Magpabilin nga Suod sa Organisasyon ni Jehova

SI DISIPULO Santiago nagsulat: “Magpalapit kamo sa Dios, kag magapalapit sia sa inyo.” (Sant. 4:8) Huo, bisan pa sang aton pagkadihimpit, si Jehova indi tuman kataas ukon kalayo sa pagpamati sa aton. (Binu. 17:27) Paano kita makapalapit sa Dios? Mahimo naton ini paagi sa pagtukod sing malapit kag personal nga kaangtanan kay Jehova nga nagalakip sang hanuot nga pangamuyo. (Sal. 39:12) Mapalambo man naton ang pagkasuod sa Dios paagi sa regular nga pagtuon sa iya Pulong, ang Biblia. Paagi sa sini, makilala naton si Jehova nga Dios, mahibaluan ang iya mga katuyuan, kag ang iya kabubut-on para sa aton. (2 Tim. 3:16, 17) Gani, matun-an naton nga higugmaon sia kag mapalambo ang nagakaigo nga kahadlok nga indi sia mapahamut-an.—Sal. 25:14.

² Apang, paagi lamang sa iya Anak, si Jesus, nga mangin malapit kita kay Jehova. (Juan 17:3; Roma 5:10) Wala sing tawo nga makahatag sa aton sing mas maayo nga paghantop sa hunahuna ni Jehova sangsa kay Jesus. Kilala gid niya ang iya Amay amo nga makasiling sia: “Wala sing nakakilala sa Anak kundi ang Amay, kag wala sing nakakilala sa Amay kundi ang Anak, kag ang bisan sin-o nga luyag sang Anak nga magpaathag tuhoy sa iya.” (Luc. 10:22) Gani kon ginatun-an naton ang mga Ebanghelyo agod mahibaluan ang panghunahuna kag balatyagon ni Jesus, daw ginatun-an man naton ang panghunahuna kag balatyagon ni Jehova. Ini nga ihibalo nagabulig sa aton nga mangin mas malapit sa aton Dios.

³ Sa idalom sang pagpanguna sang Anak sang Dios, mapalambo naton ang pagkasuod kay Jehova paagi sa pagpabilin nga suod sa kitaon nga palaagyan nga nagabulig sa aton kon paano himuon ang kabubut-on sang Dios. Subong sang gintagna sa Mateo 24:45-47, gintangduan sang Agalon, nga si Jesucristo, ang “matutom kag mainandamon nga ulipon” nga amanan sing “pagkaon sa nagakaigo nga tion” ang panimalay sang pagtuo. Sa karon, ang matutom nga ulipon nagaaman sa aton sing bugana nga espirituwal nga pagkaon. Paagi sa sining palaagyan, ginalaygayan kita ni Jehova nga basahon ang iya Pulong adlaw-adlaw, tambungan ang aton Cristianong mga miting sing regular, kag makigbahin gid sa pagbantala sing “maayong balita sang Ginharian.” (Mat. 24:14; 28:19, 20; Jos. 1:8; Sal. 1:1-3) Indi gid naton luyag tamdon ang matutom nga ulipon suno sa pagtamod sang tawo. Dapat kita maninguha nga magpabilin nga malapit sa kitaon nga bahin sang organisasyon ni Jehova kag sundon ang pagtuytoy sini. Magabuyok ini sa aton nga mangin mas malapit sa aton Dios, nga si Jehova, kag magapabakod kag magaamlig sa aton bisan pa sa mga pagtilaw.

KON NGAA NAGADAMO ANG MGA PAGTILAW

⁴ Mahimo madugay ka na sa kamatuoran, gani nahibaluan mo kon ano ang kahulugan sang pagbatas sa mga pagtilaw sa integridad. Bisan pa karon mo lang nakilala si Jehova kag nakaupod ang iya katawhan, nahibaluan mo nga ginapamatukan ni Satanas nga Yawa ang bisan sin-o nga nagapasakop sa pagkasoberano ni Jehova. (2 Tim. 3:12) Gani diutay man ukon madamo ang ginbatas mo, wala sing rason nga mahadlok ka ukon maluyahan sing buot. Si Jehova nagasaad nga sakdagon ka niya kag padyaan ka niya sing kaluwasan kag kabuhi sa palaabuton.—Heb. 13:5, 6; Bug. 2:10.

