Mangin Matutom Ka Bala Kaangay ni Elias?

“Ipadala ko sa inyo si Elias nga manalagna sa wala pa mag-abot ang daku kag makakulugmat nga adlaw ni Jehova.”​—⁠MALAQUIAS 4:⁠5.

1. Anong krisis ang natabo pagkatapos nga ang Israel yadto didto sa Ginsaad nga Duta sa mga 500 ka tuig?

“DUTA nga nagailig sing gatas kag dugos.” (Exodo 3:​7, 8) Amo ina ang ginhatag ni Jehova nga Dios sa mga Israelinhon sa tapos sila mahilway gikan sa kahiulipnan sa Egipto sang ika-16 nga siglo B.⁠C.⁠E. Apang tan-awa! Lima ka siglo na ang nagligad, kag karon ang napulo-ka-tribo nga ginharian sang Israel ginahugakom sing daku nga tiggulutom. Mabudlay makakita sing berde nga hilamon. Ang mga kasapatan nagakalamatay, kag wala sing ulan nga nagtupa sa sulod sang tatlo ka tuig kag tunga. (1 Hari 18:​5; Lucas 4:25) Ano ang may salabton sa sining kalamidad?

2. Ano ang kabangdanan sang pungsudnon nga krisis sang Israel?

² Ang apostasya amo ang ginbangdan sini nga problema. Ginsupak ang Kasuguan sang Dios, ginpangasawa ni Hari Acab ang Canaanhon nga prinsesa nga si Jesebel kag gintugutan sia nga pasudlon ang pagsimba kay Baal sa Israel. Ang malain pa, nagpatindog sia sing templo sa sining butig nga dios sa Samaria, ang kabisera nga siudad. Aba, ang mga Israelinhon ginhaylo sa pagpati nga ang pagsimba kay Baal magahatag sa ila sing bugana nga patubas! Apang, subong sang ginpaandam ni Jehova, yara karon sila sa katalagman nga ‘mawala gikan sa ila maayong duta.’​—⁠Deuteronomio 7:​3, 4; 11:​16, 17; 1 Hari 16:​30-33.

Isa ka Tumalagsahon nga Pagtilaw sa Pagka-Dios

3. Paano ginhatagan sing igtalupangod ni manalagna Elias ang matuod nga problema sang Israel?

³ Sang nagsugod ang tiggulutom, ang matutom nga manalagna sang Dios nga si Elias nagsiling kay Hari Acab: “Sa nagakabuhi si Jehova nga Dios sang Israel nga sa atubangan niya nagatindog ako, walay tun-og ukon ulan sining mga tuig, luwas sa mando sang akon pulong!” (1 Hari 17:1) Sa tapos maagom ang makangilidlis nga kamatuoran sining pahibalo, ginbasol sang hari si Elias tungod sang pagpagamo sa Israel. Apang si Elias nagsabat nga si Acab kag ang iya panimalay amo ang balasulon bangod sang ila apostasya subong mga sumilimba ni Baal. Agod malubad ang isyu, ginsugo sang manalagna ni Jehova si Hari Acab nga tipunon ang bug-os nga Israel sa Bukid sang Carmelo upod ang 450 ka manalagna ni Baal kag ang 400 ka manalagna sang sagrado nga haligi. Si Acab kag ang iya mga sinakpan nagtipon didto, ayhan sa paglaum nga tapuson sang okasyon ang tigpalamangag. Apang ginpatuhoy ni Elias ang igtalupangod sa mas importante nga isyu. “Tubtob pa bala san-o,” pamangkot niya, “magpiniang kamo sa tunga sang duha ka magkatuhay nga opinyon? Kon si Jehova amo ang matuod nga Dios, sunda sia; apang kon si Baal, sunda sia.” Ang Israel wala makahibalo kon ano ang isabat.​—⁠1 Hari 18:​18-21.

