“Nagapadayon Padulong sa Lalambuton”

“Ginakalimtan ko ang tinalikdan kag nagahimulat ayon sa naunhan, nagapadayon ako padulong sa lalambuton.”—FILIPOS 3:13, 14.

1, 2. (a) Paano si Saulo sang Tarsus nakabaton sing asaynment sa ministeryo, kag ano ini? (b) Ano ang iya reaksion sa sining asaynment?

SANG si Saulo sang Tarsus manugpakadto sa Damasco agod hingabuton ang mga Cristiano, nagsidlak sa palibot niya ang kapawa gikan sa langit, kag nakabati sia sang tingog nga nagasiling: “‘Saulo, Saulo, ngaa bala nga ginahingabot mo ako?’ Nagsiling sia: ‘Sin-o bala ikaw, Ginuo?’ Nagsabat sia: ‘Ako si Jesus, nga ginahingabot mo. Apang tindog ka kag magsulod sa siudad, kag isugid sa imo ang dapat mo himuon.’”—Binuhatan 9:3-6.

² Ngaa ginhatagan ni Jesus si Saulo sang Tarsus sina nga eksperiensia? Ginpaathag ini ni Jesus sa disipulo nga si Ananias: “Sia [Saulo] galamiton nga pinili nakon sa pagdala sang akon ngalan sa atubangan sang mga pungsod kag mga hari kag sa mga anak sang Israel.” Matinumanon nga nagtaliwan si Ananias, nagatakdung sang iya mga kamut kay Saulo kag nagsiling: “Si Jesus nga nagpakita sa imo sa dalan nga imo gin-agihan, nagpadala sa akon agod nga makakita ka kag mapuno ka sang balaan nga espiritu.” (Binuhatan 9:15, 17) Sa gilayon nga mabalik ang iya panulok, ginbautismohan sia, nagsugod sa pagpakig-upod sa Cristianong kongregasyon sa Damasco. Karon, subong bautismado nga Cristianong ministro, gilayon nga nagmasaku sia sa makugi nga pagbantala sang maayong balita nahanungod kay Jesus, ang Anak sang Dios, sa tunga sang mga Judiyo.—Binuhatan 9:20-22.

3, 4. (a) Paano gin-apresyar ni Pablo ang iya ministeryo? (b) Sa anong paagi tuhay ang panimuot ni Pablo sa ginpakita sang kongregasyon sa Efeso?

³ Ining makugi nga ministro nakilal-an nga si apostol Pablo. Daku ang iya apresasyon sa iya ministeryo kag sa dibagay nga kaluoy nga ginpakita sa iya. “Nagapasalamat ako sa nagpabakud sa akon tungod sini, si Cristo Jesus nga aton Ginuo, bangod nga ginkabig niya ako nga matutom sa pagtangdo sa akon sa iya pag-alagdan, bisan ako mapasipalahon anay kag manughingabot kag manugtampalas sa iya. Walay sapayan, nakaagom ako sing kaluoy kay ginhimu ko ini sa pagkadimatinuohon nga wala ako makahibalo.” (1 Timoteo 1:12-14) Huo, ginaapresyar niya sing daku ang ministeryo.—Roma 11:13; 2 Corinto 4:7.

⁴ Ina nga pinamulong ni Pablo nagailustrar sang balor sang ministeryo nga ginsakdag niya sa bug-os niya nga karera. Wala sia mahulog sa kahimtangan nga sang una nagluntad sa kongregasyon sang Efeso, nga sa ila si Jesus nagsiling: “Amo ini ang akon pamatok sa imo, nga ginbayaan mo ang imo nahaunang gugma.” (Bugna 2:4) Sa baylo, ginhuptan ni Pablo ang iya lalambuton sa atubangan niya kag ginhuptan ang amo man nga kakugi kag kapagsik para sa ministeryo nga ginhimu niya sang dumaan nga mga adlaw sa Damasco.

