“Labaw sa Tanan, Magmainit Kamo sa Inyo Paghigugmaanay”

“Ang katapusan sang tanan nga butang malapit na. . . . Labaw sa tanan, magmainit kamo sa inyo paghigugmaanay.”​—1 PEDRO 4:7, 8, NW.

NAHIBALUAN ni Jesus nga importante gid ang iya hingapusan nga mga inoras upod sa iya mga apostoles. Nahibaluan niya kon ano ang matabo sa ila. Madamo ang ila hilikuton, apang pagadumtan sila kag hingabuton, subong sang ginhimo sa iya. (Juan 15:18-20) Sadtong hingapusan nga gab-i, makapila nga ginpahanumdom sila ni Jesus nga dapat sila “maghigugmaanay.”—Juan 13:34, 35; 15:12, 13, 17.

2 Si apostol Pedro, nga didto sadto nga gab-i, nakahangop sang importansia sang ginpahanumdom ni Jesus. Pila ka tuig sang ulihi, sang magsulat sia antes malaglag ang Jerusalem, ginpadaku ni Pedro ang importansia sang gugma. Naglaygay sia sa mga Cristiano: “Ang katapusan sang tanan nga butang malapit na. . . . Labaw sa tanan, magmainit kamo sa inyo paghigugmaanay.” (1 Pedro 4:7, 8, NW) Importante gid ang ginpamulong ni Pedro para sa mga nagakabuhi sa “katapusan nga mga adlaw” sang karon nga sistema sang mga butang. (2 Timoteo 3:1) Ano ang ‘mainit nga gugma’? Ngaa importante nga magpakita kita sini nga sahi sang gugma sa iban? Kag paano naton ini mapakita?

‘Mainit nga Gugma’—Ano Ini?

3 Madamo ang nagahunahuna nga ang gugma kinaugali nga ginabatyag. Apang wala ginapatuhuyan ni Pedro ang bisan ano lamang nga sahi sang gugma; ginapatuhuyan niya ang pinakadungganon nga sahi sang gugma. Ang tinaga nga “gugma” sa 1 Pedro 4:8 ginbadbad gikan sa Griego nga tinaga nga a·gaʹpe. Ini nga termino nagakahulugan sing di-makagod nga gugma nga ginatuytuyan, ukon ginapahulag, sang prinsipio. Ang isa ka reperensia nagsiling: “Ang gugma nga agape sarang masugo bangod indi ini isa ka emosyon kundi isa ka determinasyon nga nagadul-ong sa paghulag.” Bangod may napanubli kita nga huyog sa kakagod, nagakinahanglan kita sing mga pahanumdom agod magpakita sing gugma sa isa kag isa, ginahimo ini sa mga paagi suno sa pagtuytoy sang diosnon nga mga prinsipio.—Genesis 8:21; Roma 5:12.

4 Indi buot silingon nga dapat kita maghigugmaanay bangod obligado kita nga himuon ini. Ang a·gaʹpe may kainit kag balatyagon. Nagsiling si Pedro nga dapat kita ‘magmainit [sing literal, ‘mag-unat’] sa aton paghigugmaanay.’a (Kingdom Interlinear) Apang, dapat gihapon panikasugan ini nga gugma. Tuhoy sa Griego nga tinaga nga ginbadbad ‘mainit,’ ang isa ka iskolar nagsiling: “Ginalaragway sini ang isa ka atleta nga nagagamit sang iya nabilin nga kusog tubtob sa inangan sang palumba.”

5 Ang aton gugma, kon amo, indi dapat paglimitehan sa paghimo sang mahapos lamang nga mga butang ukon sa pila lamang ka tawo. Ang Cristiano nga gugma nagaobligar sa aton nga ‘unaton’ ang aton tagipusuon, nagapakita sing gugma bisan pa mabudlay ini himuon. (2 Corinto 6:11-13) Maathag nga dapat naton palambuon kag panikasugan ini nga sahi sang gugma, subong nga ang isa ka atleta dapat maghanas kag magpanikasog sa pagpauswag sang iya mga kalantip. Importante nga magpakita kita sang amo sini nga sahi sang gugma sa isa kag isa. Ngaa? Bangod sang di-magkubos tatlo ka rason.

Ngaa Dapat Kita Maghigugmaanay?

