Ang Matuod nga mga Cristiano mga Manugbantala sang Ginharian

“Ining maayong balita sang ginharian ibantala sa tanan napuy-an nga duta subong nga panaksi sa tanan nga kapungsoran; kag ugaling magaabot ang katapusan.”—MATEO 24:14.

NAGABANTALA SANG GINHARIAN NI JEHOVA. Sa mga dekada na, amo ina ang panguna nga tulumuron sini nga balasahon. Sa katunayan, bahin ini sang iya gin-copy­right nga titulo. Kag importante nga ang mensahe sang Ginharian karon ibantala sa bug-os nga kalibutan. Ngaa? Bangod sang ginsiling ni Jesucristo sa tapos mahatag ang iban pa nga mga bahin nga nagahuman sang “tanda” sang iya dimakita nga “presensia” kag sang katapusan sining sistema. Si Jesus nagsiling: “Ining Maayong Balita sang ginharian ibantala sa bug-os nga kalibutan subong panaksi sa tanan nga kapungsoran. Kag ugaling magaabot ang katapusan.”—Mateo 24:3, 14, The Jerusalem Bible.

² Karon, ang “katapusan” malapit na gid. Gani, ang tagsa ka dedikado nga saksi ni Jehova mahimu mamangkot: Ano ang akon balatyagon sa hilikuton nga pagbantala sang Ginharian? Nagapakigbahin bala ako sa sini sing tayuyon? Kag ginahimu ko bala ang akon ministeryo nga may kalantip kag kakugi?

Ang Mando nga Magbantala

³ Wala sing matuodtuod nga Cristiano ang makatarunganon nga makalikaw sa pribilehiyo nga hilikuton nga ibantala ang “maayong balita” sa iban. Ginsilingan ni Jesus ang iya mga disipulo: “Kamo ang suga ang kalibutan. Ang siudad nga nahamtang sa ibabaw sang bakolod indi sarang malipdan. Wala man ang mga tawo nagasindi sang suga kag nagabutang sini sa idalom sang sulukban, kundi sa ibabaw sang tulungtungan, kag nagaiwag ini sa tanan nga yara sa balay. Sa amo nga bagay ig-iwag ninyo ang inyo kapawa sa atubangan sang mga tawo, agod nga makita nila ang inyo mga buhat nga maayo kag himayaon nila ang inyo Amay nga yara sa langit.” (Mateo 5:14-16) Ginapakita sina nga ang mga disipulo ni Jesus dapat mangin mga manugbantala sang Ginharian.

⁴ Nahanungod sa panguna nga manugbantala sang Ginharian, ginsiling ini: “Samtang ang aton Ginuo nagbantala sang ginharian nagpadayon Sia . . . sa paghanda kag sa pag-organisar sang iya Ministeryo . . . Ginsugdan Niya ang matagnaon nga ministeryo . . . kag ginpapaambit man sa sini ang Napulog-duha kag ang Kapitoan. Samtang nagabantala Sia sang nagahilapit nga ginharian kag ‘nagtagna,’ ginpadala Niya sila nga may pareho nga mensahe kag pareho nga gahom. Paagi sa dalayawon nga paagi sang malip-ot nga pagbantala . . . ginhanas Niya sila sa amo man nga tion para sa daku pa nga mga katungdanan nga itugyan sa ila sa ulihi.”—A ­Church His­to­ry, ni Milo Mahan.

⁵ Si Jesus naghatag sing matahom nga instruksion para sa iya mga apostoles kag sa 70 ka disipulo nga ginpadala niya. (Lucas 6:12-16; 10:1-22) Dugang pa, ang aton Huaran mismo “naglibot sa mga siudad kag mga minuro, nga nagawali kag nagadala sang maayong balita sang ginharian sang Dios.” Kaupod niya amo ang mga apostoles kag ang pila ka mga babayi nga “nag-alagad sa ila sa mga pagkabutang nila.” (Lucas 8:1-3) Huo, si Jesus isa ka makugi nga manugbantala sang maayong balita kag naghimu sing mga tikang agod sugdan ang organisasyon sang pagbantala sang Ginharian.

