Magtudlo nga may Kalantip kag Kakugi

“Busa lakat kamo kag himuon nga mga disipulo ang tanan nga kapungsoran, . . . nagapanudlo sa ila sa pagtuman sang tanan nga ginsugo ko sa inyo.”—MATEO 28:19, 20.

ANG PULONG NI JEHOVA nagapalig-on sing kalantip kag kapisan. Halimbawa, ini nagasiling: “Nakakita ka bala sing tawo nga may kalantip sa iya buluhaton? Magatindog sia sa atubangan sang mga hari; indi sia magtindog sa atubangan sang kubos nga mga tawo.” (Hulubaton 22:29) Siempre pa, wala sing dapat nga ikahuya sa pagpangabudlay para sa “kubos nga mga tawo.” Apang ang may kalantip nga maayong buluhaton sang isa ka manugpangabudlay indi magapabilin nga tago. Ti, mahimu nga ang balita tuhoy sa iya kalantip magalab-ot sa igdulungog sang hari, nga luyag magpatrabaho sa iya!

² Ang ihibalo kag kalantip kinahanglan sa bisan ano nga propesyon. Ang isa ka tawo mahimu nga makatuon nga mangin panday paagi sa pagpanilag sa mga tawo nga lantip sa sina nga obra. Apang agod mapalambo ang kalantip sa iya kaugalingon, dapat niya iaplikar ang iya natipon nga ihibalo. Ang manugbusbos dapat nga tudloan. Apang agod mangin may ikasarang, dapat niya iaplikar ang iya naton-an sa hulot nga oloperahan. Kag sa sina nga propesyon kinahanglan ang kalantip, kay ang pagkamay ikasarang masami nga nagakahulugan sing kabuhi ukon kamatayon para sa pasyente. Apang, ang kalantip subong ministro mas importante pa. Ngaa? Bangod ang pagkaepektibo sang ministro subong isa ka manunudlo mahimu nga magaapektar sa kon paano ang mga tawo magahulag sa maayong balita. Sa amo, ang ila paghulag mahimu magakahulugan sing kabuhi nga walay katapusan ukon dayon nga kamatayon para sa ila.—Deuteronomio 30:19, 20; Juan 17:3.

³ Ang sugo nga ginhatag ni Jesucristo sa iya mga sumulunod nagadalahig sang pagpanudlo. Nagsiling sia: “Busa lakat kamo kag himuon nga mga disipulo ang tanan nga kapungsoran, nga nagabautismo sa ila sa ngalan sang Amay kag sang Anak kag sang balaan nga espiritu, nga nagapanudlo sa ila sa pagtuman sang tanan nga ginsugo ko sa inyo. Kag, yari karon! ako kaupod ninyo sa gihapon tubtob sa konklusion sang sistema sang mga butang.” (Mateo 28:19, 20) Sa pagkamatuod, ang kalantip kinahanglan agod tudloan ang bunayag sing tagipusuon sang tanan nga butang nga ginsugo ni Jesus.

⁴ Inang may kalantip nga pagpanudlo dapat himuon nga may kakugi. Huo, ang mga Cristiano dapat mangin “makugi sa maayong mga buhat,” kag pat-od nga nagalakip ini sa pagpaambit sang espirituwal nga instruksion sa ministeryo kag sa kongregasyon. (Tito 2:14) Subong may kalantip nga mga manunudlo, sanday Aquila kag Priscilla “nagdala [kay Apolos] sa ila [sa Efeso] kag gintalastas sa iya sing sibu pa gid ang dalan sang Dios.” Nakabenepisyo sing daku si Apolos sa sini, kay sang ulihi sa Acaya “sa dakung kagamhanan ginlutos niya ang mga Judiyo sa dayag, nga nagapakita paagi sa Kasulatan nga si Jesus amo ang Cristo.” (Binuhatan 18:24-28) Sing maathag, si Apolos nagpanudlo nga may kalantip kag kakugi.

