Mga Miting nga ‘Nagapahulag sa Gugma kag Maayong mga Buhat’

SA BUG-OS nga siglo, ang katawhan ni Jehova organisado nga nagatipon sing tingob. Sa dumaan nga Israel, ang tanan nga lalaki nagakadto sa Jerusalem para sa tatlo ka dalagku nga kapiestahan. (Deut. 16:16) Sang unang siglo, regular nga nagatipon ang mga Cristiano, nga sa masami ginahiwat sa isa ka balay. (Filem. 1, 2) Sa karon, may mga miting kita, asembleya, kag kombension. Ngaa nagatipon sing tingob ang mga alagad sang Dios? Una sa tanan, bangod importante ini nga bahin sang aton pagsimba.—Sal. 95:6; Col. 3:16.

² Makabenepisyo man ang mga nagatambong sa mga miting. Tuhoy sa kada ikapito nga Kapiestahan sang mga Payagpayag, ang mga Israelinhon ginsilingan: “Tipuna ang katawhan, ang mga lalaki, ang mga babayi, ang mga kabataan, kag ang dumuluong nga mga pumuluyo sa sulod sang inyo mga siudad, agod magpamati sila kag makatuon kag magkahadlok kay Jehova nga inyo Dios kag tumanon nila ang tanan nga pulong sining Kasuguan.” (Deut. 31:12) Maathag nga ang importante nga rason sang pagtipon sing tingob amo ang ‘pagpatudlo kay Jehova.’ (Isa. 54:13) Ang mga pagtilipon nagahatag man sing kahigayunan sa aton para makilala sing maayo ang isa kag isa, mapalig-on, kag mapabakod paagi sa pag-updanay.

MGA MITING SANG KONGREGASYON

³ Ang mga disipulo nga nagtipon sa tapos sang Pentecostes 33 C.E. nag-ukod sa pagtuon sang mga ginatudlo sang mga apostoles, kag sa “adlaw-adlaw nagatipon sila sa templo nga may isa ka katuyuan.” (Binu. 2:42, 46) Sang ulihi, sang ang mga Cristiano nagtipon agod magsimba, ginabasa nila ang inspirado nga mga sinulatan, lakip na ang mga sulat sang mga apostoles kag sang iban nga Cristiano nga mga disipulo. (1 Cor. 1:1, 2; Col. 4:16; 1 Tes. 1:1; Sant. 1:1) May pangamuyo man sang kongregasyon. (Binu. 4:24-29; 20:36) Kon kaisa, ginasaysay ang mga eksperiensia sa latagon sang pagmisyonero. (Binu. 11:5-18; 14:27, 28) Ginabinagbinag ang mga doktrina sang Biblia kag ang katumanan sang mga tagna. Ginahatag ang instruksion tuhoy sa kalahamut-an nga Cristianong paggawi kag diosnon nga debosyon. Ang tanan ginapalig-on nga mangin makugi nga mga manugbantala sing maayong balita.—Roma 10:9, 10; 1 Cor. 11:23-26; 15:58; Efe. 5:1-33.

⁴ Sa aton tion, ginasunod sa Cristianong mga pagtilipon ang sulundan nga ginpahamtang sang mga apostoles. Ginasunod naton ang laygay sa Hebreo 10:24, 25: “Hunahunaon naton ang isa kag isa . . . , nga wala ginapabay-an ang aton pagtilipon, subong sang kinabatasan sang iban, kundi nagapalig-unay sa isa kag isa, kag labi na gid samtang nakita ninyo nga malapit na ang adlaw.” Sa sining mabudlay nga katapusan nga mga adlaw, kinahanglan naton ang dugang nga pagpalig-on gikan sa regular nga pagtilipon agod mahuptan ang espirituwal nga kabakod kag Cristianong integridad. (Roma 1:11, 12) Subong mga Cristiano, nagakabuhi kita sa tunga sang kaliwatan nga tiko kag balingag. Ginasikway naton ang pagkadidiosnon kag kalibutanon nga mga kailigbon. (Fil. 2:15, 16; Tito 2:12-14) Sa pagkamatuod, may updan pa bala kita magluwas sa katawhan ni Jehova? (Sal. 84:10) Kag may mas mapuslanon pa bala sangsa magtuon kag maghinun-anon sa Pulong sang Dios? Binagbinaga ang lainlain nga miting nga ginahiwat para sa aton kaayuhan.