⁵ Kita tanan mahimo pa makaeksperiensia sing mabudlay nga mga pagtilaw sa sining nabilin nga mga adlaw sang sistema ni Satanas. Sugod sang matukod ang Ginharian sang Dios sang 1914, wala na gintugutan ni Jehova si Satanas nga makakadto sa langit. Gintagbong sia sa duta, diin sia kag ang iya malauton nga mga anghel nagpabilin. Ang pagdamo sang kailo sa duta, lakip na ang daku nga paghingabot sa dedikado nga mga alagad ni Jehova, resulta sang kaakig ni Satanas kag pamatuod nga nagakabuhi kita sa katapusan nga mga adlaw sang iya malauton nga paggahom sa katawhan.—Bug. 12:1-12.

⁶ Naakig gid si Satanas sa iya manubo nga kahimtangan kag nakahibalo sia nga malip-ot na ang iya tion. Upod sa iya mga demonyo, ginahimo niya ang tanan agod upangan ang pagbantala sang Ginharian kag gub-on ang paghiusa sang mga alagad ni Jehova. Bangod sini, ang mga alagad ni Jehova may espirituwal nga pagpakig-away nga ginlaragway subong ‘pagpakig-away, indi batok sa dugo kag unod, kundi batok sa mga panguluhan, batok sa mga awtoridad, batok sa mga manuggahom sang kalibutan sining kadudulman, kag batok sa malaut nga mga espiritu sa langitnon nga mga lugar.’ Agod mangin madinalag-on kita nga dampig kay Jehova, indi kita dapat mag-untat sa pagpakig-away, kundi huptan nga kompleto ang aton espirituwal nga hinganib. Dapat kita ‘magtindog sing malig-on batok sa tuso nga mga pahito’ sang Yawa. (Efe. 6:10-17) Nagakinahanglan ini sang aton pagbatas.

PAGPALAMBO SING PAGBATAS

⁷ Ang pagbatas nagakahulugan sang ikasarang sa pagbato sa kabudlayan, ukon kalisdanan. Sa espirituwal nga kahulugan, nagapatuhoy ini sa kinaiya sang kapag-on nga himuon ang husto bisan pa may kabudlayan, pagpamatok, paghingabot, ukon iban pa nga gintuyo agod biyaan naton ang aton katutom sa Dios. Ang Cristiano nga pagbatas dapat palambuon. Nagakinahanglan ini sing tion. Ang aton ikasarang sa pagbatas nagabakod samtang nagauswag kita sa espirituwal. Paagi sa pagbatas sa gamay nga mga pagtilaw sa aton pagtuo sang bag-o pa lang kita nangin Cristiano, magabakod kita, amo nga mabatas pa gid naton ang mas mabudlay nga mga pagtilaw nga magaabot. (Luc. 16:10) Indi naton dapat paghulaton nga mag-abot pa ang daku nga mga pagtilaw antes mangin determinado nga magpabilin nga matutom sa pagtuo. Dapat determinado na kita nga mangin malig-on antes mag-abot ang pagtilaw. Agod ipakita nga dapat palambuon ang pagbatas upod ang iban pa nga diosnon nga kinaiya, si apostol Pedro nagsulat: “Panikasugi gid ninyo nga idugang sa inyo pagtuo ang labaw gid nga pagkamaayo, sa inyo labaw gid nga pagkamaayo ang ihibalo, sa inyo ihibalo ang pagpugong sa kaugalingon, sa inyo pagpugong sa kaugalingon ang pagbatas, sa inyo pagbatas ang diosnon nga debosyon, sa inyo diosnon nga debosyon ang utudnon nga pagpalangga, sa inyo utudnon nga pagpalangga ang gugma.”—2 Ped. 1:5-7; 1 Tim. 6:11.

⁸ Ang importansia sang pagpalambo sing pagbatas ginpatalupangod sa aton ni Santiago sa iya sulat: “Mga kauturan ko, magkalipay kamo kon nagaatubang kamo sang nanuhaytuhay nga pagtilaw, kay nakahibalo kamo nga ang inyo pagtuo nga natilawan sa sini nga paagi nagaresulta sang pagbatas. Apang tuguti nga makapanghikot sing bug-os ang pagbatas, agod mangin bug-os kamo kag maayo sa tanan nga paagi, nga wala sing kulang nga bisan ano.” (Sant. 1:2-4) Si Santiago nagsiling nga dapat batunon sang mga Cristiano ang mga pagtilaw kag magkalipay sa sini bangod nagabulig ini sa aton agod mapalambo ang pagbatas. Amo bala sina ang imo pagtamod? Pagkatapos sini, ginpakita ni Santiago nga ang pagbatas nagapanghikot agod mangin bug-os ang aton Cristianong personalidad kag agod mangin kalahamut-an gid kita sa Dios. Huo, ang aton pagbatas nagalambo adlaw-adlaw samtang ginaatubang naton kag ginalandas ang mga pagtilaw. Ang pagbatas naman nagapatubas sang iban pa nga maayo nga kinaiya nga kinahanglan naton.

