Gintudluan sa Paghimo sang Kabubut-on ni Jehova
“Tudlui ako sa paghimo sang imo kabubut-on, kay ikaw amo ang akon Dios.”—SALMO 143:10.
1, 2. (a) San-o kita dapat tudluan, kag upod ang anong realistiko nga pagtamod? (b) Ngaa kinahanglanon gid ang matudluan ni Jehova?
SA KADA adlaw nga ang isa ka tawo buhi kag aktibo, mahimo sia matudluan sang pila ka butang nga mapuslanon. Matuod ina sa imo kahimtangan, kag matuod man ini sa iban. Apang ano ang nagakatabo sa kamatayon? Indi posible nga tudluan sing bisan ano nga butang ukon makatuon sa sina nga kahimtangan. Ang Biblia maathag nga nagasiling nga ang mga patay ‘wala makahibalo sing bisan ano.’ Wala sing ihibalo sa Sheol, ang kinaandan nga lulubngan sang katawhan. (Manugwali 9:5, 10) Nagakahulugan bala ini nga ang pagtudlo, ang pagtipon naton sing ihibalo, walay pulos? Depende ina sa kon ano ang gintudlo sa aton kag sa kon paano naton ginagamit ina nga ihibalo.
2 Kon ang gintudlo sa aton amo lamang ang kalibutanon, wala kita sing mapinadayunon nga palaabuton. Apang, sing makalilipay, minilyon ka tawo sa tanan nga kapungsuran ang gintudluan sang balaan nga kabubut-on agod makaagom sang kabuhi nga walay katapusan. Ang sadsaran sini nga paglaum nasandig sa pagtudlo ni Jehova, ang Tuburan sang nagahatag-kabuhi nga ihibalo.—Salmo 94:9-12.
3. (a) Ngaa masiling nga si Jesus amo ang nahaunang estudyante sang Dios? (b) Ano ang pasalig sa aton nga ang mga tawo pagatudluan ni Jehova, kag upod ang anong resulta?
3 Ang panganay nga Anak sang Dios, subong ang Iya nahaunang estudyante, gintudluan sa paghimo sang kabubut-on sang iya Amay. (Hulubaton 8:22-30; Juan 8:28) Subong man, ginpakita ni Jesus nga ang linaksa ka tawo pagatudluan sang iya Amay. Ano ang palaabuton para sa aton nga nagtuon sa Dios? Si Jesus nagsiling: “Nasulat na sa Mga Manalagna, ‘Kag sila tanan pagatudluan ni Jehova.’ Ang tagsatagsa nga nagapamati gikan sa Amay kag nakatuon nagakari sa akon. . . . Sa pagkamatuod nagasiling ako sa inyo, Sia nga nagatuo may kabuhi nga walay katapusan.”—Juan 6:45-47.
4. Paano naapektuhan ang minilyon ka tawo sang panudlo sang Dios, kag ano ang ila mga palaabuton?
4 Ginbalikwat ni Jesus ang Isaias 54:13, nga ginpatuhoy sa simbuliko nga babayi sang Dios, ang langitnon nga Sion. Ina nga tagna naaplikar labi na sa iya mga anak, sa 144,000 ka ginpanganak sang espiritu nga mga disipulo ni Jesucristo. Ang nagkalabilin sinang espirituwal nga mga anak aktibo sa karon, nagapanguna sa tugob-globo nga programa sang pagpanudlo. Subong resulta, minilyon sang iban pa nga nagahuman sang “dakung kadam-an” ang nakabenepisyo sa pagtudlo ni Jehova. May pinasahi sila nga palaabuton nga makatuon nga indi na makaeksperiensia sing kamatayon. Paano? Ti, gintalana sila nga makalampuwas sa nagapakari sing madasig nga “dakung kapipit-an” kag makaagom sing kabuhi nga walay katapusan sa isa ka paraiso nga duta.—Bugna 7:9, 10, 13-17.
Labi Pa nga Pagpadaku sa Paghimo sang Kabubut-on sang Dios
5. (a) Ano ang tuigan nga teksto para sa 1997? (b) Ano ang dapat nga balatyagon naton nahanungod sa pagtambong sa Cristianong mga miting?