4. Agod mahusay ang isyu tuhoy sa pagka-Dios, ano ang ginpanugda ni Elias?

⁴ Mga tinuig nga gintilawan sang mga Israelinhon nga impunan sing Baalismo ang pagsimba kay Jehova. Agod malubad ang isyu tuhoy sa pagka-Dios, si Elias nagpanugda sing isa ka paindis-indis. Magahanda sia sing isa ka tinday nga baka para ihalad, kag ang mga manalagna ni Baal magahanda sing isa pa. Si Elias nian nagsiling: “Panawag kamo sa ngalan sang inyo dios, kag ako, sa akon bahin, magapanawag sa ngalan ni Jehova; kag mahanabo nga ang matuod nga Dios nga nagasabat paagi sa kalayo amo ang matuod nga Dios.” (1 Hari 18:​23, 24) Handurawa lamang ang kalayo nga nagapanaug halin sa langit bilang sabat sa isa ka pangamuyo!

5. Paano ginbuyagyag ang pagkawalay pulos sang pagsimba kay Baal?

⁵ Gin-agda ni Elias ang mga manalagna ni Baal sa pagsugod. Naghanda sila sing baka para ihalad kag gintungtong ini sa halaran. Nian naglumpatlumpat sila sa palibot sang halaran, nga nagapangamuyo: “O Baal, sabta kami!” Nagpadayon ini “kutob sa aga tubtob gid sa udto.” “Singgit kamo sing mabaskog,” uligyat ni Elias. Ayhan masako lamang si Baal sa isa ka hilingagawon nga butang, ukon “ayhan nagakatulog sia kag dapat pukawon!” Wala magdugay ang mga manalagna ni Baal naalipungot. Tan-awa! Ginpilas nila ang ila kaugalingon paagi sa mga sundang, kag ang dugo nag-agay gikan sa ila mga pilas. Kag daw ano gid kagahod sang ang tanan nga 450 nagsinggit sing todo! Apang wala sing sabat.​—⁠1 Hari 18:​26-29.

6. Anong paghanda ang ginhimo ni Elias para sa pagtilaw sa pagka-Dios?

⁶ Nag-abot na karon ang turno ni Elias. Nagpatindog sia liwat sing halaran kay Jehova, naghimo sing kalog sa palibot sini, kag nagplastar sang halad. Nian ginpaulaan niya sing tubig ang gatong kag ang halad. Napulog-duha ka dalagku nga banga sing tubig ang gin-ula sa halaran tubtob nga ang kalog mismo napuno. Handurawa ang paghawathawat samtang nagapangamuyo si Elias: “O Jehova, ang Dios ni Abraham, ni Isaac, kag ni Israel, ipakilala sini nga adlaw nga ikaw ang Dios sang Israel kag nga ako imo alagad kag nga tungod sa imo pulong ginhimo ko ini tanan nga butang. Sabta ako, O Jehova, sabta ako, agod nga ini nga katawhan magkilala nga ikaw, si Jehova, amo ang matuod nga Dios kag nga ikaw nagpabalik liwat sang tagipusuon nila.”​—⁠1 Hari 18:​30-37.

7, 8. (a) Paano ginsabat ni Jehova ang pangamuyo ni Elias? (b) Ano ang ginhimo sang mga hitabo sa Bukid sang Carmelo?

⁷ Bilang sabat sa pangamuyo ni Elias, “ang kalayo ni Jehova nahulog halin sa langit kag nag-upos sang halad-nga-sinunog, sang gatong, sang mga bato, kag sang yab-ok, kag nagdilap sang tubig nga yadto sa kalog.” Ang katawhan naghapa kag nagsiling: “Si Jehova amo ang matuod nga Dios! Si Jehova amo ang matuod nga Dios!” (1 Hari 18:​38, 39) Si Elias naghimo karon sing maisugon nga buhat. Sia nagmando: “Dakpa ang mga manalagna ni Baal! Indi pagpapalagyuha ang isa sa ila!” Sa tapos sila mapatay sa nalupyakan sang Cison, ang kalangitan nagdulom sa gal-um. Sa ulihi, gintapos sang mabunok nga ulan ang tigpalamangag!​—⁠1 Hari 18:​40-45; ipaanggid ang Deuteronomio 13:​1-5.

