Nisan 14—Ang Adlaw nga Dulumdumon

“Padayon nga himoa ini sa handumanan nakon.”—1 CORINTO 11:24.

1. Paano gindaug ni Jesus ang kalibutan?

“MAGPAKAISOG! Nadaug ko ang kalibutan.” Paagi sa sinang pamulong sang paumpaw kag pagpalig-on, ginpabakud ni Jesus ang iya 11 ka matutom nga apostoles sang gab-i antes sia mapatay. Ginpamatod-an ni Jesus ang iya kaugalingon nga mandadaug sa kalibutan! Madinalag-on nga nabatoan niya ang bisan ano nga tinguha sang iya kaaway, nga si Satanas nga Yawa, nga bugtuon ang iya katutom kay Jehova. Kag karon, ginaatubang sang kamatayon sa usok sang pag-antos sa pila ka takna, masinaligon sia nga mahuptan ang iya matutom nga integridad tubtob sa katapusan.—Juan 16:33; Hebreo 12:2.

2. Ngaa ginsugdan ni Jesus ang “panihapon sang Ginuo”?

² Ini nga hitabo nga importante sa bug-os nga uniberso natabo sang nagligad nga napulog siam ka gatos kag kalim-an kag duha ka tuig sang ika-14 nga adlaw sang Nisan, ang nahauna lunar nga bulan sang Judiyong sagrado nga kalendaryo. Ini nga adlaw mangin isa nga indi gid malipatan sang iya debotado nga mga sumulunod sang iya tikang. Agod siguraduhon nga indi pagpasapayanan sang iya matutom nga mga sumulunod ang importansia sang kon ano ang mahanabo, ginsugdan ni Jesus ang pinasahi mahinandumon nga panihapon, nga ginalaragway ni apostol Pablo subong “ang panihapon sang Ginuo.” Sa idalom sang balaan nga inspirasyon si Pablo nagsiling nga sa sini nga okasyon ginmandoan ni Jesus ang iya mga apostoles nga yadto didto anay: “Padayon nga himoa ini sa handumanan nakon.” (1 Corinto 11:20, 24) Kon nabalaka ikaw nga mangin isa sa mga sumulunod ni Jesus, ginaapresyar mo bala kon ngaa ginmando niya ina, kon ano ang kinahanglan nga himuon mo, kag kon ano ang buot silingon sini para sa imo palaabuton?

Isa ka Halandumon nga Adlaw

3. Ngaa, kag sa idalom sang anong kahimtangan, ginhimu una ang Nisan 14 nga adlaw nga dulumdumon?

³ Indi amo ini ang nahauna nga tion sa maragtas sang tawo nga ang Nisan 14 ginpain subong adlaw nga dulumdumon. Sang 1513 B.C.E., si Jehova, paagi sa iya alagad nga si Moises, nagmando sa mga Israelinhon: “Ining adlaw [sang Nisan 14] mangin handumanan sa inyo, kag bantayan kag saulugon ninyo ini nga piesta ni Jehova sa bug-os ninyong mga kaliwatan.” Ano anay ang nagdul-ong sa sina nga pagsaulog? Si Jehova mismo nagsabat: “Ini halad sang paskua ni Jehova, kay nagligad sia sa kabalayan sang katawhan sang Israel sa Egipto sang pagpatay niya sa mga Egiptohanon.”—Exodo 12:14, 27.

4. Anong importante nga mga hulusayon ang nadalahig sa paghilway sa Israel gikan sa Egipto?

⁴ Yadtong makahalawhaw nga pagluwas sang tagsa ka Israelinhon nga panganay sa Egipto, nga nagadalahig sa tawo kag sapat, natabo sadto nga gab-i sang Nisan 14. Amo ini ang katapusan sang siam ka sunodsunod nga kalalat-an batok sa yawan-on nga mga dios nga ginasimba sang mga Egiptohanon, nga nagapakita sang ginsambit anay nga katuyoan ni Jehova sa matinaastaason nga si Faraon: “Apang, bangod sini nga katuyoan ginbuhi ko ikaw, sa pagpakita sa imo sang akon gahom agod nga mapahayag ang akon ngalan sa bug-os nga duta.” Pila ka adlaw sang ulihi ang ngalan kag gahom ni Jehova dugang nga napadayag sang ginluwas niya ang minilyon ka Israelinhon kag ang dakung salakot nga kadam-an sa Dagat nga Pula, samtang naglumos sa mga hangaway ni Faraon. Indi katingalahan nga si Moises kag ang mga anak sang Israel: “Magaamba ako kay Jehova, kay nagdaug sia sing mahimayaon”!—Exodo 9:16; 15:1.

