Mga Kahimusan Para sa mga Duog sang Pagsimba

ANG matuod nga mga sumilimba ni Jehova ginasugo sa pagtipon sing tingob agod makabaton sing instruksion kag makapalig-unanay. (Heb. 10:23-​25) Ang nahauna nga duog sang pagsimba sang pinili nga katawhan sang Dios, ang mga Israelinhon, amo ang “tabernakulo, nga amo ang tolda nga tilipunan.” (Ex. 39:32, 40) Sang ulihi, ang anak ni David nga si Solomon nagpatindog sing isa ka balay, ukon templo, para sa himaya sang Dios. (1 Hari 9:3) Sang malaglag ini nga templo sang 607 B.C.E., ang mga Judiyo nagtipon sa mga tinukod nga ginatawag nga mga sinagoga agod simbahon ang Dios. Sang ulihi, gintukod liwat ang templo, kag nangin sentro ini sang matuod nga pagsimba. Si Jesus nagpanudlo sa mga sinagoga kag templo. (Luc. 4:16; Juan 18:20) Naghiwat pa gani si Jesus sing miting sa isa ka bukid.​—Mat. 5:1–​7:​29.

² Pagkatapos sang kamatayon ni Jesus ang mga Cristiano nagtipon sa publiko nga mga duog kag sa pribado nga mga puluy-an agod matudlo ang Kasulatan kag makapakig-upod sa mga masigkatumuluo. (Binu. 19:8, 9; Roma 16:​3, 5; Col. 4:​15; Filem. 2) Kon kaisa, kinahanglan nga magtipon ang una nga mga Cristiano sa naligwin nga mga lugar agod indi mamutikan sang mga nagahingabot. Luyag gid sang matutom nga mga alagad sang Dios sadto nga magtipon sa mga duog sang pagsimba agod “pagatudluan ni Jehova.”​—Isa. 54:13.

³ Sa karon, ang publiko nga mga duog kag pribado nga mga puluy-an ginagamit man sa miting sang mga Cristiano. Ang pribado nga mga puluy-an masami nga ginatipunan para sa paggua sa latagon. Ang nagapagamit sang ila puluy-an sa sini nga paagi nagatamod nga isa ini ka pribilehiyo kag madamo sa ila ang nagabatyag nga nakabenepisyo sila sa espirituwal.

KINGDOM HALL

⁴ Ang panguna nga duog tilipunan sang mga Saksi ni Jehova amo ang Kingdom Hall. Kinaandan na nga ginabakal ang propiedad, kag ginapatindugan sang bag-o nga Kingdom Hall ukon ginakay-o ang daan nga tinukod. Kon praktikal, agod makabarato kag para magamit gid sing maayo ang aton mga pasilidad, pila ka kongregasyon ang nagabuslanay sa isa ka Kingdom Hall. Sa pila ka duog, kinahanglan nga mag-arkila sang hall. Para sa bag-o nga mga Kingdom Hall kag hall nga may daku nga ginbag-o, nagakaigo nga may programa para sa dedikasyon. Apang, kon diutay lang ang ginbag-o sa isa ka daan nga Kingdom Hall, indi na kinahanglan ang dedikasyon.

⁵ Indi kinahanglan nga ang desinyo sang Kingdom Hall masibod agod dayawon sang iban. Bisan pa ang desinyo lainlain sa tagsa ka duog, dapat nga nagakaigo ini sa katuyuan sini. (Binu. 17:24) Nahisanto sa lokal nga mga kahimtangan, dapat komportable ini kag kombeniente para hiwatan sang Cristianong mga miting.

⁶ Ang tanan nga kongregasyon sang mga Saksi ni Jehova nagaamot para sa paggamit, pagpanghikot, kag pagmentinar sa Kingdom Hall nga ginatambungan nila. Wala sing pagpangolekta; ukon pagpangayo sing pundo. Sa baylo, may kahon alamutan nga ginaaman agod makaamot ang mga nagatambong para sa kinahanglanon nga kagastuhanan sa paggamit sang hall. Ginahimo nila ini sing kinabubut-on kag tinagipusuon.—2 Cor. 9:7.

⁷ Ginakabig sang tanan sa kongregasyon nga pribilehiyo ang pagsakdag sa pinansial sa Kingdom Hall kag ang pagboluntaryo agod magpabilin ini nga matinlo kag namentinar sing maayo. Isa ka gulang ukon ministeryal nga alagad ang kinaandan na nga ginaasayn sa pag-iskedyul sa sini nga hilikuton. Kinaandan na nga ang pagpaninlo ginahimo sang mga grupo sang pag-alagad sa latagon, nga ginapangunahan sang manugtatap sang grupo ukon sang iya kabulig. Ang gua kag sulod sang Kingdom Hall dapat nga nagakaigo sa pagrepresentar kay Jehova kag sa iya organisasyon.

