Tinudluan ni Jehova Tubtob Karon
“Si Jehova mismo naghatag sa akon sing dila sang mga tinudluan.”—ISAIAS 50:4.
1, 2. (a) Para sa ano ginhanda ni Jehova ang iya paborito nga bumulutho, kag ano ang resulta? (b) Paano ginkilala ni Jesus ang Tuburan sang iya mga panudlo?
SI Jehova nga Dios nangin isa ka Manunudlo sugod sang mangin Amay sia. Sang pila ka tion sa tapos magrebelde ang iya mga anak, ginhanda niya ang iya paborito nga bumulutho, ang iya Panganay, para sa isa ka ministeryo sa duta. (Hulubaton 8:30) Ang Isaias kapitulo 50 matagnaon nga nagapresentar sining bumulutho subong nagasiling: “Ang Soberanong Ginuong Jehova mismo naghatag sa akon sing dila sang mga tinudluan, agod nga makahibalo ako magsabat sa pulong sa ginalapyo.” (Isaias 50:4) Subong resulta sang pag-aplikar ni Jesus sang mga panudlo sang iya Amay samtang yari sia sa duta, nangin tuburan sia sang kaumpawan para sa tanan nga ‘ginalapyo kag ginabug-atan.’—Mateo 11:28-30.
2 Naghimo si Jesus sing madamong gamhanan nga mga buhat sang unang siglo. Ginpamuklat niya ang mga mata sang mga bulag kag ginbanhaw pa ang mga patay, apang labi sia nga nakilal-an sang iya mga kadungan subong isa ka manunudlo. Amo sina ang pagtawag sa iya sang iya mga sumulunod subong man sang mga nagpamatok sa iya. (Mateo 8:19; 9:11; 12:38; 19:16; Juan 3:2) Wala gid ginpabugal ni Jesus ang iya gintudlo kundi mapainubuson nga ginkilala niya: “Ang akon ginatudlo indi akon, kundi iya sang nagpadala sa akon.” “Suno sa gintudlo sa akon sang Amay ginapamulong ko ining mga butang.”—Juan 7:16; 8:28; 12:49.
Huwaran nga Manunudlo-Bumulutho nga Kaangtanan
3. Paano ang tagna ni Isaias nagapakita sang interes ni Jehova sa mga ginatudluan niya?
3 Ang isa ka maayo gid nga manunudlo nagapakita sing personal, mainulikdon, kag mahigugmaon nga interes sa iya mga bumulutho. Ginapahayag sang Isaias kapitulo 50 nga si Jehova nga Dios may subong sina nga sahi sang interes sa mga ginatudluan niya. “Nagamata sia agaaga,” siling sang tagna, “ginapukaw niya ang akon dulunggan sa pagpamati subong sang mga tinudluan.” (Isaias 50:4) Nagapahangop ini sing isa ka instruktor nga nagapukaw sa iya mga bumulutho sing aga pa agod tudluan sila. Nagkomento sa aplikasyon sang tagna, ang isa ka eskolar sa Biblia nagsiling: “Ang ideya amo, nga ang Manunubos mangin amo ang . . . isa nga, sa malaragwayon nga hambal, yara sa eskwelahan sang Dios; kag kalipikado sa pagtudlo sa iban. . . . Ang Mesias kalipikado gid, paagi sa Diosnon nga panudlo, nga mangin ang manunudlo sang katawhan.”
4. Ano ang reaksion ni Jesus sa pagtudlo sang iya Amay?
4 Sing nagakadapat, ang mga bumulutho nagapamati sa panudlo sang ila manunudlo. Paano gintamod ni Jesus ang pagtudlo sang iya Amay? Nahisanto ini sa aton mabasa sa Isaias 50:5: “Ang Soberanong Ginuong Jehova mismo nagbukas sang akon dulunggan, kag ako, sa akon bahin, indi mabinatuon. Wala ako mag-isol.” Huo, nalangkag gid si Jesus sa pagtuon. Isa sia ka maayo gid nga manugpamati. Dugang pa, handa sia nga himuon ang bisan ano nga ginapangabay sang iya Amay. Indi sia mabinatuon; sa baylo, sia nagsiling: “Indi ang akon kabubut-on, kundi ang imo, paghimuon.”—Lucas 22:42.