5. Ano ang katuyoan sang pagsaulog sang Paskua?

⁵ Sa tapos ang mga Israelinhon nagpuyo sa duta nga ginsaad sa ila katigulangan nga si Abraham, ang Paskua dapat nga saulugon sing pungsodnon sing makaisa kada tuig sa Jerusalem, bilang pagtuman sa sugo sa Deuteronomio 16:1-8. Busa si Jehova naghimus nga ang Nisan 14 dapat pirme ipatudok sa hunahuna sang iya tipiko nga katawhan. Ano ang katuyoan sini? Mangin adlaw ini nga bayawon ang ngalan ni Jehova, nga dumdumon ang iya dalagku nga mga buhat sang paghilway. Busa siniglo sang ulihi ang importansia sang Paskua amo ang nagapangibabaw sa mga tagipusuon kag mga hunahuna sang mga ginikanan ni Jesus, nga ginasugiran kita, “nagkadto tuigtuig sa Jerusalem sa piesta sang paskua.” Suno sa Judiyong batasan, ang ila anak nga si Jesus dapat nga mag-upod sa ila.—Lucas 2:41, 42.

6. Tungod sa anong mga rason nabalaka si Jesus nga saulugon ang Paskua sang 33 C.E. upod sa iya matutom nga mga apostoles?

⁶ Pagkatapos mabawtismohan si Jesus sa Jordan kag masugdan ang iya ministeryo, padayon niya nga ginsaulog ang Paskua kaupod ni Maria, ang iya dutan-on nga iloy kag sang iya mga utod sa iloy. Apang, para sa Nisan 14, 33 C.E., ginhimus ni Jesus nga saulugon ang piesta kaupod sang iya 12 ka apostoles. Ang kasaysayan ni Lucas nagasugid sa aton kon ano ang ginbatyag ni Jesus tuhoy sini nga okasyon: “Luyag ko gid ang pagkaon sini nga Paskua kaupod ninyo sa wala pa ako mag-antos!” (Lucas 22:15, To­days En­glish Ver­sion) Ngaa ginhandum gid ina ni Jesus? Bangod nahibal-an niya ang importansia sang mga hitabo nga mahanabo sa dili madugay sa sinang halandumon nga adlaw nga nagsugod sang magtunod ang adlaw. Nahibal-an man ni Jesus nga ina nga mga hitabo magatabon sadtong matabo anay sang 1513 B.C.E. Bayawon sini ang ngalan ni Jehova sing labi pa sang sa nagligad kag magapasad sing sadsaran para sa katapusan nga pagpakamaayo sa tanan nga panimalay sa duta. Subong man, madamu sia sing inughambal sa iya mga disipulo sa wala pa sia mapatay, nagapalig-on sing kaisog sa ila nga magpabilin nga iya matutom nga mga sumulunod. Ang detalyado nga kasaysayan sang Ebanghelyo nagatugot sa aton nga pamatian ini, kon hambalon pa, kon ano ang ginsiling kag ginhimu ni Jesus.—Juan 12:31; 17:26.

Ano ang Natabo? Ano ang Buot Silingon Sini?

7. (a) Ano nga hitabo sadtong katapusan nga panihapon sa Paskua ni Jesus ang nagdul-ong sa iya nga sugdan ang Memoryal sang iya kamatayon? (Juan 13:1-30) (b) Ilaragway ang paagi ni Jesus sa pagsugod sang Panihapon sang Ginuo.

