Kon Ano ang Mahimu nga Kahulugan sang 1914 sa Imo
TUBTOB sadto nga tion ang nahaunang kalibutanon nga inaway amo ang pinakalapnag kag painakamalaglagon nga inaway sang tawo. Ang ikaduhang kalibutanon nga inaway—isa gid ka kasugpon sang nahauna—mas grabe pa. Sa sining duha ka inaway, kapin sa 25 milyones ka militar, luwas sa sibilyan, ang napatay.
Ang ikatlong kalibutanon nga inaway nga nagagamit sang nuklear nga mga hinganiban sang mga superpower, kon mahanabo ina, mahimu nga mangin internasyonal nga paghikog. Ginasugid sa aton sang mga awtoridad na mahimu ini magakahulugan sa magkubos sang katapusan sang sibilisasyon nga nakilal-an naton kag sang mahimu nga kalaglagan sang tawhanon nga rasa. Ang iban sang kaliwatan nga nakasaksi sa pagpatay sang heredero sa trono sang Austria sang 1914 madugaydugay na nga nagkabuhi agod masaksihan ining mahimu nga putokputokan sang inaway sang tawo.
Apang, ang panahon naton importante luwas sa politikal nga mga rason. Ginasugiran kita sang tagna sang Biblia tuhoy sa mga butang nga nagkalatabo sa nagligad nga 70 ka tuig nga dimakita sang tawhanon nga mata. Mga hitabo ini nga nagahatag sing daku nga kahigayunan sa IMO. Binagbinagon naton ang pinakaimportante sa sini.
Si Jesus kag ang 1914
Kis-a sang si Jesus nagaisahanon kaupod sang iya apat ka sumulunod, ginpamangkot nila sia: “Ano bala ang tanda sang imo presensia kag sang konklusion sang sistema sang mga butang?” Wala sila paghatagi ni Jesus sang petsa. Sa baylo, ginlatagway niya ang mga serye sang hitabo kag huyog sa kalibutan agod mahibal-an sang iya mga sumulunod nga ang iya espirituwal nga “presensia” nagsugod na. Ang iya tagna nagasiling: “Ang pungsod magatindog batok sa pungsod kag ang ginharian batok sa ginharian, kag may mga tiggulutom kag mga linog sa nagakalainlain nga mga duog.” Dayon nagdugang sia: “Tanan ini pamuno lamang sang mga kasakit.”—Mateo 24:3, 7, 8.
Nakita mo na bala karon ang matuod nga rason kon ngaa ang dalagku nga inaway sining siglo tuman ka importante? Ginatuman nila ang tagna ni Jesus. Wala na sing iban pa nga inaway sa maragtas ang makatupon sa duha ka kalibutanon nga inaway. Ang makahilikog lamang nga ikatlong kalibutanon nga inaway ang mahimu nga mas daku, apang wala ina pag-itagna ni Jesus, sanglit ang inaway nga iya ginahambalan bahin sang “pamuno sang mga kasakit.” Magapadayon ang mga kagamo kag magadugang pa sa tapos ini mag-idlab. Walay duhaduha, ang iya tagna natuman sa mga inaway kalibutanon nga nagsugod sang 1914.
Ini nga konklusion ginpalig-on kon binagbinagon naton ang tanan iban pa nga bahin sang ‘tanda sang iya presensia’ nga ginhatag ni Jesus sa Mateo 24 kag sa iban pa nga bahin sang Biblia. Basaha ini sing kinaugalingon. Ang iban pa nga guwa sang magasin nga Lalantawan lubos nga naghinun-anon sini, kag ang katumanan sining tanan nga bahin kon binagbinagon sing tingob dimapanghiwala nga nagapamatuod nga ang aton siglo tunay nga nagaeksperiensia sang “presensia” ni Jesus. Ano ang buot sina silingon sa praktikal nga termino?
