Ang Labing Daku nga Kahigayunan sang Pamatan-on

“Ang diosnon nga debosyon mapuslanon sa tanan nga butang, nga may saad sang kabuhi karon kag sa palaabuton. Matuod ang pinamulong kag takus sang bug-os nga pagbaton.”—1 TIMOTEO 4:8, 9.

ANO ang labing daku nga kahigayunan nga ginatanyag sa imo sang kabuhi? Ginapakita sang ulihi nga pagsurbey sa mga pamatan-on nga ginakabig sang kalabanan sa ila ang “pagtigayon sang obra nga naluyagan ko” kag “ang pagkaayohan sa pangwarta” nga amo ang ila labing importante nga mga tulumuron. Nagadugang nga kadamuon sang mga pamatan-on ang mahunahunaon sa karera, kag sa iban nga duog madamu sa ila ang nagaeskwela sa mga unibersidad sa paglaum nga makakita sila sing maayo sang sueldo nga mga obra. Ginakabig sang madamu nga makakita sila sing kalig-onan, kusog, kag katumanan sa kabuhi sa sinang materyal nga mga kahigayunan. Kon ikaw isa ka pamatan-on, amo bala sina ang imo balatyagon? Kag kamo nga mga hamtong, labi na kamo nga mga ginikanan, paano ninyo tunay nga ginakabig ina nga mga kahigayunan? Amo bala ini ang sekreto sang “maayo nga kabuhi”?

² Kon ginakinahanglan gid man sang mga pamatan-on ang kusog kag katumanan, amo na ini karon sa sining “katapusan nga mga adlaw” nga ang mga tion “mabudlay atubangon.” (2 Timoteo 3:1-5) Ang mga pamatan-on karon nagdalagku sa idalom sang mga pag-ipit nga daw indi mahanduraw sang nagligad nga kaliwatan. Ang madasig nga mga pagbalhin sa katilingban, subong sang pagkabungkag sang pagkabuhi sang pamilya kag mga moral, nagtuga sing daku nga kabudlayan sa balatyagon.

Ang Pagkinahanglan sing Kusog kag Katumanan

³ Nasapwan sang madamu nga pamatan-on nga wala sila sing nasulod nga kusog sa paglandas sa mga pag-ipit sa kabuhi. (Ipaanggid ang Efeso 3:16.) Ang ulihi nga report sang Na­tion­al Ins­ti­tute of Men­tal ­Health nagahinakop nga isa sa kada lima ka pamatan-on ang napung-awan sing daku.a Kutob sang 1961 tubtob 1975, labi pa sa doble ang kadamuon sang naghikog nga mga pamatan-on sa Estados Unidos! Sa sinang isa ka pungsod halos 8,000 ka pamatan-on ang nagahikog tuigtuig, apang 50 ka pilo sina nga kadamuon ang nagtinguha nga maghikog. Ginatawag sang mga awtoridad ang problema nga pandemiko (nga nagaapektar sa kalabanan nga populasyon sa masangkad nga duog). Ginapakita man sang mga balita nga ang makakilibot nga kadamuon sang mga pamatan-on ginpasulod sa ospital sang mga buang.b

⁴ Sa pagkamatuod, indi tanan sang mga pamatan-on nagakabuhi sa mga kahimtangan nga nagatanyag sang materyal nga mga kahigayunan. Apang, kon binagbinagon mo nga ang mga balita nga ginsambit kaina nagadalahig sa daku nga pungsod diin bugana ang materyal nga mga kahigayunan, maathag nga ina lamang wala nagabulig sa mga pamatan-on nga ‘dulaon ang kaugot sa ila tagipusuon kag ang kalamidad sa ila unod.’ (Manugwali 11:9, 10) Diutay lamang nga kusog ang ginahatag sang materyal nga bentaha sa isa ka tawo nga ang tagipusuon nasit-an sang makapaluya nga pangduhaduha sa kaugalingon, mga pagkawalay kalig-onan, ukon pagkanatublag sang konsiensia. Ang Biblia nagasiling: “Napunaw ka bala sa adlaw sang kapiotan? Ang imo kusog diutay.”—Hulubaton 24:10.

⁵ Apang ang pagsalig bala sa materyal nga mga butang magadul-ong sa ulihi sa kaayawan, sa “maayo nga kabuhi”? Ang manggaranon nga si Hari Solomon nagsiling: “Nian nagtulok ako sa tanan nga binuhatan nga ginhimu sang akon mga kamut kag kinabudlayan nga ginpangabudlayan ko sa paghimu, kag, yari karon! ang tanan kadayawan kag pagpanikasog sa hangin.” (Manugwali 2:3-11) Bisan pa nga ang iya mga hinimoan naghatag sa iya sing pila ka kalipay, nabatyagan niya gihapon ang pagkawalay unod, ang pagkawalay pulos.

