Ginatahod Bala Ninyo ang Inyo Duog sa Pagsimba?

“Kutob gid sa pamuno sang ebanghelyo, ang mga Cristiano pirme may napatok kag pat-od nga duog sang pagsimba sa Dios.” ​—⁠“Primitive Christianity,” ni William Cave.

ANG katawhan sang Dios nalipay pirme magtipon sing tingob para sa pagsimba. Matuod ini sang unang siglo kag subong man sa karon. Ang mga manunulat kag mga teologo anay, kaangay nanday Lucian, Clement, Justin Martyr, kag Tertullian, tanan nagaugyon nga ang mga Cristiano may espesipiko nga mga duog diin nagtipon sila sing tayuyon sa pagsimba sing tingob.

Ginapakita man ini sang Biblia, nagahimo sing madamong pagpatuhoy sa regular nga mga pagtilipon nga ginhiwat sang mga grupo sang mga Cristiano. Ining mga grupo nakilal-an subong mga kongregasyon. Nagakaigo ini bangod ang tinaga nga “kongregasyon” sa orihinal nga mga pamulong sang Biblia nagapatuhoy sa isa ka grupo sang katawhan nga nagtipon sing tingob para sa isa ka partikular nga katuyuan ukon hilikuton.

Mga Duog Anay sang Cristianong Pagsimba

Ano ang ginhimo sang unang-siglo nga mga Cristiano sang nagtipon sila? Ginalaragway sang Biblia ang pila sinang mga miting kag ginapakita nga ang pagpanudlo isa ka importante nga bahin. (Binuhatan 2:42; 11:26; 1 Corinto 14:​19, 26) Ginhimos ang mga programa sa pagpanudlo, upod ang mga diskurso, pagsugid sing makapalig-on nga mga eksperiensia, kag mahalungon nga pagbinagbinag sa mga sulat nga nabaton gikan sa nagadumala nga hubon sa Jerusalem ukon gikan sa isa ka apostol.

Sa Binuhatan 15:​22-35, aton mabasa nga pagkatapos ginbasa ang isa sina nga sulat sa grupo sang mga Cristiano sa Antioquia, sanday Judas kag Silas “nagpalig-on sa mga kauturan paagi sa diskurso kag nagpabakod sa ila.” Ang isa pa ka kasaysayan nagasiling nga sang nag-abot sanday Pablo kag Bernabe sa Antioquia “kag gintipon ang kongregasyon, ginsugid nila ang madamong butang nga nahimo sang Dios upod sa ila.” Ang pagpangamuyo kay Jehova isa man ka importante nga bahin sang Cristianong mga miting.​—⁠Binuhatan 14:⁠27.

Ang mga duog diin ang unang-siglo nga mga kongregasyon nagtipon para sa pagsimba indi masibod nga mga tinukod kaangay sang madamo nga mga simbahan sang Cristiandad karon. Sa kalabanan nga bahin, ang unang mga Cristiano nagtipon sa pribado nga mga puluy-an. (Roma 16:5; 1 Corinto 16:19; Colosas 4:15; Filemon 2) Sa masami ang hulot sa atop ukon ang hulot nga naibabaw sang isa ka pribado nga balay amo ang gingamit. Ang Panihapon sang Ginuo ginhiwat sa hulot nga naibabaw. Sa hulot nga naibabaw man nga ang 120 ka disipulo ginhaplasan sing balaan nga espiritu sang Pentecostes.​—⁠Lucas 22:​11, 12, 19, 20; Binuhatan 1:​13, 14; 2:​1-4; 20:​7, 9.

Sa karon ang mga Saksi ni Jehova nagasunod sang talaksan nga ginpatok sang mga apostoles. Ginagamit nila ang mga duog tilipunan nga nakilal-an subong mga Kingdom Hall. Ginahanas sila subong mga manugbantala sang maayong balita sang Ginharian sang Dios. (Mateo 24:14) Sa Kingdom Hall, ginatun-an man nila ang Kasulatan, nagapangamuyo, kag nagapalig-unay sa isa kag isa. Nahisuno ini sa laygay sang Biblia sa Hebreo 10:​24, 25: “Magpatugsiling kita kon paano ang pagpukaw sa isa kag isa sa gugma kag maayong mga buhat, nga wala nagabiya sang aton pagtilipon sing tingob, subong sang kinabatasan sang iban, kundi nagalinaygayay ang isa kag isa, kag labi pa gid nga ginatan-aw ninyo nga nagapalapit na ang adlaw.”

Paggamit sang Aton Duog sa Pagsimba sing Nagakaigo

Nadumduman bala ninyo ang mga pinamulong ni apostol Pablo: “Ang Dios isa ka Dios, indi sang kagamo, kundi sang paghidait” kag, “Ang tanan nga butang himuon sing nagakaigo kag mahusay”? Kon binagbinagon ninyo ang konteksto sining mga pinamulong, matukiban ninyo nga ginbinagbinag ni Pablo ang paagi nga ang Cristianong mga miting dapat himuon. Subong sang panahon sang mga apostoles, ginapat-od sang mga Cristiano karon nga ang ila mga miting mahim-ong kag organisado sing maayo.​—⁠1 Corinto 14:​26-40.