⁶ Sa tapos sang tatlo ka tuig kag tunga nga pag-alagad, natapos ni Jesus ang iya dutan-on nga kabuhi. Apang sa wala pa sia magkayab sa langit, ginhatag niya ini nga sugo sa iya mga sumulunod: “Lakat kamo . . . kag himuon nga mga disipulo ang tanan nga kapungsoran, nga nagabautismo sa ila sa ngalan sang Amay kag sang Anak kag sang balaan nga espiritu, nga nagapanudlo sa ila sa pagtuman sang tanan nga ginsugo ko sa inyo. Kag, yari karon! ako kaupod ninyo sa gihapon tubtob sa konklusion sang sistema sang mga butang.” (Mateo 28:19, 20) Sa pagkamatuod, dapat sila mangin mga manugbantala sang Ginharian.

⁷ Sang si Jesus manugbiya na sa duta, ang iya mga disipulo namangkot: “Ginuo, pasag-ulion mo bala ang ginharian sa Israel sa sining tion?” Bilang sabat, ginsilingan niya sila: “Indi inyo ang paghibalo sang mga tion ukon mga dag-on nga ginpat-od sang Amay sa iya kaugalingon nga pagbulut-an.” Bisan pa nga sadto anay ang mga disipulo kulang sing sibu nga ihibalo nahanungod sa Ginharian, gintangdo sila ni Jesus nga mangin mga manugbantala, kay may yara sila sang nagakaigo nga bulig agod matuman ang ila komisyon. “Apang magabaton kamo sing gahom kon ang balaan nga espiritu mag-abot sa inyo,” dugang ni Jesus, “kag mangin saksi ko kamo sa Jerusalem kag sa bug-os nga Judea kag Samaria kag tubtob sa ukbong sang duta.” (Binuhatan 1:6-8) Sa idalom sang pagtuytuy sang balaan nga espiritu, ang mga sumulunod ni Jesus makahibalo sa ulihi nga ang Ginharian mangin langitnon nga pangulohan. (Juan 16:12, 13) Kag sa ulihi ang mga katunayan nahanungod sa Ginharian pagaibantala “tubtob sa ukbong sang duta.”

⁸ Nahimu sadto sang mga saksi ang ila hilikuton sing tuman kaayo. Siempre pa, si Jehova kaupod nila, kag ginasakdag sila sang ginhimaya nga si Jesucristo. (Binuhatan 8:1-8; 11:19-21) Indi katingalahan nga sang temprano pa sang 60 tubtob 61 C.E. si apostol Pablo makasiling nga ang “maayong balita” ‘nabantala na sa tanan nga tinuga sa idalom sang langit’!—Colosas 1:23.

⁹ Nahanungod sa hilikuton nga pagpanaksi, ginsulat ini: “Ang pagbantala sang ebanghelyo . . . indi isa ka hilikuton sa tunga sang madamu diin ang Iglesia sang B[ag-o] nga K[atipan] nagapanghikot, kundi amo ini ang iya sadsaran, ang iya importante nga hilikuton. . . . Talupangda man, nga si Jesus wala magsiling [sa Binuhatan 1:8], Manaksi kamo sa akon, ukon, Magapanaksi kamo sa akon, kundi, Mangin saksi ko kamo. Ang paggamit sang berbo nga ‘mangin’ diri may balor nga dapat hangpon sing bug-os kag literal nga pagkaserioso. Ang ekspresyon [sa Griego] wala lamang nagasiling kon ano ang himuon sang Iglesia, kundi kon mangin ano ang Iglesia. . . . Ang Iglesia ni Jesucristo . . . isa ka nagapanaksi nga hubon.” (Pen­te­cost and the Mis­sionary Wit­ness of the ­Church, ni Harry R. Boer, mga pahina 110-14) Huo, ang pagpanaksi amo ang panguna nga hilikuton sang matuod nga Cristianong kongregasyon.

Paagi sa Pagtuytoy sang Dios

¹⁰ Ang nahaunang-siglo nga mga manugbantala sang Ginharian nakabaton sing panuytoy gikan sa nagadumala nga hubon. Ang nagalakbay nga mga gulang nag-alagad sa sulod sang organisasyon, kag ang mga katungdanan sa kongregasyon gin-abaga sang mga manugtatap kag ministeryal nga mga alagad. (Binuhatan 15:1, 2, 22-36; Filipos 1:1) Apang ano ang natabo sang magluntad ang bag-o nga mga kahimtangan?