⁹ Ang aton pagbatas kalahamut-an kay Jehova; magapahulag ini sa iya nga padyaan kita sing kabuhi nga wala sing katapusan. Nagsiling pa si Santiago: “Malipayon ang tawo nga padayon nga nagabatas sang pagtilaw, kay kon mahamut-an sia, mabaton niya ang purongpurong sang kabuhi, nga ginsaad ni Jehova sa mga padayon nga nagahigugma sa Iya.” (Sant. 1:12) Huo, nagabatas kita bangod nadalahig ang aton kabuhi. Kon wala kita sing pagbatas, indi kita makapabilin sa kamatuoran. Kon magpadaug kita sa mga pag-ipit sang kalibutan, mapilitan kita nga magbalik sa kalibutan. Kon wala kita sing pagbatas, indi naton padayon nga matigayon ang espiritu ni Jehova, amo nga indi naton mapatubas ang bunga sini sa aton kabuhi.

¹⁰ Agod padayon kita nga makabatas sa sining mabudlay nga tion, dapat naton palambuon ang nagakaigo nga panimuot sa aton pag-antos subong mga Cristiano. Dumduma ang ginsulat ni Santiago: “Magkalipay kamo.” Indi ini mahapos, ilabi na kon nadalahig ang pag-antos ukon grabe nga kasubo. Apang dumduma nga nataya diri ang aton kabuhi sa ulihi. Ang eksperiensia sang mga apostoles makabulig sa aton kon paano magkalipay sa tion sang pag-antos. Ang rekord mabasa sa libro sang Binuhatan, nga nagasiling: “Ginpatawag nila ang mga apostoles, ginbunal sila, kag ginmanduan sila nga mag-untat na sa paghambal sa ngalan ni Jesus, kag ginbuy-an sila. Gani naghalin sila sa atubangan sang Sanhedrin, nga nagakasadya bangod ginkabig sila nga takus pakahuy-an tungod sa iya ngalan.” (Binu. 5:40, 41) Nahangpan nila nga ang ila pag-antos pamatuod nga nangin matinumanon sila sa sugo ni Jesus kag nahamuot si Jehova sa ila. Pagligad sang tinuig, sang ginsulat ni Pedro ang iya nahauna nga sulat, nagkomento sia tuhoy sa balor sini nga pag-antos tungod sa pagkamatarong.—1 Ped. 4:12-16.

¹¹ Ang isa pa ka eksperiensia may kahilabtanan kanday Pablo kag Silas. Samtang nagamisyonero sila sa Filipos, gindakop sila kag ginsumbong nga nagapanggamo sa siudad kag nagabantala sang indi suno sa kasuguan nga mga kustombre. Subong resulta, ginbakol sila kag ginbilanggo. Ang Biblia nagasugid sa aton nga samtang yara sila sa bilangguan kag wala pa mabulong ang ila mga pilas, “sang mga tungang-gab-i na, si Pablo kag si Silas nagpangamuyo kag nagdayaw sa Dios paagi sa ambahanon, kag nagapamati sa ila ang mga bilanggo.” (Binu. 16:16-25) Gintamod ni Pablo kag sang iya kaupod ang ila pag-antos para sa Cristo indi lamang subong pamatuod sang ila katutom sa atubangan sang Dios kag sang mga tawo kundi subong dugang nga panaksi sa mga tawo nga mahimo nahuyog sa pagpamati sa maayong balita. Nadalahig ang kabuhi sang iban. Sa sina mismo nga gab-i, ang manugbilanggo kag ang iya panimalay nagpamati kag nangin mga disipulo. (Binu. 16:26-34) Si Pablo kag Silas nagsalig kay Jehova, sa iya gahom, kag sa iya kahanda nga sakdagon sila sa mga pag-antos nila. Wala sila mapaslawi.

¹² Sa karon man, si Jehova nag-aman sang tanan nga kinahanglan naton agod sakdagon kita sa tion sang pagtilaw. Luyag niya nga makabatas kita. Ginhatag niya ang iya Pulong sa aton agod masangkapan kita sing sibu nga ihibalo tuhoy sa iya katuyuan. Nagapabakod ini sang aton pagtuo. May kahigayunan kita sa pagpakig-upod sa mga masigkatumuluo kag paghimo sang sagrado nga pag-alagad. May pribilehiyo man kita nga mahuptan ang suod nga pagpakig-upod kay Jehova paagi sa pangamuyo. Ginapamatian niya ang aton mga pagdayaw sa iya kag ang aton hanuot nga mga pangabay nga mahuptan ang matinlo nga tindog sa atubangan niya. (Fil. 4:13) Kag indi dapat pagkalimtan ang kusog nga matigayon naton paagi sa pagpamalandong sa paglaum nga ginpahamtang sa atubangan naton.—Mat. 24:13; Heb. 6:18; Bug. 21:1-4.