⁸ Daw ano ka daku nga adlaw! Si Jehova nagmadinalag-on sa sining tumalagsahon nga pagtilaw sa pagka-Dios. Dugang pa, ining mga hitabo nagpabalik liwat sang tagipusuon sang madamong Israelinhon sa Dios. Sa sini kag sa iban pa nga mga paagi, si Elias napamatud-an nga matutom subong manalagna, kag personal sia nga nagtungod sing isa ka matagnaon nga papel.

“Si Elias nga Manalagna” Manug-abot Pa?

9. Ano ang gintagna sa Malaquias 4:​5, 6?

⁹ Sang ulihi, paagi kay Malaquias, ang Dios nagtagna: “Tan-awa! Ipadala ko sa inyo si Elias nga manalagna sa wala pa mag-abot ang daku kag makakulugmat nga adlaw ni Jehova. Kag lisuon niya ang tagipusuon sang mga amay sa mga anak, kag ang tagipusuon sang mga anak sa ila mga amay; agod nga basi indi ako mag-abot kag sakiton sing aktuwal ang duta sing pagpakamalaut.” (Malaquias 4:​5, 6) Si Elias nagkabuhi sing mga 500 ka tuig antes ginbungat ining mga pulong. Bangod isa ini ka tagna, ang mga Judiyo sang nahaunang siglo C.⁠E. nagpaabot sang pag-abot ni Elias agod tumanon ini.​—⁠Mateo 17:⁠10.

10. Sin-o ang gintagna nga Elias, kag paano naton nahibaluan?

¹⁰ Sin-o, nian, ining manug-abot nga Elias? Ang pagkilala sa iya ginpahayag sang si Jesucristo nagsiling: “Kutob sa mga adlaw ni Juan Bautista tubtob karon ang ginharian sang mga langit amo ang tulumuron nga ginatinguhaan sang mga tawo, kag ginaagaw ini sang mga pakusog nga nagatinguha sini. Kay ang tanan, ang mga Manalagna kag ang Kasuguan, nagpanagna tubtob kay Juan; kag kon luyag ninyo nga batunon ini, Sia mismo amo ‘si Elias nga gintangdo nga magakari.’ ” Huo, si Juan Bautista amo ang gintagna nga katumbas ni Elias. (Mateo 11:​12-14; Marcos 9:​11-13) Isa ka anghel ang nagsiling sa amay ni Juan, nga si Zacarias, nga si Juan magatigayon sing “espiritu kag gahom ni Elias” kag ‘magahanda kay Jehova sing isa ka nahanda nga katawhan.’ (Lucas 1:17) Ang bawtismo nga ginhimo ni Juan isa ka publiko nga simbulo sang paghinulsol sang isa ka indibiduwal sa iya mga kasal-anan batok sa Kasuguan, nga magatuytoy sa mga Judiyo pakadto kay Cristo. (Lucas 3:​3-6; Galacia 3:24) Busa ang hilikuton ni Juan ‘naghanda sing isa ka nahanda nga katawhan kay Jehova.’

11. Sa Pentecostes, ano ang ginsiling ni Pedro tuhoy sa “adlaw ni Jehova,” kag san-o ini natabo?

¹¹ Ang hilikuton ni Juan Bautista subong “Elias” nagpakita nga ang “adlaw ni Jehova” malapit na. Ang kalapiton sina nga adlaw nga ang Dios magapanghikot batok sa iya mga kaaway kag magaamlig sa iya katawhan ginpakita man ni apostol Pedro. Ginpakita niya nga ang milagruso nga mga hitabo sang Pentecostes sang 33 C.⁠E. katumanan sang tagna ni Joel tuhoy sa pagpasagahay sing espiritu sang Dios. Ginpakita ni Pedro nga mahanabo ini sa wala pa ang “daku kag dayag nga adlaw ni Jehova.” (Binuhatan 2:​16-21; Joel 2:​28-32) Sadto sang 70 C.⁠E. nga gintuman ni Jehova ang iya Pulong paagi sa pagtugot sa Romanong hangaway sa pagpatuman sing balaan nga paghukom sa pungsod nga nagsikway sa iya Anak.​—⁠Daniel 9:​24-27; Juan 19:⁠15.