‘Andami ang Imo Pagpanudlo’

⁵ Ginsilingan ni apostol Pablo ang iya Cristianong kaupod nga si Timoteo: “Andami ang imo kaugalingon kag ang imo pagpanudlo. Magpadayon sa sina, kay sa paghimu sini maluwas mo ang imo kaugalingon kag ang mga nagapamati sa imo.” (1 Timoteo 4:16) Sanglit ang kaluwasan mismo sang manunudlo kag estudyante nahilabtan, ina nga instruksion dapat gid nga ipaambit nga may kalantip kag kakugi.

⁶ Dapat gid nga andaman sang mga panday kag mga manugbusbos ang ila kaugalingon. Dapat sila makasarang sa paggamit sang ila mga kagamitan ukon mga instrumento sing may ikasarang. Amo man sa Cristianong ministro, nga ang panguna nga kasangkapan amo ang ‘espada sang espiritu, ang pulong sang Dios.’ (Efeso 6:17) Paano ka mangin eksperto sa pag-uyat sa Kasulatan? Siempre, paagi sa tayuyon nga pagtuon kag paggamit. Kon amo, nabasa mo na bala ang bilog nga Biblia, naghinguyang sing tion nga pamalandungan ang iya maayo nga laygay? Ginabasa mo bala ini adlaw-adlaw? Ginagamit mo bala ini sing tayuyon sa pag-alagad sa latagon? Kag ginahimuslan mo bala sing bug-os ang bugana espirituwal nga pagkaon nga ginaaman ni Jehova paagi sa “matutom kag mainandamon nga ulipon”?—Mateo 24:45-47.

⁷ Siguradoha nga magpain sing tion para ton-an ang Pulong sang Dios kag ang matuod nga Cristianong mga publikasyon. Magapuno ini sang imo hunahuna sang maayo nga impormasyon nga magabenepisyo sa imo kag sarang magamit sa pagsabat sa sinsero nga mga nagapamangkot. (1 Pedro 3:15; Colosas 4:6) Ang mga pamilya kag mga indibiduwal may lainlain nga mga tion sa pagtuon kag sa pagpamalandong. Mahimu nga natukiban sang iban nga mapuslanon magtuon kon gab-i. Ang iban mas alisto pagbugtaw. Ang iban naman nakatukib nga ang udto amo ang pinakamaayo para sa ila. Bisan ano man, ang pagkatayuyon kag kakugi amo ang pinakaimportante. Sanday Josue kag ang mga hari sang Israel nagbasa anay sang Pulong sang Dios adlaw-adlaw.—Josue 1:7, 8; Deuteronomio 17:18-20.

Mangabudlay Agod Mangin Mas Maayo nga Manunudlo

⁸ Ang pag-uswag sa kalantip sa pagpanudlo nagakinahanglan sing lakas nga pagpangabudlay. Ang isa ka paagi nga mapauswag ang imo ikasarang subong manunudlo amo ang paggamit sang imo men­tal as­so­ci­a­tion ukon pagkonektar sa hunahuna kon nagatuon sang Biblia ukon sang Cristianong mga publikasyon. Ikonektar ang bag-o nga mga ideya sa naton-an mo na. Magabulig ini sa imo nga mabalay ang impormasyon sa imo hunahuna amo kon ngaa mapaathag mo ang mga bagay sing maathag kon nagatudlo sa iban. Sa walay duhaduha, nagamit mo na ang pagkonektar sa hunahuna sang nagtuon ka sang nagligad. Halimbawa, sang isa ka bes mahimu nga naton-an mo nga ang mga Cristiano dapat nga magpasakop sing relatibo sa “superyor nga mga awtoridad” sang pangulohan. Apang naton-an mo karon nga ang pagtuman sa Dios amo ang una. (Roma 13:1-8; Marcos 12:17; Binuhatan 5:29) Nahangpan mo ini bangod ginkonektar mo ang bag-o nga mga punto sa sadtong naton-an mo na.