¹¹ Bueno, binagbinaga kon ano ang natabo wala gid lamang madugay sa tapos sang Pentecostes sang 33 C.E. Ang nagapamulong sing Griego nga mga Judiyo nagsugod sa pagkumud batok sa nagapamulong sing Hebreo nga mga Judiyo “bangod wala matatapi ang ila mga balo nga babayi sa pagpanagtag adlaw-adlaw.” Agod lubaron ang problema, ang mga apostoles nagtangdo sang “pito ka lalaki nga maayo sing kadungganan” sa pag-atipan sa sining pagpanagtag sang pagkaon. (Binuhatan 6:1-8) Nahanungod sa sini aton mabasa: “Sang primero, ginsugiran kita nga ang ‘pito’ ginpili agod magrasyon sang pagkaon sa walay pili, apang, siempre, ang iban nga mga katungdanan gindugang samtang nagautwas ini, kay bisan pa ang mga prinsipio sang bag-o nga pagtuo wala magbalhin, ang pahito kag mga paagi nga ini mapatok kag mapasangkad sing labi ka epektibo, gintugyan sa kaalam kag praktikal nga eksperiensia sang masunod nga kaliwatan . . . Ang pagpasibu kag pagbag-o sang indi importante nga mga detalye . . . kinahanglanon sa bisan anong daku nga organisasyon.”—­Hours With the Bible, Mga Serye sang Bag-o nga Katipan, tomo II, ni Cun­ning­ham Geikie.

¹² Ang mapangamuyuon nga pagsalig sa Dios, upod ang “kaalam kag praktikal nga eksperiensia” sang nagadumala nga hubon, nakaamot sa pag-uswag sang dumaan nga Cristianismo. Kag nahanabo gid ini bangod sang balaan nga pagtuytoy. Halimbawa, ang dumaan nga mga sumulunod ni Jesus ginsilingan natungod sa “Ang Dalan.” (Binuhatan 9:1, 2) Apang ayhan sang temprano pa sang 44 C.E. sa Antioquia, Siria, “ang mga disipulo paagi sa pagtuytoy sang Dios gintawag nga mga Cristiano.” (Binuhatan 11:26) Amo ini ang hatag-Dios nga ngalan nga ginbaton nila sa gilayon.—1 Pedro 4:16.a

¹³ Sa tunga sadtong dumaan nga mga Cristiano, ang iban nga mga hitabo yara man sa idalom sang pagtuytoy sang Dios. Halimbawa, subong nga ang mga Saksi ni Jehova karon nagagamit sang moderno nga mga metodo sa pagbalhag, ginsugdan man sang dumaan nga mga Cristiano ang paggamit sang codex—nga isa gid ka pagpakamaayo sa ila makugi nga hilikuton sa pagbantala sang Ginharian. Nahanungod sa sini, si C. C. McCown nagsulat: “Ang relihioso nga mga tolon-an sang mga Cristiano, ang Daan nga Katipan kag ang bag-o nga mga sinulatan . . . indi para sa kalingawan nga balasahon sang mga manggaranon. Ang mapisan nga mga negosyante luyag makapulos sing daku sa sining tolon-an. Sila kag ang makugi nga mga Cristianong misyonero naghandum nga mapatuhoyan nila ini ukon inang pamatuod nga teksto sing maabtik nga indi paghumlaron ang malaba kaayo nga papyrus.”—The Bib­li­cal Ar­chae­ol­o­gist Read­er, pahina 261.