WEEKEND MEETING

⁵ Ang una nga bahin sang weekend meeting amo ang diskurso sa Biblia nga gindesinyo gid para sa publiko, nga ang pila mahimo nga amo pa lang nakatambong sa miting. Ang pamulongpulong publiko importante gid agod mapun-an sang mga bag-uhan kag mga manugbantala sang kongregasyon ang ila espirituwal nga mga kinahanglanon.—Binu. 18:4; 19:9, 10.

⁶ Si Cristo Jesus, ang iya mga apostoles, kag ang ila kaupdanan nagadumala sing mga miting publiko nga kaanggid sa ginahimo subong sang mga kongregasyon sang katawhan ni Jehova. Indi gid maduhaduhaan nga si Jesus amo ang pinakamaayo nga mamulongpulong sa publiko nga nagkabuhi sa duta. May nagsiling parte sa iya: “Wala pa gid sing tawo nga nakahambal kaangay sini.” (Juan 7:46) Si Jesus naghambal nga may awtoridad, amo nga nahayanghag ang iya tagpalamati. (Mat. 7:28, 29) Madamo ang benepisyo sang mga nagapamati kag nagaaplikar sang iya mensahe. (Mat. 13:16, 17) Ginsunod sang mga apostoles ang iya halimbawa. Sa Binuhatan 2:14-36, mabasa naton ang makapakumbinsi nga pamulongpulong ni Pedro sang Pentecostes 33 C.E. Linibo ang napahulag bangod sang ila nabatian. Sang ulihi, may mga tawo nga nangin tumuluo sang nabatian nila ang diskurso ni Pablo sa Atenas.—Binu. 17:22-34.

⁷ Minilyon man karon ang nakabenepisyo sa mga pamulongpulong publiko kada semana nga ginahiwat sa mga kongregasyon kag sa mga pamulongpulong publiko nga ginapresentar sa mga asembleya kag kombension. Ina nga mga pamulongpulong nagabulig sa aton nga madumduman pirme ang Cristianong mga panudlo kag magpabilin nga malig-on sa pag-alagad sa Ginharian. Paagi sa pag-agda sa mga interesado kag sa publiko, daku ang aton mahimo agod mangin pamilyar ang mga tawo sa panguna nga mga panudlo sang Biblia.

⁸ Lainlain nga topiko ang ginabinagbinag sa mga pamulongpulong publiko. Ang mga pamulongpulong nagabinagbinag sang doktrina kag tagna sang Biblia, mga prinsipio sa Kasulatan kag laygay parte sa pagkabuhi sang pamilya kag pag-asawahay, mga problema sang mga pamatan-on, kag Cristianong moralidad. Ang pila ka pamulongpulong nasentro sa makatilingala nga pagpanuga ni Jehova. Ang iban nagapadaku sang huwaran nga pagtuo, kaisog, kag integridad sang lainlain nga karakter sa Biblia, nga nagapatalupangod sang mga leksion para sa aton karon.

⁹ Agod makabenepisyo sing bug-os sa mga pamulongpulong publiko, importante gid nga mamati kita sing maayo, pangitaon ang mga teksto nga ginasambit sang humalambal, kag sundan sia samtang ginabasa kag ginapaathag ini. (Luc. 8:18) Kon ginapat-od naton ang mga butang nga ginbinagbinag, mangin determinado kita nga himuon pirme ang aton natun-an kag iaplikar ini.—1 Tes. 5:21.