⁷ Samtang nagakaon, si Jesus nagtindog kag ginhugasan ang mga tiil sang iya mga disipulo, sa amo nagpahamtang sing himpit nga halimbawa sang pagpaubos. Nian nagsiling si Jesus, “Ang isa sa inyo magaluib sa akon.” Dili madugay pagkatapos sadto, nagliso sia kay Judas kag nagsiling, “Ang imo ginahimu himoa sing madali.” Ang kasaysayan ni Juan nagasiling: “Nagguwa sia sa gilayon. Kag gab-i sadto.” (Juan 13:21, 27, 30) Pagkatapos sini nga ginsugdan ni Jesus ang Memoryal sang iya kamatayon. Pamatian naton kon paano ginalaragway sang nakasaksi nga si Mateo kon ano ang natabo: “Karon sang nagakaon sila, nagkuha si Jesus sing tinapay kag, ginpakamaayo, kag gintipiktipik ini, kag ginhatag sa mga disipulo, kag nagsiling: ‘Kuha kamo, kaon kamo. Ini nagakahulugan sang akon lawas.’ Kag nagkuha sia sang tagayan kag, sang nagapasalamat, ginhatag niya ini sa ila, nga nagasiling: ‘Inum kamo tanan sini; kay ini nagakahulugan sang akon “dugo sang katipan,” nga ginaula tungod sa madamu sa kapatawaran sang mga sala. Ako nagasiling sa inyo, kutob karon indi na ako magainum sining bunga sang ubas tubtob sadtong adlaw nga magainum ako sini sing bag-o kaupod ninyo sa ginharian sang akon Amay.’ Kag sang nakaamba sila sing amba sang pagdayaw, nagguwa sila pakadto sa Bukid sang mga Olibo.”—Mateo 26:26-30; tan-awa man ang Marcos 14:22-26, Lucas 22:19, 20, kag 1 Corinto 11:23-26.

8. Ngaa tuman ka importante nga hangpon ang kahulugan sang ginsiling kag ginhimu ni Jesus sang ginsugdan ang Memoryal?

⁸ Ano ang bug-os nga kahulugan sang ginsiling kag ginhimu ni Jesus sadto nga okasyon? Ginpadaku ni Pablo kon daw ano ka importante ini para sa tanan hinaplas nga mga sumulunod ni Cristo nga apresasyon, nga nagasiling: “Busa ang bisan sin-o nga magkaon sang tinapay ukon mag-inum sa tagayan sang Ginuo sa indi takus mangin malinapason sang lawas kag sang dugo sang Ginuo.” Sa pagkamatuod wala sang mga hinaplas ang maluyag nga mangin “indi takus” sa itololok ni Jehova, nga nagaresulta sa iya malain nga paghukom. Dugang pa, ang “dakung kadam-an” luyag nga maisip nga takus subong mga kaupod sang hinaplas nga nagkalabilin. Gani, sa pagkari sang isa pa ka Memoryal sa Lunes, Marso 24, 1986, sibu sa tion nga usisaon naton liwat ini nga butang sing detalyado.—1 Corinto 11:27.

9. (a) Ngaa ang pagbadbad sa pinamulong ni Jesus nga, “Ini nagakahulugan sang akon lawas” mas husto sang sa, “Ini amo ang akon lawas”? (Tan-awa ang foot­note.) (b) Anong pinasahi nga kahulugan ang ginbutang ni Jesus sa tinapay? (c) Sa alak?

⁹ Si Jesus nagsiling, “Ini nagakahulugan sang akon lawas.”a Sang ginhambal ini nga mga pulong, si Jesus naghatag sing pinasahi nga kahulugan sa tinapay—simbulo ini sang iya kaugalingon walay sala undanon nga lawas nga ginhatag niya “tungod sa kabuhi sang kalibutan.” (Juan 6:51) Sing kaanggid, sang magsiling sia nahanungod sa tagayan sang alak, “Ini nagakahulugan sang akon ‘dugo sang katipan,’ . . . nga gin-ula . . . para sa kapatawaran sang mga sala,” gingamit niya ang maaslom nga alak sa tagayan subong simbulo sang iya kaugalingon nga dugo. Ining dugo mangin sadsaran agod magpanghikot ang “bag-o nga katipan.” Ang iya ginpatulo nga dugo nagakahulugan man sing pag-aman sang “kapatawaran sa mga sala.”—Mateo 26:28; Jeremias 31:31-33; Hebreo 9:22.

