Tinguhaa ang Diosnon nga Debosyon Subong Bawtismado nga mga Cristiano
“Apang, ikaw, O tawo sang Dios, . . . tinguhaa ang pagkamatarong, diosnon nga debosyon.”—1 TIMOTEO 6:11.
1. Paano mo sabton ang pamangkot, Ano ang labing importante nga adlaw sa imo kabuhi? Ngaa amo sina ang imo sabat?
ANO ang labing importante nga adlaw sa imo kabuhi? Kon ikaw isa ka bawtismado nga Saksi ni Jehova, wala sing duhaduha nga magasabat ka, ‘Ti, ang adlaw nga nagpabawtismo ako!’ Sa pagkamatuod, ang bawtismo isa ka labing importante nga tikang sa imo kabuhi. Isa ini ka naguwa nga simbulo nga ikaw nakahimo sing bug-os kag wala sing kondisyon nga dedikasyon kay Jehova nga himuon ang iya kabubut-on. Ang imo bawtismo nagatanda sang petsa nga ikaw gin-ordenahan subong isa ka ministro sang Labing Mataas nga Dios, si Jehova.
2. (a) Paano mailustrar nga ang bawtismo indi ang katapusan nga tikang sa imo Cristianong dalanon? (b) Anong importante nga panugod nga mga tikang ang ginhimo antes ka magpabawtismo?
2 Apang, ang bawtismo bala, amo ang katapusan nga tikang nga ginahimo mo sa imo Cristiano nga dalanon? Indi gid! Sa pag-ilustrar: Sa madamo nga kadutaan ang seremonya sang kasal amo ang katapusan sang panahon sang pagplano kag paghanda (kag sa masami sang pagnobyahanay). Sa amo man nga tion, ginatandaan sini ang pamuno sang pagkabuhi subong mag-asawa. Sing kaanggid, ang imo bawtismo amo ang katapusan sang panahon sang paghanda nga sa tion sini ginhimo mo ang pila sang importante nga panugod nga mga tikang. Nakatigayon ka sing ihibalo tuhoy sa Dios kag kay Cristo. (Juan 17:3) Nagsugod ka sa pagpakita sing pagtuo kay Jehova subong ang matuod nga Dios, kay Cristo subong ang imo Manluluwas, kag sa Biblia subong amo ang Pulong sang Dios. (Binuhatan 4:12; 1 Tesalonica 2:13; Hebreo 11:6) Ginpakita mo ina nga pagtuo paagi sa paghinulsol gikan sa imo anay dalanon sang paghikot kag nakombertir ka sa matarong nga dalanon. (Binuhatan 3:19) Nian naghimo ka sing desisyon nga idedikar ang imo kaugalingon kay Jehova sa paghimo sang iya kabubut-on. (Mateo 16:24) Sa katapusan, ginbawtismuhan ka.—Mateo 28:19, 20.
3. (a) Paano naton mapasundayag nga ang aton bawtismo nagatanda sang pamuno sang isa ka kabuhi sang nakadedikar nga pag-alagad sa Dios? (b) Anong mga pamangkot ang nagautwas, kag ngaa dapat kita mangin interesado gid sa mga sabat?
3 Apang, ang imo bawtismo indi ang katapusan kundi ang pamuno sang kabuhi sang dedikado nga balaan nga pag-alagad sa Dios. Subong ginpatalupangod sang isa ka eskolar sa Biblia, ang Cristiano nga pagkabuhi indi dapat mangin ‘una nga silabo nga ginasundan sang madugay nga pagdulog.’ Paano mo, nian, mapasundayag nga sa imo bahin, ang bawtismo wala nagalaragway sang isa lamang ka ‘una nga silabo’? Paagi sa pagtinguha sang bug-os kabuhi nga dalanon sang diosnon nga debosyon. Ano ining diosnon nga debosyon? Ngaa kinahanglanon nga tinguhaan ini? Paano mo mapalambo ini sing bug-os pa sa imo kabuhi? Dapat kita mangin interesado gid sa mga sabat, kay dapat kita mangin mga tawo nga ginapakilala sang “mga buhat sang diosnon nga debosyon” agod maluwas kita sa nagahilapit nga adlaw sang paghukom ni Jehova.—2 Pedro 3:11, 12.