⁶ Ginakabig sang madamu karon ang mas mataas nga edukasyon subong isa sang mga sekreto sang palaabuton nga “maayo nga kabuhi.” Gintawag pa gani sang isa ka gobernador anay sang estado sang E.U. nga ang pag-eskwela “kinahanglanon para sa kusog, katumanan kag kaluwasan.” Amo gid bala? Bueno, ang 846 ka gradwado sang isa ka talahuron nga unibersidad nagtipon sing “report sang klase” nahanungod sa kon kamusta na sila napulo ka tuig sa tapos makagradwar. “Samtang ang mapagsik nga kalipay lapnag sa report,” siling sang isa ka miembro sang klase, “yara man ang pesimismo, kapait kag kapaslawan.” Pagkatapos sang 25 ka tuig, ang isa ka naggradwar nakatigayon sing “pila ka pinansial nga mga tulumuron,” apang nagsiling sia: “Ang mga kapaslawan sa akon personal nga kabuhi mas madamu sa mga kadalag-an nga indi na kinahanglan nga sambiton pa ining duha.” Amo bala ini ang labing maayo nga mahatag sang kabuhi?

Ang Labing Daku nga Kahigayunan

⁷ Sa iya inspirado nga mga sulat sa Cristianong disipulo nga si Timoteo, gintudlo ni apostol Pablo ang pila ka butang nga mas maayo pa. Ining pamatan-on gintangdo nga mag-alagad sa Efeso, ang isa sang labing daku nga mga sentro sa komersio sang dumaan nga panahon. Mahimu nga nakita niya ang lainlain nga mga karera! Mahimu nga nagpanikasog sia kuntani nga mangin madinalag-on nga negosyante ukon nagpanikasog kuntani nga mangin bantog sa eskwelahan ni Tirano ukon sa lokal nga teatro. (1 Timoteo 1:3; Binuhatan 19:1, 9, 29) Walay duhaduha nga naghanas kuntani si Timoteo para sa isa ka sekular nga karera nga makuartahan, apang si Pablo nagsulat: “Hanasa ang imo kaugalingon nga ang diosnon nga debosyon ang imo tulumuron. Kay ang paghanas nga lawasnon may diutay nga kapuslanan; apang ang diosnon nga debosyon mapuslanon sa tanan nga butang, nga may saad sang kabuhi karon kag sa palaabuton.” Huo, ang diosnon nga debosyon “mapuslanon sa tanan nga butang.” Indi lamang ini pagbantabanta, kay si Pablo nagdugang: “Matuod ang pinamulong kag takus sang bug-os nga pagbaton.” Gikan sa personal nga inagihan, nahibal-an ni Pablo kon ano ang magabukas sa labing maayo nga dalanon sang kabuhi.—1 Timoteo 4:7-9; 2 Corinto 6:10.

⁸ Ano ining diosnon nga debosyon? Amo ini ang personal nga kaangtanan sa Dios nga naghalin sa tagipusuon nga ginpahulag sang hanuot nga apresasyon sa iya makagalanyat nga mga kinaiya. Samtang ang “diosnon nga kahadlok” (Hebreo 12:28) nagakahulugan sing matinahuron lamang nga kahadlok sa paghimu sang bisan ano nga dikalahamut-an sa Dios, ang “diosnon nga debosyon” amo ang sabat sang tagipusuon nga magapahulag sa imo nga magkabuhi sa paagi nga kalahamut-an sa Dios bangod ginahigugma mo sia.c Ina nga kinaiya sang tagipusuon nagadul-ong sa “pagkasuod sa Dios,” ang personal nga kaangtanan nga sa diin mabatyagan mo ang iya kahamuot kag bulig. (Job 29:4) Ang kahigayunan nga matigayon ining personal nga pagpakig-abyan sa Dios mas hamili sang sa bisan ano nga butang nga mahatag sa imo.—Ipaanggid ang Jeremias 9:23, 24.