10. Ano ang ginapakita sang pagpakig-ambit sa tinapay kag alak?

¹⁰ Ano, nian, ang ginapakita sa bahin sadtong makig-ambit sa tinapay kag sa alak kon saulugon ang Memoryal? Ang pagsaulog mismo nagapasundayag sa mga nagapakig-ambit, kag sa mga tumalan-aw, nga nakabenepisyo na sila gikan sa halad-gawad ni Cristo Jesus, apang sa pinasahi nga paagi kag para sa pinasahi nga katuyoan. Paano ini nagapanghikot? Sa sadsaran sang ila pagtuo sa halad ni Cristo kag sa ila dedikasyon, ginakilala sila sang Dios paagi sa halad-gawad ni Jesus. Para sa ano nga katuyoan? Agod mahatag sa ila ang tawhanon nga kahimpitan kag sa amo ang matarong nga tindog sa atubangan sang Dios. Nian ginapanganak sila ni Jehova paagi sa iya balaan nga espiritu kag sila nangin iya espirituwal nga mga anak. Yara na karon sila sa tindog nga isakripisyo ang ila kinamatarong nga magkabuhi sa duta bilang balus sa langitnon nga palanublion. Ini tanan nahanabo sa wala pa sila nakig-ambit sa Panihapon sang Ginuo.—Roma 5:1, 2, 8; 8:15-17; Santiago 1:18.

11, 12. (a) Anong duha ka dugang nga butang ang ginapakita sang pag-inum sang alak? (b) Ipaathag ang katipan nga ginhimu ni Jesus upod sadtong mga makig-ambit.

¹¹ Binagbinaga karon kon ano pa ang ginapakita sang pag-inum sang alak. Bisan nga si Jehova naghatag sing pagkamatarong sa iya espirituwal nga mga anak kag gin-adoptar sila subong mga anak, yara gihapon sila sa dihimpit nga unod. Nahuyog gihapon sila sa sala kag ginakilala nila ini. Sa pag-inum sa alak, ginakilala nila ang ila matag-adlaw nga pagsandig sa dugo ni Cristo Jesus, nga “gin-ula tungod sa madamu para sa kapatawaran sang mga sala.”—1 Juan 1:9, 10; 2:1.

¹² Apang, may isa pa nga ginapakita ang pag-inum sa alak. Ang mga nagapakig-ambit nagapamatuod nga gindala sila pasulod sa “bag-o nga katipan” nga gintagna ni Jehova sang nagligad paagi kay manalagna Jeremias. Ini nga katipan ginpapanghikot paagi sa dugo ni Jesus. Ang mga partido sa sina nga katipan amo si Jehova nga Dios kag ang iya espirituwal nga mga anak, nga sing tingob nagahuman sa espirituwal nga Israel. Ang kada katapo ginpili sang Dios. Si Jesus amo ang Manugpatunga sang katipan, nga sa sini ginabuligan niya yadtong 144,000 ka katapo sang katipan nga mangin bahin sang binhi ni Abraham. (Jeremias 31:31-34; 2 Tesalonica 2:13; Hebreo 8:10, 12; 12:22-24; Galacia 3:29) Sila man amo ang ginpasulod ni Jesus pasulod sa ‘katipan para sa isa ka ginharian.’ Subong resulta, pagagamiton sila sa ulihi kaupod sa ila Hari nga si Jesucristo nga ihatag ang mga pagpakamaayo nga kabuhi sa tanan nga panimalay sa duta.—Lucas 22:28-30; Juan 6:53; Bugna 5:9, 10; Genesis 22:15-18.

