Mga Miting Para sa Pag-alagad sa Latagon

1. Ngaa luyag gid naton nga organisado ang aton pagbantala sa latagon?

¹ Nagpahamtang si Jesus sang halimbawa kon paano organisado nga dumalahan ang pagbantala sang Ginharian. Kaangay man sa karon, luyag gid sang may katungdanan sa pagbantala sang Ginharian nga ilugon ang amo man sini nga sahi sang pagdumala. Nahisuno sa sini, ang mga kongregasyon sa bug-os nga kalibutan nagahiwat sing mga miting sa pag-alagad sa latagon agod organisahon ang mga grupo sang mga manugbantala sang Ginharian.—Mat. 24:45-47; 25:21; Luc. 10:1-7.

2. Ano ang mapaabot naton sa mga miting para sa pag-alagad?

² Isa ka Maayo nga Kahimusan: Katuyuan sang mga miting sa pag-alagad nga palig-unon, hatagan sing praktikal nga mga instruksion kag giya ang mga magagua sa pagbantala. Ang adlaw-adlaw nga teksto mahimo hinun-anunan kon nagakaigo ini sa pag-alagad sa latagon. Agod mahanda ang magagua sa latagon, mahimo gamiton ang mga pahanumdom gikan sa Ang Aton Ministeryo sa Ginharian, sa libro nga Reasoning, ukon sa libro nga Eskwelahan Para sa Ministeryo. Mahimo man nga ipasundayag sing malip-ot ang tanyag nga literatura. Antes sang nagatakop nga pangamuyo, dapat mahibaluan sang tanan kon sin-o ang ila partner kag kon diin ang ila teritoryo. Ang miting indi dapat magsobra sa 15 minutos kag ang tanan dapat magkadto dayon sa teritoryo.

3. Sin-o ang may responsibilidad sa pag-organisar sang mga miting para sa pag-alagad?

³ Paano Ini Ginaorganisar? Ang manugtatap sang pag-alagad amo ang may responsibilidad sa pag-organisar sang mga miting para sa pag-alagad. Responsibilidad sang mga manugtatap sang grupo, ukon sang ila mga kabulig, nga updan ang ila grupo sa pagbantala kon Sabado kag Domingo. Mahimo man updan sang mga manugtatap ukon sang mga ministeryal nga alagad ang mga grupo sa tungatunga sang semana. Dapat makig-angot pirme ang mga manugtatap sang grupo sa manugtatap sang pag-alagad agod may bastante nga teritoryo ang ila grupo kon Sabado kag Domingo. Halin sa Lunes asta sa Biernes, ang manugtatap sang pag-alagad amo ang magaatipan sang kahimusan kon sin-o ang magapanguna sa mga magagua sa latagon.

4-6. (a) Ano ang tuyo sang mga miting para sa pag-alagad sa latagon may kaangtanan sa teritoryo sang kongregasyon? (b) Ano ang dapat binagbinagon agod mahibaluan ang kinahanglanon sa mga miting para sa pag-alagad sa latagon?

⁴ Diin kag San-o Ini nga mga Miting Hiwaton? Sa baylo nga magtipon ang bug-os nga kongregasyon sa isa ka duog, mas maayo nga ini nga mga miting hiwaton sa kombeniente nga mga duog, masami sa mga balay. Ang tuyo sini amo nga matuptupan sing maayo sang kongregasyon ang teritoryo. Mahimo man hiwatan ang mga Kingdom Hall sini nga mga miting. Madamo nga kongregasyon ang nagahiwat sini nga mga miting sa Kingdom Hall pagkatapos sang pamulongpulong publiko kag Pagtinuon sa Lalantawan. Tinguhaan nga malapit ang teritoryo halin sa ginatipunan. Ini nga mga kahimusan dapat nga binagbinagon sa pulupanag-on agod nga ini nga mga ginahiwatan sang miting nagakaigo gihapon sa pagtuptop sing bug-os sang teritoryo.

⁵ Ang maayo nga tion sa sini nga mga miting kag kon pila ka beses ini nga hiwaton sa isa ka semana nagadepende sa teritoryo. Ang masunod nga mga pamangkot mahimo mangin giya agod hibaluon kon diin kag kon san-o labing maayo nga hiwaton ang mga miting para sa pag-alagad sa latagon.

⁶ Diin nga teritoryo ang dapat hatagan sing kapin nga igtalupangod? Ano ang maayo nga tion nga magpamalaybalay? Mahimo bala mag-iskedyul sang pamalaybalay ukon pagduaw liwat sa gab-i? Ang tanan nga kahimusan sa latagon dapat ibutang sa information board sang kongregasyon. Handum naton tanan nga manugbantala sang Ginharian nga tuptupan ang aton naasayn nga teritoryo asta nga makasiling man kita kaangay ni apostol Pablo: “Wala na ako sing teritoryo nga wala mabantalaan.”—Roma 15:23.