PAGBATAS SA NANUHAYTUHAY NGA MGA PAGTILAW

¹³ Ang mga pagtilaw nga ginaatubang naton karon kaanggid man sa gin-atubang anay sang una nga mga disipulo ni Jesucristo. Sa moderno nga tion, ang mga Saksi ni Jehova nag-antos sing berbal kag pisikal nga pag-abuso sang mga manugpamatok nga may sayop nga impormasyon tuhoy sa aton. Kaangay sang panahon sang mga apostoles, ang kalabanan nga pagpamatok ginsugyot sang mga panatiko sang relihion nga ang butig nga mga panudlo kag buhat ginbuyagyag sa Pulong sang Dios. (Binu. 17:5-9, 13) Kon kaisa, ang katawhan ni Jehova napaumpawan bangod ginkilala sang mga gobierno ang ila legal nga mga kinamatarong. (Binu. 22:25; 25:11) Apang, ang mga manuggahom mismo nagdumili man sang aton hilikuton, bangod luyag nila pauntaton ang aton Cristianong ministeryo. (Sal. 2:1-3) Sa sini nga mga sirkunstansia, maisog nga ginasunod naton ang halimbawa sang matutom nga mga apostoles, nga nagsiling: “Dapat namon tumanon ang Dios subong manuggahom sa baylo sang mga tawo.”—Binu. 5:29.

¹⁴ Samtang nagainit ang nasyonalismo sa bug-os nga duta, ang mga manugbantala sang maayong balita labi pa nga ginaipit nga talikdan ang ministeryo nga ginhatag sang Dios sa ila. Labi nga nahangpan sang tanan nga alagad sang Dios ang paandam sa Bugna 14:9-12 tuhoy sa pagsimba sa “mabangis nga sapat kag sa larawan sini.” Nakita naton ang importansia sang ginsiling ni Juan: “Nagakinahanglan ini sang pagbatas sa bahin sang mga balaan, nga nagatuman sang mga sugo sang Dios kag malig-on nga nagasunod sa pagtuo ni Jesus.”

¹⁵ Tungod sang mga pagtilaw nga resulta sang mga inaway, rebelyon, ukon direkta nga paghingabot kag pagdumili, posible nga indi mo na mahimo sing hayag ang imo pagsimba. Ayhan imposible maghiwat sing mga miting subong kongregasyon. Mahimo nga indi ka na makapakig-angot sa sanga talatapan. Mahimo man maupangan ang mga pagduaw sang mga manugtatap sang sirkito. Ang mga publikasyon mahimo indi mag-abot. Kon matabo ini, ano ang dapat mo himuon?

¹⁶ Ang sabat amo, himua ang bisan ano nga masarangan mo sa sina nga mga sirkunstansia. Ang personal nga pagtuon posible. Sa masami, ang magagmay nga mga grupo makatipon sa mga puluy-an para magtuon. Ang mga publikasyon nga gingamit sang nagligad kag ang Biblia mismo mahimo gamiton sa sini nga mga miting. Indi magkabalaka. Ang Nagadumala nga Hubon masami nga makahimo sing paagi agod makakomunikar gilayon sa responsable nga mga utod.

¹⁷ Apang bisan pa napahilayo ka sa tanan mo nga kauturan, dumduma pirme nga wala ka napahilayo kay Jehova kag sa iya Anak, si Jesucristo. Ang imo paglaum makapabilin nga mabakod. Si Jehova magapamati gihapon sang imo mga pangamuyo, kag mapabakod ka niya paagi sa iya espiritu. Magpangayo sa iya sing panuytoy. Dumduma nga alagad ka ni Jehova kag disipulo ni Jesucristo, gani himusli ang tanan nga kahigayunan sa pagpanaksi. Pakamaayuhon ni Jehova ang imo panikasog, kag sa indi madugay ang iban mahimo magabuylog sa imo sa matuod nga pagsimba.—Binu. 4:13-31; 5:27-42; Fil. 1:27-30; 4:6, 7; 2 Tim. 4:16-18.