Ang Kahulugan sang Diosnon nga Debosyon
4. Ano ang ginlaygay ni Pablo kay Timoteo, kag ano ang matuod kay Timoteo sa sining tion?
4 Sa ulot sang 61 kag 64 C.E., ginsulat ni apostol Pablo ang iya nahauna nga inspirado nga sulat sa Cristiano nga disipulo nga si Timoteo. Sa tapos malaragway ang mga katalagman nga resulta sang gugma sa kuwarta, si Pablo nagsulat: “Apang, ikaw, O tawo sang Dios, palagyo ka sa sini tanan. Apang tinguhaa . . . ang diosnon nga debosyon.” (1 Timoteo 6:9-11) Sing makawiwili, mahimo nga sa sini nga tion si Timoteo mga treintahon na ang edad. Madamo na ang iya nalakbayan upod si apostol Pablo kag ginhatagan sia sing awtoridad sa pagtangdo sing mga manugtatap kag ministeryal nga mga alagad sa mga kongregasyon. (Binuhatan 16:3; 1 Timoteo 5:22) Apang, ginlaygayan ni Pablo ining dedikado kag bawtismado, hamtong nga Cristiano nga lalaki nga tinguhaan ang diosnon nga debosyon.
5. Ano ang kahulugan sang ekspresyon nga “diosnon nga debosyon”?
5 Ano ang buot silingon ni Pablo sa ekspresyon nga “diosnon nga debosyon”? Ang orihinal nga Griegong tinaga (eu·seʹbei·a) mahimo badbaron sing literal subong “pagtaha.” Tuhoy sa kahulugan sini, aton mabasa: “Ang eusebeia ginagamit kon kaisa sa kahulugan nga nagapahangop sing personal nga relihioso nga debosyon sa mga sinulat sa amo nga tion . . . apang ang kapin ka kabilugan nga kahulugan sini sa popular nga Griego sang panahon sang mga Romano amo ang ‘katutom.’ . . . Para sa mga Cristiano ang eusebeia amo ang labing mataas nga sahi sang debosyon sa Dios.” (Christian Words, ni Nigel Turner) Gani suno sa paggamit sang Kasulatan, ang ekspresyon nga “diosnon nga debosyon” nagapatuhoy sa pagtaha ukon debosyon nga may katutom kay Jehova nga Dios.
6. Paano ang isa ka Cristiano nagahatag sing pamatuod sa iya diosnon nga debosyon?
6 Apang, ining diosnon nga debosyon, indi lamang isa ka balatyagon sa pagsimba. Subong nga ang “pagtuo nga wala sing mga buhat patay,” ang diosnon nga debosyon dapat man ipabutyag sa kabuhi sang isa. (Santiago 2:26) Sa New Testament Words, si William Barclay nagsulat: “Ang [eu·seʹbei·a kag ang may kaangtanan nga mga tinaga] wala lamang nagapabutyag sing balatyagon nga pagkapunaw kag pagtaha, kundi nagapahangop man sila sing pagsimba nga nagakaigo sa sina nga pagkapunaw, kag sing kabuhi nga may aktibo nga pagkamatinumanon nga nagakaigo sa sina nga pagtaha.” Ang eu·seʹbei·a ginalaragway sing dugang pa subong “mapuslanon gid nga pagkilala sa Dios sa tagsa ka bahin sang kabuhi.” (The Second Epistle General of Peter and the General Epistle of Jude, ni Michael Green) Busa, ang Cristiano dapat maghatag sing pamatuod tuhoy sa iya personal nga gugma kay Jehova paagi sa iya pagkabuhi.—1 Timoteo 2:2; 2 Pedro 3:11.
Kinahanglan ang Makugi nga Pagpanikasog
7. Ano ang buot silingon ni Pablo sang ginlaygayan niya si Timoteo, bisan pa bawtismado na sia, nga ‘tinguhaan’ ang diosnon nga debosyon?
