Ang Ginakinahanglan sang mga Kabataan Gikan sa mga Ginikanan
ANG tanan nga mga ginikanan nagapakigbahin sa isa ka hitabo nga indi mahangpan sing bug-os sang tawo. Ang tagsa ka ginikanan may ginaamot gikan sa ila lawas. Subong resulta, ang nagatubo sa sulod sang tiyan sang isa ka iloy isa ka kompleto nga buhi nga persona. Busa, indi makapakibot nga kon mabun-ag ang isa ka bata, ginatawag ini sang mga tawo nga “milagro sang pagkabun-ag.”
Sa pagkamatuod, ang pagbun-ag sing bata umpisa lamang sang salabton sang mga ginikanan. Sa primero, ang tawhanon nga mga lapsag halos nagasandig lamang sa ila mga ginikanan, apang samtang nagadaku sila, indi lamang pisikal nga atension ang ginakinahanglan nila. Nagakinahanglan sila sing bulig agod magtubo sa mental, emosyonal, moral, kag espirituwal.
Agod mangin maayo sila pagdaku nila, ilabi na nga kinahanglan sang mga kabataan ang gugma sang mga ginikanan. Bisan pa importante ang gugma nga ginapabutyag sa pulong, dapat ini pamatud-an sa mga buhat. Huo, kinahanglan sang mga kabataan ang maayo nga halimbawa sang mga ginikanan. Nagakinahanglan sila sing panuytoy sa moral, ang mga prinsipio nga masunod nila. Kag kinahanglan nila ini halin sa ila pagkabata. Ang makapasubo nga mga butang mahimo matabo kag matuod gid nga nagakatabo kon ang mga kabataan ulihi na nga makabaton sing bulig.
Yara sa Biblia ang labing maayo nga mga prinsipio. Ang mga instruksion nga napasad sa Biblia may yara di-matupungan nga mga bentaha. Paagi sa sini nga mga instruksion, marealisar sang mga kabataan nga ang ginatudlo sa ila wala maghalin sa tawo kundi sa ila Manunuga, ang ila langitnon nga Amay. Amo nga ang laygay may awtoridad nga indi matupungan.
Ginapalig-on sang Biblia ang mga ginikanan nga magtinguha gid nga ipatudok ang husto nga mga prinsipio sa hunahuna sang ila mga anak. Apang, samtang nagadaku ang mga kabataan, masami nga ginabudlayan ang mga ginikanan sa pagpakighambal sa ila tuhoy sa importante gid nga mga butang. Ini nga libro, Magtuon Gikan sa Daku nga Manunudlo, gindesinyo agod makabulig nga malikawan ini nga kahimtangan. Magahatag ini sa inyo kag sa inyo mga anak sing espirituwal nga materyal nga mabasa ninyo. Apang kapin pa sa sini, dapat ini magpahulag sa mga bata kag sa mga magabasa sini nga libro upod sa ila nga hambalan ini.
Matalupangdan ninyo nga ginapasabat sang libro ang mga kabataan. May yara ini madamo nga nagakaigo nga mga pamangkot. Kon makalab-ot na kamo sa sini, makita ninyo ang subong sini nga kurit (—). Isa ini ka pahanumdom nga dapat ka magdulog kag palig-unon ang bata nga ipabutyag ang iya kaugalingon. Luyag sang mga kabataan nga makapakigbahin sila. Kon indi pagpahambalon ang bata, mahimo nga madali madula ang iya interes.
Apang, mas importante pa, ini nga mga pamangkot makabulig sa inyo agod mahibaluan kon ano ang ginahunahuna sang isa ka bata. Matuod, mahimo nga sayop ang isabat sang bata. Apang ang naimprinta nga impormasyon nga nagasunod sa tagsa ka pamangkot gindesinyo agod buligan ang bata sa pagpalambo sing maayo nga panghunahuna.
Ang pinasahi nga bahin sang libro amo ang kapin sa 230 ka laragway sini. Ang kalabanan sini may kapsion nga nagakinahanglan sing sabat gikan sa bata, pasad sa iya makita kag nabasa. Gani repasuha sa bata ang mga laragway. Maayo gid ini nga bulig sa pagpanudlo nga magapadaku sang mga leksion nga ginatudlo.
Kon makabasa na ang bata, palig-una sia nga basahon niya ang libro sing mabaskog sa inyo kag sa iya kaugalingon. Sa dugang nga pagbasa niya sini, dugang pa nga mapatudok ang maayo nga laygay sini sa iya hunahuna kag tagipusuon. Agod mapabakod ang wagkus sang gugma kag pagtahod sa ulot ninyo kag sang inyo anak, basaha ninyo nga magkaupod ang libro, kag himua ini sing regular.
Sa isa ka paagi nga halos indi mahanduraw sang nagligad nga mga dekada, ginapadayag karon ang mga kabataan sa indi nagakaigo nga sekso, espiritismo, kag iban pa nga mga kalainan. Gani nagakinahanglan sila sing proteksion, nga amo ang ginahatag sini nga libro sa isa ka dungganon apang prangka nga paagi. Apang, dapat gid tuytuyan ang mga kabataan padulong sa Tuburan sang tanan nga kaalam, ang aton langitnon nga Amay, si Jehova nga Dios. Amo sini pirme ang ginhimo ni Jesus, ang Daku nga Manunudlo. Sinsero nga nagalaum kami nga ini nga libro makabulig sa inyo kag sa inyo pamilya sa pagdihon sang inyo kabuhi agod mangin kalahamut-an kay Jehova, kag padyaan kamo tubtob sa walay katubtuban.