5. (a) Ano ang nagapakita nga nahibaluan na ni Jesus sing abanse ang mga pagtilaw nga iya pagaantuson sa duta? (b) Paano natuman ang tagna sa Isaias 50:6?
5 Ginapakita sang tagna nga nahibaluan na sang Anak kon ano ang mangin resulta sang iya paghimo sang kabubut-on sang Amay. Ginapakita ini sang ginsiling sang isa nga tinudluan: “Gintaya ko ang akon likod sa mga manughanot, kag ang akon guya sa mga naggabot sang buhok. Wala ko pagtagua ang akon nawong sa kahuya kag sa pagdupla.” (Isaias 50:6) Subong ginapakita sang tagna, ginpintasan si Jesus sa duta. “Ginduplaan sia nila sa iya nawong,” sulat ni apostol Mateo. “Ang iban nagtampa sa iya.” (Mateo 26:67) Natabo ini sa mga kamot sang relihiosong mga lider sang gab-i sang Paskuwa sang 33 C.E. Sang masunod nga adlaw gintaya ni Jesus ang iya likod sa mga manughanot, kay wala kaluoy nga ginhanot sia sang Romanong mga soldado antes sia ginbitay sa isa ka usok agod mapatay.—Juan 19:1-3, 16-23.
6. Ano ang nagapakita nga si Jesus wala gid madulai sing pagsalig sa iya Manunudlo, kag paano ginpadyaan ang iya pagsalig?
6 Ang Anak, nga una na nga tinudluan sing maayo, wala gid magdula sing pagsalig sa iya Manunudlo. Ginapakita ini sang iya masunod nga ginsiling suno sa tagna: “Ang Soberanong Ginuong Jehova mismo magatabang sa akon. Busa indi ako magbatyag sing kahuya.” (Isaias 50:7) Ang pagsalig ni Jesus sa bulig sang iya Manunudlo bugana nga ginpadyaan. Ginbayaw sia sang iya Amay, ginpakamaayo sia sing isa ka superyor nga posisyon labaw sa tanan nga iban pa nga alagad sang Dios. (Filipos 2:5-11) Nagahulat man sa aton ang dakung mga pagpakamaayo kon matinumanon nga sundon naton ang pagtudlo ni Jehova kag indi “mag-isol.” Usisaon naton kon paano ginatanyag sa aton ina nga pagtudlo tubtob sa aton adlaw.
Isa ka Napasangkad nga Programa sa Pagpanudlo
7. Paano ginhimo ni Jehova ang iya pagtudlo sa duta?
7 Subong napatalupangod na naton kaina, gingamit ni Jehova ang iya dutan-on nga Tiglawas, si Jesucristo, sa paghimo sang diosnon nga pagpanudlo sang unang siglo. (Juan 16:27, 28) Masunson nga gintudlo ni Jesus ang Pulong sang Dios subong amo ang awtoridad para sa iya pagpanudlo, nagahatag sing huwaran sa mga gintudluan niya. (Mateo 4:4, 7, 10; 21:13; 26:24, 31) Pagkatapos sadto, ang pagtudlo ni Jehova ginhimo sa duta paagi sa ministeryo sinang mga tinudluan. Dumduma nga ginsugo sila ni Jesus: “Busa lakat kamo kag maghimo sing mga disipulo sa katawhan sang tanan nga kapungsuran, . . . nga nagapanudlo sa ila sa pagtuman sang tanan nga ginsugo ko sa inyo.” (Mateo 28:19, 20) Sang mahimo ang mga disipulo, ini sila nangin bahin sang “panimalay sang Dios, . . . ang kongregasyon sang buhi nga Dios.” (1 Timoteo 3:15) Ginporma man sila sa indibiduwal nga mga kongregasyon diin gintudluan sila ni Jehova. (Binuhatan 14:23; 15:41; 16:5; 1 Corinto 11:16) Nagpadayon bala tubtob karon ang diosnon nga pagpanudlo sa sinang paagi?