⁹ Ang pagtigayon sing diosnon nga ginikanan ukon ang pagpabautismo subong Cristiano awtomatiko bala nga nagapahanabo sina nga kaangtanan sa Dios? Indi, bangod ang kahanuot sa tagipusuon dapat palambuon, upod ang iban pa Cristiano nga mga kinaiya. (2 Pedro 1:5-8) Dapat ka mangin isa ka tawo nga ‘ang tagipusuon nagapahulag’ sa iya nga maghimu sang “mga buhat sang diosnon nga debosyon.” (Ipaanggid ang Exodo 36:2; 2 Pedro 3:11; Colosas 3:22.) Bisan pa nga ginpadaku kutob sa pagkalapsag sa dalanon sang kamatuoran, dapat palambuon ni Timoteo ang diosnon nga debosyon. Karon, kinahanglan man ang disiplinado nga panikasog, apang ining diosnon nga debosyon “dakung pagdaug.” (1 Timoteo 6:6) Paano?

Ang Mataas nga Dalanon sang Kabuhi

¹⁰ Sa Efeso, ginpanikasogan ni Timoteo ang diosnon nga debosyon sa tunga sang mga tawo nga ‘naggawi sa pagkawalay pulos sa ila hunahuna.’ (Efeso 4:17) Wala gid sing pulos kundi kadayawan lamang ang yara sa ila mga hunahuna. “Daw ano nga paglaragway!” siling sang eskolar sang Biblia nga si R. C. H. Lenski nahanungod sa Efeso 4:17. “Ang mga tawo nagahunahuna kag nagapangatarungan kag pirme nagakabuhi, kag nagasunod sa mga dikta sang ila mga hunahuna nga nagadangat sa makahalanusbo nga kapaslawan!”

¹¹ Nakita ni Timoteo nga ang dalanon sang pagkabuhi sang mga taga-Efeso walay pulos kag malaut. Ginsimba sang madamu ang diosa nga si Artemis, apang ang ila panatiko nga pagsimba ginpatuhoy sa walay kabuhi nga imahen. Naglakip ini sang magaris nga pagpatuyang sa sekso kag seremonyal nga pagpamiga. (Binuhatan 19:23-34) Apang, ang dalanon sang pagkabuhi ni Timoteo mataas sang sa iya sang mga pungsod, nga “nahamulag sa kabuhi sang Dios . . . [kag] sa pagbuhat sang tanan nga kahigkoan.” (Efeso 2:6; 4:18, 19) Ang iya diosnon nga dalanon sa “kabuhi nga iya sang Dios” naghatag sa iya sang labing maayo nga Abyan sa uniberso! Hamili gid sa pagkamatuod ang kahigayunan nga palambuon ining kaangtanan upod sa buhi nga Dios paagi sa diosnon nga debosyon! Makasalig ka bala sa sini?

¹² Madamu karon ang nagasimba sa sekso, kalingawan, manggad, kag mas mataas nga edukasyon sing subong ka kusog sang pagsimba sang dumaan nga mga taga-Efeso kay Artemis. (Mateo 6:24; Efeso 5:3-5; Filipos 3:19) Apang, yadtong nagapanikasog sing diosnon nga debosyon nagaagom sang superyor nga kalidad sang kabuhi. “Gintan-aw ko ang mga bata nga kaupod ko anay antes ako magsugod sa pagtuon sang Biblia,” siling sang isa ka 24-anyos nga Cristiano. “Katunga sa ila ang yara sa bilanggoan. Ang kalabanan sa ila nagadroga, kag madamu nga mga kababayin-an ang ginpamataan. Ang ila kabuhi magarot. Madamu na sa ila ang patay. Mapasalamaton gid ako nga ginbag-o ko ang akon kabuhi kag ginapabugal ko gid ang akon nakita!” Ang iban nga Cristianong mga pamatan-on tinagipusuon nga nagaugyon!

¹³ Yadtong nagakabuhi nga may diosnon nga debosyon may bahandi sang ministeryo. (2 Corinto 4:1, 7; 2 Timoteo 4:5) Nagahatag ini sang matuod nga katuyoan kag hangkat. Sa baylo sang salimpapaw nga kalipay sang pila ka gin-imbento nga drama sa TV ukon sine, ang mga Cristiano nga nadalahig sa ministeryo nagaduaw sa kabalayan sang matuod nga mga tawo agod buligan sila. Nagapakig-angot man sila sa matuod nga mga problema. Indi gid malaragway ang ila kalipay nga makita ang mga tawo nga nagkabuhi anay sing imoral, masingki ukon walay paglaum nga nagahulag sa instruksion sang Biblia kag nagasikway sa daan malain nga batasan, nagapalambo sang pagtahod sa kaugalingon, kag nagaalagad kay Jehova. Wala na sing iban pa nga karera nga subong ka makahulugan ukon nagapatubas sinang mapinadayunon nga kaayo!