12. (a) Ano ang ginsiling nanday Pablo kag Pedro tuhoy sa nagapakari nga “adlaw ni Jehova”? (b) Ngaa may pat-od gid nga butang nga mahanabo subong sang ginrepresentar sang hilikuton ni Elias?

¹² Apang, may dugang pa nga mahanabo pagkatapos sang 70 C.⁠E. Gin-angot ni apostol Pablo ang nagapakari nga “adlaw ni Jehova” sa presensia ni Jesucristo. Dugang pa, nagpamulong si apostol Pedro tuhoy sa sinang adlaw may kaangtanan sa palaabuton nga “bag-ong mga langit kag bag-ong duta.” (2 Tesalonica 2:​1, 2; 2 Pedro 3:​10-13) Dumduma nga si Juan Bautista naghimo sing hilikuton nga kaangay kay Elias antes mag-abot ang “adlaw ni Jehova” sang 70 C.E. Kon tingubon tanan ginpakita sini nga may butang pa nga mahanabo subong sang ginrepresentar sang hilikuton nga ginhimo ni Elias. Ano ina?

May Espiritu Sila ni Elias

13, 14. (a) Sa ano magkaanggid ang mga ginhimo ni Elias kag sang karon nga hinaplas nga mga Cristiano? (b) Ano ang ginhimo sang mga apostata sang Cristiandad?

¹³ Ang hilikuton ni Elias indi lamang kaanggid sa mga ginhimo ni Juan Bautista kundi sa iya man sang hinaplas nga mga Cristiano sa sining makahalanguyos nga panag-on nga nagadul-ong tubtob sa nagapakari nga “adlaw ni Jehova.” (2 Timoteo 3:​1-5) Upod ang espiritu kag gahom ni Elias, mainunungon sila nga mga sumalakdag sang matuod nga pagsimba. Kag kinahanglanon gid ini! Sang napatay ang mga apostoles ni Cristo, may yara apostasya gikan sa matuod nga Cristianismo, kaangay sang pag-uswag sang pagsimba kay Baal sa Israel sang panahon ni Elias. (2 Pedro 2:1) Gin-impon sang nagapangangkon nga mga Cristiano ang Cristianismo sa mga doktrina kag mga buhat sang butig nga relihion. Halimbawa, ginbaton nila ang pagano kag dimakasulatanhon nga panudlo nga ang tawo nagapanag-iya sing dimamalatyon nga kalag. (Manugwali 9:​5, 10; Ezequiel 18:4) Ang mga apostata sang Cristiandad wala na maggamit sang ngalan sing isa lamang ka matuod nga Dios, si Jehova. Sa baylo, nagasimba sila sa isa ka Trinidad. Ginbaton man nila ang kaangay kay Baal nga buhat sang pagyaub sa mga imahen ni Jesus kag sang iya iloy, si Maria. (Roma 1:​23; 1 Juan 5:21) Apang indi lang ina.

¹⁴ Kutob sang ika-19 nga siglo padayon, ang mga lider sang mga simbahan sang Cristiandad nagsugod sa pagpabutyag sing pangduhaduha sa madamo nga bahin sang Biblia. Halimbawa, ginsikway nila ang rekord sang Genesis tuhoy sa pagpanuga kag gindayaw ang teoriya sang ebolusyon, nagatawag sini nga “sientipiko.” Supak gid ini sa mga panudlo ni Jesucristo kag sang iya mga apostoles. (Mateo 19:​4, 5; 1 Corinto 15:47) Apang, kaangay ni Jesus kag sang iya unang mga sumulunod, ginasakdag sang hinaplas-sing-espiritu nga mga Cristiano karon ang rekord sang Biblia tuhoy sa pagpanuga.​—⁠Genesis 1:⁠27.