⁹ Ang isa pa ka paagi sa pagpauswag sang imo ikasarang sa pagpanudlo amo ang paghanduraw sang mga hitabo nga narekord sa Biblia. Ngaa indi ini paghimuon karon sa Hukom 7:19-22? Sa kagab-ihon, ginlibotan ni Gideon kag sang 300 ka lalaki ang kampo sang Midianhon diin bag-o pa lang mabutang ang mga bantay. Sing hinali, mabatian mo ang pagpatunog sang kabon ni Gideon nga ginakatapoan sang 100 ka tawo sang ila mga budyong, kag makita mo sila nga nagbuka sang mga tibud nga ila ginadala. Amo man sina ang ginhimu sang 200 pa ka mga Israelinhon. Kag samtang ginakaptan nila ang tanan nga sulo, mabatian mo sila nga nagasinggit: “Ang espada ni Jehova kag ni Gideon!” Samtang ang hinadlokan nga mga Midianhon nagsugod sa pagpinalagyo, ang tatlo ka kabon ni Gideon padayon nga nagapatunog sang ila mga budyong, kag makita mo nga ginbutang ni Jehova ang espada sang nagpinalagyo nga mga kaaway batok sa isa kag isa. Bangod ginhanduraw mo ini nga hitabo, walay duhaduha nga madumduman mo ini sing maayo kag magamit ini kon nagatudlo sa iban. Sa pagkamatuod, ang isa ka leksion nga ginatudlo sini amo nga sarang maluwas ni Jehova ang iya katawhan nga wala nagakinahanglan sing gamhanan tawhanon militar nga kusog.—Salmo 94:14.

¹⁰ Ang matahom nga mga ilustrasyon, lakip yadtong sa Kasulatan, makapauswag man sa imo ikasarang subong manunudlo. Halimbawa, binagbinaga ang Hukom 9:8-15. Si Jotam nga anak ni Gideon nagsugid sang tion nga ang mga kahoy magahaplas sang mga gumalahom sa ibabaw nila. Samtang wala pagbatona sang kahoy nga olibo, sang kahoy nga higuera, kag sang balagon ang posisyon sang pagkamanuggahom, ang kubos nga talongan makunyagon nga nagbaton sini. Ang hamili nga mga tanum nagarepresentar sa takus nga mga tawo nga wala magtinguha nga mangin hari sa ibabaw sang ila masigka Israelinhon. Apang, ang talongon, nga magamit lamang subong gatong, nagarepresentar sa pagkahari sang matinaastaason, mamamatay-tawo nga si Abimelec, nga maluyag gamhan ang iban apang nakaagom sing malain nga katapusan bilang katumanan sang tagna ni Jotam. (Hukom 9:50-57) Ini nga ilustrasyon sarang magamit sa pagpadaku sa kinahanglanon nga himuon kon ano ang maayo kag mangin mapainubuson, indi mangin matinaastaason.—Salmo 18:26, 27; 1 Pedro 5:5.

¹¹ Ang Daku nga Manunudlo, si Jesucristo, bantog kaayo bangod sang iya matahom nga mga ilustrasyon. Halimbawa, binagbinaga ang iya ginsiling: “Ang ginharian sang langit kaangay sang isa ka manugpatikang nga nagapangita sing maayo nga mga mutya. Sang pagkakita niya sang isa ka mutya nga bilidhon, naglakat kag ginbaligya ang tanan niya kag ginbakal ang mutya.” (Mateo 13:45, 46) Sa amo gin-ilustrar ni Jesus ang pagkabilidhon sang Ginharian kag ginpakita nga ang isa ka tawo nga nagaapresyar sa matuod nga balor sang pagtigayon sini mangin handa nga ipaambit ang bisan ano agod himuon ina. Indi masibud ina nga ilustrasyon, kag maayo nga hunahunaon sang Cristianong mga manunudlo ina nga talaksan kon nagagamit sing mga ilustrasyon subong bulig sa pagpanudlo.

Ang mga Miting Magahimu sa Aton nga Mangin Labi Kalantip

¹² Ang Cristianong mga miting may importante nga papel sa paghimu sa mga alagad ni Jehova nga mangin may kalantip kag kakugi nga mga manunudlo. Subong sang ginapakita sang Sermon sa Bukid ni Jesus, ang pamulongpulong publiko isa ka maayo nga paagi sa paghatag sang espirituwal nga instruksion. (Mateo 5:1–7:29) Gani, ang mga pamulongpulong publiko bahin sang mga miting sang mga Saksi ni Jehova karon. Nagatambong ka bala sing tayuyon? Matinahuron ka bala nga tagpalamati? Ginabuksan mo bala ang imo Biblia kon ang mga teksto ginabasa sang humalambal? Batasan mo na bala nga magkuha sing nota? Amo ini ang mga paagi nga mapauswag mo ang imo ikasarang subong manunudlo, kag ang matahom Makasulatanhon nga instruksion magapauswag sang imo kalantip kag sang imo kakugi subong manughimu sing disipulo.