5 Sa 1997, sa kapin sa 80,000 ka kongregasyon sa bug-os nga kalibutan, dumdumon pirme sang mga Saksi ni Jehova ang nagabukas nga mga tinaga sang Salmo 143:10: “Tudlui ako sa paghimo sang imo kabubut-on.” Amo ina ang tuigan nga teksto sa 1997. Inang mga tinaga, nga makita sing talalupangdon sa mga Kingdom Hall, mangin pahanumdom nga ang isa ka tumalagsahon nga duog sa pagbaton sing edukasyon sa Dios amo ang sa mga miting sa kongregasyon, diin makapakigbahin kita sa ginahimo nga programa sang pagtudlo. Kon nagabuylog sa aton mga kauturan sa mga miting agod tudluan sang aton Dakung Instruktor, magabatyag kita kaangay sang salmista, nga nagsulat: “Nagkasadya ako sang nagsiling sila sa akon: ‘Makadto kita sa balay ni Jehova.’ ”—Salmo 122:1; Isaias 30:20.
6. Sa mga pinamulong ni David, ano ang ginakilala naton?
6 Huo, handum naton nga tudluan sa paghimo sang kabubut-on sang Dios sa baylo sang kabubut-on sang aton kaaway nga Yawa ukon sang kabubut-on sang dihimpit nga mga tawo. Gani, kaangay ni David, ginakilala naton ang Dios nga aton ginasimba kag ginaalagad: “Kay ikaw amo ang akon Dios. Ang imo espiritu maayo; kabay nga magtuytoy ini sa akon sa duta sang pagkatadlong.” (Salmo 143:10) Sa baylo nga mag-upod sa mga tawo sang kabutigan, ginpili ni David nga mangin yara sa kon diin ginahimo ang pagsimba kay Jehova. (Salmo 26:4-6) Paagi sa pagtuytoy sang espiritu sang Dios sa iya mga tikang, si David nakalakat sa mga banas sang pagkatadlong.—Salmo 17:5; 23:3.
7. Paano nagapanghikot ang espiritu sang Dios sa Cristianong kongregasyon?
7 Ang Daku Pa nga David, si Jesucristo, nagpasalig sa mga apostoles nga ang balaan nga espiritu magatudlo sa ila sang tanan nga butang kag magapahanumdom sa ila sang tanan nga butang nga ginsugid niya sa ila. (Juan 14:26) Kutob sang Pentecostes padayon, si Jehova progresibo nga nagapahayag sang “madalom nga mga butang sang Dios” nga yara sa iya nasulat nga Pulong. (1 Corinto 2:10-13) Ginhimo niya ini sa kalalangan sang kitaon nga alagyan nga gintawag ni Jesus nga “ang matutom kag mainandamon nga ulipon.” Nagaaman ini sing espirituwal nga pagkaon nga ginabinagbinag sa programa sang pagtudlo sa mga kongregasyon sang katawhan sang Dios sa bug-os nga kalibutan.—Mateo 24:45-47.
Gintudluan sang Kabubut-on ni Jehova sa Aton mga Miting
8. Ngaa ang pagkomento sa Pagtinuon sa Lalantawan tuman ka hamili?
8 Ang materyal sa semanal nga Pagtinuon sa Lalantawan sa kongregasyon masunson nagahinun-anon sang pag-aplikar sa mga prinsipio sang Biblia. Nagabulig gid ini sa aton sa pag-atubang sa mga kabalaka sa kabuhi. Sa iban nga mga pagtinuon ang madalom nga espirituwal nga mga kamatuoran ukon mga tagna sang Biblia ginabinagbinag. Kadamo gid sang ginatudlo sa aton sa sining mga pagtuon! Sa madamong kadutaan ang mga Kingdom Hall napuno tungod sining mga miting. Apang sa pila ka mga pungsod, ang tumalambong sa mga miting nagnubo. Sa banta mo, ngaa? Mahimo bala nga ginatugutan sang iban ang sekular nga palamugnan sa pag-upang sa ila regular nga pagtipon sing tingob ‘sa pagpukaw sa gugma kag sa maayong mga buhat’? Ukon mahimo bala nga madamong inoras ang ginahinguyang sa sosyal nga mga hilikuton ukon sa pagtan-aw sing telebisyon, nagahatag na lamang sing diutay nga tion sa pagtambong sa tanan nga miting? Dumduma ang inspirado nga laygay sa Hebreo 10:23-25. Indi bala nga ang pagtipon sing tingob para sa panudlo sang Dios labi pa gid karon ka importante samtang “ginatan-aw [naton] nga nagapalapit ang adlaw”?