Ang Abril 15, 1970, nga guwa sang Ang Lalantawan nagsiling: “Ang espirituwal nga palibot sa Kingdom Hall matuod, nagagikan sa matuod nga interes sa matuod nga pagsimba kag panudlo sang Biblia. Kag ang masadya, natural nga mga palibot sa tilipunan nagapalig-on sa mga nagatambong nga mangin mainit kag mainabyanon, wala ginaupangan sang isa ka ginapatuman sing makatalanhaga nga pagkasolemne.” Sa pagkamatuod, dapat man maghalong agod ang paggamit sing Kingdom Hall pirme nagapabanaag sing pagtahod kag dignidad.

Ang Cristiandad nagpakita sing daku nga dipagtahod sa sining bahin. Ang iban nga relihiosong mga organisasyon nagagamit sang ila duog sa pagsimba subong mga sentro sang kalingawan sang komunidad. May live sila nga mga konsierto sang relihiosong rock nga musika, mga hulot para sa pagbarbel, bilyaran, nursery, kag sinehan. Ang isa ka simbahan may sambuwa sang dumog subong bahin sang ila programa. Wala gid ini nahisanto sa talaksan nga ginpahamtang sang mga apostoles.

Kon ang bisan anong unang-siglo nga kongregasyon nagpanghikot sing dinagakaigo, ang pagtadlong nagakabagay. Halimbawa, ang pila sa Cristianong kongregasyon sa Corinto naggamit sang pagsaulog sang Panihapon sang Ginuo subong okasyon para magkaon kag mag-inom. Nagdala sila sing palanyapunon agod kaunon antes ukon sa tion sang miting, ang iban nagkaon kag nag-inom sing sobra. Indi gid ini nagakaigo. Si apostol Pablo nagsulat sa ila: “Pat-od gid nga may mga balay kamo nga kaunan kag imnan, indi bala?”​—⁠1 Corinto 11:​20-29.

Nahisanto sa laygay ni Pablo, ang mga Saksi ni Jehova nagapanikasog sa pag-atipan sang personal nga mga butang sa balay ukon sa iban nga lugar sa baylo nga sa Kingdom Hall. Matuod, ang aton regular nga mga miting nagahatag sing kombeniente nga kahigayunan nga makita ang pila ka mga abyan sa isa ka tion. Apang, ang Kingdom Hall gindedikar kay Jehova, gani dapat ini gamiton para lamang sa pagsimba sa iya. Wala naton ginahingalitan ang aton pagtambong didto agod magnegosyo ukon maghimo sing personal nga mga transaksion.

Dugang pa, ang mga Kingdom Hall wala ginagamit sang kongregasyon para sa mga programa sa paglingawlingaw, mga aktibidad sa pagpangayo sing amot, ukon sosyal nga mga hilikuton, subong sang pag-atipan sa bata. May iban pa nga lugar nga maatipan sang isa inang personal nga mga butang kag negosyo.

Natalupangdan sang mga gulang sa isa ka Kingdom Hall nga nangin batasan na sang mga miembro sang kongregasyon ang maghulamay ukon mag-uliay sang ginhulam nga mga butang sa miting. Subong man, naanad na sila sa pagbayluhanay sing mga video­cas­sette nga sine sa Kingdom Hall. Bisan pa indi ini komersio, ang mga gulang nagbulig sa ila sa paghangop sang kaalam sang pag-atipan sining mga butang sa balay kon mahimo pa.

Agod malikawan ang mga kahimtangan nga makahatag sing sayop nga impresyon kag mapat-od nga ang Kingdom Hall ginagamit sing nagakaigo, dapat pamangkuton sang kada isa ang iya kaugalingon: ‘May personal nga mga butang bala ako nga ginaatipan sa Kingdom Hall nga mahimo maatipan sa balay?’ Halimbawa, kon nagaorganisar sing mga pagliwaliwa ukon iban pa nga sosyal nga mga pagtinipon, indi bala mas maayo nga hambalan ina nga kahimusan sa balay? Magamit bala naton ang telepono ukon maduaw sa balay yadtong luyag naton masugilanon? Nagahulam sang pinamulong ni Pablo, makasiling kita: ‘Pat-od gid nga may mga balay kami sa pagdipara sina nga mga butang, indi bala?’

Gintalana nga Tion kag Duog sa Pagsimba kay Jehova

Ang Biblia nagasiling sa Manugwali 3:1: “Kay sa tagsa ka butang may gintalana nga tion, bisan sing tion para sa tagsa ka katuyuan sa idalom sang langit.” Kon nagatambong sing mga miting sa Kingdom Hall, bug-os kita nga magasako sa mga hilikuton may kaangtanan sa Cristianong ministeryo. Gintalana nga tion ini sa pagsimba kay Jehova.

