BAHIN 5

Ang Daku nga Baha—Sin-o ang Namati? Sin-o ang Wala?

Ang kalabanan nga tawo sang panahon ni Noe nagahimo sing malain. Genesis 6:5, Ang Pulong sang Dios

Malaut nga mga anghel nga naggamit sang lawas sang tawo kag nagpakig-upod sa mga babayi

Nagpamata kanday Adan kag Eva amo nga nagdamo ang mga tawo sa duta. Sang ulihi, ang iban nga anghel nag-upod man kay Satanas sa pagrebelde.

Nagpanaug sila sa duta kag naggamit sang lawas sang tawo para makapangasawa. Ang ila mga asawa nagbun-ag sing dalagku nga mga bata nga mapintas kag makusog.

Babayi nga nagakugos sang lapsag samtang ginasumbag sia sang bata nga lalaki; ang Nefilim, nga mga anak sang malaut nga mga anghel, nagapamintas

Ang kalibutan napuno sing malain nga mga tawo. Ang Biblia nagsiling: “Ang ginahimo sang mga tawo sa kalibutan puro na lang kalautan, kag ang ila ginahunahuna permi malain.”

Si Noe namati sa Dios kag naghimo sing arka. Genesis 6:13, 14, 18, 19, 22

Maayo nga tawo si Noe. Ginsugiran ni Jehova si Noe nga laglagon Niya ang mga malauton paagi sa daku nga baha.

Si Noe kag ang iya pamilya nagtukod sang arka

Ginsugo man sang Dios si Noe nga maghimo sing daku nga barko, nga ginatawag arka, kag pasudlon niya sa sini ang iya pamilya kag ang tanan nga sahi sang sapat.

Ginapaandaman ni Noe ang mga tawo parte sa manug-abot nga Baha pero ginkadlawan lang nila sia

Ginpaandaman ni Noe ang mga tawo parte sa manug-abot nga Baha, pero wala sila namati. Ginkadlawan sang iban si Noe; ang iban naakig sa iya.

Ginatipon ni Noe kag sang iya pamilya ang mga sapat kag ginapasulod sa arka

Sang natapos ang arka, ginpasulod ni Noe ang mga sapat.