Pagkakontento kag Matinlo nga Konsiensia

¹⁴ “May dakung pagdaug sa diosnon nga debosyon nga may pagkakontento. . . . Gani, kon kita may kalan-on kag panapton, kontento kita sini. Apang, ang mga buot magmanggaranon . . . nagsuntok sang ila mga tagipusuon sing madamung kasakitan.” (1 Timoteo 6:6-10) Sang 1981 ang isa ka surbey sang Psy­chol­o­gy Today nagpakita nga ang mga pamatan-on nagahunahuna “sing labi” tuhoy sa kuarta sang sa bisan ano nga grupo sang pangedaron. Apang, katunga sang grupo nga gin-interbyu nga nabalaka sing labi tuhoy sa kuarta (lakip ang mga manggaranon kag mga imol) ang nagyamo sang “dalayon nga kabalaka kag paghimud-os.”

¹⁵ Isa ka pamatan-on sa Japan ang nagmadinalag-on nga magmanggaranon halin sa kaimulon, apang bangod sini nahalitan niya ang iya panglawas. Sang ulihi, paagi sa bulig sang pagtuon sa Biblia, napalambo niya ang diosnon nga debosyon. “Kon dumdumon ko ang akon anay panguna nga tulumuron sa kabuhi nga magmanggaranon, indi gid mapaanggiran kon daw ano ako ka malipayon karon kutob sang ginbag-o ko ang akon tulumuron,” hinakop niya. “Sa pagkamatuod, wala gid sing mapaanggid sa pagkakontento kag pagkanaayawan nga naghalin sa paggamit sang kabuhi nga nagaalagad sa Daku nga Manunuga.”d—Hulubaton 10:22; Manugwali 5:10-12.

¹⁶ Ginlaygayan ni Pablo si Timoteo nga ‘huptan ang maayo nga konsiensia.’ Paano? Ang isa ka paagi amo nga tratahon niya ang mga babayi “sa bug-os nga kaputli.” (1 Timoteo 1:19; 5:2) Apang, ang kaputli nadula sa tunga sang madamu nga mga pamatan-on kay ang ila mga konsiensia nahirohan. (1 Timoteo 4:2) Apang ang imoralidad wala nagadala sing nasulod nga paghidait kag kaayawan. Ginbinagbinag sang isa ka pagtuon ang seksuwal nga panimuot kag pagginawi sang ginatos ka mga nagahinupang. Nahanungod sa mga salamwanan sa sekso, ang report nagasiling: “Abi nila nagagawi sila nga may diutay nga katuyoan kag pagkakontento sa kaugalingon.” Halos katunga sa ila ang nagbatyag: “Sa akon paagi sa pagkabuhi, ang kalabanan sang akon mga ikasarang wala sing pulos.”

¹⁷ Kon, sa ulihi, panikasogan sang mag-asawa ang dungganon nga pag-asawahay, makabenepisyo sila paagi sa pagpakita sing gugma bangod sang matinlo nga tagipusuon kag matinlo nga konsiensia. (1 Timoteo 1:5) Sang 1984 ang Jour­nal of Mar­riage and the Fam­ily nagreport nga ang pagtuon sa 309 ka bag-o lang ginkasal nga mag-asawa nagpakita nga ang paghulid sa wala pa ang kasal may kaangtanan sa “mas kubos nga kaawayan sa pag-asawahay para sa duha.” Apang kabaliskaran gid ina sa putli nga mga tawo! “Kaayo sang akon pamatyag kon dumdumon ko ang nagligad kag nahibaloan ko nga matinlo ako,” siling sang isa ka lamharon nga Cristianong babayi nga malipayon nga minyo sa sulod sang 7 na ka tuig. Huo, ang matinlo nga konsiensia amo ang bugana nga padya para sa mga pamatan-on nga “nangin huaran sa kaputli.”—1 Timoteo 4:12.

Nasulod nga Kusog

¹⁸ Walay duhaduha nga si Timoteo nakasugata sing madamu nga mga pag-ipit sa Efeso. Ang mga pagsulay sa manggaranon kag imoral nga siudad kag ang pagpadaku sini sa ‘kasadyahan kag hampang’ nagdala sing naguwa nga pag-ipit. Ang dayag nga pagkatuhay ni Timoteo kag ang iya man “pirme nga pagmasakit” pat-od nga nagtuga sing mga pag-ipit sa sulod niya. (1 Timoteo 5:23) Apang ginpahanumdom sia ni Pablo: “Ang Dios wala maghatag sa aton sang espiritu sang katalaw, kundi sang gahom kag gugma kag maligdong nga hunahuna.”—2 Timoteo 1:7.