¹⁰ Kon may bastante nga humalambal, pat-od gid nga may pamulongpulong publiko ang kongregasyon kada semana. Sa masami, mangin posible ini paagi sa pag-agda sing mga humalambal gikan sa kaingod nga mga kongregasyon. Bisan diutay lamang ang mga humalambal, ini nga mga pamulongpulong ginahatag sing regular tubtob posible.

¹¹ Ang ikaduha nga bahin sang weekend meeting amo ang Pagtinuon sa Ang Lalantawan, nga isa ka pamangkot kag sabat nga paghinun-anon sa mga artikulo sa tulun-an nga edisyon sang Ang Lalantawan. Paagi sa Ang Lalantawan, ginaamanan kita ni Jehova sing suno sa tion nga espirituwal nga pagkaon.

¹² Ang tulun-an nga mga artikulo masami nagabinagbinag kon paano iaplikar ang mga prinsipio sang Biblia sa adlaw-adlaw nga pagkabuhi. Nagapabakod ini sa mga Cristiano batok sa “espiritu sang kalibutan” kag indi matinlo nga paggawi. (1 Cor. 2:12) Ang Lalantawan nagahatag sa aton sing dugang nga kasanag sa doktrina kag tagna sang Biblia, gani ang tanan makadungan sa kamatuoran kag makapabilin sa banas sang mga matarong. (Sal. 97:11; Hulu. 4:18) Ang pagtambong sa Pagtinuon sa Ang Lalantawan kag pagkomento sa sini magabulig sa aton nga magkasadya sa paglaum tuhoy sa matarong nga bag-ong kalibutan ni Jehova. (Roma 12:12; 2 Ped. 3:13) Ang aton Cristianong pag-inupdanay nagabulig sa aton nga mapalambo ang mga kinaiya nga ginapatubas sang espiritu kag nagapabaskog sang aton handum nga alagaron sing makugi si Jehova. (Gal. 5:22, 23) Nagapabakod ini sa aton nga mabatas ang mga pagtilaw kag matukod ang “isa ka maayo nga sadsaran para sa palaabuton” agod “makapanguyapot [kita] sing malig-on sa matuod nga kabuhi.”—1 Tim. 6:19; 1 Ped. 1:6, 7.

¹³ Paano kita makapanginpulos sing bug-os sa sini nga espirituwal nga pagpakaon? Dapat naton tun-an sing abanse ang pagatun-an, subong indibiduwal ukon pamilya, tan-awon ang ginsambit nga mga teksto, kag magkomento sa aton kaugalingon nga mga tinaga sa tion sang miting. Magabulig ini para magtudok gid ang kamatuoran sa aton tagipusuon, kag makabenepisyo ang iban samtang ginapamatian nila ang aton pagpabutyag sang pagtuo. Paagi sa pagpamati sing maayo sa mga komento sang iban, makabenepisyo kita sa pagtinuon kada semana.

MIDWEEK MEETING

¹⁴ Kada semana, ang mga kongregasyon nagatipon sa Kingdom Hall para sa programa nga ginatawag nga Ang Aton Cristianong Pagkabuhi kag Pagministeryo. Ini nga miting may tatlo ka bahin nga gindesinyo para mabuligan kita nga mangin “kalipikado gid” subong mga ministro sang Dios. (2 Cor. 3:5, 6) Ang iskedyul kag materyal makita sa bulanan nga Ang Aton Cristianong Pagkabuhi kag Pagministeryo—Workbook Para sa Miting. Ang Pagkabuhi kag Pagministeryo nga Workbook Para sa Miting nagalakip man sang mga sampol nga mga pag-istoryahanay nga magamit sa ministeryo.

