Manginpulos sing Bug-os sa mga Miting sa Pag-alagad sa Latagon

1. Paano kita mabuligan sang mga miting sa pag-alagad sa latagon?

¹ Ang epektibo nga mga miting sa pag-alagad sa latagon nagapalig-on kag nagatudlo gid sa aton antes kita magkadto sa ministeryo. Magabulig ini sa aton sa pagpakigbahin sa grupo nga pagpanaksi agod makapakig-upod sa iban kag magabinuligay kag magbayluhanay sing paghanas. (Hulu. 27:17; Man. 4:9, 10) Ano ang himuon naton agod nga makapanginpulos kita sing bug-os sa sini nga mga miting?

2. Ano ang mahimo nga binagbinagon sang nagadumala?

² Sa Nagadumala: Kinaandan nga wala sing nabalay nga espesipiko nga impormasyon nga pagabinagbinagon sa sini nga mga miting. Busa, ang maayo nga paghanda kinahanglanon kon ikaw ang magadumala. Indi maayo nga inadlaw nga teksto na lang dayon ang pagabinagbinagon, bisan pa nga mahimo mo ini malakip sa paghinun-anon kon direkta ini nga may kaangtanan sa pagministeryo. Hunahunaa ang makabulig gid sa mga magabantala sa sina nga adlaw. Halimbawa, mahimo luyag mo binagbinagon ukon ipasundayag ang isa ka presentasyon. Mahimo nga repasuhon mo ang pila ka punto gikan sa Reasoning, Eskwelahan Para sa Ministeryo nga mga libro, ukon sa bag-o nga programa sa Miting sa Serbisyo. Sa iban nga tion, mahimo mo binagbinagon kon paano atubangon ang mga pagpamalibad sa inyo teritoryo, ukon mahimo hinun-anunan mo kon paano mapalambo ang interes kag makasugod sing mga pagtuon sa Biblia ilabi na kon madamo ang magahimo sing mga pagduaw liwat. Bisan ano man ang pagabinagbinagon, mangin mapagsik kag positibo.

3. Daw ano kalawig ang miting, kag ano ang dapat himuon sa sini nga tion?

³ Sugdi sa husto nga oras ang miting, bisan pa nga nakahibalo ka nga may maulihi. Hunahunaa sing maayo kon ginaorganisar mo ang mga grupo, kag hatagi sing teritoryo ang mga nagakinahanglan. Ang miting dapat indi maglampas sa 10 tubtob 15 minutos kag mas malip-ot pa kon nagasunod ini sa miting sa kongregasyon. Antes tapuson ang miting, dapat mahibaluan sang tanan kon sin-o ang ila kaupod kag kon sa diin sila manghikot. Dapat takpan sang pangamuyo ang miting.

4. Ano ang makabulig sa tanan agod makapanginpulos sing bug-os sa miting sa pag-alagad sa latagon?

⁴ Mahimo Kamo Makabulig: Subong sang mga miting sa kongregasyon, ipakita naton ang pagtahod kay Jehova kag patugsiling sa iban paagi sa pag-abot sing temprano. Makigbahin sa paghinun-anon. Tuguti ang nagadumala kon sin-o ang itangdo nga updon mo, ukon sarang ka makahimo sang imo kaugalingon nga kahimusan sing abanse antes sang miting. Kon ginapakamaayo mo nga maghimo sing kaugalingon nga kahimusan, tinguhai nga “magpasangkad” paagi sa pagpanghikot upod sa nanuhaytuhay nga manugbantala, sa baylo nga sa imo na lang pirme suod nga abyan. (2 Cor. 6:11-13) Kon matapos na ang miting, likawi ang pagbag-o sa kahimusan, kag magkadto gilayon sa teritoryo.

5. Ano ang katuyuan sang mga miting sa pag-alagad sa latagon?

⁵ Ang katuyuan sang mga miting sa pag-alagad sa latagon kaanggid man sa mga miting sa kongregasyon. Ginahiwat ini para “binagbinagon naton ang isa kag isa agod pukawon sa gugma kag sa maayong mga buhat.” (Heb. 10:24, 25) Kon panikasugan naton nga makapanginpulos sa sining mga miting, mabuligan gid kita nga matuman ang aton ministeryo—nga isa gid ka ‘maayong buhat’!