6 Una, “kay ang gugma gikan sa Dios.” (1 Juan 4:7) Si Jehova, ang Tuburan sining matahom nga kinaiya, una nga naghigugma sa aton. Si apostol Juan nagsiling: “Sa sini ginpahayag sa aton ang gugma sang Dios, nga ginpadala sang Dios sa kalibutan ang iya bugtong nga Anak, agod nga magkabuhi kita paagi sa iya.” (1 Juan 4:9) “Ginpadala” ang Anak sang Dios agod mangin isa ka tawo, magatuman sang iya ministeryo, kag mapatay sa usok sang pag-antos—agod “magkabuhi kita.” Paano naton dapat balusan ining labaw gid nga kapahayagan sang gugma sang Dios? Si Juan nagasiling: “Kon ang Dios naghigugma gid sa aton, kita man dapat maghigugmaanay.” (1 Juan 4:11) Talupangda nga si Juan nagsulat, “Kon ang Dios naghigugma gid sa aton”—indi lamang ikaw kundi kita. Maathag ang punto: Kon ginahigugma sang Dios ang aton mga masigkasumilimba, dapat man naton higugmaon sila.

7 Ikaduha, importante gid nga maghigugmaanay kita labi na karon agod mabuligan naton ang aton mga kauturan nga nagakinahanglan sing bulig bangod “ang katapusan sang tanan nga butang malapit na.” (1 Pedro 4:7, NW) Nagakabuhi kita sa “makahalanguyos nga mga tion.” (2 Timoteo 3:1) Ang mga kahimtangan sa kalibutan, kinaugali nga mga kalamidad, kag ang pagpamatok nagadala sing mga kabudlayan sa aton. Bangod sang mabudlay nga mga kahimtangan, dapat kita mangin suod sa isa kag isa sing labi pa. Ang mainit nga gugma magahugpong sa aton kag magapahulag sa aton nga ‘magkabalaka sa isa kag isa.’—1 Corinto 12:25, 26.

8 Ikatlo, dapat kita maghigugmaanay bangod indi naton luyag ‘hatagan sing kahigayunan ang yawa’ nga hingalitan kita. (Efeso 4:27) Maabtik si Satanas sa paggamit sang mga di-kahimpitan sang aton mga masigkatumuluo—ang ila mga kaluyahon, mga sayop, kag mga sala—subong mga salandaran. Mahalin bala kita sa kongregasyon bangod sang walay pasunaid nga hambal ukon masakit nga buhat? (Hulubaton 12:18) Indi kita magahalin kon mainit kita nga nagahigugmaanay! Ini nga gugma nagabulig sa aton agod mahuptan ang paghidait kag nahiusa nga mag-alagad sa Dios nga may “paghilisugot.”—Sofonias 3:9.

Kon Paano Ipakita nga Ginahigugma Mo ang Iban

9 Ang pagpakita sing gugma dapat magsugod sa puluy-an. Nagsiling si Jesus nga makilala ang iya matuod nga mga sumulunod paagi sa ila paghigugmaanay. (Juan 13:34, 35) Dapat mangin dayag ang gugma indi lamang sa kongregasyon kundi sa pamilya man—sa ulot sang mag-asawa kag sa ulot sang mga ginikanan kag mga anak. Indi lamang kita dapat magbatyag sing gugma para sa mga katapo sang aton pamilya; dapat naton ipabutyag ini sa positibo nga mga paagi.

10 Paano ang mag-asawa makapakita sing gugma sa isa kag isa? Ang bana nga may matuod nga gugma sa iya asawa nagapahibalo sa iya paagi sa pulong kag buhat—sa publiko kag sa pribado⁠—​nga ginapalangga niya sia. Ginatahod niya ang personal nga dignidad sang iya asawa kag ginabinagbinag ang iya panghunahuna, pagtamod, kag balatyagon. (1 Pedro 3:7) Ginauna niya ang kaayuhan sang iya asawa, kag ginahimo niya ang tanan nga masarangan niya agod atipanon ang materyal, espirituwal, kag emosyonal nga mga kinahanglanon sang iya asawa. (Efeso 5:25, 28) Ang asawa nga may tunay nga gugma sa iya bana ‘nagatahod’ sa iya, bisan pa kon kaisa indi niya mahimo ang iya mga ginapaabot. (Efeso 5:22, 33) Ginasakdag niya ang iya bana kag nagapasakop sa iya, wala sia nagapangayo sing di-makatarunganon nga mga butang, kundi nagakooperar sa iya sa pag-una sa espirituwal nga mga butang.—Genesis 2:18; Mateo 6:33.

11 Mga ginikanan, paano ninyo mapakita ang inyo gugma sa inyo mga anak? Ang inyo kahanda sa pagpangabudlay sing lakas agod mahatag ang ila materyal nga mga kinahanglanon isa ka ebidensia sang inyo gugma. (1 Timoteo 5:8) Apang kapin pa sa pagkaon, panapton, kag puluy-an ang ginakinahanglan sang mga kabataan. Agod magdaku sila nga nagahigugma kag nagaalagad sa matuod nga Dios, kinahanglan nila ang espirituwal nga paghanas. (Hulubaton 22:6) Nagakahulugan ina sang pag-iskedyul sing tion para sa pamilya agod tun-an ang Biblia, magpakigbahin sa ministeryo, kag magtambong sa Cristianong mga miting. (Deuteronomio 6:4-7) Ang dalayon nga paghimo sining mga butang nagakinahanglan sing daku gid nga pagsakripisyo, labi na sa sining mabudlay nga mga tion. Ang inyo kabalaka kag panikasog sa pag-atipan sa espirituwal nga mga kinahanglanon sang inyo mga anak isa ka ekspresyon sang inyo gugma, kay paagi sa sini ginapakita ninyo nga interesado gid kamo sa ila dayon nga kaayuhan.—Juan 17:3.

