugang naman nga adlaw nga inyo nabulig sa paghatag sing sabat sa mga pagyaguta ni Satanas. (Hulubaton 27:11) Ang pagbatas kon kaisa mabudlay gid. Ang mga problema sa lawas, sa kuwarta, sa emosyon, kag ang iban pa nga mga sablag makahimo sang tagsa ka nagaligad nga adlaw nga isa ka pagtilaw. Labi na nga hamili kay Jehova ang pagbatas sa atubangan sina nga mga pagtilaw. Amo kon ngaa ginpangabay ni Hari David si Jehova nga isulod ang iya mga luha sa isa ka malaragwayon nga “panit nga botelya,” nga nagapamangkot sing masinaligon, “Wala bala sila sa imo tulun-an?” (Salmo 56:8) Huo, ginapakabahandi kag ginadumdom ni Jehova ang tanan nga luha kag pag-antos nga ginabatas naton sa paghupot sang aton katutom sa iya. Hamili man ini sa iya mga mata.
16 Bangod sang aton mas maayong mga kinaiya kag sang aton mga panikasog, daw ano kaathag nga si Jehova makasapo sing madamo nga mapabilihan sa tagsatagsa sa aton! Ano man ang ginpakita sa aton sang kalibutan ni Satanas, ginatamod kita ni Jehova subong hamili kag bahin sang “halandumon nga mga butang sang tanan nga kapungsuran.”—Hageo 2:7.
Kon Ano ang Nahimo ni Jehova Agod Ipasundayag ang Iya Gugma
17. Ngaa ang halad nga gawad ni Cristo dapat magkumbinse sa aton nga si Jehova kag si Jesus nagahigugma sa aton subong mga indibiduwal?
17 Ikatlo, daku ang ginahimo ni Jehova agod pamatud-an ang iya gugma para sa aton. Sa pagkamatuod, ang halad nga gawad ni Cristo amo ang labing mabaskog nga sabat sa binutig ni Satanas nga kita walay pulos ukon indi hiligugmaon. Indi gid naton pagkalipatan nga ang masakit nga kamatayon nga gin-antos ni Jesus sa usok sang pag-antos kag ang kapin pa nga kasakit nga ginbatas ni Jehova samtang ginatan-aw ang kamatayon sang iya hinigugma nga Anak pamatuod sang ila gugma para sa aton. Dugang pa, yadto nga gugma naaplikar sa aton mismo. Amo sina ang pagtamod ni apostol Pablo, kay nagsulat sia: “Ang Anak sang Dios . . . nagahigugma sa akon kag nagtugyan sang iya kaugalingon para sa akon.”—Galacia 2:20.
18. Sa anong kahulugan ginabuyok kita ni Jehova kay Cristo?
18 Ginpamatud-an ni Jehova ang iya gugma para sa aton paagi sa pagbulig sa aton subong mga indibiduwal nga himuslan ang mga benepisyo sang halad ni Cristo. Si Jesus nagsiling sa Juan 6:44: “Wala sing tawo nga makakari sa akon kon indi sia pagbuyukon sang Amay nga nagpadala sa akon.” Paagi sa pagbantala nga hilikuton, nga nagalab-ot sa tagsatagsa sa aton, kag paagi sa iya balaan nga espiritu, nga ginagamit ni Jehova sa pagbulig sa aton nga mahangpan kag iaplikar ang espirituwal nga mga kamatuoran walay sapayan sang aton mga limitasyon kag mga dikahimpitan, ginabuyok kita mismo ni Jehova padulong sa iya Anak kag sa ginalauman nga dayon nga kabuhi. Busa, masiling ni Jehova sa aton ang ginsiling niya anay sa Israel: “Ginhigugma ko ikaw sa gugma nga dayon. Busa sa mahigugmaon nga kalulo ginbuyok ko ikaw.”—Jeremias 31:3.
19. Ngaa ang pribilehiyo sa pagpangamuyo dapat magkumbinse sa aton sang gugma mismo ni Jehova para sa aton?
19 Apang, mahimo nga paagi sa pribilehiyo sa pagpangamuyo, mabatyagan naton ang gugma ni Jehova sa labing suod nga paagi. Ginaagda niya ang tagsatagsa sa aton nga “mangamuyo sing walay untat” sa iya. (1 Tesalonica 5:17) Nagapamati sia! Ginatawag pa gani sia nga “Manugpamati sang pangamuyo.” (Salmo 65:2) Wala niya gintugyan ini nga palangakuan kay bisan sin-o, bisan sa iya Anak. Hunahunaa lamang: Ang Manunuga sang uniberso nagapalig-on sa aton nga magpalapit sa iya sa pangamuyo, nga may kahilwayan sa paghambal. Ang imo mga pakiluoy mahimo pa gani nga magpahulag kay Jehova nga himuon ang indi niya kuntani paghimuon.—Hebreo 4:16; Santiago 5:16; tan-awa ang Isaias 38:1-16.