¹⁴ Ang “mapatuhoyan nila ini ukon inang pamatuod nga teksto sing maabtik” tuman ka importante bangod sang mga metodo sa pagbantala sang Ginharian nga ginhimu sang dumaan nga mga Cristiano. Kon kaisa, siempre pa, nagpanaksi sila sa mga tawo sing dipormal, subong sang masami nga ginahimu karon sang mga Saksi ni Jehova. Tuhoy sa sini ginsiling ini: “Ang isa sang pinasahi nga mga bahin sang pagbantala sang mga apostoles amo ang indi pormal nga pagbantala. Ang isa ka apostol wala maghulat sing daku nga kahigayunan. Ang iya lamang pormal nga okasyon amo sang kaangay ni Pablo sa atubangan ni Felix, gindala sia subong bilanggo sa atubangan sang isa ka manuggahom agod magpaathag sang iya kaugalingon kag sabton ang panumbongon nga paglapas sang kasugoan. Madamu sia sing kahigayunan, sa bilanggoan, sa dalanon, kag sa puluy-an nga sa diin mahimu sia magapaligad sang gab-i. . . . Ginbatyag niya nga ang iya mensahe para gid sa mga indibiduwal, apang handa man sia sa pagpresentar sini sa kadam-an. Kag subong man sa bisan anong tumalambong. Wala niya malipati ang halimbawa ni Cristo, . . . [nga] ang iya teritoryo amo ang yab-okon nga dalanon, ukon gutok nga kalye, ukon ang batubatuhon nga baybayon sang Galilea sang mga Judiyo . . . [Ang mga apostoles] wala malipat nga naghatag sia sa ila sang kaupod pa niya sila sang pinasahi nga mga instruksion kon ano ang labing maayo nga paagi sa pagbantala sang iya mga panudlo, nagpabakud sining una nga mga leksion, kag, sang wala pa sia magkayab, gintudlo niya sa ila ang kalibutan subong ila latagon kag ang tagsa ka tinuga subong ila tagpalamati.”—His­to­ry of the Chris­tian ­Church, ni John F. ­Hurst, tomo I, pahina 96.

“Sa Pamalaybalay”

¹⁵ Sa mga adlaw pagkatapos sang Pentecostes sang 33 C.E., ang mga disipulo ni Jesus naggamit na sang labing maayo nga metodo sa pagbantala sang “maayong balita.” Sa tapos ang ginhingabot nga mga apostoles ginpakahuy-an bangod sang ngalan ni Jesucristo, ano ang ginhimu nila? Ti, “sa adlaw-adlaw sa templo kag sa pamalaybalay wala sila mag-untat sa pagpanudlo kag pagwali sang maayong balita nahanungod kay Cristo, si Jesus”! (Binuhatan 5:41, 42) Huo, ang mga apostoles nagpanaksi sa pamalaybalay.

¹⁶ Sang ulihi, ginpahanumdom ni apostol Pablo ang gintangdo nga mga gulang gikan sa Efeso: “Wala ako mag-isol sa pag-asoy sa inyo sang bisan ano nga mapuslanon kag nagatudlo sa inyo sa dayag kag sa pamalaybalay. Kundi nagapanaksi ako sa mga Judiyo kag sa mga Griego sang paghinulsul sa Dios kag pagtuo sa aton Ginuong Jesus.” (Binuhatan 20:20, 21) Indi buot silingon ni Pablo nga gintudloan niya ang gintangdoan nga mga gulang sa ila mga puluy-an. Sa baylo, nagpanaksi sia sa ditumuluo nga mga Judiyo kag mga Griego nahanungod sa paghinulsul sa Dios kag pagtuo kay Jesucristo. Sa walay duhaduha, gintudloan man ni Pablo yadtong mga gulang kon paano magpanaksi sa pamalaybalay.

¹⁷ Nahanungod sa pag-alagad sang apostol sa Efeso, amo ini ang ginsiling: “Ang kinaandan nga ginhimu ni Pablo amo ang pag-obra kutob sa pagbutlak sang adlaw tubtob alas 11 s.a. (Binuhatan 20:34-35) nga sa amo nga oras si Tirano nakatapos na sang iya pagpanudlo; nian kutob sa alas 11 s.a. tubtob alas 4 s.h. sa pagbantala sa tiliponan, paghiwat sang mga komperensia upod sa mga kabulig kag makighambal sing pribado sa mga kandidato, pagplano sing mga pagpasangkad sa nasulod nga bahin; kag sa katapusan sa paghimu sing pamalaybay nga pagbantala sang ebanghelyo nga naglawig kutob alas 4 s.h. tubtob kagab-ihon. (Binuhatan 20:20-21, 31).” (A. E. Bailey) Ang iban pa nga mga iskolar nagsiling: “Indi lamang sia kontento sa pagpamulongpulong sa publiko, kag paggamit sang iban nga instrumento, kundi makugi nga nagbuhat sang iya dakung hilikuton sa pribado, sa pamalaybalay, kag sa literal nagdala pauli sang kamatuoran sang langit sa mga balay kag mga tagipusuon sang mga taga-Efeso.” (A. A. Liv­ermore) “Sa dayag kag sa pamalaybalay, sa siudad kag sa bug-os nga probinsia, ginbantala niya ang ebanghelyo.” (E. M. Blaik­lock) “Talalupangdon gid nga ining pinakadaku sa mga manugbantala nagbantala sa pamalaybalay kag wala magduaw sa sosyal nga mga tiliponan lamang.”—A. T. Robert­son.