9. (a) Paano kita ginasangkapan sang Miting sa Serbisyo para sa ministeryo? (b) Ano ang dapat nga mangin panimuot naton nahanungod sa pagpanaksi?
9 Ang isa sang aton labing importante nga salabton amo ang pag-alagad subong mga ministro sang Dios. Ang Miting sa Serbisyo ginadesinyo agod tudluan kita kon paano naton ini himuon sing epektibo. Nagatuon kita sa kon paano masugilanon ang mga tawo, kon ano ang isiling, kon ano ang mangin reaksion kon mamati sila, kag bisan kon ano ang himuon kon sikwayon sang mga tawo ang aton mensahe. (Lucas 10:1-11) Samtang ang epektibo nga mga paagi ginahambalan kag ginapasundayag sa sining semanal nga mga miting, labi kita nga nakahanda sa paglab-ot sa mga tawo indi lamang kon nagapamalaybalay kundi kon nagabantala man sa mga dalan, sa mga paradahan sang salakyan, sa pangpubliko nga transportasyon, sa mga erport, sa mga balaligyaan, ukon sa mga eskwelahan. Nahisuno sa aton pangabay, “Tudlui ako sa paghimo sang imo kabubut-on,” luyag naton himuslan ang tanan nga kahigayunan nga himuon ang subong sang ginlaygay sang aton Agalon: “Paiwaga ang inyo kapawa sa atubangan sang mga tawo, agod . . . mahimaya nila ang inyo Amay nga yara sa langit.”—Mateo 5:16.
10. Paano naton tunay nga mabuligan ang ‘mga takus’?
10 Sa sining mga miting sa kongregasyon, ginatudluan man kita nga himuon nga mga disipulo ang iban. Sa tion nga makita ang interes ukon mapahamtang ang literatura, ang aton tulumuron sa mga pagduaw-liwat amo ang pagsugod sing mga pagtuon sang Biblia sa puluy-an. Kaanggid ini sa ‘pagpabilin [sang mga disipulo] sa mga takus’ agod matudlo sa ila ang mga butang nga ginsugo ni Jesus. (Mateo 10:11; 28:19, 20) Paagi sa maayo nga mga bulig, subong sang libro nga Ang Ihibalo nga Nagadul-ong sa Kabuhi nga Walay Katapusan, nasangkapan gid kita agod matuman sing bug-os ang aton ministeryo. (2 Timoteo 4:5) Kada semana samtang nagatambong ka sa Miting sa Serbisyo kag sa Teokratikong Eskwelahan sa Pagministro, panikasugi nga hangpon kag nian gamiton ang mabuligon nga mga punto nga magarekomendar sa imo subong isa sang kalipikado sing nagakaigo nga mga ministro sang Dios, nga nagatuman sang iya kabubut-on.—2 Corinto 3:3, 5; 4:1, 2.
11. Paano ginpakita sang iban ang pagtuo sa mga pinamulong nga masapwan sa Mateo 6:33?
11 Kabubut-on sang Dios nga aton ‘padayon nga . . . pangitaon anay ang ginharian kag ang iya pagkamatarong.’ (Mateo 6:33) Pamangkuta ang imo kaugalingon, ‘Paano ko iaplikar ining prinsipio kon ang akon [ukon ang iya sang akon tiayon] sekular nga palamugnan nagaupang sa pagtambong sa mga miting?’ Madamong hamtong sa espirituwal ang nagahimo sing mga tikang agod masugilanon ang ila mga amo nahanungod sini nga butang. Ginsugiran sang isa ka bug-os tion nga ministro ang iya amo nga kinahanglan niya ang time off kada semana agod makatambong sa mga miting sa kongregasyon. Nagpasugot sia sa pangabay sang utod nga babayi. Apang bangod interesado sia nga mahibaluan kon ano ang ginahimo sa mga miting, nangabay sia sa pagtambong. Didto nabatian niya ang pahibalo nahanungod sa nagapakari nga distrito nga kombension. Subong resulta, ang amo naghimo sing kahimusan nga tambungan ang isa ka bug-os nga adlaw sang kombension. Ano nga leksion ang matun-an mo gikan sini nga halimbawa?