13. Anong mga butang ang dapat naton karon dumdumon sa Nisan 14?

¹³ Sa pagkamatuod, samtang aton ginausisa ang bug-os nga kahulugan sang pinamulong ni Jesus nga ginpamulong sa sini nga adlaw agod dumdumon, makusog kita nga ginapahanumdom sang gugma ni Jehova paagi sa pag-aman sa iya ginapalangga nga Anak. Ginapahanumdom man kita sang gugma ni Jesus bangod sang pag-aman sang iya kabuhi subong gawad para sa tanan tumuluo nga katawhan. (Juan 3:16; Roma 5:8; 1 Timoteo 2:5, 6) Apang, may yara pa iban nga hamili nga mga kamatuoran nga ginhambalan si Jesus kaupod sang iya mga sumulunod sadto nga gab-i. Tuhoy sa mga manunulat sang Biblia, si apostol Juan lamang ang nagrekord sining tuman kasuod nga paghambalanay.

Himaya, Gugma, kag Paghiusa

14. (a) Paano ginahimaya si Jehova sa pagsaulog sa kada Memoryal? (b) Ano ang bahin sang gugma sa pagdumdum kay Jesus, kag anong pag-usisa sa kaugalingon ang itiklod sini sa mga hunahuna sang mga makig-ambit?

¹⁴ Si Jesus nagsiling: “Karon ang Anak sang tawo ginhimaya, kag ang Dios ginhimaya may kahilabtanan sa iya.” (Juan 13:31) Kutob sang ginhilway ang Israel gikan sa Egipto, ang Nisan 14 ginbuylog sa pagbindikar sa ngalan ni Jehova, sa iya pagkasoberano, kag sa iya gahom. Karon, paagi sa katutom ni Jesus tubtob kamatayon kag sa iya nagsunod mahimayaon nga pagkabanhaw paagi sa gahom sang Dios, dugang pa nga dungog kag himaya ang gindala sa ngalan sang Dios. (Ipaanggid ang Hulubaton 27:11.) Ginsilingan ni Jesus ang iya mga disipulo nga magahatag sila sing pamatuod sang pagkadisipulo paagi sa pagtuman sa “bag-o nga sugo,” nga ‘maghigugmaanay sa isa kag isa subong nga sia naghigugma sa ila.’ (Juan 13:34, 35) Ang pagkatudok sang aton utudnon nga gugma isa ka pagpakita sang aton apresasyon sa gugma nga ginpabutyag ni Jesus sa aton sadto nga tion.—1 Juan 4:19.

15. (a) Ano nga paglaum sa kabuhi ang ginapahamtang sa atubangan sadtong nakig-ambit sing takus? (b) Paano ginpamatod-an ang gugma kay Jesus?

¹⁵ Ang paglaum nga pila ka adlaw magkabuhi sa langitnon nga puluy-an bahin sang kalipay nga ginpahamtang sa sadtong pinili nga mangin kaupod nga gumalahom ni Cristo. (Bugna 20:6) Ginpakilala ni Jesus ini nga paglaum, nga nagasiling: “Nagakadto ako sa pag-aman sa inyo sing duog. . . . Magabalik ako kag dalhon ko kamo kaupod nakon.” (Juan 14:2-4) Daw ano nga pag-abiabi ang nagahulat sa sadtong magapabilin nga matutom tubtob sa katapusan! Busa, si Jesus nagalaygay, “Kon ginahigugma ninyo ako, tumanon ninyo ang akon mga sugo.” Nagakahulugan ini sang iya tanan nga mga sugo, lakip ang sugo nga magtudlo kag maghimu sing mga disipulo.—Juan 14:15, 21; Mateo 28:19, 20.

16. (a) Paano ginpadaku ni Jesus ang pagkinahanglan nga maghiusa sa tunga sang iya mga sumulunod, kag ngaa ini nga paghiusa tuman ka importante? (b) Ano dapat ang atubangon sang mga sumulunod ni Jesus, apang ano ang magabulig sa ila nga himuon ini?