7 Apang, ano ang nadalahig sa pagpalambo kag sa pagpakita sing diosnon nga debosyon? Nagadalahig bala ini sang pagpabawtismo lamang? Dumduma nga si Timoteo, bisan pa bawtismado na, ginlaygayan nga “tinguhaan [sing literal, ‘tigayunon’]” ini.a (1 Timoteo 6:11, Kingdom Interlinear) Maathag nga si Pablo wala nagapahangop nga ang disipulo nga si Timoteo kulang sing diosnon nga debosyon. Sa baylo, ginapasalop niya sa iya ang kinahanglanon nga padayunon ang pagtinguha sa sini nga may pagkahanuot kag kakugi. (Ipaanggid ang Filipos 3:14.) Sing maathag, isa ini ka bug-os kabuhi nga pagtinguha. Si Timoteo, kaangay sang tanan bawtismado nga mga Cristiano, makapadayon sa paghimo sing pag-uswag sa pagpakita sing diosnon nga debosyon.
8. Paano ginpakita ni Pedro nga kinahanglan ang makugi nga panikasog sa pagtinguha sang dedikado kag bawtismado nga Cristiano sa diosnon nga debosyon?
8 Kinahanglan ang makugi nga panikasog sa pagtinguha sang isa ka dedikado kag bawtismado nga Cristiano sa diosnon nga debosyon. Sa iya sulat sa bawtismado nga mga Cristiano nga may paglaum nga “mangin umalambit sa kinaugali nga diosnon,” si apostol Pedro nagsiling: “Huo, tungod sini gid nga kabangdanan, tinguhaa ninyo nga idugang sa inyo pagtuo ang kaayo, kag sa kaayo ang ihibalo, kag sa ihibalo ang pagpugong sang kaugalingon, kag sa pagpugong sang kaugalingon ang pagbatas, kag sa pagbatas ang diosnon nga debosyon.” (2 Pedro 1:4-6) Maathag nga kinahanglan ang pagtuo agod mapresentar naton ang aton kaugalingon para sa bawtismo. Apang, sa tapos sang bawtismo indi kita dapat magpauyaya, nga kontento na sa pakitakita lamang nga Cristianismo. Sa baylo, samtang nagauswag kita sa Cristiano nga pagkabuhi, dapat kita magpadayon sa pagpalambo sang iban pa sang maayong mga kinaiya, lakip ang diosnon nga debosyon, nga sarang madugang sa imo pagtuo. Ini, siling ni Pedro, nagakinahanglan sing hanuot nga panikasog sa aton bahin.
9. (a) Paano ang Griego nga tinaga para sa “idugang” nagailustrar sang kabaskugon sang panikasog nga kinahanglanon sa pagpalambo sing diosnon nga debosyon? (b) Ano ang ginalaygay sa aton ni Pedro nga himuon?
9 Ang Griego nga tinaga nga gingamit ni Pedro para sa “idugang” (e·pi·kho·re·geʹo) may makawiwili nga ginhalinan kag nagailustrar sang kabaskugon sang panikasog nga kinahanglanon. Naghalin ini sa isa ka nombre (kho·re·gosʹ) nga sing literal nagakahulugan “ang lider sang isa ka koro.” Nagapatuhoy ini sa isa nga nagbayad sang tanan nga gasto sa paghanas kag sa pagmentinar sang isa ka koro sa isa ka palaguwaon. Ina nga mga tawo kinabubut-on nga nagbaton sining salabton bangod sang ila gugma sa ila siudad kag ginbayaran nila ang gasto gikan sa ila kaugalingon nga mga bulsa. Bugal sina nga mga tawo nga maggasto sing daku agod mahatag ang tanan nga kinahanglanon para sa isa ka dungganon nga pag-arte. Ang tinaga nadugangan sing kahulugan nga amo “sa pagdugang, sa pag-aman sing bugana.” (Ipaanggid ang 2 Pedro 1:11.) Gani ginapalig-on kita ni Pedro nga dugangan ang aton kaugalingon, indi lamang sing diutay nga diosnon nga debosyon, kundi sang posible nga pinakabug-os nga pagpabutyag sining hamili nga kinaiya.
10, 11. (a) Ngaa kinahanglan ang panikasog sa pagpalambo kag sa pagpakita sing diosnon nga debosyon? (b) Paano kita makadaug sa pagpakig-away?