Gintudluan sang Kabubut-on ni Jehova sang Diosnon nga mga Ginikanan
12. Agod ang kabataan matudluan sang kabubut-on ni Jehova, ano ang dapat himuon sang Cristianong mga ginikanan nga may pagpailob kag pagkalig-on?
12 Apang indi lamang mga miting sa kongregasyon kag mga kombension ang ginaaman agod matudluan sa paghimo sang kabubut-on sang Dios. Ang diosnon nga mga ginikanan ginasugo nga hanason, disiplinahon, kag padakuon ang ila kabataan sa pagdayaw kay Jehova kag sa paghimo sang iya kabubut-on. (Salmo 148:12, 13; Hulubaton 22:6, 15) Nagakinahanglan ini sang pagdala naton sa aton “mga magamay” sa mga miting diin ‘makapamati kag makatuon’ sila, apang kamusta ang pagtudlo sa ila gikan sa balaan nga mga sinulatan sa puluy-an? (Deuteronomio 31:12; 2 Timoteo 3:15) Mahunahunaon nga ginsugdan sang madamong pamilya ang mga programa sang regular nga pangpamilya nga pagtuon sa Biblia, apang nagtugot nga mangin di-tayuyon ini ukon mauntat sa ulihi. Naagihan mo na bala ini? Magahinakop ka bala nga ang rekomendasyon nga maghiwat sining regular nga pagtuon indi nagakaigo ukon nga ang kahimtangan sang imo pamilya tuhay amo nga indi gid ini magamadinalag-on sa bahin ninyo? Ano man ang kahimtangan, palihug repasuha ninyo nga mga ginikanan ang matahom nga mga artikulo nga “Ang Amon Bugana Espirituwal nga Pinanubli” kag “Ang mga Padya sang Pagkamapinadayunon” sa Ang Lalantawan sang Agosto 1, 1995.
13. Paano makabenepisyo ang mga pamilya gikan sa pagbinagbinag sa adlaw-adlaw nga teksto?
13 Ang mga pamilya ginapalig-on nga himuon nga batasan ang pagbinagbinag sa adlaw-adlaw nga teksto gikan sa Pag-usisa sa Kasulatan sa Adlaw-adlaw. Ang pagbasa lamang sang teksto kag komento maayo, apang ang paghinun-anon sang teksto kag ang pag-aplikar sini mas mapuslanon. Halimbawa, kon nagabinagbinag sang Efeso 5:15-17, ang mga katapo sang pamilya mahimo makapangatarungan kon paano ‘baklon ang nagakaigo nga tion’ para sa personal nga pagtuon, sa pagpakigbahin sa pila ka porma sang bug-os tion nga ministeryo, kag sa pag-atipan sa iban nga teokratikong mga asaynment. Huo, ang paghinun-anon sang pamilya sa adlaw-adlaw nga teksto mahimo magdul-ong sa isa ukon sa madamo nga ‘magpadayon sa paghantop [sing labi pa] kon ano ang kabubut-on ni Jehova.’
14. Dapat ano nga sahi sang mga manunudlo ang mga ginikanan suno sa ginapakita sang Deuteronomio 6:6, 7, nga nagakinahanglan sing ano?