¹⁵ Ang nahauna nga bahin sini nga miting, ginatawag nga Mga Bahandi sa Pulong sang Dios, magabulig sa aton nga mangin pamilyar sa background kag konteksto sang mga rekord sa Biblia kag kon paano ini maaplikar. Ang miting magalakip sing pamulongpulong, pagbasa, kag paghinun-anon pasad sa semanal nga pagbasa sa Biblia. Agod matudlo ini nga mga rekord, ginlakip sa Pagkabuhi kag Pagministeryo nga Workbook Para sa Miting ang mga visual aid kag worksheet. Ining madalom nga pagbinagbinag sa Biblia mapuslanon sa aton personal nga kabuhi kag sa aton panudlo, agod lubos ang aton ‘ikasarang, kag masangkapan kita sing bug-os para sa tagsa ka maayong buhat.’—2 Tim. 3:16, 17.

¹⁶ Ang ikaduha nga bahin sang miting, Mangin Epektibo sa Ministeryo, gindesinyo agod mahatagan sing kahigayunan ang tanan nga makapraktis para sa ministeryo kag mapauswag ang ila ikasarang sa pagbantala kag pagtudlo. Dugang pa sa mga asaynment sang estudyante, ginabinagbinag man ang mga video sang sampol nga mga pag-istoryahanay. Ini nga bahin sang miting magabulig sa aton nga matigayon ang ‘dila sang natudluan agod masabat naton sing husto nga mga pulong ang mga ginalapyo.’—Isa. 50:4.

¹⁷ Ang ikatlo nga bahin, Pagkabuhi Bilang Cristiano, magabinagbinag sang praktikal nga mga prinsipio sang Biblia sa matag-adlaw nga pagkabuhi. (Sal. 119:105) Ang panguna nga bahin sini amo ang Pagtinuon sang Kongregasyon sa Biblia. Pareho sang Pagtinuon sa Ang Lalantawan, isa man ini ka pamangkot kag sabat nga paghinun-anon.

¹⁸ Kada bulan kon mabaton ang bag-o nga Pagkabuhi kag Pagministeryo nga Workbook Para sa Miting, ang koordenitor sang hubon sang mga gulang, ukon ang gulang nga nagabulig sa iya, mahalungon nga magabinagbinag sini kag magahimo sing iskedyul. Kada semana, isa ka gulang nga maayo nga manunudlo kag gin-aprobahan sang hubon sang mga gulang magaalagad subong tsirman sang miting. Ang iya responsibilidad nagalakip sa pagpat-od nga ang miting magaumpisa kag matapos sa tion kag ang paghatag sing komendasyon kag laygay sa mga estudyante nga may asaynment.

¹⁹ Samtang regular nga ginahandaan, ginatambungan, kag ginapakigbahinan naton ang Pagkabuhi kag Pagministeryo nga Miting, matigayon naton ang ihibalo halin sa Kasulatan, ang paghangop sa mga prinsipio sang Biblia, ang kompiansa sa pagbantala sang maayong balita, kag ang kalantip sa paghimo sang disipulo. Ang mga nagatambong nga indi pa bawtismado nga Saksi makabenepisyo man sa maayo nga pagpakig-upod kag makapalig-on sa espirituwal nga pagpakighinun-anon. Agod mabuligan kita nga mahandaan ini nga bahin kag ang iban pa, magamit naton ang Watchtower Library, JW Library^®, Watchtower ONLINE LIBRARY^™ (kon yara ini sa imo lenguahe), kag ang librarya sa Kingdom Hall. Ang librarya sa Kingdom Hall may mga publikasyon sang mga Saksi ni Jehova, mga Watch Tower Publications Index ukon Giya sa Pagtuon Para sa mga Saksi ni Jehova, subong man may pila ka badbad sang Biblia, konkordansia, diksionaryo, kag iban pa nga mapuslanon nga reperensia. Ini nga librarya mahimo gamiton sang bisan sin-o antes ukon pagkatapos sang mga miting.