¹³ Ang hilikuton nga paghimu sing disipulo nakaagom sing importansia sa tunga sang mga alagad ni Jehova paagi sa panawag nga ‘Ibantala ang Hari kag ang Ginharian,’ nga ginpalanog una sa ila kombension sa Cedar ­Point, Ohio, sang 1922. Sadto man nga tuig, ang grupo nga pagtinuon sa The Watch Tower una nga gin-organisar. Ini nga magasin pat-od nga nagbutang sa unahan sang panudlo sang Biblia kag sang pagbantala sang Ginharian, kay ang iya mismo ngalan amo Ang Lalantawan Nagabantala sang Ginharian ni Jehova. Mahuyugon ka bala nga bumalasa sang Pulong sang Dios paagi sa bulig sang Ang Lalantawan? Aktibo ka bala nga nagapakigbahin sa semanal nga Pagtinuon sa Lalantawan?

¹⁴ Ang semanal nga Pagtinuon sa Libro sang Kongregasyon nagahatag man sing mga kahigayunan nga mapauswag ang imo ikasarang subong manunudlo sang maayong balita. Kon nagasabat sa mga pamangkot sa sining mas magagmay nga pagtinipon, subong man sa Pagtinuon sa Lalantawan, ginapabutyag mo bala ang mga bagay sa imo kaugalingon nga tinaga? Ginapabanaag bala sang imo mga komento kon ano ang imo ginapatihan sa imo tagipusuon?

¹⁵ Antes sang 1922, ang mga alagad ni Jehova kinabatasan nga nagatipon para sa tunga-tunga sang semana nga Miting sa Pangamuyo, Pagdayaw, kag Pagpanaksi. Amo ini anay ang okasyon para sa pag-amba, paghatag sing pagpanaksi, kag pagpangamuyo. Apang paagi sa dugang nga pagpadaku sa pamalaybalay nga pagbantala sang Ginharian, ini nga mga pagtinipon nangin Miting sa Serbisyo nga nagapadaku sa hilikuton nga pag-alagad. Nakabulig gid sing daku ang Bul­le­tin, nga nagaunod sang mga instruksion kag “pamatuod,” ukon testimoniya sa pag-alagad sa latagon, nga magamit sa pag-alagad. Sa karon, Ang Aton Ministeryo sang Ginharian nagahatag sing kaanggid nga bulig, subong man sing panuytoy para sa semanal nga “Mga Miting sa Pagbulig sa Aton Himu Disipulo.” Nagapakigbahin ka bala sing tayuyon sa sina nga mga miting? Ginaaplikar mo bala ang laygay nga gindesinyo agod buligan ka sa pagtudlo nga may kalantip kag kakugi?

¹⁶ Agod pauswagon ang may kalantip nga pagpanudlo, ginpatok ang Teokratikong Eskwelahan sa Ministeryo sa mga kongregasyon sang mga Saksi ni Jehova sang 1943. Nahanungod sa panguna nga katuyoan sang eskwelahan, ang iya nahauna nga giya nga libro nagsiling: “Ini nga kurso wala pag-iaman agod kuhaon ang imo tion nga ginahinguyang sa pag-alagad sa latagon, kundi ginhimus agod himuon ka nga mas lantip sa sini. Ginsambit sa mas espesipiko nga mga termino, ang katuyoan sining ‘Kurso sang Teokratikong Ministeryo’ amo ang paghanda sa tanan ‘matutom nga mga lalaki,’ yadtong mga nakabati sang Pulong sang Dios kag nagpamatuod sang ila pagtuo sa sini, agod ‘sarang makatudlo sa iban paagi sa pagpamalaybalay, paagi sa pagbalik-duaw, paagi sa paghiwat sing modelo nga pagtuon kag pagtinuon sa libro, kag, sa malip-ot, paagi sa pagpakigbahin sa tagsa ka bahin sang pag-alagad sa Ginharian. Tuyo sini nga ang kada isa mangin labi ka hanas nga Teokratikong ministro sa kadungganan sang ngalan sang Ginuo; agod masangkapan sia sing labi pa nga mapresentar sing dayag ang paglaum nga yara sa sulod niya; agod sia ‘nagakabagay magtudlo, magpailob, nagapanudlo sa kalum-ok’. (2 Tim. 2:24, 25) Amo ini ang nahauna nga katuyoan sang kurso.” (­Course in The­ocra­tic Mi­nis­try, pahina 4) Amo gihapon ini ang panguna nga katuyoan sang Teokratikong Eskwelahan sa Ministeryo. Ginaaplikar mo bala ang matahom nga impormasyon sa pagpanudlo, pagbasa, pagpamulongpulong publiko, kag iban pa, nga makita sa libro sining eskwelahan?a Nagpalista ka bala? Ginabaton mo bala sing mapasalamaton kag ginahimu ang imo asaynment sa programa sang eskwelahan? Ini nga aman ni Jehova paagi sa iya organisasyon magabulig sa imo nga mangin may kalantip kag kakugi nga ministro.