14 Ang mga ginikanan dapat mangin makugi nga mga manunudlo sang ila kabataan. (Deuteronomio 6:6, 7) Apang indi lamang ini pagsaway ukon pagsugo sa ila kabataan. Ang amay kag iloy dapat man mamati, sa sinang paagi mahibaluan nila sing mas maayo kon ano ang kinahanglan nga ipaathag, iklaro, ilaragway, ukon suliton. Sa isa ka Cristianong pamilya, ginapapagsik sang mga ginikanan ang bukas nga komunikasyon paagi sa pagpalig-on sa ila kabataan nga mamangkot nahanungod sa mga butang nga wala nila mahangpan ukon nagatuga sing kabalaka. Sa amo nahibaluan nila nga ang isa ka tin-edyer nga anak nga lalaki nabudlayan gali sa paghangop nga si Jehova wala sing ginsuguran. Gingamit sang mga ginikanan ang impormasyon gikan sa mga publikasyon sang Watch Tower Society nga nagapakita nga ang tion kag espasyo ginakabig nga wala sing katapusan. Nakabulig ini sa pag-ilustrar sang punto, kag nangin kontento sa sini ang ila anak. Gani maghinguyang sing tion nga masabat sing maathag kag gikan sa Kasulatan ang mga pamangkot sang inyo kabataan, nagabulig sa ila nga mahangpan nga ang pagtuon sa paghimo sang kabubut-on sang Dios mahimo gid nga mangin makaalayaw. Ano pa ang ginatudlo karon sa katawhan sang Dios—bata kag tigulang?
Gintudluan sa Paghigugma kag sa Pagpakig-away
15. San-o mahimo tilawan ang pagkamaminatud-on sang aton utudnon nga gugma?
15 Nahisuno sa bag-ong sugo ni Jesus, ‘gintudluan kita sang Dios nga maghigugmaanay.’ (1 Tesalonica 4:9) Kon ang kahimtangan malinong kag maayo, mahimo kita magbatyag nga ginahigugma gid naton ang aton tanan nga kauturan. Apang ano ang nagakatabo kon magautwas ang personal nga dipaghangpanay ukon nasaklaw kita bangod sang ginsiling ukon ginhimo sang isa ka Cristiano? Sa sining punto ang pagkamaminatud-on sang aton gugma mahimo tilawan. (Ipaanggid ang 2 Corinto 8:8.) Ano ang ginatudlo sang Biblia sa aton nga himuon sa sining mga kahimtangan? Ang isa amo nga manikasog nga ipakita ang gugma sa bug-os gid nga kahulugan. (1 Pedro 4:8) Sa baylo nga pangitaon ang aton kaugalingon nga mga kaayuhan, mangakig sa magagmay nga mga kakulangan, ukon magtanom sing aligutgot, dapat kita mangabudlay nga tabunan sang gugma ang kadam-an nga mga sala. (1 Corinto 13:5) Nakahibalo kita nga kabubut-on ini sang Dios, kay amo ini ang ginatudlo sang iya Pulong.
16. (a) Sa anong sahi sang inaway gintudluan ang mga Cristiano nga makig-away? (b) Paano kita nasangkapan?
16 Samtang wala ginaangot sang madamo ang gugma kag inaway, ang naulihi amo ang isa ka butang nga gintudlo sa aton, apang isa ka tuhay nga sahi sang inaway. Ginkilala ni David ang pagsandig niya kay Jehova nga tudluan sia kon paano himuon ang pagpakig-away, walay sapayan nga sang panahon niya naglakip ini sang literal nga pagpakig-away batok sa mga kaaway sang Israel. (1 Samuel 17:45-51; 19:8; 1 Hari 5:3; Salmo 144:1) Kamusta ang aton pagpakig-away karon? Ang aton mga hinganiban indi undanon. (2 Corinto 10:4) Ang aton pagpakig-away espirituwal, nga tungod sini dapat kita nasangkapan sing espirituwal nga hinganib. (Efeso 6:10-13) Paagi sa iya Pulong kag sa iya gintipon nga katawhan, ginatudluan kita ni Jehova sa pagpakig-away sing isa ka madinalag-on nga espirituwal nga inaway.
17. (a) Anong mga taktika ang ginagamit sang Yawa agod lingawon kita? (b) Ano ang maalamon nga dapat naton likawan?