¹⁸ Ang pamalaybalay nga pagpanaksi ginhimu sang mga apostoles ni Jesus sang 33 C.E. Bahin ini sang pag-alagad ni Pablo sa Efeso kag walay duhaduha bisan diin. Gani may yara malig-on Makasulatanhon nga sadsaran para sa pamalaybalay nga pag-alagad sang mga Saksi. Kag matuod ini sa nanuhaytuhay iban pa nga mga paagi nga ginagamit nila sa pagpalapnag sang mensahe sang Ginharian. Sing makawiwili, ang Cyclopedia nanday McClintock kag ­Strong nagasiling: “Ang aton Ginuo kag ang iya mga apostoles nagbantala bisan diin nga may mga tawo. Ginbantala nila ang Ebanghelyo sa kiliran sang bukid, sa baybayon sang mga dagat kag mga suba, sa mga dalan, sa pribado nga mga puluy-an, sa mga balkonahe sang Templo, sa Judiyong sinagoga, kag sa nanuhaytuhay iban pa nga mga duog.” (Tomo VIII, pahina 483) Kaangay ni Jesus kag sang iya dumaan nga mga disipulo, ang mga Saksi ni Jehova nagabantala sang mensahe sang Ginharian sa “dalan, sa pribado nga mga balay, . . . kag sa nanuhaytuhay iban pa nga mga duog.” Halimbawa, nagapanaksi sila sa mga dalan nga dala ang magasin (ini nga magasin kag ang iya kaupod nga Lalantawan) kag bantog gid bangod sang ila pamalaybalay nga pagpanaksi.

¹⁹ Ang sadsaran nga mga paagi sa pag-alagad nga ginagamit karon sang mga Saksi ni Jehova ginhimu na sadto pa sang nahaunang siglo, kag, luwas sini, nagakaigo para sa karon nga Nagadumala nga Hubon sang hinaplas nga mga Cristiano nga mamat-od kon anong mga metodo sa pagbantala ang nagakaigo karon. Ina nga mga desisyon sarang mapasad sa “kaalam kag praktikal nga eksperiensia” sining mga tawo. Walay sapayan, nagahimu man sila sing mga desisyon subong sang ginhimu sang nahaunang-siglo nga Cristianong nagadumala nga hubon. Ang direksion sang Dios kag ang pagtuytoy sang iya balaan nga espiritu ginapangabay sa mga pangamuyo, kag ang Makasulatanhon nga mga halimbawa ginsunod kon nagapamat-od kon anong mga metodo sa pagbantala ang labi nga nagakaigo sa sining “katapusan nga mga adlaw.”—2 Timoteo 3:1; Binuhatan 15:23, 28.

²⁰ Maathag nga ang mga metodo sa pagbantala nga ginagamit sang mga Saksi ni Jehova yara sa idalom sang panuytoy sang Dios, kay ginpurongpurongan sang Dios ining mga panikasog sing bugana nga kadalag-an kag pagpakamaayo. (Hulubaton 10:22) Madamu ang nagabaton sang matuod nga pagsimba kag nagabuylog sa nagkalabilin sang hinaplas nga mga sumulunod ni Jesus subong bahin sang lamang nga organisasyon nga nagapadungog sa balaan nga ngalan ni Jehova kag walay kahadlok nga nagabantala sang maayong balita sang natukod na nga langitnon nga Ginharian. Busa kabay nga ang tanan nga mga alagad ni Jehova padayon nga magapanikasog sa hilikuton nga paghimu-disipulo samtang ini nga sistema nagahilapit sa iya katapusan. Dapat naton ini himuon sing matutom, kag walay duhaduha nga ang matuod nga Cristiano mga manugbantala sang Ginharian.