8. Paano suno kay Jesus dumalahan ang pagbantala nga hilikuton sa duta antes mag-abot ang katapusan?
8 Huo, sa pagkamatuod! Tatlo ka adlaw antes sang kamatayon ni Jesus, nagtagna sia nga sa indi pa matapos ining sistema sang mga butang, mahanabo ang dakung hilikuton sa pagbantala. “Iwali ining maayong balita sang ginharian sa bug-os napuy-an nga duta subong panaksi sa tanan nga kapungsuran,” siling niya, “kag ugaling magaabot ang katapusan.” Nagpadayon si Jesus sa paglaragway sang instrumento nga gamiton sa pagtuytoy sining programa sang bug-os kalibutan nga pagbantala kag pagpanudlo. Ginsambit niya “ang matutom kag mainandamon nga ulipon” nga mangin alagyan, ukon instrumento, sa pag-aman sing espirituwal nga kalan-on sa Iya mga alagad. (Mateo 24:14, 45-47) Ginagamit ni Jehova nga Dios ining “ulipon” sa pagdumala sang mga interes sang Ginharian sa bug-os nga duta.
9. Sin-o ang nagahuman sa matutom kag mainandamon nga ulipon?
9 Sa karon, ang matutom kag mainandamon nga ulipon ginahuman sang nagkalabilin sang mga manunubli sang Ginharian. Hinaplas sila nga mga Cristiano, ang mga nagkalabilin sa duta sang 144,000, nga “iya ni Cristo” kag bahin sang “binhi ni Abraham.” (Galacia 3:16, 29; Bugna 14:1-3) Paano mo makilala ang matutom kag mainandamon nga ulipon? Paagi labi na sa hilikuton nga ila ginahimo kag sa ila bug-os nga pagsunod sa Pulong sang Dios, ang Biblia.
10. Anong mga instrumento ang ginagamit sang ulipon nga klase sa pagsakdag sa mga panudlo ni Jehova?
10 Ginagamit ni Jehova ining “ulipon” subong paagi niya sa pagtudlo sa katawhan karon. Ang mga katapo sang ulipon nga klase nagbaton sang ngalan nga mga Saksi ni Jehova sang 1931. Sugod sadto minilyon ang nakig-upod sa ila kag nagbaton sina nga ngalan kag nagbuylog sa pagwali sing Ginharian sang Dios. Ining magasin, Ang Lalatanwan Nagabantala sang Ginharian ni Jehova, amo ang panguna nga instrumento nga ginagamit sang “ulipon” sa pagpanudlo nga hilikuton. Apang, ginagamit man ang iban pa nga mga publikasyon, lakip ang mga libro, mga pulyeto, mga brosyur, mga tract, kag ang Magmata! nga magasin.
11. Anong mga eskwelahan ang ginsakdag sang “ulipon,” kag ano ang katuyuan sang tagsatagsa sining mga eskwelahan?
11 Dugang pa, ang “ulipon” nagasakdag sing nanuhaytuhay nga mga eskwelahan. Nagalakip ini sa Watchtower Bible School of Gilead, nga isa ka lima ka bulan nga kurso nga nagahanda sa lamharon nga mga ministro para sa pagmisyonero sa iban nga pungsod, kag sa duha ka bulan nga Ministerial Training School nga kurso, nga nagahanas sa soltero nga mga gulang kag ministeryal nga mga alagad para sa pinasahi nga teokratikong mga tulumanon. Yara man ang Kingdom Ministry School, diin ang Cristianong mga gulang kag ministeryal nga mga alagad ginatudluan sa tion kag tion sang ila mga salabton sa kongregasyon, kag ang Pioneer Service School, nga nagasangkap sa bug-os tion nga mga ebanghelisador agod mangin kapin pa ka epektibo sa ila pagbantala nga hilikuton.
12. Ano ang semanal nga bahin sang programa sa pagpanudlo?
12 Ang isa pa ka bahin sang programa sa pagpanudlo amo ang lima ka semanal nga miting nga ginahiwat sa kapin sa 75,500 ka kongregasyon sang katawhan ni Jehova sa bug-os nga kalibutan. Nagabenepisyo ka bala sing bug-os nga mahimo gikan sa sining mga miting? Paagi sa imo pagpamati sing maayo sa instruksion nga ginahatag, ginapakita mo bala nga ikaw gid nagapati nga ikaw, sa malaragwayon nga paghambal, yara sa eskwelahan sang Dios? Ang imo bala espirituwal nga pag-uswag maathag nga nagapakita sa iban nga ikaw may “dila sang mga tinudluan”?—Isaias 50:4; 1 Timoteo 4:15, 16.