MGA MITING PARA SA PAG-ALAGAD SA LATAGON

²⁰ Sa lainlain nga oras sa sulod sang semana kag sa talipuspusan sang mga semana, ang mga grupo sang mga manugbantala nagatipon sing makadali sa mga miting para sa pag-alagad sa latagon. Ini nga mga miting kinaandan na nga ginahiwat sa pribado nga mga balay ukon sa iban pa nga kombeniente nga mga lugar. Mahimo man gamiton ang Kingdom Hall para sa sini. Ang gamay nga mga grupo nga nagatipon sa lainlain nga lokasyon sa teritoryo magapahapos sa mga manugbantala nga makabiyahe pakadto sa miting para sa pag-alagad kag sa teritoryo. Magapadali ini sa pag-organisar sa mga manugbantala kag makakadto gilayon sa teritoryo. Mas matatap sing maayo sang manugtatap sang grupo ang iya miembro. Bisan pa may mga bentaha nga magtipon ang grupo sa lainlain nga lugar, may mga kahimtangan nga kinahanglan magtingob ang pila ka grupo. Halimbawa, sa mga adlaw magluwas sa talipuspusan sang semana, kon gamay lang ang nagabantala, mahimo nga may bentaha nga magtipon sing tingob ang mga grupo ukon ang tanan sa Kingdom Hall ukon sa iban pa nga nagakaigo nga lokasyon. Sa sini nga paagi, may maupod ang mga manugbantala sa pagministeryo. Mahimo nga makita man sang kongregasyon nga kombeniente kon magtipon sing tingob sa Kingdom Hall sa nahauna nga Sabado sang bulan kag sa tion nga holiday. Ukon mahimo nga magdesisyon ang kongregasyon nga tingbon ang miting para sa pag-alagad sa latagon sa tapos sang Pagtinuon sa Ang Lalantawan.

²¹ Kon nagatipon ang mga grupo sa magkatuhay nga lokasyon, ang manugtatap sang grupo amo ang magadumala sa miting para sa pag-alagad sa latagon. Kon kaisa, mahimo i-asayn sang manugtatap sang grupo ang iya kabulig ukon ang iban pa nga kalipikado nga utod nga lalaki sa pagdumala sina nga miting. Ang nagadumala dapat handa sa pagbinagbinag sang praktikal kag mapuslanon nga mga punto sa pagministeryo. Ginahimo niya ang mga kahimusan sa pag-alagad sa latagon, kag isa sa grupo ang magapangamuyo. Kag gilayon nga makadto ang grupo sa teritoryo. Ina nga miting mga lima asta pito ka minutos ang kalawigon, pero mas malip-ot pa ini kon nagasunod ini sa miting sang kongregasyon. Dapat magahatag ini sing pagpalig-on, praktikal nga mga instruksion, kag panuytoy sa mga magabantala. Ang mga bag-uhan ukon ang iban nga nagakinahanglan sing bulig mahimo makapanghikot upod sa mga eksperiensiado nga mga manugbantala para mahanas.

MGA KAHIMUSAN SANG MITING SA BAG-O UKON MAGAMAY NGA MGA KONGREGASYON

²² Samtang nagadamo ang mga disipulo, nagadamo man ang kongregasyon. Kinaandan na nga ang manugtatap sang sirkito ang nagapadala sang aplikasyon para sa bag-o nga kongregasyon. Apang, sa pila ka kahimtangan, mahimo nga mas maayo para sa magamay nga mga grupo nga makig-upod sa pinakamalapit nga kongregasyon.