7. Ano ang responsibilidad sang isa nga gintangdo sa pagpanguna sa grupo nga magabantala?

⁷ Paghiwat sang mga Miting Para sa Pag-alagad sa Latagon: Ginapakita sang gintangduan sini nga miting ang tudok nga pagtahod sa sini nga teokratikong kahimusan kon nagahanda sia sing maayo. Dapat nga magsugod sa eksakto nga tion kag dapat maathag ang mga instruksion. Dapat malip-ot ini, mga 10 tubtob 15 minutos lamang. Dapat nahibaluan na nga daan sang nagadumala kon diin ang teritoryo. Bisan pa indi na kinahanglan nga hulaton ang mga naulihi sa tapos sang miting para sa pag-alagad sa latagon, mas maayo nga magbilin sang mensahe kon diin ang teritoryo. Dapat maglakat gilayon pagkatapos sang miting. Kon organisado gid kag maathag ang miting para sa pag-alagad sa latagon, nahibaluan na sang tanan ang ila himuon sa ila ministeryo sa sina nga adlaw.—Hulu. 11:14.

8. Ano ang mabulig sang mga nagatambong sa nagapanguna sa miting para sa pag-alagad sa latagon?

⁸ Pagtambong sa mga Miting Para sa Pag-alagad sa Latagon: Importante ang kooperasyon. (Heb. 13:17) Kon posible, buligan sang nagapanguna sa grupo ang bisan sin-o nga nagakinahanglan sang kaupod sa pagbantala. Maayo kon may eksperiensiado nga manugbantala agod mabuligan ang mga bag-uhan kag indi eksperiensiado nga manugbantala. Kon kaisa maayo ang resulta kon handa ang isa nga updan naman ang iban. (Hulu. 27:17; Roma 15:1, 2) Dapat nga tinguhaan sang tanan nga indi maulihi. Ang aton pagtahod kag konsiderasyon sa teokratikong kahimusan kag sa mga kauturan magapahulag sa aton nga maghimo sing nagakaigo nga pagbag-o.—2 Cor. 6:3, 4; Fil. 2:4.

9. Paano makasakdag ang mga payunir sa sini nga kahimusan?

⁹ Ang Pagsakdag sang Payunir: Importante kag makapalig-on sa tanan ang pagsakdag sang mga payunir sa mga miting para sa pag-alagad sa latagon. Matuod nga madamo ang responsibilidad sang mga payunir. Magluwas nga magadumala sila sing mga pagtuon sa Biblia kag magduaw liwat, nalakip sa ila matag-adlaw nga iskedyul ang pag-atipan sang ila pamilya kag ang trabaho. Gani indi dapat magbatyag ang mga payunir nga obligado sa pagsakdag sang tanan nga miting para sa pag-alagad sa latagon nga gin-organisar sang kongregasyon, ilabi na kon ginahiwat ini kada adlaw. Apang basi posible nga makasakdag ang mga payunir sa pila ka miting kada semana. Sa pila ka kahimtangan ang mga miting sa pag-alagad makabulig sa paghanas sa pila ka miembro sang kongregasyon, kag daku gid ang mabulig sang mga payunir bangod sang ila nahibaluan kag eksperiensia sa espirituwal. Madamo sila sing eksperiensia sa ministeryo bangod pirme sila nagagua sa latagon. Puede ini mapaambit. Sarang mailog ang ila kapisan sa ministeryo kag sa pagtambong sa mga miting para sa pag-alagad sa latagon. Kag ginaapresyar gid ang ila pagpakigbahin sa sining mga miting para sa pag-alagad sa latagon.

10. Ngaa nagakaigo nga sakdagon sang tanan nga manugbantala sang Ginharian ini nga kahimusan?

¹⁰ Subong sang ginhimo ni Jesus kag sang iya mga disipulo, ang pagpanaksi sa pamalaybalay amo ang may daku nga papel agod matuman ang pagbantala sang Ginharian. Katuyuan sang mga miting para sa pag-alagad sa latagon amo nga mapalig-on kag makapakigbahin sing maayo ang tanan sa sini nga hilikuton. Ang tanan nga manugbantala dapat makigbahin tubtob sa ila masarangan. (Binu. 5:42; 20:20) Kabay nga sakdagon naton sing bug-os ini nga kahimusan. Kon himuon naton ini, mapaabot naton ang mga pagpakamaayo ni Jehova kag mapahalipay naton ang aton Lider, si Jesucristo, samtang nagabantala kita sing maayong balita sang Ginharian sang Dios.—Mat.  25:34-40; 28:19, 20.