15, 16. Kabaliskaran sa Cristiandad, sin-o ang nagaagom sing tayuyon nga mga aman sang espirituwal nga pagkaon, kag sa anong mga paagi?

¹⁵ Samtang ang kalibutan nagasulod sa “tion sang katapusan,” isa ka espirituwal nga tiggulutom ang naghugakom sa Cristiandad. (Daniel 12:​4; Amos 8:​11, 12) Apang ang diutay nga grupo sang hinaplas nga mga Cristiano nag-agom sing tayuyon nga mga aman sang hatag-Dios nga espirituwal nga pagkaon “sa nagakaigo nga tion,” subong sang pagpat-od ni Jehova nga si Elias ginpakaon sadtong tiggulutom sang panahon niya. (Mateo 24:​45; 1 Hari 17:​6, 13-16) Kilala anay subong International Bible Students, ginbaton sang ulihi sining matutom nga mga alagad sang Dios ang Makasulatanhon nga ngalan nga Mga Saksi ni Jehova.​—⁠Isaias 43:⁠10.

¹⁶ Si Elias nagkabuhi suno sa iya ngalan, nga nagakahulugan “Ang Akon Dios Amo si Jehova.” Subong ang opisyal nga balasahon sang dutan-on nga mga alagad ni Jehova, Ang Lalantawan padayon nga naggamit sa ngalan sang Dios. Sa katunayan, ang ikaduhang guwa sini (Agosto 1879) nagpabutyag sing pagsalig nga si Jehova ang nagasakdag sa magasin. Ginbuyagyag sini nga balasahon kag sang iban pa nga mga publikasyon sang Watch Tower Society ang dimakasulatanhon nga mga panudlo sang Cristiandad kag sang nabilin pa nga bahin sang Babilonia nga Daku, ang bug-os kalibutan nga emperyo sang butig nga relihion, samtang ginasakdag ang pagkamaminatud-on sang Pulong sang Dios, ang Biblia.​—⁠2 Timoteo 3:​16, 17; Bugna 18:​1-5.

Matutom sa Idalom Sang Pagtilaw

17, 18. Ano ang reaksion ni Jesebel sa pagpamatay sa mga manalagna ni Baal, kag paano ginbuligan si Elias?

¹⁷ Ang reaksion sang klero sa mga pagbuyagyag kaanggid sa reaksion ni Jesebel sang mahibal-an niya nga ginpatay ni Elias ang mga manalagna ni Baal. Ginpadalhan niya sing mensahe ang matutom nga manalagna ni Jehova, nagasumpa nga ipapatay sia. Indi ini isa ka walay pulos nga pamahog, kay madamo na nga manalagna sang Dios ang ginpatay ni Jesebel. Sa kahadlok, si Elias nagpalagyo sa bagatnan-katundan padulong sa Beer-seba. Ginbilin didto ang iya alagad, nagpalayo pa gid sia, pakadto sa kamingawan, nangamuyo nga mapatay. Apang wala ginpabayaan ni Jehova ang iya manalagna. Isa ka anghel ang nagpakita kay Elias agod ihanda sia para sa malawig nga paglakbay pakadto sa Bukid sang Horeb. Busa nakabaton sia sing pagkaon sa sulod sang 40-ka-adlaw nga paglakbay nga may kalawigon nga kapin sa 300 kilometros. Sa Horeb, ang Dios nagpamulong sa iya pagkatapos sang makahalawhaw nga pagpakita sing gahom sa isa ka mabaskog nga hangin, linog, kag kalayo. Wala si Jehova sa sining mga pagpadayag. Mga ekspresyon lamang ini sang iya balaan nga espiritu, ukon aktibo nga kusog. Nian nakighambal si Jehova sa iya manalagna. Handurawa kon paano gid napabakod si Elias sa sining eksperiensia. (1 Hari 19:​1-12) Ano abi kon, kaangay ni Elias, daw sa mahadlukan kita kon ginapahog sang mga kaaway sang matuod nga pagsimba? Ang iya eksperiensia magabulig sa aton nga mahangpan nga wala ginapabayaan ni Jehova ang iya katawhan.​—⁠1 Samuel 12:⁠22.