12 Importante man nga magpakita ang mga ginikanan sing gugma paagi sa pag-atipan sa emosyonal nga mga kinahanglanon sang ila mga anak. Ang mga kabataan maluya pa; dapat makumbinsi ang ila malum-ok nga mga tagipusuon nga ginahigugma ninyo sila. Sugiri sila nga ginahigugma ninyo sila, kag ipakita sa ila nga ginapalangga gid ninyo sila, kay ini nga mga ekspresyon nagapasalig sa ila nga sila takus higugmaon kag may balor. Hatagi sila sing mapinalanggaon kag tunay nga komendasyon, kay nagapahibalo ini sa ila nga nakita ninyo kag ginapabaloran ang ila mga panikasog. Disiplinaha sila nga may gugma, kay ini nga pagtadlong nagasugid sa ila nga nagakabalaka kamo sa ila mangin personalidad. (Efeso 6:4) Ini tanan nga mapuslanon nga mga ekspresyon sang gugma nagabulig sa pagtukod sing isa ka malipayon kag nagabuligay nga pamilya nga mas nakahanda sa pagpamatok sa mga pag-ipit sining katapusan nga mga adlaw.

13 Ang gugma nagapahulag sa aton nga indi pagsapakon ang mga kakulangan sang iban. Dumduma nga sang ginalaygayan niya ang iya mga bumalasa nga “magmainit kamo sa inyo paghigugmaanay,” ginhatag ni Pedro ang rason kon ngaa importante ini: “Kay ang gugma nagatabon sang kadam-an nga mga sala.” (1 Pedro 4:8) Ang ‘pagtabon’ sa mga sala wala nagakahulugan nga ‘hipsan’ ang mabug-at nga mga sala. Ina nga mga butang nagakaigo nga ginareport sa responsable nga mga utod sa kongregasyon nga magaatipan sini. (Levitico 5:1; Hulubaton 29:24) Indi gid mahigugmaon—kag indi Makasulatanhon—nga tugutan ang dayag nga mga makasasala nga magpadayon sa paghalit ukon sa pagbiktima sa mga inosente.—1 Corinto 5:9-13.

14 Sa masami, indi gid man serioso ang mga sayop sang mga masigkatumuluo. Kita tanan nagakasandad kon kaisa sa pulong ukon sa buhat, nagapaslaw ukon nagasaklaw pa gani sa isa kag isa. (Santiago 3:2) Dapat bala naton dayon ipamaba ang mga kakulangan sang iban? Ini nga buhat magapagamo lamang sa kongregasyon. (Efeso 4:1-3) Kon may gugma kita, indi naton ‘pag-ibuyagyag ang sayop’ sang isa ka masigkasumilimba. (Salmo 50:20, NW) Subong nga ginapatsihan kag ginapinturahan ang daw mga mantsa sa dingding, ginatabunan man sang gugma ang mga di-kahimpitan sang iban.—Hulubaton 17:9.

15 Ang gugma magapahulag sa aton nga buligan ang mga nagakinahanglan. Samtang nagalain ang mga kahimtangan sa katapusan nga mga adlaw, may mga tion nga ang aton mga masigkatumuluo nagakinahanglan sing materyal ukon pisikal nga bulig. (1 Juan 3:17, 18) Halimbawa, nagbaliskad bala ang pinansial nga kahimtangan sang isa ka katapo sang kongregasyon ukon nadulaan bala sia sing trabaho? Kon amo, ayhan makahatag kita sing materyal nga bulig, suno sa ginatugot sang aton kahimtangan. (Hulubaton 3:27, 28; Santiago 2:14-17) May kalay-uhon bala ang balay sang isa ka tigulang nga balo nga babayi? Kon amo, ayhan makaboluntaryo kita sa pagbulig sa iya.—Santiago 1:27.

