Nasubuan Ka Man Bala kag Nahadlok Kon Kaisa?

Tan-awa ang bata sa piktyur. Daw masubo sia kag nahadlok, indi bala? Nagabatyag ka man bala sina?— Tanan kita ginahadlukan ukon ginasubuan kon kaisa. Mabasa sa Biblia ang parte sa mga abyan ni Jehova nga ginsubuan man kag ginhadlukan. Ang isa sa ila amo si Elias. Istoryahan naton ang parte sa iya.

Nagkabuhi si Elias sa Israel sang una, antes pa natawo si Jesus. Ang hari sang Israel sadto nga si Ahab, wala nagasimba sa matuod nga Dios nga si Jehova. Sia kag ang iya asawa nga si Jezebel nagasimba sa butig nga dios nga si Baal. Gani, mas madamo nga Israelinhon ang nagsimba man kay Baal. Si Rayna Jezebel tuman kalaut kag gusto niya ipapatay ang mga nagasimba kay Jehova, pati si Elias. Bal-an mo bala kon ano ang ginhimo ni Elias?—

Nagpalagyo si Elias! Nagkadto sia sa desyerto kag nagpanago sa isa ka kueba didto. Sa banta mo, ngaa ginhimo niya ini?— Huo, nahadlok sia. Pero indi sia dapat mahadlok. Ngaa? Kay bal-an niya nga buligan sia ni Jehova. Nakita na ni Elias ang iya gahom sadto. Isa ka bes, ginsabat ni Jehova ang iya pangamuyo paagi sa pagpadala sing kalayo halin sa langit. Gani, sigurado nga mabuligan sia ni Jehova subong!

Sang ara sa kueba si Elias, gin-istorya sia ni Jehova kag ginpamangkot: ‘Nagaano ka diri?’ Si Elias nagsabat: ‘Isa na lang ako nga nagasimba sa imo, kag nahadlok ako nga basi patyon man ako.’ Abi ni Elias ginpatay na ang tanan nga nagasimba kay Jehova. Pero ginsilingan sia ni Jehova: ‘Indi ina matuod. May 7,000 pa ka tawo nga padayon nga nagasimba sa akon. Magpakaisog ka, kay madamo pa ako sing ipahimo sa imo!’ Nalipay bala si Elias sa iya nabatian?—

Ano ang matun-an mo sa inagihan ni Elias?— Ginatudlo sini nga indi ka kinahanglan masubuan ukon mahadlok. May mga amigo kag amiga ka nga nagapalangga kay Jehova kag nagapalangga man sa imo. Isa pa, si Jehova gamhanan gid, kag buligan ka niya pirme. Nalipay ka bala kay nabal-an mo ini?—