Magpadayon Padulong sa Tulumuron!

Importante nga mga Punto Gikan sa Mga Taga-Filipos

LUYAG ni apostol Pablo nga ang mga Cristiano sa Filipos magapadayon pirme padulong sa tulumuron para sa padya nga dayon nga kabuhi. Gani, nagsulat sia sa ila sang mga 60 ukon 61 C.E., sa tion sang iya una nga pagkabilanggo sa Roma. Ang iya sulat ginpadala sa kongregasyon nga gintukod niya napulo ka tuig ang nagligad sa Filipos, isa ka siudad nga ginpasad ni Felipe sang Macedon (amay ni Alejandro nga Daku). Sang unang siglo C.E., ini nangin “pangunang siudad sang distrito sang Macedonia,” bahin karon sang naaminhan nga Gresya kag nabagatnan nga Yugoslavia.​—⁠Binuhatan 16:​11, 12.

Ang mga tumuluo sa Filipos mga imol apang maalwan. Kapin sa makaisa, nagpadala sila sing pila ka butang para sa mga kinahanglanon ni Pablo. (Filipos 4:​14-17) Apang ang iya sulat indi lamang sulat sang pagpasalamat. Naghatag man ini sing pagpalig-on, nagpabutyag sing gugma, kag naghatag sing laygay.

Dayag ang Cristianong mga Kinaiya

Ang sulat ni Pablo nagabukas paagi sa pagpamatuod sang iya gugma para sa mga tumuluo sa Filipos. (1:​1-30) Nagpasalamat sia kay Jehova tungod sang ila amot para sa pagpauswag sang maayong balita kag nangamuyo nga magadugang ang ila gugma. Nalipay si Pablo nga ang pagbilanggo sa iya nagtiklod sa ila nga ipakita ‘ang labi nga kaisog sa pagpamulong sang pulong sang Dios sa walay kahadlok.’ Handum niya nga makaupod si Cristo apang nagbatyag nga makaalagad pa sia sa ila. Luyag man ni Pablo nga sila padayon nga ‘magapanikasog sing tingob sa pagtuo sang maayong balita.’

Masunod amo ang laygay nahanungod sa panimuot kag paggawi. (2:​1-30) Ang mga taga-Filipos ginpalig-on sa pagpakita sing personal nga interes sa iban kag sa pagpakita sing pagpaubos kaangay kay Cristo. “Nagasiga [sila] subong nga mga sulu sa kalibutan” kag ginlaygayan sa paghupot sing “hugot nga pagpanguyapot sa pulong sang kabuhi.” Nagalaum si Pablo sa pagpadala kay Timoteo sa ila kag nagasalig nga sia mismo magakari sa indi madugay. Agod ipasalig liwat sa ila si Epafrodito, nga nagmasakit sing grabe, ginpadala ni Pablo sa ila ining matutom nga alagad.

Padayon nga Magpadayon Padulong sa Tulumuron

Masunod nga ginpakita sang apostol sa mga taga-Filipos kon diin ibutang ang ila pagsalig samtang nagapadayon sila padulong sa tulumuron. (3:​1-21) Dapat ini ibutang kay Jesucristo, indi sa unod ukon sa sirkunsisyon subong sang ginahimo sang iban. Ginkabig ni Pablo ang iya undanon nga mga kredensiyal nga mga sagbut bangod sang “labaw gid nga kabilyanan sang ihibalo kay Cristo.” Ang apostol “nagapadayon sa lalambuton tungod sa padya sang mataas nga pagtawag sang Dios nga yara kay Cristo Jesus” kag naglaygay sa mga taga-Filipos nga maghunahuna man sing subong.

Ang pagtuman sa nagahinakop nga laygay ni Pablo nagabulig sa mga taga-Filipos sa paghupot sa tulumuron kag padya sa unahan. (4:​1-23) Ginlaygayan niya ang mga taga-Filipos nga itugyan ang ila mga paghimud-os sa Dios sa pangamuyo kag punuon ang ila mga painoino sing maayong mga panghunahuna. Sa liwat ginkomendasyonan sila ni Pablo bangod sang ila kaalwan kag naghinakop paagi sa mga panamyaw kag paglaum nga ang dibagay nga kaluoy ni Ginuong Jesucristo mangin kaupod sang espiritu nga ginapakita nila.

Ang sulat ni Pablo sa mga taga-Filipos nagapauswag sang kaalwan, gugma, kag pagpaubos. Nagapalig-on ini sang pagsalig kay Cristo kag bug-os tagipusuon nga pagpanga­muyo sa Dios. Kag ang mga pina­mulong ni Pablo pat-od gid nga magabulig sa mga Saksi ni Jehova nga magpadayon padulong sa tulumuron para sa padya nga kabuhi nga dayon.

[Kahon/Piktyur sa pahina 25]

Padulong sa Tulumuron: “Ginakalimtan ko ang tinalikdan kag nagahimulat ayon sa unahan,” sulat ni Pablo, “nagapadayon ako padulong sa lalambuton tungod sa padya sang mataas nga pagtawag sang Dios nga yara kay Cristo Jesus.” (Filipos 3:​13, 14) Ang apostol nagapanikasog kaangay sang isa sa palumba. Wala sia nagauyang sing tion kag kusog sa pagbalikid kundi nagapadayon sa iya lalambuton​—⁠kaangay sang isa ka manugdalagan nga nagahimulat sa pagtabok sa finish line. Para kay Pablo kag sa iban hinaplas nga mga Cristiano, ang padya amo ang langitnon nga kabuhi paagi sa pagkabanhaw pagkatapos sang dutan-on nga dalanon sang katutom sa Dios. Langitnon man ukon dutan-on ang aton mga paglaum, padayon kita nga maghupot sang aton integridad kay Jehova kag magpadayon padulong sa lalambuton subong iya mga Saksi.​—⁠2 Timoteo 4:⁠7.