10 Apang, ngaa, kinahanglan ina nga panikasog sa pagpalambo kag sa pagpakita sing diosnon nga debosyon? Una, yara ang pagpanikasog batok sa napukan nga unod. Sanglit “ang tinutuyo sang tagipusuon sang tawo malaut kutob sa iya pagkapamatan-on,” indi mahapos ang pagtinguha sa kabuhi nga may aktibo nga pagkamatinumanon sa Dios. (Genesis 8:21; Roma 7:21-23) “Ang tanan nga luyag magkabuhi nga may diosnon nga debosyon sa paghiusa kay Cristo Jesus pagahingabuton man,” siling ni apostol Pablo. (2 Timoteo 3:12) Huo, ang Cristiano nga nagatinguha sa pagkabuhi sa isa ka paagi nga nagapahamuot sa Dios dapat mangin tuhay sa kalibutan. Sia may tuhay nga mga talaksan kag tuhay nga mga tulumuron. Subong ginpaandam ni Jesus, magapukaw ini sang dumot sang malaut nga kalibutan.—Juan 15:19; 1 Pedro 4:4.
11 Walay sapayan, mahimo kita magdaug sa pagpakig-away, kay “si Jehova makahibalo magluwas sang katawhan nga may diosnon nga debosyon gikan sa mga pagtilaw.” (2 Pedro 2:9) Apang, dapat naton himuon ang aton bahin paagi sa padayon nga pagtinguha sa diosnon nga debosyon.
Pagpalambo sing Diosnon nga Debosyon
12. Paano ginpakita ni Pedro kon ano ang kinahanglanon sa pagpalambo sing diosnon nga debosyon sing bug-os pa?
12 Paano mo, nian, mapalambo ining diosnon nga debosyon sing bug-os pa? Si apostol Pedro nagahatag sing ideya. Sa 2 Pedro 1:5, 6, sang ginlista niya ang mga kinaiya nga dapat idugang sa aton pagtuo, ginlista niya ang ihibalo sing una sa diosnon nga debosyon. Antes sini sa amo gihapon nga kapitulo, sia nagsulat: “Ang iya diosnon nga gahom naghatag sa aton sang tanan nga butang nga nahanungod sa kabuhi kag diosnon nga debosyon, paagi sa sibu nga pagkilala sa isa nga nagtawag sa aton.” (2 Pedro 1:3) Sa amo ginaangot ni Pedro ang diosnon nga debosyon sa sibu nga ihibalo tuhoy kay Jehova.
13. Ngaa kinahanglanon ang sibu nga ihibalo sa pagpalambo sing diosnon nga debosyon?
13 Sa kamatuoran, kon wala sing sibu nga ihibalo imposible nga mapalambo ang diosnon nga debosyon. Ngaa? Ti, dumduma nga ang diosnon nga debosyon ginapatuhoy kay Jehova gid kag ginapamatud-an ini sang aton pagkabuhi. Sa amo ang sibu nga ihibalo tuhoy kay Jehova kinahanglanon, kay nagadalahig ini sing pagkilala sa iya sing personal, sing suod, nga nahibaluan sing bug-os ang iya mga kinaiya kag mga dalanon. Kapin pa sa sina, nagadalahig ini sing pagtinguha nga ilugon sia. (Efeso 5:1) Sa dugang nga pag-uswag naton sa pagtuon nahanungod kay Jehova kag sa pagbinagbinag sang iya mga dalanon kag mga kinaiya sa aton kabuhi, makilala naton sia sing mas maayo. (2 Corinto 3:18; ipaanggid ang 1 Juan 2:3-6.) Nian, ini man, magaresulta sa daku pa nga pag-apresyar sa hamili nga mga kinaiya ni Jehova, isa ka bug-os pa nga kadakuon sang diosnon nga debosyon.