¹⁶ Daw ano gid ka importante para sa mga sumulunod ni Jesus nga mahiusa sa iya kag sa isa kag isa! Gingamit ni Jesus ang ilustrasyon tuhoy sa isa ka ubas kag sa mga sanga sini agod iilustrar ini nga katunayan. Ang paghiusa nagaresulta sing bunga kag ini, nagahimaya sa Amay. (1 Corinto 1:10; Juan 15:1, 5, 8) Ang paghilabot kag pagpamatok ginaatubang sang tanan nga mga sumulunod ni Jesus. Apang daw ano ka makapabakud-pagtuo ang paghibalo nga ginhuptan ni Jesus ang iya integridad subong ang mandadaug sang kalibutan walay sapayan sang mga pagsalakay ni Satanas!—Juan 15:18-20; 16:2, 33.

17. Sambita ang pila sa mga pangabay ni Jesus sa iya pangamuyo nga narekord sa Juan kapitulo 17.

¹⁷ Ginhinakpan ni Jesus ang gab-i paagi sa tinagipusuon nga pangamuyo sa iya Amay. Ang paghimaya sa iya Amay amo ang una sa iya pangabay. Nangamuyo sia nga ang iya mga sumulunod pagaamligan gikan sa isa nga malaut, si Satanas, samtang sila nagapabilin nga nahamulag sa kalibutan. Kag nangamuyo man sia nga subong man ka mahigugmaon nga paghiusa nga nagaluntad sa ulot niya kag sang Amay padayon nga magatubo sa iya nagadugang sing kadamuon nga mga sumulunod sang iya tikang.—Juan kapitulo 17.

18. Nagabinagbinag sang kabilogan nga nagtambong sa Memoryal sang 1984, ngaa pila lamang ang nakig-ambit sa mga emblema?

¹⁸ Nabinagbinag naton ang pila lamang sang hamili nga mga kamatuoran kag mga panghunahuna nga ginpaambit ni Jesus sa iya mga disipulo sadto nga gab-i sang nagligad nga mga 1,952 ka tuig, apang sa pagkamatuod nagabulig ini sa aton nga mahangpan kon ngaa ang Nisan 14 isa gid ka adlaw nga dulumdumon. Indi katingahalan, nian, nga sang nagligad nga tuig, 7,416,974 ka mga Saksi ni Jehova kag mga kaabyanan nila ang nakahangop sa importansia nga magtipon sing tingob agod saulugon sang Panihapon sang Ginuo. Apang, sa sinang dakung kadam-an, 9,081 lamang ang nakig-ambit sa mga emblema. Ngaa? Bangod ang kalabanan sang mga Saksi ni Jehova karon nagatan-aw sa ila kaugalingon subong bahin sang “dakung kadam-an” nga nagatindog “sa atubangan sang trono kag sa atubangan sang Kordero.” Nagapaabot sila nga magkabuhi sa planeta nga Duta subong ang ila walay katapusan nga puluy-an, indi ang magkabuhi sa langit diin ang 144,000 “magagahom subong mga hari kaupod [ni Cristo] sa isa ka libo ka tuig.”—Bugna 7:9; 20:6; Salmo 37:11.

19. Ano ang ton-an sa masunod nga semana, kag ngaa importante nga ang tanan magatambong?

¹⁹ Apang, nag-utwas ang pila ka mga pamangkot nahanungod sa kaangtanan sang Panihapon sang Ginuo kag sang “dakung kadam-an” sang “iban nga mga karnero.” (Juan 10:16) Busa, nagakaigo gid nga hambalan ining mga bagay sa masunod nga artikulo agod wala sing sayop nga paghangop sa bahin ni bisan sin-o samtang nagahilapit ang pagsaulog sa isa pa ka Memoryal.—1 Tesalonica 5:21.

[Footnote]

Madumduman Mo Bala—

◻ Sin-o ang nagapakig-ambit sa mga emblema sa Memoryal?

◻ Anong importante nga mga bagay ang dapat ipahanumdom sang Memoryal?

◻ Paano napamatod-an ang matag-adlaw nga pagdumdom kay Jesus?

◻ Anong importante nga hulusayon ang pirme ginabuylog sa Nisan 14?