⁸ Kon kapin sa isa ka kongregasyon ang nagagamit sa hall, ang mga gulang sini nga mga kongregasyon magahimo sing Kingdom Hall Operating Committee para matatap ang pagmentinar sa tinukod kag sa propiedad. Nagapili ang mga hubon sang mga gulang sing isa nga magaalagad subong koordenitor sang operating committee. Paagi sa direksion sang mga hubon sang mga gulang, ginamonitor sang operating committee ang pagtinlo sa Kingdom Hall, para mamentinar ini sing maayo kag may bastante nga suplay sa paghimo sini. Kinahanglan gid ang maayo nga kooperasyon sang nadalahig nga mga kongregasyon.

⁹ Kon pila ka kongregasyon ang nagagamit sa Kingdom Hall, mahimo sila magbuslanay sang iskedyul sang miting. Dapat himuon sang mga gulang ini nga iskedyul nga may pag-ulikid kag gugma sa mga utod. (Fil. 2:​2-4; 1 Ped. 3:8) Wala sing kongregasyon ang magahimo sing desisyon para sa iban nga kongregasyon. Kon nagaduaw ang manugtatap sang sirkito sa isa sa mga kongregasyon nga nagagamit sang Kingdom Hall, bag-uhon sang iban nga kongregasyon ang oras sang ila miting sa sina nga semana kon kinahanglanon.

¹⁰ Ang Kingdom Hall mahimo gamiton sa diskurso sa kasal kag lubong sa pagpahanugot sang Komite sang Pag-alagad sang Kongregasyon. Ginabinagbinag sing maayo sining mga gulang ang tagsa ka pangabay kag nagadesisyon pasad sa panuytoy sang sanga talatapan.

¹¹ Ang mga gintugutan nga gamiton ang Kingdom Hall para sa sini nga katuyuan ginalauman nga maggawi sing nagakaigo para sa matuod nga mga Cristiano. Dapat nga wala gid sang ginahimo sa Kingdom Hall nga makahalit sa kongregasyon ukon makapasipala kay Jehova kag sa maayo nga ngalan sang kongregasyon. (Fil. 2:​14, 15) Paagi sa panuytoy sang sanga talatapan, ang Kingdom Hall mahimo gamiton sa iban pa nga hilikuton sa espirituwal, kaangay sang Kingdom Ministry School kag Pioneer Service School.

¹² Dapat pirme tamdon sing matinahuron sang kongregasyon ang ila duog tilipunan. Dapat makita sa pamayo, pamustura, kag paggawi ang dignidad nga naangot sa pagsimba kay Jehova. (Man. 5:1; 1 Tim. 2:​9, 10) Ang pagsunod sa sini nga laygay nagapakita nga ginaapresyar naton ang aton Cristianong mga miting.

¹³ Importante man ang kahim-ong sa tion sang mga miting. Ginarekomendar nga ang mga bata magpungko sa tupad sang ila mga ginikanan. Ginapalig-on man ang mga ginikanan nga may magagmay nga kabataan nga magpungko sa lugar nga indi sila tanto makatublag kon kinahanglan nga dalhon nila ang ila kabataan sa gua agod disiplinahon ukon atipanon ang ila nga kinahanglanon.

¹⁴ Ang kalipikado nga mga utod nga lalaki ginaasayn subong mga atendant sa mga miting sa Kingdom Hall. Dapat nga alisto sila kag mainabyanon kag may maayo nga paghantop. Lakip sa ila mga responsibilidad ang pagtamyaw kag pag-abiabi sa mga bag-uhan, pagpangita sing pulungkuan sa mga naulihi, pagrekord sang kadamuon sang nagatambong, kag pagtatap sa nagakaigo nga bentilasyon sang hall. Kon kinahanglanon, pahanumdumon sang mga atendant ang mga ginikanan nga bantayan ang ila kabataan agod indi magduludalagan antes kag pagkatapos sang mga miting ukon maghampang sa entablado. Mahimo pangabayon sing mainayuhon kag mataktikanhon sang atendant ang ginikanan nga dalhon sa gua ang nagasinabad nga bata agod indi matublag ang tumalambong. Ang ginahimo sang mga atendant nagabulig sing daku sa kalipay sang tanan sa mga miting. Mas maayo nga mga gulang kag mga ministeryal nga alagad ang gamiton nga mga atendant.

PAGPATINDOG SANG KINGDOM HALL

¹⁵ Sang unang siglo, ang pila ka Cristiano mas maayo ang kahimtangan sa materyal sangsa iban, gani si apostol Pablo nagsulat: “Paagi sa inyo sobra sa sini nga tion mapun-an ang ila kinahanglanon, kag mapun-an man sang ila sobra ang inyo kakulangan, agod may pag-alalangay.” (2 Cor. 8:14) Sa karon, may yara man “pag-alalangay.” Ginatingob ang pundo nga ginaamot sang mga kongregasyon sa bug-os nga kalibutan agod maghatag sang pinansial nga bulig sa pagpatindog kag pagpakay-o sang mga Kingdom Hall. Ang maalwan nga pagbulig sang mga utod sa bug-os nga kalibutan ginaapresyar gid sang organisasyon kag sang mga kongregasyon nga nakabenepisyo sa sini nga mga amot.