¹⁸ Gin-athag sang Dios nga si Elias may dapat pa himuon subong isa ka manalagna. Isa pa, walay sapayan nga naghunahuna si Elias nga nagaisahanon lamang sia nga sumilimba sang matuod nga Dios sa Israel, ginpakita ni Jehova sa iya nga 7,000 ang wala magyaub kay Baal. Nian ginpabalik sang Dios si Elias sa iya asaynment. (1 Hari 19:​13-19) Kaangay ni Elias, mahimo kita hingabuton sang mga kaaway sang matuod nga pagsimba. Mahimo kita mangin mga sentro sang daku nga paghingabot, subong sang gintagna ni Jesus. (Juan 15:​17-20) Kon kaisa, mahimo kita magapangalag-ag. Apang, sarang kita mangin kaangay ni Elias, nga nakabaton sing mga pasalig sa Dios kag nian matutom nga nagpadayon sa pag-alagad kay Jehova.

19. Ano ang naeksperiensiahan sang hinaplas nga mga Cristiano sadtong Inaway Kalibutanon I?

¹⁹ Bangod sang daku nga paghingabot sadtong Inaway Kalibutanon I, ang pila ka hinaplas nga Cristiano hinadlukan kag nag-untat sa pagbantala. Nagsala sila sa paghunahuna nga ang ila hilikuton sa duta natapos na. Apang wala sila pagsikwaya sang Dios. Sa baylo, maluluy-on nga ginsakdag niya sila, subong sang pag-aman niya sing pagkaon kay Elias. Kaangay ni Elias, ginbaton sang matutom nga mga hinaplas ang pagtadlong sang Dios kag nakapanumbalik gikan sa pagkadiaktibo. Ang ila mga mata nabuksan sa dakung pribilehiyo nga ibantala ang mensahe sang Ginharian.

20. Sa karon, anong pribilehiyo ang ginhatag sa mga matutom kaangay ni Elias?

²⁰ Sa iya tagna tuhoy sa iya presensia, ginbalay ni Jesus ang bug-os kalibutan nga hilikuton nga matapos sa wala pa ang katapusan sining malauton nga sistema sang mga butang. (Mateo 24:14) Sa karon, ining hilikuton ginahimo sang hinaplas nga mga Cristiano kag sang ila minilyon ka kaupdanan nga nagapaabot nga magkabuhi sa paraiso nga duta. Ang paghimo sang pagbantala sing Ginharian nga hilikuton tubtob matapos ini isa ka pribilehiyo nga ginhatag lamang sa mga matutom kaangay ni Elias.

Mangin Matutom Kaangay ni Elias

21, 22. (a) Anong hilikuton ang ginapangunahan karon sang hinaplas nga mga Cristiano? (b) Paagi sa anong bulig ginahimo ang pagbantala nga hilikuton, kag ngaa kinahanglan ini?

²¹ May kakugi kaangay ni Elias, ang diutay nga nagkalabilin sang matuod nga hinaplas nga mga Cristiano naghimo sang ila responsabilidad nga pag-atipan sa dutan-on nga mga interes sang nagalingkod na sa trono nga Hari, si Jesucristo. (Mateo 24:47) Kag kapin na sa 60 ka tuig karon, ginagamit sang Dios ining mga hinaplas sa pagpanguna sa hilikuton nga paghimo sing mga disipulo sang katawhan nga sa ila ginhatag niya ang makalilipay nga paglaum nga mabuhi sing dayon sa paraiso nga duta. (Mateo 28:​19, 20) Daw ano gid ang pagpasalamat sining minilyon nga ang diutay lamang nga nagkalabilin nga mga hinaplas makugi kag matutom nga nag-atipan sang ila mga responsabilidad!