5. Sa tapos maalagad si Jehova sing tinuig, paano naton palig-unon ang iban?

⁵ Sa tapos mangin matutom nga Cristianong ministro sing mga dekada, gingamit ni Pablo ang iya kaugalingon nga background kag mga eksperiensia agod palig-unon ang mga masigka ministro sa kongregasyon sang Filipos agod indi sila mag-untat. Indi bala nga sing masami tuman ka makawiwili nga pamatian kon paano naton-an sang isa ang kamatuoran kag nangin ministro? Sing nahisuno, ginapalig-on mo bala ang iban pasad sa imo kaugalingon nga sugilanon kag tinuig sang matutom nga pag-alagad subong dedikado nga Cristianong ministro?

6. Ano ang background ni Pablo subong Judiyo?

⁶ Sa iya sulat sa mga taga-Filipos, ginpatuhoyan ni Pablo ang iya kabuhi subong isa ka aktibo nga Judiyo. Nagsiling sia: “Kon bisan sin-o pa nga tawo nagahunahuna nga may katarungan sia sa pagsalig sa unod, ako may labi pa; ginsirkunsidar ako sa ikawalong adlaw, sa katawhan sang Israel, sa kabikahan ni Benjamen, Hebreo nga natawo sa mga Hebreo; nahanungod sa kasugoan, Fariseo; nahanungod sa kakugi, manughingabot sang kongregasyon; nahanungod sa pagkamatarong sa idalom sang kasugoan, disalawayon.”—Filipos 3:4-6.

7. Ngaa gintalikdan ni Pablo yadtong mga butang kag ano ang iya nadaug bangod sang paghimu sini?

⁷ Bangod sina nga ginhalinan mahimu nga madamu sing materyal nga bentaha si Pablo sa pagpakig-upod sa mga Judiyo. Apang, nagpadayon sia sa pagsiling: “Apang ang bisan ano nga sa akon sadto daug, ginbilang ko nga kadulaan tungod kay Cristo. Sa pagkamatuod, ginabilang ko ang tanan nga butang subong nga kadulaan bangod sang labaw gid nga kabilyanan sang pagkilala kay Cristo Jesus nga akon Ginuo. Tungod sa iya gin-antus ko ang kadulaan sang tanan nga butang, kag ginabilang sila nga mga sagbut, . . . agod nga makilala ko sia kag ang gahom sang iya pagkabanhaw kag makaambit sang iya mga pag-antus, nga mangin kaangay niya sa iya kamatayon, agod nga kon mahimu madangat ko ang pagkabanhaw gikan sa minatay.” (Filipos 3:7-11) Ina nga mga pulong nagapasundayag sang bug-os nga pagtuo kay Cristo Jesus kag sa mga aman nga ginhimu ni Jehova nga Dios. Kaangay bala kamo kay Pablo sa indi pagtugot sa handum para sa kabantogan kag materyal nga daug nga magadominar sang inyo kabuhi?

Ang Husto nga Kaisipan

8. (a) Sa tapos mag-alagad sing malawig sa ministeryo, ano ang ginsiling ni Pablo tuhoy sa iya lalambuton? (b) Paano mangin matuod sa aton bahin ang ginsiling ni Pablo sa 1 Corinto 9:24-27?