[Mga footnote]

Ano ang Imo Paghangop?

◻ Ngaa ang mensahe sang Ginharian dapat ibantala karon sa bug-os nga duta?

◻ Ano ang panguna nga hilikuton sang tanan nga matuod nga mga Cristiano?

◻ Ngaa masiling nga sa tunga sang mga alagad ni Jehova ang mga bagay nagakahanabo paagi sa pagtuytoy sang Dios?

◻ Ano ang nagakaigo nga sadsaran sang pamalaybalay nga hilikuton sa pagbantala sang mga Saksi ni Jehova?

[Mga Pamangkot sa Pagtinuon]]

1, 2. (a) Ngaa ang mensahe sang Ginharian dapat ibantala karon sa bug-os nga duta? (b) Ano nga mga pamangkot ang mahimu ipamangkot sang tagsa ka Saksi ni Jehova?

3. Ano ang ginapakita sang ginsiling ni Jesus nga narekord sa Mateo 5:14-16 nahanungod sa iya mga sumulunod?

4. Ano ang ginsiling nahanungod sa panguna nga manugbantala sang Ginharian?

5. Nahanungod sa pagbantala sang Ginharian, ano ang ginhimu ni Jesus?

6. Sa wala pa magkayab sa langit, ano nga sugo ang ginhatag ni Jesus sa iya mga sumulunod?

7. Bisan pa nga ang mga disipulo ni Jesus kulang anay sang sibu nga ihibalo sang Ginharian, ngaa nagmadinalag-on sila sa ila pagkamangin saksi niya?

8. Daw ano ka madinalag-on ang nahaunang-siglo nga hilikuton sa pagbantala?

9. Subong sang ginsiling diri, ano ang panguna nga hilikuton sang Cristianong kongregasyon?

10, 11. (a) Sing sadsaran, paano gin-organisar ang nahaunang-siglo nga mga manugbantala sang Ginharian? (b) Ano ang natabo sang magluntad ang bag-o nga mga kahimtangan?

12. (a) Ano ang nag-amot sa pag-uswag sang dumaan nga Cristianismo? (b) Diin kag paano ang mga sumulunod ni Jesus gintawag nga mga Cristiano?

13. Samtang ang mga Saksi ni Jehova karon nagagamit sang moderno nga mga metodo sa pagbalhag, ano ang gingamit sang dumaan nga mga Cristiano sa ila hilikuton nga pagbantala sang Ginharian?

14. Sa idalom sang anong mga kahimtangan nalangkag ang mga apostoles ni Jesus sa pagbantala?

15. Paano gintuman sang mga apostoles ang hilikuton nga pagbantala sa mga kaadlawan pagkatapos sang Pentecostes sang 33 C.E.?

16. Sa ano nga sahi sang hilikuton sa pagbantala ginhanas ni Pablo ang mga gulang sa Efeso?

17. Ano ang ginsiling sang nanuhaytuhay nga mga eskolar nahanungod sa pamalaybalay nga pag-alagad ni Pablo sa Efeso?

18. (a) Ngaa makasiling ka nga may yara malig-on Makasulatanhon nga sadsaran para sa pamalaybalay nga pag-alagad sang mga Saksi ni Jehova? (b) Kaangay ni Jesus kag sang iya dumaan nga mga disipulo, diin kag paano ginbantala sang mga Saksi ni Jehova ang mensahe sang Ginharian?

19. Paano ginadesisyonan ang nahanungod sa mga metodo sa pagbantala nga ginagamit karon sang mga Saksi ni Jehova?

20. (a) Ngaa makasiguro kita nga ginakahamut-an sang Dios ang mga metodo sa pagbantala nga ginagamit sang mga Saksi ni Jehova? (b) Ano dapat ang mangin panimuot sang mga alagad ni Jehova sa hilikuton nga pagbantala?