¹⁹ Sa pagkamatuod, ginakahidlawan gid sang madamu nimo nga katubotubo ina nga kusog! Isa ka pamatan-on nga babayi ang nakalandas sing bug-os sang pagkabuhi nga nagapamiga kag nayanggaw sa droga. “Paagi lamang ini sa bulig ni Jehova,” siling niya. “May mga tion nga nagabalik yadtong daan nga balatyagon, apang nagapangamuyo ako—sa gilayon. Ang ikasarang sa paglandas sining mga problema mas makakulonyag sang sa bisan ano nga natigayon ko sa akon kabuhi!” Wala sing duhaduha tuhoy sa sini, ang Dios ‘nagahatag sing gahom’ sa imo kag nagahatag sa imo sang nasulod nga kusog nga malandas ang bisan ano nga pag-ipit kag makahimu sing maayo nga mga desisyon.—2 Timoteo 4:17.

²⁰ Gani ang diosnon nga debosyon nagahatag sa imo sing madamu nga mga benepisyo. Ang imo “dalanon sang pagkabuhi” makatigayon sing katuyoan nga nagapangibabaw sa mga tulumuron sadtong nagahimud-os lamang sang materyal nga mga kahigayunan. (2 Timoteo 3:10) Subong sang ginsiling sang isa ka Cristianong pamatan-on nga nagbiya sang iskolarship sa kolehiyo kag nangin bug-os tion nga ebanghelisador: “Natigayon ko ang labing maayo nga karera nga maluyagan ni bisan sin-o, ang mangin manunudlo sang maayong balita kag mabuligan ang iban nga makilala ang aton mahigugmaon nga Amay! Kag ang ­‘fringe be­ne­fit’—ang akon mismo nag-uswag nga personalidad—mas maayo sang sa bisan ano nga mahatag ni bisan sin-o. Idugang sa sina ang padya nga magkabuhi sa Paraiso sing dayon nga wala na sing kasubo. Mamangkot karon: Ano pa ang mas maayo nga kabuhi nga pangitaon ni bisan sin-o?”

²¹ Mahimu magasiling ka: ‘Paano ko mapalambo ang diosnon nga debosyon?’ Para sa sabat, basaha ang masunod nga artikulo.

[Footnotes]

Madumduman Mo Bala?

◻ Ngaa ang materyal nga mga kahigayunan may limitado nga balor?

◻ Ano ang imo labing daku nga kahigayunan?

◻ Ano ang ginahatag sang diosnon nga debosyon nga nagabulig sa imo nga matigayon ang labing maayo sa kabuhi?

[Mga Pamangkot sa Pagtinuon]

1, 2. (a) Ano ang ginakabig sang madamu nga pamatan-on nga importante nga mga kahigayunan, kag anong mga pamangkot ang nag-utwas? (b) Ngaa ang mga pamatan-on karon may pinasahi nga mga pag-ipit?

3, 4. Ano nga pamatuod ang nagapakita nga ang madamu nga pamatan-on wala sing nasulod nga kusog, kag ngaa ang materyal nga mga bentaha wala nagahatag sina?

5, 6. Mahatag bala sang materyal nga mga butang ang “maayo nga kabuhi” sa palaabuton? Iilustrar.

7. Sa ano nga mga karera naghanas kuntani si Timoteo, apang ano ang ginrekomendar ni Pablo?

8, 9. (a) Ano ang diosnon nga debosyon? (b) Ano ang imo labing daku nga kahigayunan, kag ngaa kinahanglan ang panikasog nga himuslan ini?

10, 11. Paano ang diosnon nga debosyon nagbayaw sang pagkabuhi ni Timoteo?

12. Ano ang ginsiling sang isa ka Cristianong pamatan-on nahanungod sa “dakung ganansia” sang diosnon nga debosyon? Ano ang imo balatyagon tuhoy sa sina?

13. Ngaa ang pagsunod sa sugo sa 2 Timoteo 4:5 nagadugang sing kahulugan sa kabuhi?

14, 15. Paano ang diosnon nga pagkakontento sa kuarta nagadul-ong sa mas maayo nga kabuhi?

16. Ano ang resulta sa sadtong napaslawan sa ‘paghupot sing maayong konsiensia’?

17. Ngaa ang ‘gugma bangod sang maayo nga konsiensia’ nagabulig sa aton nga matigayon ang labing maayo sa kabuhi?

18, 19. (a) Ano nga mga pag-ipit ang dapat atubangon ni Timoteo? (b) Paano sia ginbuligan sang Dios?

20, 21. (a) Ihatag ang pila ka mga benepisyo sang diosnon nga debosyon. (b) Ano ang pagabinagbinagon sa masunod nga artikulo?