⁸ Sa tapos maalagad ni Pablo ang Dios sing mga dekada, mahimu bala sia makauntat sa pagpadayon sa iya lalambuton? Nagsulat sia sa mga taga-Filipos: “Mga kautoran, wala ako nagaisip nga ini akon na; apang isa ka butang ang akon ginahimu: Sa ginakalimtan ko ang tinalikdan kag nagahimulat ayon sa naunhan, nagapadayon ako padulong sa lalambuton tungod sa padya sang mataas nga pagtawag sang Dios nga yara kay Cristo Jesus.” (Filipos 3:13, 14) Nakahimu na sia sing maayong rekord sa Cristianong ministeryo kag nakabatas sing madamung butang, kag samtang yara sia sa bilanggoan sa Roma nga ginsulat niya ining mga pulong sa mga taga-Filipos, apang wala pa matapos ang iya ministeryo. Agod batunon niya ang padya nga matigayon sadtong nagaalagad sa nahaunang-siglo nga Cristianong kongregasyon, nga amo “ang mataas nga pagtawag sang Dios nga yara kay Cristo Jesus,” nian dapat sia magpadayon sa iya lalambuton. Amo sini ang husto nga pagtamod nga ginahuptan sang tanan nga hamtong mga mga Cristiano, kon bala ang ila paglaum para sa palaabuton nga kabuhi sa langit man ukon sa duta. Maayo nga usisaon sang kada isa sa aton ang aton kaugalingon nga tindog kag ang aton paagi sang panghunahuna agod tan-awon kon bala tunay nga aton ginaapresyar ang ministeryo nga gintugyan sa aton sa idalom sang kahimusan sang Dios.

9. Anong hamtong nga panghunahuna ang matigayon naton?

⁹ Ginpakilala ni Pablo ang hamtong nga Cristianong panimuot, nga nagasiling: “Ang mga hamtong sa aton maghunahuna sing subong; kag kon sa bisan anong butang tuhay kamo sing panghunahuna, ina man ipahayag sang Dios sa inyo.” (Filipos 3:15) Ang hamtong nga Cristianong panimuot nagadul-ong sa kadalag-an. Nagadalahig ini sang pagsunod sa mga tikang ni Cristo Jesus, nga madinalag-on nga nagtapos sang iya gintangdo sa iya dutan-on nga ministeryo. Si Jesus sarang makapangamuyo sa iya Amay: “Ginhimaya ko ikaw sa duta, sang natapos ko ang buluhaton nga nahatag mo sa akon nga himuon. Kag karon, Amay, himayaa ako kaupod nimo sang himaya nga naagom ko sadto anay kaupod nimo sa wala pa ang kalibutan.”—Juan 17:4, 5.

10. Ano ang labi pa nga masiling tuhoy sa huwaran nga panghunahuna ni Cristo sa pag-alagad kay Jehova?

¹⁰ Agod pahamut-an naton si Jehova nga Dios, kag sa sining paagi batunon ang padya nga kabuhi nga walay katapusan, dapat tigayunon naton ang pareho nga kaisipan nga ginpakita ni Cristo Jesus. Nakahibalo sini, si Pablo nag-apelar: “Hupti ninyo ini nga hunahuna nga yara man kay Cristo Jesus, nga bisan sa dagway sia sang Dios, wala niya pagbilanga ang pagpakigtupong sa Dios nga butang nga pag-agawon. Wala, kundi gin-ula niya ang iya kaugalingon, nga nangin dagway sang ulipon nga natawo sa kaanggid sang mga tawo. Labi pa sa sina, sang makita sa bayhon sang tawo nagpaubos sia sang iya kaugalingon kag nangin masinulundon tubtob sa kamatayon, bisan sa kamatayon sa usok sang pag-antus. Busa ginbayaw sia sang Dios sing mataas gid kag ginhatagan sia sing ngalan nga labaw sa tanan nga ngalan.” (Filipos 2:5-9) Daw ano katahom nga panimuot ang iya ni Jesus! Sarang bala naton sia mailog? Ang mapainubuson nga pagtinguha nga himuon ang kabubut-on sang Dios pirme nagadul-ong sa mga pagpakamaayo. Kon ginatuman ang isa ka asaynment, nagaresulta ini sa maayo.