²² Ining pagbantala sing Ginharian nga hilikuton ginhimo sang dihimpit nga mga tawo kag paagi lamang sa kusog nga ginahatag ni Jehova sa mga mapangamuyuon nga nagasalig sa iya. “Si Elias isa ka tawo nga may balatyagon kaangay sa aton,” siling ni disipulo Santiago sang ginhatag ang halimbawa sang manalagna sa pagpangamuyo agod ipakita ang kusog sang pangamuyo sang isa ka matarong nga tawo. (Santiago 5:​16-18) Si Elias wala pirme magpanagna ukon maghimo sing mga milagro. May tawhanon nga mga balatyagon kag mga kaluyahon man sia kaangay naton, apang nag-alagad sia sa Dios sing matutom. Sanglit may bulig kita sang Dios kag ginapabakod niya kita, sarang kita mangin matutom kaangay ni Elias.

23. Ngaa may maayong rason kita para magmatutom kag maglaum para sa mas maayo nga butang?

²³ May maayong rason kita para magmatutom kag maglaum sing mas maayo nga butang. Dumduma nga si Juan Bautista naghimo sing hilikuton nga kaangay kay Elias sa wala pa mag-abot ang “adlaw ni Jehova” sadtong 70 C.⁠E. May espiritu kag gahom ni Elias, ginhimo sang hinaplas nga mga Cristiano ang kaanggid nga hatag-Dios nga hilikuton sa bug-os nga duta. Nagapamatuod ini sing maathag nga ang dakung “adlaw ni Jehova” malapit na.

Paano Mo Sabton?

◻ Paano ang pagka-Dios ni Jehova ginpamatud-an sa Bukid sang Carmelo?

◻ Sin-o ‘si Elias nga magaabot’ kag ano ang ginhimo niya?

◻ Paano ginpakita sang karon nga hinaplas nga mga Cristiano nga may espiritu sila ni Elias?

◻ Ngaa posible para sa aton nga magmatutom kaangay ni Elias?

[Kahon sa pahina 15]

Diin nga Mga Langit Nagsaka Si Elias?

“SANG nagalakat pa [sanday Elias kag Eliseo], nga nagahambalanay samtang nagalakat, aba, yari karon! isa ka nagakalayo nga kangga sang inaway kag nagakalayo nga mga kabayo, kag nagbulag sa ila nga duha; kag si Elias nagsaka sa mga langit paagi sa buhawi.”​—⁠2 Hari 2:⁠11.

Ano ang buot silingon sang tinaga nga “mga langit” sa sining hitabo? Ang termino nagaaplikar kon kaisa sa espirituwal nga puluy-an sang Dios kag sa iya mga anak nga anghel. (Mateo 6:​9; 18:10) Ang “mga langit” mahimo man magkahulugan sa pisikal nga uniberso. (Deuteronomio 4:19) Kag ginagamit sang Biblia ining termino sa pagpatuhoy sa malapit nga atmospera sang duta, diin nagalupad ang mga pispis kag nagahuyop ang hangin.​—⁠Salmo 78:​26; Mateo 6:⁠26.

Diin sining mga langit nagsaka si manalagna Elias? Sing maathag, ginliton sia paagi sa atmospera sang duta kag ginbutang sa lain nga bahin sang globo. Si Elias yara gihapon sa duta mga tinuig sang ulihi, kay nagsulat sia kay Hari Jehoram sang Juda. (2 Cronica 21:​1, 12-15) Ang indi pagsaka ni Elias sa espirituwal nga puluy-an ni Jehova nga Dios ginpamatud-an sang ulihi ni Jesucristo, nga nagsiling: “Wala sing tawo nga nakasaka sa langit kundi sia nga nanaug gikan sa langit, ang Anak sang tawo,” nga amo, si Jesus mismo. (Juan 3:13) Ang dalan pakadto sa langitnon nga kabuhi una nga nabuksan sa dihimpit nga mga tawo sa tapos mapatay, mabanhaw, kag magkayab si Jesucristo.​—⁠Juan 14:​2, 3; Hebreo 9:​24; 10:​19, 20.