Paghanas para sa Makugi nga Pagpanudlo

¹⁷ Si Jehova nagahatag sing bugana espirituwal nga mga aman para sa sadtong may pribilehiyo sa pagtudlo sa iban sang iya sagrado nga kamatuoran. Ang iban sini, ginaaman niya sa mga literatura nahanungod sa Biblia, sa semanal nga mga miting, kag sa mas dalagku nga mga asambleya. Inang matahom nga mga aman nagahimu sa iya dedikado nga mga Saksi nga mangin may kalantip kag kakugi nga mga manunudlo.

¹⁸ Apang kamusta kon gintangdo kita subong mga gulang ukon mas eksperiensiado nga mga saksi ni Jehova? Nian ang gugma sa iban magapahulag sa aton nga buligan ang bag-ohan kag ang indi eksperiensiado nga mga Cristiano nga mangin labi kalantip kag may kakugi nga mga manunudlo. Nagakaigo gid ini, kay ginpadala ni Jesus ang 70 ka disipulo sa tapos lamang niya sila mahatagan sing instruksion para sa ila ministeryo. (Lucas 10:1-24) Gintudloan ni Pablo ang mga manugtatap sang Efeso “sing dayag kag sa pamalaybalay,” kag nagalakip ini sang paghanas sa ila nga magpanaksi sa ditumuluo samtang nagapamalaybalay sa pag-alagad sa latagon. (Binuhatan 20:20, 21) Sing kaanggid, ang mga gulang, mga payunir, kag iban pa malipay sa paghanas sa masigka Saksi nga mag-alagad sa latagon karon. Nakita mo bala ang pagkakinahanglanon sina nga pag-alagad? Nian sa tanan nga paagi tinguhai kag batona ini. Isa ka bala ka gulang? Nian maghimu sing mga kahimusan para hanason ang iban sa ministeryo samtang ikaw mismo makugi nga nagapanguna sa pag-alagad sa latagon.

Padayon nga Palamboa ang Kalantip

¹⁹ Ang mga manugbusbos, mga panday, kag iban pa nangin labi kalantip paagi sa padayon nga pagtuon kag pag-aplikar sa natigayon nga ihibalo. Amo man sa Cristianong mga ministro. Busa, importante gid nga ang kada dedikado nga saksi ni Jehova mangabudlay sing lakas agod pauswagon ang iya ikasarang subong manunudlo sang maayong balita! Kag sanglit buluhaton ini ni Jehova, dapat naton ini ipangamuyo sing hanuot. Kon ginapangabay naton ang bulig kag tuytoy ni Jehova, makasalig kita nga pakamaayuhon niya ang aton makugi nga pag-alagad. Subong sang ginsiling ni apostol Juan: “Ang bisan ano nga ginapangayo ta mabaton ta sa iya [Jehova nga Dios], kay ginabantayan ta ang iya mga sugo kag nagahimu sang nahamut-an niya.”—1 Juan 3:22.