11. Ano ang dapat nga himuon sadtong mabakud kag hamtong sa espirituwal?

¹¹ Bangod sang ginsulat ni Pablo, ang iban sa kongregasyon sang Filipos nagapanikasog gihapon nga tigayunon ang hamtong nga Cristianong panimuot. Ginpalig-on kag ginbuligan sila ni Pablo. Sa kalabanan nga mga kongregasyon karon, yara ang mas makusog sa pagtuo kag yara ang iban nga may kaluyahon. Kaangay ni Pablo, dapat palig-unon sang mga makusog ang iban. Daku sing mahimu si Cristo Jesus agod pabakuron yadtong may espirituwal nga mga kinahanglanon, nagapahamtang sing halimbawa agod sundon sang mga Cristiano. “Kita nga mga mabakud dapat magdala sang mga kaluyahon sang mga maluya, kag dili magpahamuot sa aton kaugalingon. Ang tagsa sa aton magpahamuot sa iya isigkatawo sa maayo sa pagpalig-on sa iya. Ang Dios sang pagkalig-on kag pagkabakud magtugot sa inyo nga mangin isa kamo sing hunahuna sa isa kag isa, suno kay Cristo Jesus, agod nga sa tingob mahimaya ninyo sa isa ka tingog ang Dios kag Amay sang aton Ginuong Jesucristo.”—Roma 15:1, 2, 5, 6.

12. Ano dapat ang aton pagtamod sa padya nga ginaaman sang Dios?

¹² Sa pagpabakud sa pagtuo sang mga taga-Roma, ginapakita ni Pablo nga “ang dulot nga ginhatag sang Dios amo ang kabuhi nga walay katapusan paagi kay Cristo Jesus nga aton Ginuo.” (Roma 6:23) Sadtong iya ministeryo madamu man sing masiling si Jesus tuhoy sa kabuhi nga walay katapusan. Amo ini ang matahom nga padya nga ginahatag sang Dios sa iya mga alagad. Luyag sang Dios nga pirme ituon sang iya mga alagad ang ila mata sa padya, kay nagapahulag ini sa ila nga magmatutom. Kon himuon naton ina ginapakita naton ang makusog nga pagtuo sa iya mga saad. Sa aton Cristianong mga miting may okasyon kita nga ihambal sing masunson ang padya nga ginahatag ni Jehova sa mga matutom.

Ang Aton Ministeryo Walay Sapayan sang Kabudlayan

13. Ano ang bahin sang Kasulatan sa aton pagtigayon sing husto nga panghunahuna?

¹³ Mangin mapuslanon ang pagpabilin naton sa husto nga panimuot, ukon panghunahuna samtang aton ginatuman ang aton ministeryo sa sining katapusan nga mga adlaw. Bisan nga madula sang iban ang ila nahauna nga gugma, kabay nga mamat-od kita nga indi gid ini matabo sa aton. Ang kasulatan mismo makabulig sa sining katuyoan. (Roma 15:4) Paagi sa aton pagtuon sa sini matigayon naton ang paglaum. Mapasalamaton bala kita sing tudok kay Jehova bangod sang Kasulatan, kag sang madamung mga butang nga narekord sa sini tuhoy sa matutom nga mga alagad ni Jehova subong ni apostol Pablo?

14. Paano ginhuptan ni Pablo ang iya positibo nga panimuot sa atubang sang mabudlay nga mga eksperiensia?

¹⁴ Ano ang himuon naton kon maagihan naton sing personal ang mga ginsambit ni Pablo sa 2 Corinto 11:23-28? Ngaa wala mag-untat si Pablo? Bangod ginahunahuna niya ang iya lalambuton. Mahimu nga maagihan naton ang kaanggid nga mga butang. Apang dapat kita magpadayon sa aton lalambuton para sa padya nga ginatigana sang Dios sa aton. Sang nagsulat si Pablo sa mga taga-Filipos, ginpakita niya ang iya maayong panghunahuna paagi sa pagsambit nga yara sia sa bilanggoan bangod sang pagpangapin sa maayong balita. (Filipos 1:7, 16) Nahangpan niya kon ngaa yadto didto sia. Importante ina kon napaidalom kita sa sina nga pagtilaw. Dugang pa, nahibaloan naton nga sarang kita gamiton ni Jehova agod makapanaksi sa iya kadayawan.