Ang “presensia” ni Jesus nagakahulugan sang pagsugod sang iya paggahom subong Hari sa Ginharian sang Dios. Indi ini makita sang aton literal nga mga mata, bangod ang Ginharian langitnon, indi dutan-on. (Juan 18:36) Busa kinahanglan ang “tanda” agod mahibal-an naton nga natabo na ini. Walay sapayan, importante gid nga kamatuoran nga sa temprano nga inadlaw sining siglo, sang ang mga emperyo sang kalibutan nagakapukan kag ang bag-ong kagamhanan nagainulhot, ang labing daku nga kagamhanan sa kalibutan—ang Ginharian sang Dios—nabun-ag.
Si Satanas kag ang 1914
Apang, kon ang “presensia” ni Jesus dimakita, ngaa tuman ini ka importante? Bangod sang epekto sini sa katawhan. Ang iban nga mga tagna nagabulig sa aton nga mahangpan ini. Halimbawa, sa tolon-an sang Bugna, ginrekord ni apostol Juan ang palanan-awon sa kon ano ang mahanabo kon si Jesus magsugod sa paggahom subong Mesianikon Hari: “May inaway sa langit: si Miguel kag ang iya mga manugtonda nga nagapakig-away batok sa dragon, kag ang dragon kag ang iya mga manugtonda nagpakig-away batok sa dragon, kag ang dragon kag ang iya mga manugtonda nagpakig-away, apang gindaug sila kag wala na sing duog sa ila sa langit. Kag ginhulog ang dakung dragon, yanang dumaan nga man-ug, nga ginatawag nga Yawa kag Satanas, ang manugdaya sang Bug-os nga kalibutan; ginhulog sia sa duta, kag ang iya mga manugtonda ginhulog kaupod niya.”—Bugna 12:7-9.
Kon amo, ang nahaunang kalibutanon nga inaway indi amo lamang ang inaway nga nag-idlab sang 1914. May daku pa nga inaway nga gin-away, bisan pa dimakita sang tawhanon nga mga mata. Apang ang mga resulta mabatyagan diri sa duta: “Nabatian ko ang mabaskug nga tingog sa langit nga nagasiling: “Karon nag-abot ang kaluwasan kag ang gahom kag ang ginharian sang aton Dios kag ang pagbulut-an sang iya Cristo . . . Nian magkalipay, O langit kag kamo nga nagapuyo sa sini! Kailo sa duta kag dagat, kay ang Yawa nagpanaug sa inyo sa dakung kasingkal, bangod nga nakahibalo sia nga may malip-ot lamang sia nga tion.’”—Bugna 12:10, 12.
Yari ang bag-o nga kadakuon sang mga problema sang katawhan sang ika-20 ka siglo. Si Satanas kag ang iya mga demonyo yari sa palibot sang duta. Katingalahan bala nga ang iban sang labing malaut nga mga tawo sa maragtas nagkabuhi kag nagmadinalag-on sa panahon naton? Ang mga binuhatan ni Satanas magapadayon sa “malip-ot lamang nga tion.” Apang tubtob indi matapos ina nga tion, indi magauswag ang mga bagay. Indi katingalahan nga si Jesus nagsiling nga ang nahaunang kalibutan nga inaway kag ang kaanggid nga mga hitabo “pamuno lamang sang mga kasakit”!
Apang, ina nga kasakit indi magapadayon sa walay katubtoban. Sa katunayan, ginpakita ni Jesus nga magapadayon ini sa malip-ot lamang nga tion. Nagtagna sia nahanungod sadtong nagkabuhi sang 1914 nga makakita sa katumanan sang ‘tanda sang iya presensia’; “Sa pagkamatuod nagasiling ako sa inyo nga ining kaliwatan indi magtaliwan tubtob nga tanan ining butang matuman.” (Mateo 24:34) Ang isa nga mahanabo sa pagkabuhi sining kaliwatan amo amo ang katumanan sang tagna gikan sa pinakadumaan nga bahin sang Biblia.