¹⁸ Bisan pa pahugon ka nga patyon, kaangay sang mga apostoles kag sang iban pa, magsalig ka sa “Dios nga nagabanhaw sang mga patay.” (2 Cor. 1:8-10) Ang imo pagtuo sa iya aman nga pagkabanhaw makabulig sa imo nga mabatas bisan ang pinakagrabe nga pagpamatok. (Luc. 21:19) Si Cristo Jesus nagpahamtang sing halimbawa; nakahibalo sia nga ang iya katutom sa idalom sang pagtilaw magapabakod sa iban nga magbatas. Mahimo ka mangin tuburan sang kabakod sa imo kauturan sa kaanggid nga paagi.—Juan 16:33; Heb. 12:2, 3; 1 Ped. 2:21.

¹⁹ Magluwas sa paghingabot kag pagpamatok, mahimo nga kinahanglan mo nga batason ang iban pa nga mabudlay nga kahimtangan. Halimbawa, ang pila nagluya bangod indi interesado ang mga tawo sa ila teritoryo. Dapat batason sang iban ang ila mismo pisikal ukon emosyonal nga mga balatian ukon batason ang mga limitasyon nga resulta sang ila pagkatawhanon. Dapat man batason ni apostol Pablo ang isa ka sahi sang pagtilaw nga nagtublag sang iya pag-alagad ukon nagpabudlay sa iya kon kaisa. (2 Cor. 12:7) Subong man, si Epafrodito, ang unang-siglo nga Cristiano sa Filipos, “ginapung-aw bangod nabatian [sang iya mga abyan] nga nagmasakit sia.” (Fil. 2:25-27) Ang aton pagkadihimpit kag ang iya sang iban ginabangdan sang mga problema nga mabudlay gid batason. Ayhan tungod sa kinatuhayan sang personalidad may magautwas nga problema sa mga masigka-Cristiano ukon bisan sa miembro sang pamilya. Apang ini nga mga sablag sarang mabatas kag malandas sing madinalag-on sang mga nagasunod sa laygay sang Pulong ni Jehova.—Ezeq. 2:3-5; 1 Cor. 9:27; 13:8; Col. 3:12-14; 1 Ped. 4:8.

DETERMINADO SA PAGPABILIN NGA MATUTOM

²⁰ Dapat manguyapot kita sa isa nga gintangdo ni Jehova subong Ulo sang kongregasyon, si Jesucristo. (Col. 2:18, 19) Dapat kita mangabudlay sing suod upod sa “matutom kag mainandamon nga ulipon” kag sa gintangdo nga mga manugtatap. (Heb. 13:7, 17) Paagi sa pagsunod sing maayo sa teokratiko nga mga kahimusan kag pagkooperar sa mga nagapanguna, mangin organisado kita sa paghimo sang kabubut-on ni Jehova. Dapat naton himuslan sing bug-os ang pribilehiyo nga makapangamuyo. Dumduma nga bisan ang pader sang bilangguan ukon bartolina indi makautod sang aton komunikasyon sa aton mahigugmaon nga Amay sa langit ukon makatublag sang aton paghiusa sa mga masigkatumuluo.

²¹ Upod ang determinasyon kag pagbatas, himuon naton ang tanan naton nga masarangan agod matuman ang aton hilikuton nga pagbantala, kag padayon nga himuon ang hilikuton nga ginsugo sang ginbanhaw nga si Jesucristo sa iya mga sumulunod: “Gani kadtui ninyo ang mga tawo sa tanan nga pungsod kag tudlui ninyo sila agod mangin disipulo ko. Bawtismuhi ninyo sila sa ngalan sang Amay kag sang Anak kag sang balaan nga espiritu. Tudlui ninyo sila nga tumanon ang tanan nga ginsugo ko sa inyo.” (Mat. 28:19, 20) Kaangay ni Jesus, magbatas kita. Kabay nga huptan naton sing maathag sa atubangan naton ang paglaum sa Ginharian kag ang kabuhi nga wala sing katapusan. (Heb. 12:2) Subong bawtismado nga mga disipulo sang Cristo, may pribilehiyo kita nga makigbahin sa katumanan sang tagna ni Jesus tuhoy sa “hingapusan sang sistema sang mga butang.” Sia nagsiling: “Ining maayong balita sang Ginharian ibantala sa bug-os nga duta subong panaksi sa tanan nga pungsod; kag dayon magaabot ang katapusan.” (Mat. 24:3, 14) Kon bug-os tagipusuon nga himuon naton ini nga hilikuton sa sini nga tion, maagom naton ang kalipay nga mabuhi sa wala sing katapusan sa matarong nga bag-o nga kalibutan ni Jehova!