14. Agod makatigayon sing sibu nga ihibalo, ano dapat ang ilakip sang aton programa sang personal nga pagtuon, kag ngaa?
14 Paano mo matigayon ina nga sibu nga ihibalo? Wala sing laktod sa sini. Agod matigayon ang sibu nga ihibalo, dapat kita magmaukod sa pagtuon sang Pulong sang Dios kag sang napasad sa Biblia nga mga publikasyon. Ina nga personal nga pagtuon dapat maglakip sang regular nga programa sa pagbasa sing Biblia, subong sang iskedyul para sa Teokratikong Eskwelahan sa Ministeryo. (Salmo 1:2) Sanglit ang Biblia isa ka regalo gikan kay Jehova, ang aton ginahimo paagi sa personal nga pagtuon sa Biblia isa ka pagpakita kon daw ano ang pag-apresyar naton sa sina nga regalo. Ano ang ginapahayag sang imo batasan sa personal nga pagtuon nahanungod sa pagkadaku sang imo apresasyon sa espirituwal nga mga aman ni Jehova?—Salmo 119:97.
15, 16. (a) Ano ang makabulig sa aton sa pagpalambo sing espirituwal nga gana para sa personal nga pagtuon sa Biblia? (b) Agod ang personal nga pagtuon sa Biblia magaresulta sa aton pagpalambo sing diosnon nga debosyon, ano dapat ang himuon kon nagabasa sing isa ka bahin sang Pulong sang Dios?
15 Ginabaton nga ang pagbasa kag pagtuon indi mahapos para sa iban. Apang paagi sa paghinguyang sing tion kag panikasog, makapatubo ka sing espirituwal nga gana para sa personal nga pagtuon sa Biblia. (1 Pedro 2:2) Kon binagbinagon mo sing mainapresyahon ang tanan nga nahimo ni Jehova nga Dios, ang Iya ginahimo, kag himuon pa para sa imo, ang imo tagipusuon mapahulag sa pagtuon sang tanan nga masarangan mo nahanungod sa iya.—Salmo 25:4.
16 Apang agod ang imo personal nga pagtuon sa Biblia magaresulta sa imo pagpalambo sing diosnon nga debosyon, ang imo tulumuron indi lamang ang pagkobre sang mga pahina sang materyal ukon pun-on ang imo hunahuna sing impormasyon. Sa baylo, kon basahon mo ang isa ka bahin sang Pulong sang Dios, dapat ka maghinguyang sing tion sa pagpamalandong sa materyal, nga ginapamangkot ang imo kaugalingon sing subong sini: ‘Ano ang ginatudlo sini nahanungod sa mahigugmaon nga mga kinaiya kag mga dalanon ni Jehova? Paano ako sing dugang pa mangin kaangay ni Jehova sa sining mga bahin?’
17. (a) Ano ang matun-an naton nahanungod sa kaluoy ni Jehova gikan sa tulun-an ni Oseas? (b) Paano kita dapat maapektohan sang pagpamalandong sa kaluoy ni Jehova?
17 Binagbinaga ang isa ka halimbawa. Sang nagligad, ang balasahon sa Biblia nga gin-asayn sa aton sa Teokratikong Eskwelahan sa Ministeryo amo ang tulun-an ni Oseas. Sa tapos mabasa ini nga tulun-an sang Biblia, mahimo pamangkuton mo ang imo kaugalingon: ‘Ano ang matun-an ko nahanungod kay Jehova subong Persona—ang iya mga kinaiya kag ang iya mga dalanon—gikan sa sini nga tulun-an?’ Ang paggamit sa sini sang naulihi nga mga manunulat sang Biblia nagapakita nga daku ang matun-an naton nahanungod sa mahigugmaon nga kaluoy ni Jehova gikan sa tulun-an ni Oseas. (Ipaanggid ang Mateo 9:13 sa Oseas 6:6; ang Roma 9:22-26 sa Oseas 1:10 kag 2:21-23.) Ang pagkahanda ni Jehova sa pagpakita sing kaluoy sa Israel gin-ilustrar sang mga pagpakig-angot ni Oseas sa iya asawa nga si Gomer. (Oseas 1:2; 3:1-5) Bisan pa ang pagpatulo sing dugo, pagpangawat, pagpakighilawas, kag idolatriya lapnag sa Israel, si Jehova ‘naghambal sa Israel sing malulo.’ (Oseas 2:13, 14; 4:2) Indi obligado si Jehova sa pagpakita sina nga kaluoy apang himuon niya ini ‘sing kinabubut-on,’ kon ang mga Israelinhon nagpakita sing tinagipusuon nga paghinulsol kag naglisa gikan sa ila makasasala nga dalanon. (Oseas 14:4; ipaanggid ang Oseas 3:3.) Samtang ginapamalandong mo sa sining paagi ang tumalagsahon nga kaluoy ni Jehova, magapukaw ini sa tagipusuon, nga ginapalig-on ang imo personal nga gugma sa iya.