Tinudluan sa mga Miting sa Kongregasyon
13. (a) Ano ang importante nga paagi sang pagtudlo ni Jehova sa iya katawhan karon? (b) Paano naton mapakita ang aton apresasyon sa Ang Lalantawan?
13 Labi na nga ginatudluan ni Jehova ang iya katawhan paagi sa isa ka semanal nga pagtuon sa Biblia, nga ginagamit ang Lalantawan subong isa ka bulig sa pagpanudlo. Ginatamod mo bala ining miting subong isa ka duog diin matudluan ikaw ni Jehova? Bisan pa ang Isaias 50:4 naaplikar labi na kay Jesus, maaplikar man ini sa tanan nga nagahimulos sa mga aman sang Dios sa pagbaton sing “dila sang mga tinudluan.” Ang isa ka paagi nga mapakita mo nga ginapakabahandi mo ang Lalantawan amo ang pagbasa sang tagsa ka guwa sa gilayon nga mahimo sa tapos mo mabaton ini. Nian, kon ginatun-an ang Lalantawan sa kongregasyon, mapakita mo ang imo apresasyon kay Jehova paagi sa pagtambong kag paagi man sa pagkahanda sa paghimo sing dayag nga pagpabutyag sang imo paglaum.—Hebreo 10:23.
14. (a) Ngaa ang pagkomento sa mga miting isa ka importante gid nga pribilehiyo? (b) Ano nga sahi sang mga komento sang kabataan ang labing makapalig-on?
14 Nahangpan mo bala nga paagi sa imo mga komento sa mga miting, makapakigbahin ikaw sa daku nga programa sa pagpanudlo ni Jehova? Sing pat-od, ang pagkomento sa mga miting isa ka importane nga paagi nga makapalig-unay kita sa isa kag isa “sa gugma kag sa maayong mga buhat.” (Hebreo 10:24, 25) Makapakigbahin man bala sa sining programa sang pagpanudlo ang kabataan? Huo. Ang tinagipusuon nga mga komento sang mga kabataan masami nga makapalig-on sa mga may edad. Kon kaisa, ang mga bag-uhan nga nagatambong sa aton mga miting ginapahulag sang mga komento sang kabataan nga mangin kapin ka serioso sa kamatuoran sang Biblia. Ginahimo nga batasan sang pila ka kabataan nga basahon ang ila mga komento direkta gikan sa parapo ukon suliton ang ginahutik sang isa ka hamtong. Apang, makapalig-on gid kon ang ila mga komento ginhanda sing maayo. Ina nga pagkomento nagadala gid sing kadungganan sa aton Dakung Instruktor kag sa iya nabayaw nga programa sang pagpanudlo.—Isaias 30:20, 21.
15. Ano ang mahimo sang mga ginikanan sa pagbulig sa kabataan sa pagkomento sing kapin ka epektibo?
15 Makalilipay makita ang kabataan nga nagahandum sa pagpakigbahin sa pagdayaw sa aton Dios. Gin-apresyar ni Jesus ang mga pagpabutyag sang pagdayaw gikan sa kabataan. (Mateo 21:15, 16) Ang isa ka Cristianong gulang nagsiling: “Sang bata pa ako, naluyag gid ako magkomento sa Pagtinuon sa Lalantawan. Sa tapos ako mabuligan sa paghanda sing komento, ginaobligar ako sang akon amay nga ensayuhon ko ang akon komento sa dimagkubos sing pito ka beses.” Ayhan sa tion sang inyo pagtuon sa Biblia subong pamilya, kamo nga mga ginikanan makabulig sa inyo kabataan sa paghanda sing mga komento sa ila kaugalingon nga mga tinaga sa pinili nga mga parapo sa Ang Lalantawan. Buligi sila sa pag-apresyar sang dakung pribilehiyo nila sa pagpakigbahin sa programa sa pagpanudlo ni Jehova.