Ang 1914 kag ang Bug-os Kalibutan nga Pangulohan
Ginatos ka tuig antes sang panahon ni Jesus, ginhatagan kita sang isa ka Hebreo nga manalagna nga nagahingalan kay Daniel sing umpisa sang pagmartsa sang mga kagamhanan sa kalibutan kutob sang iya adlaw tubtob sa aton. Sa katapusan sang tagna, nagatudlo sa mga gumalahom nga nagagahom sa aton adlaw, sia nagsiling: “Sa mga adlaw sadto nga mga hari magapatindog ang Dios sang langit sing ginharian nga dili gid malaglag. Kag ang ginharian mismo dili ibilin sa iban nga katawhan. Dugmokon sini kag papason ini tanan nga ginharian kag ini magapadayon sa gihapon.”—Daniel 2:44.
Kon amo, ang pagkabun-ag sang Ginharian sang Dios sang 1914 importante katama sa maragtas sang kalibutan. Isa gid ini ka bug-os kalibutan nga pangulohan. Tal-usan sini sa dili madugay ang matag-adlaw nga nagagahom sa sining duta.
Ang mga epekto sini talalupangdon gid. Gin-abiabi sang tuig 1914 ang dag-on sang kagumon kag kasingki. Pagkatapos sang Armagedon, ipaluntad sang Ginharian sang Dios ang dag-on sang paghidait kag kalinong. Sa isa ka matahom nga laragway sang bug-os kalibutan nga paghiusa nga magaluntad sa dili madugay sa pagginahom ni Jesus, ang dumaan nga tagna nagasiling: “Sa iya mga adlaw magalambo ang matarong, kag ang bugana nga paghidait tubtob nga wala na ang bulan. Sia may kagamhanan man kutob sa dagat pa dagat kag kutob sa suba tubtob sa kaukbungan sang duta.”—Salmo 72:7, 8.
Kon amo, ang internasyonal nga kagamo nga nasaksihan sang duta kutob sang 1914 ginhangop nga talalupangdon nga pamatuod sang “konklusion sang sistema sang mga butang.” Pamatuod ini sang kaakig ni Satanas bangod nahibaloan niya nga ang iya tion halos maubos na. Pagpakita ini sang katunayan nga ang isa ka bag-o kag mas maayo nga sistema sang mga butang malapit na.
Ang 1914 kag ang mga Cristiano
Ngaa wala na pagpaluntara ni Jesus inang paghidait kag paghiusa sa katawhan? Bangod may isa ka importante nga buluhaton nga pagahimuon anay. Gintagna ini ni Jesus sang ginhatag niya ‘ang tanda sang iya presensia.’ Nagsiling sia: “Ining maayong balita sang ginharian ibantala sa bug-os napuy-an nga duta nga panaksi sa tanan nga kapungsoran; kag ugaling magaabot ang katapusan.” (Mateo 24:14) Indi magaabot ang katapusan kon indi pa masugiran ang kaawhan kon ano ang nagakatabo. Ginasugiran na bala sila?
Huo. Kutob sang temprano nga mga adlaw pagkatapos sang inaway Kalibutanon I, ang mga Saksi ni Jehova makugi kag walay kahadlok nga nagbantala nahanungod sa bag-o nabun-ag nga Ginharian sang Dios. Sa kapin sa 200 ka kadutaan karon, padayon nila nga ginaduaw ang mga tawo sa ila puluy-an kag ginapaathagan sang matuod nga rason sang mga problema sining siglo. Ginasugiran nila sila tuhoy sa bag-ong sistema nga magaluntad sa dili madugay sa idalom sang Ginharian sang Dios, kag sa amo ginapakig-ambit nila sa ila ang paglaum sa palaabuton. Ang katapusan indi magaabot kon indi anay matapos inang hilikuton nga pagbantala.