18. Sa tapos makapamalandong sa kaluoy ni Jehova subong ginpadaku sa Oseas, ano ang mahimo ipamangkot mo sa imo kaugalingon?
18 Apang, kapin pa ang kinahanglanon. “Malipayon ang mga maluluy-on, kay pakitaan sila sing kaluoy,” siling ni Jesus. (Mateo 5:7) Busa, sa tapos makapamalandong sa kaluoy ni Jehova subong ginpadaku sa tulun-an ni Oseas, pamangkuta ang imo kaugalingon: ‘Paano ko mailog sing maayo pa ang kaluoy ni Jehova sa akon mga pagpakig-angot sa iban? Kon ang utod nga lalaki ukon babayi nga nakasala sa akon ukon nagsaklaw sa akon mangayo sing kapatawaran, nagapatawad bala ako sing “malipayon”?’ (Roma 12:8; Efeso 4:32) Kon nagaalagad ka sa kongregasyon subong isa ka tinangdo nga gulang, mahimo mo pamangkuton ang imo kaugalingon: ‘Kon nagatatap sing hudisyal nga mga hulusayon, paano ko mailog sing maayo pa si Jehova, nga “handa sa pagpatawad,” labi na kon ang nakasala nagahatag sing matuod nga pamatuod sang tinagipusuon nga paghinulsol?’ (Salmo 86:5; Hulubaton 28:13) ‘Ano ang dapat pangitaon ko subong sadsaran sa pagpakita sing kaluoy?’—Ipaanggid ang Oseas 5:4 kag 7:14.
19, 20. (a) Ano ang resulta kon ang pagtuon sa Biblia ginahimo sa maid-id nga paagi? (b) Ano ang dugang pa nga bulig sa pagpalambo sing diosnon nga debosyon?
19 Daw ano ka mangin makapaladya ang imo personal nga pagtuon sa Biblia kon himuon ina sa subong sina kaid-id nga paagi! Ang imo tagipusuon mapuno sing apresasyon sa hamili nga mga kinaiya ni Jehova. Kag paagi sa padayon nga pagtinguha sa pag-ilog sining mga kinaiya sa imo kabuhi, mapalig-on mo ang imo personal nga gugma sa iya. Paagi sa sini ginatinguhaan mo ang diosnon nga debosyon subong isa ka dedikado kag bawtismado nga alagad ni Jehova.—1 Timoteo 6:11.
20 Ang dugang pa nga bulig sa pagpalambo sining hamili nga kinaiya sarang masapwan kay Jesucristo—ang himpit nga huwaran sang diosnon nga debosyon. Paano ang pagsunod sa huwaran ni Jesus makabulig sa imo sa pagpalambo kag sa pagpakita sing diosnon nga debosyon? Ang artikulo sa pahina 18 magapaathag sini kag sang mga pamangkot nga may kaangtanan sa sini.
[Footnote]
a Tuhoy sa Griego nga tinaga nga di·oʹko (“tinguhaa”), ang The New International Dictionary of New Testament Theology nagapaathag nga sa klasikal nga mga sinulatan ang tinaga “lit[eral] nga nagakahulugan sing paglagas, pagtinguha, paglaot, . . . kag sing mal[aragwayon], sa pagtinguha sa isa ka butang sing makugihon, pagtinguha sa paglab-ot sang isa ka butang, pagtinguha sa pagtigayon.”
Paano Mo Sabton?
◻ Ngaa ang bawtismo indi ang katapusan nga tikang sa imo Cristianong dalanon?
◻ Ano ang kahulugan sang “diosnon nga debosyon,” kag paano ka nagahatag sing pamatuod sa sini?
◻ Ngaa kinahanglan ang makugi nga panikasog sa pagpalambo sing diosnon nga debosyon?
◻ Paano ka makapalambo sing diosnon nga debosyon sing bug-os pa?