Si Daniel sa Lungib sang mga Leon

Ang isa pa ka hari sang Babilonia amo si Dario nga Medianhon. Nakita ni Dario nga lain gid si Daniel sa iban. Si Daniel ang ginpadumala niya sa mga lalaki nga mataas nga opisyal sang pungsod. Nahisa ini nga mga lalaki kay Daniel kag gusto nila sia patyon. Nakahibalo sila nga nagapangamuyo si Daniel kay Jehova sing tatlo ka beses kada adlaw, gani ginsilingan nila si Dario: ‘O hari, dapat may kasuguan nga ang tanan sa imo lamang mangamuyo. Ang bisan sin-o nga indi magtuman sa sini nga kasuguan ihaboy sa lungib sang mga leon.’ Nagustuhan ini ni Dario, gani ginpirmahan niya ang sugo.

Sang nabatian ni Daniel ining bag-o nga sugo, nagpauli sia sa iya balay. Sa atubangan sang bukas nga bintana, nagluhod sia kag nangamuyo kay Jehova. Ang nahisa nga mga lalaki nagsulod sa iya balay kag nakita nila sia nga nagapangamuyo. Nagdalagan sila pakadto kay Dario kag nagsiling: ‘Si Daniel wala magtuman sa imo. Nagapangamuyo sia sa iya Dios sing tatlo ka beses kada adlaw.’ Nanamian si Dario kay Daniel kag indi niya gusto nga mapatay ini. Bilog nga adlaw sia nga nagapamensar kon paano luwason si Daniel. Pero bisan ang hari indi makabag-o sang sugo nga ginpirmahan niya. Kinahanglan niya suguon ang iya mga tinawo nga ihaboy si Daniel sa lungib sang mabangis nga mga leon.

Sina nga gab-i, nabalaka gid si Dario kay Daniel amo nga indi sia makatulog. Pagkaaga, nagdalagan sia pakadto sa lungib kag gintawag si Daniel: ‘Ginluwas ka bala sang imo Dios?’

May nabatian si Dario nga tingog. Tingog ini ni Daniel! Nagsiling sia kay Dario: ‘Ginkipot sang anghel ni Jehova ang baba sang mga leon. Wala nila ako mahalitan.’ Nalipay gid si Dario! Nagsugo sia nga batakon si Daniel sa lungib. Wala gid gani si Daniel sing bisan isa ka karos. Dayon ang hari nagsugo: ‘Ihaboy sa lungib ang mga lalaki nga nag-akusar kay Daniel.’ Sang ginhaboy sa lungib ini nga mga lalaki, gingus-ab sila dayon sang mga leon.

Nagpadala si Dario sini nga sugo sa iya katawhan: ‘Ang tanan dapat magkahadlok sa Dios ni Daniel. Ginluwas niya si Daniel sa mga leon.’

Nagapangamuyo ka man bala kay Jehova kada adlaw pareho kay Daniel?