17 Sa madayaon, malimbungon nga mga paagi, masunson ginagamit sang Yawa ang kalibutanon nga mga pagsulay, mga apostata, kag iban pa nga mga nagapamatok sa kamatuoran sa panikasog nga lingawon kita sa indi importante nga mga butang. (1 Timoteo 6:3-5, 11; Tito 3:9-11) Daw subong bala nga nakita niya nga diutay lamang ang kahigayunan niya nga madaug kita sa kalalangan sang direkta, dayag nga pagsalakay, gani ginatinguhaan niya nga masandad kita paagi sa paghaylo sa aton nga ipabutyag ang aton masunson nga reklamo kag binuang nga mga pamangkot, nga wala sing espirituwal nga kabilihanan. Subong mabinantayon nga mga hangaway, dapat kita mangin alisto sa sining mga katalagman subong sang pagkaalisto naton sa direkta nga mga pagsalakay.—1 Timoteo 1:3, 4.
18. Ano gid ang nadalahig sa indi na pagkabuhi para sa aton kaugalingon?
18 Wala naton ginapasanyog ang mga kailigbon sang mga tawo ukon ang kabubut-on sang mga pungsod. Gintudluan kita ni Jehova paagi sa halimbawa ni Jesus nga indi na kita dapat magkabuhi para sa aton kaugalingon; sa baylo dapat kita nga may panghunahuna kaangay ni Cristo Jesus kag magkabuhi para sa kabubut-on sang Dios. (2 Corinto 5:14, 15) Sang nagligad, mahimo kita nagkabuhi sing patuyang kag malain, nagausik sang hamili nga tion. Ang magansal kag magamo nga mga kinalipay, mga ininom, kag imoralidad nagalaragway sa sining malauton nga kalibutan. Karon nga gintudluan na kita sa paghimo sang kabubut-on sang Dios, wala bala kita nagapasalamat nga nahamulag kita gikan sa sining malauton nga kalibutan? Gani makig-away kita sing lakas sa espirituwal agod indi madalahig sa mahigko nga mga buhat sang kalibutan.—1 Pedro 4:1-3.
Nagatudlo sa Aton Agod Mabuligan Kita
19. Ano ang mga benepisyo sang pagkanatudluan sang kabubut-on ni Jehova kag nian ang paghimo sini?
19 Dapat kilalahon nga bangod natudluan ni Jehova, magabulig ini sa aton sing daku. Sing halangpunon, dapat naton himuon ang aton bahin paagi sa pagtalupangod sing maayo agod makatuon kag nian matuman ang mga instruksion nga ginahatag sa aton paagi sa iya Anak subong man paagi sa iya Pulong kag natipon nga katawhan. (Isaias 48:17, 18; Hebreo 2:1) Paagi sa paghimo naton sini, mapabakod kita sa pagtindog nga malig-on sa sining ital-ital nga mga tion kag mabatas ang mga pagtilaw sa unahan. (Mateo 7:24-27) Bisan karon, mapahamut-an naton ang Dios paagi sa paghimo sang iya kabubut-on kag mapat-od nga ang aton mga pangamuyo ginasabat. (Juan 9:31; 1 Juan 3:22) Kag makaagom kita sing tunay nga kalipay.—Juan 13:17.
20. Tuhoy sa ano maayo nga mamalandong samtang makita ninyo ang tuigan nga teksto sa bug-os nga 1997?
20 Sa bug-os nga 1997, may kahigayunan kita pirme nga mabasa kag mabinagbinag ang tuigan nga teksto, ang Salmo 143:10: “Tudlui ako sa paghimo sang imo kabubut-on.” Samtang ginahimo naton ini, gamiton naton ang pila ka okasyon sa pagbinagbinag sa mga aman sang Dios agod tudluan kita, subong sang ginpahamtang sa ibabaw. Kag gamiton naton ining pagpamalandong sa sining mga tinaga subong pangpapagsik sa pagpanghikot sing dalayon suno sa sina nga pag-ampo, nakahibalo nga “sia nga nagahimo sang kabubut-on sang Dios nagapabilin sing dayon.”—1 Juan 2:17.
Paano Mo Sabton?
◻ Sin-o karon ang ginatudluan sa paghimo sang kabubut-on ni Jehova?
◻ Paano kita dapat maapektuhan sang Salmo 143:10 sa 1997?
◻ Paano kita ginatudluan sa paghimo sang kabubut-on ni Jehova?
◻ Ano ang dapat himuon sang Cristianong mga ginikanan kon nagatudlo sa ila kabataan?