²⁰ Busa samtang ang karon malaut nga sistema sang mga butang malapit na sa iya katapusan, kabay nga manikasog kita sing lakas nga mag-alagad. Kabay nga ‘andaman naton ang aton kaugalingon kag ang aton panudlo,’ para sa aton kaugalingon nga kaluwasan kag sa iya sadtong nagapamati sang mensahe sang Ginharian. Huo, panikasogan gid naton nga magtudlo nga may kalantip kag kakugi.

[Footnotes]

Ano ang Imo Isiling?

◻ Luwas sa pagbantala, ano ang ginakinahanglan sa hilikuton nga paghimu sing disipulo?

◻ Ngaa tuman ka importante nga ‘andaman ang inyo pagtudlo’?

◻ Ano ang pila ka paagi nga mapauswag ang ikasarang sa pagpanudlo?

◻ Paano kita mabuligan sang Cristianong mga miting nga mangin may kalantip kag kakugi nga mga manunudlo sang Pulong sang Dios?

◻ Ano ang mahimu sang mga gulang kag sang iban eksperiensiado nga mga Saksi tuhoy sa pag-alagad sa latagon?

[Mga Pamangkot sa Pagtinuon]

1. Ano ang ginapalig-on sang Hulubaton 22:29, kag paano?

2. (a) Agod mapalambo ang kalantip sa bisan ano nga propesyon, ano ang kinahanglan? (b) Ngaa ang pagkaepektibo sang isa ka Cristianong ministro subong manunudlo tuman ka importante?

3. Ano ang ginakinahanglan sa paghimu sing disipulo?

4. (a) Paagi sa anong panimuot dapat himuon ang may kalantip nga pagpanudlo? (b) Paano nakabenepisyo si Apolos bangod sang pagpakig-upod kanday Aquila kag Priscilla?

5. Suno sa 1 Timoteo 4:16, ngaa dapat kita magtudlo nga may kalantip kag kakugi?

6. Paano ka mangin hanas sa pag-uyat sang Kasulatan, kag anong nagakaigo nga mga pamangkot ang sarang mabinagbinag?

7. Anong mga panugda ang ginatanyag nahanungod sa tion sa pagtuon, kag paano ang pagkinahanglan sa pagtuon mapakita sing Makasulatanhon?

8. Paano ang paggamit sing pagkonektar sa hunahuna makapauswag sang imo ikasarang sa pagpanudlo?

9. Iilustrar kon paano mo handurawon ang hitabo nga narekord sa Biblia.

10. Sa pagtudlo, paano mo gamiton ang ilustrasyon nga masapwan sa Hukom 9:8-15?

11. (a) Ano nga mga punto ang ginapadaku sa ilustrasyon ni Jesus nga narekord sa Mateo 13:45, 46? (b) Ano ang ginapanugda sang kinaugali sina nga ilustrasyon nahanungod sa mga ilustrasyon nga ginagamit sang Cristianong mga manunudlo?

12. Paano ka mabuligan sang pagtambong sa pamulongpulong publiko nga mapauswag ang imo ikasarang sa pagpa­nudlo?

13, 14. (a) San-o nakaagom sing labi na nga importansia ang hilikuton nga paghimu sing disipulo sa tunga sang mga alagad ni Jehova? (b) Ano nga mga pamangkot ang sarang mapamangkot nahanungod sa Pagtinuon sa Lalantawan kag sa Pagtinuon sa Libro sang Kongregasyon?

15. Ano ang katuyoan sang Miting sa Serbisyo, kag paano ginaaman ang panuytoy sa sini?

16. Subong sang ginasiling sang iya introduksion, ano ang katuyoan sang Teokratikong Eskwelahan sa Ministeryo?

17. Anong espirituwal nga mga aman ang ginhimu ni Jehova para sa sadtong nagatudlo sa iban sang iya sagrado nga kamatuoran?

18. Nagailog sang mga halimbawa nanday Jesus kag Pablo, anong mga kahimusan ang mahimu sang mga gulang agod pauswagon ang pag-alagad sa latagon karon?

19. Ngaa dapat kita mangamuyo tuhoy sa aton ministeryo?

20. Subong mga Saksi ni Jehova, sa ano kita dapat mangin determinado samtang nagahilapit na sa katapusan ini nga sistema?