16. Ano ang nangin kaayuhan sang Teokratikong Eskwelahan sa Pagministro, kag sin-o ang mahimo magpalista sa eskwelahan?
16 Dapat man binagbinagon sing serioso ang pagtudlo sa iban pa nga Cristianong mga miting, sang mga may pribilehiyo sa paghatag sing impormasyon kag sang mga nagapamati sa instruksion nga ginapresentar. Sa kapin sa 50 ka tuig karon, ginagamit ni Jehova ang semanal nga Teokratikong Eskwelahan sa Pagministro sa paghanas sa minilyon ka kalalakin-an kag kababayin-an sa pagtanyag sing mensahe sang Ginharian sing kapin ka epektibo. Mahimo makapalista sa sini ang mga aktibo nga nagapakig-upod sa kongregasyon, lakip ang mga tawo nga bag-o lang magsugod sa pagtambong sa mga miting, basta nagakabuhi sila nahisanto sa Cristianong mga prinsipio.
17. (a) Ano gid ang katuyuan kon ngaa ginpatok ang Miting Publiko? (b) Ano ang mga butang nga dapat tandaan sang publiko nga mga humalambal?
17 Ang isa pa ka madugay na nga bahin sang programa sa pagpanudlo amo ang Miting Publiko. Subong ginapakita sang ngalan sini, ginpatok ining miting ilabi na agod tudluan ang mga indi pa Saksi sang sadsaran nga mga panudlo sang Biblia. Sa amo, dapat ipresentar sang isa nga nagahatag sing pamulongpulong ang impormasyon sa isa ka paagi nga mahangpan sang mga nagapamati sa mensahe sa una nga tion. Nagakahulugan ini nga dapat ipaathag ang mga termino subong sang “iban nga mga karnero,” “kauturan,” kag “nagkalabilin,” mga termino nga mahimo indi mahangpan sang mga indi pa Saksi. Sanglit ang mga tawo nga nagatambong sa Miting Publiko mahimo nga may mga pagtuluuhan ukon estilo sang pagkabuhi nga nagasumpakil sa Kasulatan—bisan pa ginabaton ini sa karon nga katilingban—ang humalambal dapat pirme mangin mataktikanhon kag indi gid pagyubiton ina nga mga pagtuluuhan ukon estilo sang pagkabuhi.—Ipaanggid ang 1 Corinto 9:19-23.
18. Ano pa ang iban nga mga miting sa kongregasyon kada semana, kag ano ang mga katuyuan sini?
18 Ang Pagtinuon sang Kongregasyon sa Libro isa ka miting diin ang mga publikasyon nga ginhanda sa idalom sang pagtuytoy sang matutom kag mainandamon nga ulipon ginatun-an kada semana upod sa Biblia. Ang libro nga Revelation—Its Grand Climax At Hand! amo ang ginagamit karon sa madamong kadutaan. Ang Miting sa Serbisyo ginadesinyo sa pagsangkap sa katawhan ni Jehova nga makapakigbahin sing bug-os sa pagbantala sing maayong balita sang Ginharian kag sa paghimo sing mga disipulo.—Mateo 28:19, 20; Marcos 13:10.
Tinudluan sa Mas Dalagku nga mga Miting
19. Anong mas dalagku nga mga pagtinipon ang ginahanda sang “ulipon” kada tuig?
19 Sa kapin sa isa ka gatos ka tuig, ang ‘matutom nga ulipon’ naghanda sing mga kombension kag mga asambleya agod tudluan kag palig-unon sa pinasahi nga paagi ang matuod nga mga Cristiano. Tatlo sining mas dalagku nga mga miting ang ginahiwat karon kada tuig. May yara isa ka adlaw nga asambleya nga ginatambungan sang isa ka grupo sang mga kongregasyon nga nagahuman sing isa ka sirkito. Sa sulod sang tuig, ang tagsa ka sirkito may yara man duha ka adlaw nga pagtinipon nga ginatawag sirkito nga asambleya. Dugang pa, may isa ka pagtinipon nga ginatawag distrito nga kombension, nga ginatambungan sang pila ka sirkito. Sa tion kag tion may yara internasyunal nga mga kombension. Ining daku nga mga pagtinipon nga may mga bisita nga mga Saksi gikan sa madamong pungsod makapalig-on gid sa pagtuo para sa katawhan ni Jehova!—Ipaanggid ang Deuteronomio 16:16.