²³ Kon kaisa, mga utod nga babayi lamang ang katapo sang magamay nga mga kongregasyon. Kon amo sini ang kahimtangan, dapat magtakdong ang utod nga babayi nga nagapangamuyo sa kongregasyon ukon nagadumala sing mga miting, nahisanto sa kahimusan sa Kasulatan. (1 Cor. 11:3-16) Sa kalabanan nga kahimtangan, nagapungko sia nga nagaatubang sa grupo. Indi maghatag sing diskurso sa mga miting ang mga utod nga babayi. Sa baylo, basahon nila kag komentuhan ang materyal nga gin-aman sang organisasyon, ukon mahimo nila ini binagbinagon paagi sa paghinun-anon ukon pasundayag. Pangabayon sang sanga talatapan ang isa sa mga utod nga babayi nga magabaton kag magapadala sing mga sulat sa talatapan kag magadumala sang mga miting. Sa ulihi, kon may kalipikado na nga mga utod nga lalaki, sila ang magatatap sa sini nga mga responsibilidad.

MGA SIRKITO NGA ASEMBLEYA

²⁴ Kada tuig, ang mga kongregasyon nga naasayn sa isa ka sirkito nagatipon sing duha ka beses para sa sirkito nga asembleya, nga ginahiwat sing tig-isa ka adlaw. Ining makalilipay nga mga pagtilipon nagahatag sa tanan nga tumalambong sing kahigayunan agod ‘mabuksan sing masangkad ang ila tagipusuon’ sa Cristiano nga pag-updanay. (2 Cor. 6:11-13) Bangod sang pinasahi nga kinahanglanon, ang organisasyon ni Jehova nagahanda sing mga tema base sa Kasulatan kag lainlain nga bahin sa sini nga mga programa. Ang impormasyon ginapresentar paagi sa mga diskurso, pasundayag, pag-akto liwat, pagpakig-istorya sa kaugalingon, kag interbyu. Ining suno sa tion nga instruksion nagapabakod sa tanan nga nagatambong. Ini nga mga asembleya, nagahatag sang kahigayunan sa bag-o nga mga disipulo nga magpabawtismo bilang simbulo sang ila dedikasyon kay Jehova.

MGA REHIYONAL NGA KOMBENSION

²⁵ Makaisa kada tuig, ginahiwat ang dalagku nga mga pagtilipon. Masami nga tatlo ka adlaw ini nga rehiyonal nga kombension, nga ginatambungan sang mga kongregasyon sa pila ka sirkito. Mahimo makita sang magamay nga mga sanga nga mas praktikal para sa tanan nga kongregasyon sa teritoryo sang sanga nga magtipon sa isa lang ka tilipunan. Sa pila ka kadutaan, ang mga kahimusan sa sini nga mga pagtilipon mahimo nga nagalainlain depende sa mga kahimtangan ukon panuytoy sang organisasyon. Kon kaisa, nagahiwat sing internasyonal ukon pinasahi nga mga kombension sa pila ka pungsod kag mahimo ini tambungan sang linibo ka Saksi halin sa lainlain nga kadutaan. Sa sulod sang mga tinuig, nahibaluan sang madamo nga tawo ang maayong balita sang Ginharian bangod sa pagpasayod sa sining dalagku nga mga pagtilipon sang mga Saksi ni Jehova.

²⁶ Para sa dedikado nga katawhan ni Jehova, ang mga kombension masadya nga mga pagtilipon para sa nahiusa nga pagsimba. Ginapahibalo sa ila ang nagasanag nga kapawa sang kamatuoran. Sa pila ka kombension, ginapagua ang bag-o nga mga publikasyon para sa pagtuon sing personal kag sang kongregasyon ukon para gamiton sa pagministeryo. Bahin man sang mga kombension ang mga bawtismo. Ang mga kombension importante gid sa espirituwal nga pag-uswag. Nagahatag ini sing pamatuod nga ang katawhan ni Jehova may internasyonal nga paghiliutod sang dedikado nga mga Cristiano kag may tanda nga nagapakilala nga mga disipulo sila ni Jesucristo.—Juan 13:35.