¹⁶ Pasad sa rehiyonal nga plano, ang sanga talatapan amo ang nagaasayn sa mga kongregasyon sa espesipiko nga mga Kingdom Hall. Sila man ang nagapat-od kon san-o kag diin patindugon ang bag-o nga mga Kingdom Hall kag kay-uhon ang daan nga mga hall sa teritoryo sang sanga. Kon may kalamidad nga matabo, may kahimusan agod kay-uhon ang naguba nga mga Kingdom Hall, kag sa pila ka sitwasyon ang mga puluy-an sang kauturan.

¹⁷ Ang sanga talatapan amo ang nagadumala sa paggamit sang mga nagaboluntaryo sa pagbulig sa pagpangita sang lote, pagdesinyo sang Kingdom Hall, pagkuha sang mga permit, pagpatindog, kag pagmentinar. Bangod madamo nga Kingdom Hall ang kinahanglan sa kalabanan nga kadutaan, madamo nga boluntaryo ang ginakinahanglan. Ang tanan nga bawtismado nga manugbantala nga kalipikado kag nagahandum nga magbulig ginapalig-on nga magpil-ap sang aplikasyon kag ipasa ini sa ila lokal nga Komite sang Pag-alagad sang Kongregasyon. Bisan ang di-bawtismado nga manugbantala mahimo makabulig sa pagpatindog ukon pagkay-o sang ila kaugalingon nga Kingdom Hall.

MGA ASSEMBLY HALL

¹⁸ Ang mga Cristiano sang una masami nga nagtipon sa magagmay nga mga grupo. Apang kon kaisa, “madamo” ang nagatipon. (Binu. 11:26) Ang katawhan ni Jehova nagatipon man karon sa dalagku nga mga pagtilipon para sa mga sirkito nga asembleya kag rehiyonal nga mga kombension. Ang lokal nga mga pasilidad masami ginaarkilahan para sa sini nga katuyuan, apang kon indi ini nagakaigo ukon bakante, ang isa ka duog sang pagsimba nga ginatawag Assembly Hall mahimo matigayon.

¹⁹ Kon kaisa, ang isa ka tinukod ginabakal, ginapakay-o, kag ginagamit subong Assembly Hall. Apang sa masami, ang propiedad ginabakal, kag ginapatindugan sing bag-o nga hall. Ang kadakuon sang mga Assembly Hall depende sa lokal nga mga kinahanglanon. Ang pagpatindog sini ginadesisyunan sa tapos lamang matimbangtimbang sing maayo sang sanga talatapan ang bili sini kag mapat-od kon daw ano kasunson ini gamiton.

²⁰ Ang sanga talatapan ang nagatangdo sing kauturan nga lalaki nga magapalakat kag magamentinar sang Assembly Hall. May ginahimo nga kahimusan ang mga sirkito sa pagtinlo sang Assembly Hall. May iskedyul para sa regular nga pagpaninlo, iskedyul sa pagpaninlo sing makaisa kada anom ka bulan, kag iskedyul sa pagmentinar. Mas maayo kon mga lalaki ang magboluntaryo sa paghimo sini. Gani, ginapalig-on ang mga kongregasyon nga sakdagon ini nga kahimusan sing bug-os tagipusuon.—Sal. 110:3; Mal. 1:​10.

²¹ Kon kaisa, ang Assembly Hall mahimo gamiton para sa iban pa nga teokratiko nga okasyon, subong sang mga Bible school kag pinasahi nga miting para sa mga manugtatap sang sirkito. Kaangay sang Kingdom Hall, ang Assembly Hall isa ka nadedikar nga duog para sa pagsimba. Kon magtipon kita sa Assembly Hall, ang aton paggawi, pamayo, kag pamustura dapat may dignidad, subong nga yara kita sa Kingdom Hall sa pagsimba.

²² Madamo nga bag-uhan ang napahulag sa pagsulod sa organisasyon sang Dios sa ulihi nga bahin sining katapusan nga mga adlaw. Pamatuod ini sang pagpakamaayo ni Jehova. (Isa. 60:​8, 10, 11, 22) Gani, suportahan naton ang kahimusan sa pagtigayon kag pagmentinar sang matinlo kag komportable nga mga duog sang pagsimba. Sa paghimo sini, ginapakita naton ang aton apresasyon sa papel sini nga mga pasilidad agod buligan kita nga magpalig-unanay ilabi na samtang nagahilapit ang adlaw ni Jehova.