20. Ano ang dalayon nga ginapadaku sa mas dalagku nga mga pagtinipon sang mga Saksi ni Jehova?
20 Sang 1922, sang mga 10,000 ang nagtipon sa Cedar Point, Ohio, E.U.A., nagpagsik ang mga delegado sa pagpalig-on sang humalambal: “Amo ini ang adlaw sang tanan nga adlaw. Tan-awa, ang Hari nagagahom na! Kamo ang iya mga manugbantala. Busa ibantala, ibantala, ibantala, ang Hari kag ang iya ginharian.” Ang dalagku nga mga kombension subong sini dalayon nga nagapadaku sang pagbantala nga hilikuton. Halimbawa, sa internasyunal nga kombension sa Siudad sang New York sang 1953, ginpahibalo ang pagpatok sing programa sa paghanas para sa pamalaybalay nga hilikuton sa tanan nga kongregasyon. Positibo gid ang epekto sang pagpatuman sini sa pagbantala sing Ginharian sa madamong kadutaan.
Tinudluan sang Dios sa Pagtudlo
21. Anong pribilehiyo ang luyag naton batunon, nga wala ginawasi ang katuyuan sini?
21 Sa pagkamatuod, si Jehova may dalayawon nga programa sa pagtudlo sa duta karon! Ang tanan nga nagahimulos sini sarang matudluan sang Dios, huo, sarang malakip sa mga ginhatagan sing “dila sang mga tinudluan.” Daw ano nga pribilehiyo nga mangin yara sa malaragwayon nga eskwelahan sang Dios! Apang, kon ginabaton ining pribilehiyo, indi naton dapat wasihon ang katuyuan sini. Gintudluan ni Jehova si Jesus agod nga makapanudlo sia sa iban, kag gintudluan ni Jesus ang iya mga disipulo agod nga makahimo sila sing amo man nga hilikuton nga ginhimo niya apang sa mas daku nga kasangkaron. Sing kaanggid, ginahanas kita sa dakung programa sa pagtudlo ni Jehova para sa katuyuan nga tudluan ang iban.—Juan 6:45; 14:12; 2 Corinto 5:20, 21; 6:1; 2 Timoteo 2:2.
22. (a) Ano anay ang problema nanday Moises kag Jeremias, apang paano ini nalubad? (b) Paano naton mapat-od nga ipatapos gid sang Dios ang pagbantala sa Ginharian?
22 Nagasiling ka bala, kaangay ni Moises, “Indi ako talunsay maghambal,” ukon subong sang ginsiling ni Jeremias, “Indi gid ako makahibalo maghambal”? Buligan ikaw ni Jehova subong nga ginbuligan niya sila. “Ako gid magaupod sa imo baba,” siling niya kay Moises. Kag kay Jeremias sia nagsiling “Dili ka mahadlok . . . ako nagaupod sa imo.” (Exodo 4:10-12; Jeremias 1:6-8) Sang luyag pahipuson sang relihiosong mga lider ang iya mga disipulo, si Jesus nagsiling: “Kon ini sila maghipos, ang mga bato gid magasinggit.” (Lucas 19:40) Apang indi kinahanglan magsinggit sadto ang mga bato, kag indi man karon kay ginagamit ni Jehova ang dila sang iya mga tinudluan sa pagdala sang mensahe sang iya Ginharian.
Masabat Mo Bala?
◻ Anong huwaran nga Manunudlo-bumulutho nga kaangtanan ang ginapadaku sa Isaias kapitulo 50?
◻ Paano ginahimo ni Jehova ang isa ka masangkad nga programa sa pagpanudlo?
◻ Ano ang pila sang ginalakip sa programa sa pagpanudlo ni Jehova?
◻ Ngaa isa ka dakung pribilehiyo ang magpakigbahin sa programa sa pagpanudlo ni Jehova?
[Retrato sa pahina 16]
Ang tinagipusuon nga mga komento sang kabataan masami nga makapalig-on sa mga may edad