16 Indi lamang ang mga tawo sa palibot naton ang dapat naton pakitaan sing gugma. Kon kaisa, makabati kita sing mga report tuhoy sa mga alagad sang Dios sa iban nga mga pungsod nga nabiktima sang mabaskog nga mga bagyo, mga linog, ukon kinagubot sang mga banwahanon. Mahimo nga nagakinahanglan gid sila sing pagkaon, panapton, kag iban pa nga mga butang. Indi importante kon tuhay ang ila rasa ukon tribo. Aton ‘ginahigugma ang bug-os nga katilingban sang mga kauturan.’ (1 Pedro 2:17, NW) Gani, kaangay sang unang-siglo nga mga kongregasyon, nalangkag kita nga suportahan ang mga panikasog nga ginaorganisar sa paghatag sing bulig. (Binuhatan 11:27-30; Roma 15:26) Kon nagapakita kita sing gugma sa sining tanan nga mga paagi, ginapabakod naton ang higot nga nagahiusa sa aton sa sining katapusan nga mga adlaw.—Colosas 3:14.

17 Ang gugma nagapahulag sa aton nga ipaambit sa iban ang maayong balita sang Ginharian sang Dios. Binagbinaga ang halimbawa ni Jesus. Ngaa nagbantala kag nagpanudlo sia? “Napahulag sia sang kaluoy” sa kadam-an bangod sang ila makaluluoy nga kahimtangan sa espirituwal. (Marcos 6:34, NW) Ginpatumbayaan sila kag ginpatalang sang butig nga relihiosong mga manugbantay, nga dapat kuntani nagtudlo sa ila sing espirituwal nga mga kamatuoran kag naghatag sa ila sing paglaum. Gani, bangod ginpahulag sia sang tudok, tinagipusuon nga gugma kag kaluoy, ginlugpayan ni Jesus ang katawhan paagi sa “maayong balita sang ginharian sang Dios.”—Lucas 4:16-21, 43.

18 Sa karon man, madamo nga mga tawo ang ginpatumbayaan kag ginpatalang sa espirituwal kag wala sing paglaum. Kon kaangay ni Jesus, mangin mahinuklugon kita sa espirituwal nga mga kinahanglanon sang mga tawo nga wala pa makakilala sa matuod nga Dios, pahulagon kita sang gugma kag kaluoy nga ipaambit sa ila ang maayong balita sang Ginharian sang Dios. (Mateo 6:9, 10; 24:14) Bangod malip-ot na lang ang tion nga nabilin, hilingagawon gid karon nga ibantala ining makaluwas sing kabuhi nga mensahe.—1 Timoteo 4:16.

“Ang Katapusan Sang Tanan nga Butang Malapit Na”

19 Dumduma, ginsugdan ni Pedro ang iya laygay nga maghigugmaanay kita paagi sa mga pulong: “Ang katapusan sang tanan nga butang malapit na.” (1 Pedro 4:7) Sa indi madugay ining malaut nga kalibutan pagabuslan sang matarong nga bag-ong kalibutan sang Dios. (2 Pedro 3:13) Gani, indi karon tion nga magpulupatawhay. Si Jesus nagpaandam: “Andam kamo sa inyo mga kaugalingon basi ang inyo mga tagipusuon mabug-atan sang patuyang kag kahulugbon kag mga paghimud-os sining kabuhi, kag yadtong adlaw magaabot sa inyo sing hinali subong sang siod.”—Lucas 21:34, 35.

20 Kon amo, ‘magpadayon kita sa pagbantay,’ nga alisto kon diin na kita sa lakat sang tion. (Mateo 24:42, NW) Magbantay kita batok sa bisan ano nga mga pagsulay ni Satanas nga mahimo makatublag sa aton. Indi gid naton pagtugutan ining walay pasunaid, walay gugma nga kalibutan nga magpugong sa aton sa pagpakita sing gugma sa iban. Labaw sa tanan, tinguhaan naton nga mangin suod pa sa matuod nga Dios, si Jehova, nga sa indi madugay magatuman sang iya mahimayaon nga katuyuan sa sini nga duta paagi sa iya Mesianikong Ginharian.—Bugna 21:4, 5.

[Nota]

MGA PAMANGKOT SA PAGTINUON

• Ano nga laygay ang ginhatag ni Jesus sa iya mga disipulo sang manugtaliwan na sia, kag ano ang nagapakita nga nahangpan ini ni Pedro? (Par. 1-2)

• Ano ang ‘mainit nga gugma’? (Par. 3-5)

• Ngaa dapat kita maghigugmaanay? (Par. 6-8)

• Paano mo mapakita nga ginahigugma mo ang iban? (Par. 9-18)

• Ngaa indi tion karon nga magpulupatawhay, kag dapat determinado kita nga himuon ang ano? (Par. 19-20)

[Retrato sa pahina 29]

Ang nagabuligay nga pamilya mas nakahanda sa pagbatas sa mga pag-ipit sining katapusan nga mga adlaw

[Retrato sa pahina 30]

Ang gugma nagapahulag sa aton nga buligan ang mga nagakinahanglan

[Retrato sa pahina 31]

Ang pagpaambit sa iban sing maayong balita sang Ginharian sang Dios isa ka buhat sang gugma