20. Ngaa ang gugma sang Dios para sa aton indi balibad sa pagpaimportante sang kaugalingon ukon pagkamaiyaiyahon sa bahin naton?
20 Wala sing balanse nga Cristiano nga magatamod sina nga ebidensia sang gugma kag pag-apresyar sang Dios sa aton subong isa ka balibad nga tamdon ang iya kaugalingon subong mas importante sangsa kon ano gid sia. Si Pablo nagsulat: “Paagi sa dibagay nga kaluoy nga ginhatag sa akon nagasiling ako sa tagsa ka tawo nga yara sa inyo nga dili maghunahuna sang iya kaugalingon sing mataas pa sa dapat niya paghunahunaon; kundi maghunahuna agod makatigayon sing maligdong nga painuino, ang kada isa suno sa talaksan sang pagtuo nga ginbahin sa iya sang Dios.” (Roma 12:3) Gani samtang nagapainit-init kita sa kainit sang gugma sang aton langitnon nga Amay, magmaligdong kita sa painuino kag dumdumon naton nga ang mahigugmaon nga kalulo sang Dios dibagay.—Ipaanggid ang Lucas 17:10.
21. Anong kabutigan ni Satanas ang dapat naton padayon nga pamatukan, kag ano nga diosnon nga kamatuoran ang dapat naton pirme hunahunaon?
21 Himuon naton tanan ang tanan nga masarangan naton agod pamatukan ang mga ideya nga ginasakdag ni Satanas sa sining nagatagumatayon na nga daan nga kalibutan. Nagalakip ina sang pagsikway sa panghunahuna nga kita walay pulos ukon wala ginahigugma. Kon ang kabuhi sa sining sistema nagtudlo sa imo nga tamdon ang imo kaugalingon subong isa ka sablag nga tuman ka daku nga indi malandas bisan sang daku nga gugma sang Dios, ukon ang imo maayong mga binuhatan subong tuman ka diutay nga indi matalupangdan bisan sang makakita-sing-tanan nga mga mata niya, ukon ang imo mga sala subong tuman ka daku nga indi matakpan bisan sang kamatayon sang iya hamili nga Anak, gintudluan ikaw sing kabutigan. Sikwaya ina nga kabutigan upod ang bug-os nga pagkangil-ad nga nagakadapat sa sini! Dumdumon naton pirme ang mga pulong ni apostol Pablo sa Roma 8:38, 39: “Kumbinsido ako nga bisan ang kamatayon bisan ang kabuhi bisan ang mga anghel bisan ang mga panguluhan bisan ang mga butang nga yari karon bisan ang mga butang nga maabot pa bisan ang mga kagamhanan bisan ang kataasan bisan ang kadadalman bisan ang iban pa nga mga tinuga indi makapahamulag sa aton sa gugma sang Dios nga yara kay Cristo Jesus nga aton Ginuo.”
[Footnote]
a Sa kamatuoran, ginsikway nila ang mga imol paagi sa matinamayon nga termino nga “ ʽam-ha·ʼaʹrets,” ukon “katawhan sang pungsod.” Suno sa isa ka eskolar, nagtudlo ang mga Fariseo nga ang isa indi dapat magtugyan sing bilidhon nga mga butang sa sining mga imol, ukon saligan ang ila testimonya, ukon abiabihon sila subong mga bisita, ukon mangin mga bisita nila, ukon magbakal sa ila. Ang relihioso nga mga lider nagsiling nga kon ipakasal sang isa ka tawo ang iya anak nga babayi sa isa sining mga tawo mangin kaangay ini sang paghatag sa iya nga nagapos kag wala sing mahimo sa isa ka sapat.
Ano sa Banta Mo?
◻ Ngaa ginatinguhaan ni Satanas nga kumbinsihon kita nga kita walay pulos kag wala ginahigugma?
◻ Paano gintudlo ni Jesus nga ginapabilihan ni Jehova ang tagsatagsa sa aton?
◻ Paano naton nahibaluan nga ginapabilihan ni Jehova ang aton maayong mga kinaiya?
◻ Paano naton mapat-od nga ginapakabahandi ni Jehova ang aton mga panikasog?
◻ Paano ginpamatud-an ni Jehova ang iya gugma para sa aton subong mga indibiduwal?
[Retrato sa pahina 13]
Ginatalupangod kag ginadumdom ni Jehova ang tanan nga nagahunahuna sang iya ngalan