Pamangkot

◼ Ano nga impormasyon ang dapat ihatag sa mga miting antes mag-alagad sa latagon?

Ang katuyuan sang miting antes mag-alagad sa latagon amo ang buligan kita nga magkonsentrar sa hilikuton nga pagahimuon​—⁠ang ministeryo. Busa, ang konduktor dapat nga nakahanda sing maayo sa pagpaambit sing butang nga makapalig-on, espesipiko, kag praktikal. Kon ang teksto sa sina nga adlaw direkta nga may kaangtanan sa pagbantala nga hilikuton, mahimo ini basahon kag binagbinagon sing malip-ot. Apang, ang miting dapat nakonsentrar una sa pagbulig sa tanan nga magaguwa sa hilikuton nga pagpanaksi nga mangin handa gid sa pagtuman sa ministeryo sa sini nga adlaw.​—⁠2 Tim. 4:5.

Ang nagakaigo nga mga punto gikan sa Ang Aton Ministeryo sa Ginharian mahimo binagbinagon agod mangin alisto ang tanan sa bag-o nga tanyag kag kon paano ini itanyag. Sa Adlaw Sang Magasin ang presentasyon gikan sa “Kon Ano ang Isiling Tuhoy sa mga Magasin” mahimo ipasundayag. Para sa iban nga mga kampanya, ang isa ukon duha ka introduksion sa Reasoning nga libro nga bagay sa lokal nga teritoryo mahimo ipatalupangod. Ang isa ka bahin sang ministeryo mahimo binagbinagon ukon ipasundayag, subong sa kon paano gamiton ang Biblia sa ganhaan, kon paano sabton ang posible nga pagpamatok, kon paano itanyag ang isa ka pagtuon sa Biblia, ukon kon paano tatapon ang interes.

Ang mga miting sa pag-alagad indi dapat magsobra sa 10 tubtob 15 minutos, nga nagalakip sang pag-organisar sang mga grupo, pagtangdo sang teritoryo, kag pagpangamuyo. Kon matapos na, dapat nahibaluan sang tanan nga nagtambong kon upod kay sin-o kag kon diin sila magpanghikot, kag dapat sila gilayon magkadto sa teritoryo. Bangod malip-ot ang miting, importante nga ang tanan mag-abot sing husto sa oras. Kon ang miting sa pag-alagad ginahimo pagkatapos sang isa ka miting sang kongregasyon, subong sang Pagtinuon sa Lalantawan, dapat mas malip-ot ini. Indi na kinahanglan nga binagbinagon pa ang teksto sa sini nga adlaw, kay may maayo na nga pagbinagbinag sa Kasulatan.

Ang sangkol kag bawtismado nga mga kauturan nga lalaki dapat tangduan sing abanse sa pagdumala sang tagsa ka miting sa pag-alagad. Kon wala sing manguna sa isa ka partikular nga adlaw, dapat magpili ang mga gulang kon sin-o nga bawtismado nga mga utod nga babayi ang makapanguna kon kinahanglanon. Samtang nagapabilin nga nagalingkod, mahimo sugdan sang utod nga babayi ang grupo nga pagbinagbinag sa teksto sa sina nga adlaw ukon sa iban pa nga mga punto may kaangtanan sa pag-alagad sa latagon, ginahuptan nga malip-ot ang iya komento. Dapat sia magtakdong.

Ang mga miting antes mag-alagad sa latagon maayo gid nga mga kahigayunan agod mapalig-on kita kag masangkapan sa pagpakigbahin sa ministeryo. Kon mas handa ang konduktor, mas madamo ang mabenepisyo sang tanan.