Luwas sa pagpahibalo sa katawhan sa kabilogan nahanungod sa Ginharian, ang hilikuton nga pagbantala may isa pa ka katuyoan: Ginahatagan sini ang mga tawo sing kahigayunan nga mangin mga sakop sang Ginharian sang Dios. Ginapalig-on ni Jehova nga Dios ang mga pungsod kag ang ila mga gumalahom: “Alagda nga may kahadlok si Jehova kag magkalipay nga may pagkurog. Haloki ang anak nga lalaki, basi maakig Sia kag mawala kamo.” (Salmo 2:11, 12) Ang mga pungsod subong kabilogan wala magsabat sa sining imbitasyon, apang madamu nga mga indibiduwal ang nagsabat. Wala ini maghimu sa ila nga rebolusyonaryo nga mga kaaway sang karon nga mga gumalahom sang duta. (Roma 13:1-7) Apang naghimu ini sa ila nga maluyag hibaluon ang mga kasugoan sang Ginharian sang Dios kag tumanon ini.
Ang resulta talalupangdon gid, nagatagna sang isa pa ka tagna para sa panahon naton: “Ang madamung katawhan magakadto kag magasiling: ‘Kari kamo, kag magataklad kita sa bukid ni Jehova, sa balay sang Dios ni Jacob; kag tudloan niya kita sang iya mga dalanon kag magalakat kita sa iya mga banas.’ . . . Kag ang ila mga espada salsalon nila nga mga punta sang arado kag ang ila mga bangkaw nga mga galab nga inughagbas. Ang pungsod indi magbayaw sing espada batok sa pungsod, kag indi na sila magtuon sing inaway.”—Isaias 2:2-4.
Ginatuman na karon sang mga indibiduwal ina nga tagna. Gikan sa tanan nga kapungsoran kag hambal, literal nga minilyon ang nagsugod nga magkabuhi sa mga kasugoan sang Ginharian sang Dios, kag may paghidait sa tunga nila. Ang siniglo na kadugay nga mga pag-inaway sa tribo kag relihion nalubad sa tunga sang mga indibiduwal. Sa amo, ang isa ka grupo sang mga tawo ginpain gikan sa kalibutan agod mangin sentro sang bag-ong sistema sa bug-os nga kalibutan nga magaluntad sa idalom sang Ginharian sang Dios.—Bugna 7:9-17.
Ang 1914 kag Ikaw
Nakita mo bala karon ang importansia sang petsa nga 1914 kag ang mahimo nga epekto sini sa imo? Sadto nga tuig, ang mga hitabo ginsugdan nga magaresulta sa bug-os nga pagbag-o sa kalibutan. Ang yabi sang mga pagbag-o amo ang Ginharian sang Dios. Sang magsugod si Jesus sa paggahom sa sinang Ginharian, indi na mangin amo gihapon sa liwat ang mga bagay. Si Satanas gintabog gikan sa langit. Ang kahim-ong sang kalibutan narumpag, kag ang mga tawo wala sing nasapwan nga malig-on agod ibutang sa lugar sini. Apang “dugmokon” sa ulihi sang Ginharian sang Dios ang mga sistema sa paggahom sang tawo kag buslan ini sing dayon.
Kon amo ginsugdan sang tuig 1914 ang tion sang dakung pagkahilingagawon apang nga may daku man nga kahigayunan. May tion pa gihapon nga ‘halokan ang anak nga lalaki’ bilang pagpakita sang imo pagpasakop sa iya. Yadtong nagahimu sini makalampuwas sa nagapakari nga katapusan sining sistema sang mga butang kag mangin bahin sang tawhanon nga rasa nga nahiusa sa paghidait kag paghiusa sa idalom sang isa ka Hari, si Jesucristo.
Ini nga palaabuton mangin amo ang matuod nga kahulugan sang tuig 1914 sa imo.