15. (a) Ngaa ang kongregasyon sang Filipos nagakinahanglan sing pagpalig-on, kag ano ang ginsiling ni Pablo sa ila agod palig-unon sila? (b) Ano ang reaksion sang kongregasyon sa Roma sa pagkabilanggo ni Pablo?

¹⁵ Ang mga taga-Filipos may kaanggid nga pagtilaw nga naagihan ni Pablo sa Roma. Nagsulat sia: “Nga may amo man kamo nga pagpakig-away nga inyo nakita kag karon ginapamatian nga yari sa akon.” (Filipos 1:30) Sa sining kahimtangan si Pablo sarang makasulat sing makapalig-on sa ila. Nagsiling sia nga nakilal-an ang maayong balita sa tunga sang Praetoriano nga Bantay. Sing maathag ang Cristianong mensahe nakasulod sa panimalay mismo sang emperador, ang iban didto naangin dedikado nga mga Cristiano. Ang kongregasyon sa Roma nagahulag sing maayo sa kahimtangan, nga wala magluya, masubol ukon mahadlok bangod sang katunayan nga si Pablo nabilanggo. Sa baylo masaku sila sa hilikuton nga luyag ni Jehova nga ipahimu, nagpakita sing labi pa nga kasidla nga ihambal ang pulong sang Dios sa walay kahadlok.—Filipos 1:12-14; 4:22.

16. Ano ang labi na nga dapat naton himuon kon magautwas ang pagpamatok?

¹⁶ Kon mag-utwas ang pagpamatok, madamu sing kaayohan ang paghupot sang paghiusa sa Cristianong kongregasyon. Ginpadaku ni Pablo ang paghiusa kag pagkaisa. (Filipos 1:27-2:4) Inang mga tion nagakinahanglan nga ipabutyag ang mga pulong sang pagtuo sa isa kag isa, agod nga indi kita mag-untat sa pagpadayon padulong sa lalambuton. Tion ini nga maghupot sing mahigugmaon, mapainubuson nga panimout kag sa paghimu sing maayo sa isa kag isa, nagadipara sang mga intereses sang isa kag isa.—Ipaanggid ang Filipos 2:19-21.

Paglandas sa mga Upang

17. Ngaa indi kia dapat mag-untat sa pagpadayon sa aton lalambuton kon mag-utwas ang palaligban sa panglawas?

¹⁷ Ang suod nga kaupod ni apostol Pablo amo Epafrodito. Bangod sang buluhaton sang Ginuo halos yara na sia sa bibi sang kamatayon, apang wala sing pamatuod nga ang iya problema sa panglawas nagtiklod sa iya nga dulaon ang lalambuton nga yara sa unahan niya. (Filipos 2:25-30) Sa 2 Corinto 12:7, ginsambit ni Pablo ang iya kaugalingon nga eksperiensia tuhoy sa “ungon sa unod,” ayhan nagapatuhoy sa pila ka kabudlayan sa iya mata. Nangamuyo sia nga kuntani madula na ini sa iya, apang wala pag-ihatag ang iya pangabay. Apang, nagadumdom sang iya lalambuton nabuligan si Pablo nga magpadayon walay sapayan sang bisan anong balatian sa pisikal. Bisan nga may kaluyahon, nakasapo sia sing paagi sa bulig ni Cristo Jesus.—2 Corinto 12:9.