Ang utod nga lalaki sa iloy ni Jesus nga si Santiago naglaygay batok sa pagpakita sing paboritismo sa sulod sang Cristianong kongregasyon. (Santiago 2:​1-9) Paano naton maaplikar ini nga laygay sa aton mga Kingdom Hall? Ang dagway sang paboritismo sarang mapakita kon ang hayag nga pagpasa sing nasulat nga mga imbitasyon para sa sosyal nga mga hitabo ginahimo didto. Sa isa ka kongregasyon ang batasan amo ang pagbutang sina nga mga imbitasyon sa bag ukon Biblia sang mga nagatambong. Matuod, mas kombeniente ini sangsa ipadala sa koreo ang imbitasyon ukon idul-ong ini sa tagsa ka balay. Apang, ano ang batyagon sang wala makabaton sing imbitasyon kon makita niya nga ang iban ginhatagan? Nagahatag bala ini sing dagway sang paboritismo?

Sa pagkamatuod, indi kinahanglan nga may estrikto nga kasuguan nga nagasiling nga wala sing isa ang makadaho sa iban sing personal nga mensahe ukon pinutos samtang sa Kingdom Hall; ni malain hambalan sa Kingdom Hall ang nahanungod sa adlaw-adlaw nga mga hilikuton ukon mga hitabo, ukon agdahon ang isa sa imo puluy-an, ukon pangabayon ang isa nga mag-upod sa inyo sa paglingawlingaw. Apang dapat ini natabuan lamang kag himuon sa mainandamon kag maugdang nga paagi. Ang personal nga mga kahimusan indi gid dapat magsamok sa matuod nga katuyuan sang pagtipon naton sa Kingdom Hall, nga amo, ang mapalig-on sa espirituwal.​—⁠Mateo 6:33; Filipos 1:⁠10.

Mga Lalaki nga Nagpahamtang sing Halimbawa

Ang mga gulang kag mga ministeryal nga alagad makugi nga nagapahamtang sing halimbawa sa pagpakita sing pagtahod sa Kingdom Hall. Sa masami may isa ukon duha ka gulang kag ministeryal nga alagad ang gintangdo sa paghituhog sang mga butang may kaangtanan sa pag-atipan sa Kingdom Hall. Kon kapin sa isa ang nagagamit sang tilipunan, ang komite sang mga gulang nagatatap sining mga butang.

Samtang ang iban espesipiko nga gintangdo sa pag-atipan sina nga mga katungdanan, ang tanan nga mga ministeryal nga alagad dapat magpakita sing matuod nga interes sa tilipunan. Ginakilala nila nga ang Kingdom Hall gindedikar kay Jehova kag ginagamit para sa pagsimba sa iya.

Ang mga gulang indi dapat magpalantang kon kinahanglan ang pagkay-o. (2 Cronica 24:​5, 13; 29:3; 34:8; Nehemias 10:39; 13:11) Sa pila ka mga kongregasyon ginahimo ang regular nga pag-inspeksion sa Kingdom Hall agod maatipan sa gilayon ang bisan anong kinahanglanon nga pagkay-o. Ginahimo ang imbentaryo agod pat-uron nga may yara kinahanglanon nga mga suplay nga magamit. Kon may gintangdo nga lugar para taguan sing mga suplay, kagamitan, kag inugtinlo, ang tanan nga mga gulang kag mga ministeryal nga alagad dapat magpakita sing interes sa kahimtangan sini, nagapat-od nga ang tanan ginahuptan nga mahipid. Yadtong nagapangabudlay sa estante sang literatura kag magasin makapakita sang ila interes paagi sa pagtatap sa gilayon nga ang walay unod nga mga karton wala nagalapta sa tilipunan.

Paagi sa pagpakita sing halimbawa, ang mga gulang kag mga ministeryal nga alagad makabulig sa iban nga mga katapo sang kongregasyon sa pagpadayag sing kakugi sa Kingdom Hall. (Hebreo 13:⁠7) Ang tanan makapakita sing nagakaigo nga pagtahod paagi sa pagpakigbahin sa pagtinlo sa tilipunan kag paagi sa pagpakita sing matuod nga interes sa kabilugan nga hitsura sini.

Si Jesus nagsiling sa Mateo 18:20: “Kon diin nagatipon ang isa ukon duha sa akon ngalan, yara ako sa tunga nila.” Huo, interesado si Jesus sa ginahimo naton kon nagatipon kita sa pagsimba kay Jehova. Nagalakip ini sang mga miting nga ginahiwat sa pribado nga mga puluy-an kag sa dalagku nga mga pagtilipon subong sang mga kombension ukon mga asambleya.

Para sa minilyon ka Saksi ni Jehova, wala na sing lugar nga mas malapit pa sa ila tagipusuon sangsa ila regular nga duog sa pagsimba, sa Kingdom Hall. Ginapakita nila ang nagakaigo nga pagtahod para sa sina nga duog. Ginapadayag nila ang mapisan nga espiritu sa pag-atipan para sa sini, kag ginapanikasugan nila pirme nga gamiton ini sing nagakaigo. Kabay nga sundon man ninyo ang laygay nga ginahatag ni Jehova mismo: “Bantayi ang imo tiil kon magkadto ka sa balay sang matuod nga Dios.”​—⁠Manugwali 5:⁠1.