²⁷ Paagi sa pagtambong sa mga miting sang kongregasyon sa inyo lugar kag sa mga asembleya kag mga kombension sang katawhan ni Jehova, napabakod kita sa paghimo sang kabubut-on ni Jehova. Ginaamligan man kita batok sa mga impluwensia sang kalibutan nga makapaluya sang aton Cristianong pagtuo. Ini nga mga pagtilipon nagahimaya kag nagadayaw kay Jehova. (Sal. 35:18; Hulu. 14:28) Nagapasalamat kita nga gin-aman ni Jehova ini nga mga pagtilipon para paumpawan sa espirituwal ang iya dedikado nga katawhan sa sining tion sang katapusan.

PANIHAPON SANG GINUO

²⁸ Makaisa kada tuig sa anibersaryo sang kamatayon ni Jesucristo, ang mga kongregasyon sang mga Saksi ni Jehova sa bilog nga duta nagasaulog sang Memoryal sang kamatayon sang Cristo, ukon ang Panihapon sang Ginuo. (1 Cor. 11:20, 23, 24) Amo ini ang pinakaimportante nga pagtilipon kada tuig para sa katawhan ni Jehova. Direkta kita nga ginsugo nga saulugon ang Memoryal.—Luc. 22:19.

²⁹ Ang petsa sang Memoryal nagatupa sa petsa sang Paskua sa Biblia, nga ginapakita sang Kasulatan. (Ex. 12:2, 6; Mat. 26:17, 20, 26) Ang Paskua amo ang tuigan nga pagsaulog sang Paggua sang mga Israelinhon sa Egipto sang 1513 B.C.E. Sa sina nga tion, ginmarkahan ni Jehova ang ika-14 nga adlaw sang ila nahaunang lunar nga kalendaryo subong ang petsa para kaunon nila ang kordero sang Paskua kag biyaan ang ila pagkaulipon sa Egipto. (Ex. 12:1-51) Mapat-od ang petsa paagi sa pag-isip sing 13 ka adlaw halin sa pagpakita sang bag-o nga bulan nga pinakamalapit sa spring equinox nga kitaon sa Jerusalem. Kinaandan na nga ang pagsaulog sang Memoryal nagatupa sa nahauna nga ugsad pagkatapos sang spring equinox.

³⁰ Ginasambit sang Mateo 26:26-28 ang ginsiling ni Jesus kon paano saulugon ang Memoryal. Indi ini isa ka ritwal nga may mistiko nga kahulugan, kundi isa ka simbuliko nga pagsalo sang pagkaon sang mga gintawag nga mangin masigkamanunubli ni Jesucristo sa iya langitnon nga Ginharian. (Luc. 22:28-30) Ang iban pa nga dedikado nga mga Cristiano kag mga interesado ginapalig-on sa pagtambong sa Panihapon sang Ginuo agod mag-obserbar. Paagi sa ila pagtambong, ginapakita nila ang ila apresasyon sa aman ni Jehova nga Dios para sa kaayuhan sang bug-os nga katawhan paagi sa iya Anak, nga si Jesucristo. Antes sang Memoryal, may hiwaton nga pinasahi nga pamulongpulong publiko agod pukawon ang kalangkag sa sini nga okasyon kag ang dugang nga interes nga tun-an ang Biblia.

³¹ Ang mga Saksi ni Jehova malipayon nga nagapaabot sang tion nga makatipon sing tingob sa mga miting, diin ‘ginahunahuna naton ang isa kag isa agod mapahulag sa gugma kag sa maayong mga buhat.’ (Heb. 10:24) Alisto ang matutom kag mainandamon nga ulipon sa pag-aman sina nga mga miting suno sa aton espirituwal nga kinahanglanon. Ang tanan nga alagad ni Jehova kag ang mga interesado ginapalig-on nga himuslan sing bug-os ang mga kahimusan para sa regular nga pagtilipon. Nahiusa ang mga alagad sang Dios sa pagpakita sing tinagipusuon nga apresasyon sa mga aman ni Jehova paagi sa iya organisasyon. Labaw sa tanan, ginadayaw kag ginahimaya naton si Jehova.—Sal. 111:1.