18. Paano ginpakita ni Pablo ang maayo nga pagkatimbang nahanungod sa materyal nga mga butang?

¹⁸ Ang sulat sa mga taga-Filipos (4:11-13) nagasambit man sang mga kinahanglanon sa kabuhi. Ang pag-eksperiensia sing kakulangan sarang mangin pagtilaw sa Cristiano sa kon bala bayaan niya ang pagpadayon sang iya lalambuton. Ukon himuon bala niya ang hamtong nga panimuot paagi sa paglubad sa problema kag sa gihapon nagapakigbahin sa ministeryo? (Ipaanggid ang Binuhatan 18:1-4) Bisan nga kulang ukon dagaya si Pablo sing mga aman, ang iya ministeryo amo ang una. Sang dagaya sia wala niya paggamita ang okasyon nga maghinguyang sing madamu nga tion sa paglingawlingaw, kundi nagpadayon sia sa lalambuton sang padya.

19. Ano ang ginalaygay sa aton sang Filipos 4:6, 7 nga himuon kon nagakinahanglan kita sing bulig? Kag ano ang mga resulta?

¹⁹ Wala pagsambita ni Pablo ang tagsa ka sahi ang eksperiensia nga mahimu agumon sang Cristiano sa kabuhi. Apang kon mag-abot ang mga butang nga magasablag sa ministeryo, subong hamtong nga mga Cristiano dapat kita magliso kay Jehova sa pangamuyo, ang dalanon nga ginarekomendar sa Filipos 4:6, 7. Nian hatagan kita ni Jehova sing kalinong sa panghunahuna, nagabulig sa aton nga maghunahuna sing maathag kag nagabulig sa aton nga malandas ang mga problema samtang nagapadayon kita subong iya matutom nga mga ministro. Ang pangamuyo nagabulig sa aton nga huptan ang aton pagtuo kag magapadayon padulong sa aton lalambuton.

20. (a) Paano kita ginapalig-on sang mga halimbawa sang matutom nga mga gulanggulang sa kamatuoran? (b) Ano dapat ang aton himuon? Ngaa?

²⁰ Madamu sadtong nagapakig-upod sa mga kongregasyon karon ang nagaalagad kay Jehova sing mga dekada. Sila tanan nakaagi sing pagtilaw samtang nagahimu sang ila ministeryo. Apang nabuligan sila ni Jehova, gani nagpadayon sila padulong sa lalambuton para sa padya. Nagapasalamat kita kay Jehova nga sa modernong tion, subong sadtong nahauna nga siglo anay, may yara kauturan nga mga lalaki kag mga babayi nga mga halimbawa sa pagbatas, matutom sa ila pag-alagad sa Ginharian kag nagatuon pirme sang ila mata sa padya. Yadtong mga pamatan-on ukon bag-ohan sa “Dalan” nakabenepisyo paagi sa pag-usisa sa rekord ni apostol Pablo ukon sang matutom nga mga alagad sa modernong-adlaw nga kongregasyon, kon paano nila ginlubad ang ila mga palaligban. (Binuhatan 9:2; Hebreo 13:7) Kabay nga gamiton sang kada isa sa aton ang tagsa ka okasyon nga magpalig-onay sa isa kag isa agod makabatas kita sing matutom sa pag-alagad nga ginahimu naton kag nahiusa nga magpadayon padulong sa lalambuton nga ginpahamtang ni Jehova sa atubangan naton. Paagi sina, nagalaum kita nga maalagad si Jehova nga Dios sing dayon sa malipayon nga pagpakig-upod sa mga matutom.—Filipos 3:13-16.

Mga Punto nga Dumdumon

◻ Ano ang personal nga background ni Pablo, kag paano niya ini gingamit agod palig-unon ang mga kautoran?

◻ Paano ginapakita sa aton sang mga halimbawa nanday Cristo Jesus kag Pablo kon ano ang hamtong nga Cristianong panimuot?

◻ Paano naton mapadayag ang aton paghiusa kon magautwas ang pagpamatok?

◻ Ngaa dapat kita magpadayon padulong sa aton lalambuton?

[Piktyur sa pahin 11]

Madamu ang ginhimu ni Cristo Jesus agod pabakuron yadtong may espirituwal nga mga kinahanglanon