Ang Bata nga si Jesus

Si Jose kag si Maria nagaistar sa Nazaret upod ni Jesus kag sang iban pa nila nga kabataan. Nagapamanday si Jose para masuportahan ang iya pamilya, kag ginatudluan niya sila parte kay Jehova kag sa iya Kasuguan. Regular nga nagakadto ang ila pamilya sa sinagoga para magsimba, kag kada tuig nagakadto sila sa Jerusalem para magselebrar sang kapiestahan sang mga Judiyo nga ginatawag Paskua.

Sang 12 anyos si Jesus, naglakbay sing malayo ang iya pamilya pakadto sa Jerusalem pareho sang kinaandan nila nga ginahimo. Madamo sing tawo ang nagkadto sa siudad para magselebrar sang Paskua. Pagkatapos sang Paskua, naglakbay naman si Jose kag si Maria pauli, kag naghunahuna sila nga nag-upod si Jesus sa ila mga paryente. Pero sang ginpangita nila sia, indi nila sia makita.

Nagbalik sila sa Jerusalem, kag tatlo na ka adlaw nga ginapangita nila ang ila bata. Sang ulihi, nagkadto sila sa templo. Didto gali si Jesus, nga nagapungko upod sa mga manunudlo. Nagapamati gid sia sing maayo kag nagapamangkot sa ila. Nagdayaw gid ang mga manunudlo kay Jesus amo nga ginapamangkot man nila sia. Kag nagdayaw man sila sa iya mga sabat. Nakita nila nga naintiendihan gid niya ang Kasuguan ni Jehova.

Nabalaka gid si Jose kag si Maria. Si Maria nagsiling: ‘Anak, ginpangita ka namon bisan diin! Sa diin ka naghalin?’ Si Jesus nagsabat: ‘Wala bala kamo makahibalo nga dapat ari ako sa balay sang akon Amay?’

Nagpauli si Jesus sa Nazaret upod sa iya mga ginikanan. Gintudluan ni Jose si Jesus sing pagpamanday. Sa banta mo, ano nga klase sang bata si Jesus? Samtang nagadaku sia, nagadugang ang iya kaalam kag mas ginpalangga sia sang Dios kag sang mga tawo.