Ministeryal nga mga Alagad—Isa ka Pagpakamaayo sa Katawhan ni Jehova

“Sila man pagtilawan anay, ugaling mangin mga ministro sila, kon sila disalawayon.”—1 TIMOTEO 3:10.

SI Jehova “malipayon nga Dios,” kag luyag niya nga ang iya mga alagad magmalipayon. (1 Timoteo 1:11) Bangod sina, gin-aman niya ang mga gulang kag ministeryal nga mga alagad para sa kabulahanan sang iya katawhan. Ining responsable nga mga lalaki nagahatag sing mapuslanon nga mga katuyoan kag nagabulig sa pagpasalig sang kalipay, paghiusa, kag mahim-ong nga pagpanghikot sang Cristianong kongregasyon. Mapasalamaton gid ang mga Saksi ni Jehova bangod sang mahigugmaon kag mabuligon nga pag-alagad nga ginahimu sining mga tinangdo sa sulod sang teokratikong organisasyon sang Dios!

² Apang, walay sapayan sang importante nga bulig nga ginahimu sang mga gulang kag ministeryal nga mga alagad sa kongregasyon, indi nila dapat pakadakuon ang ila kaugalingon nga importansia. Dapat nila dumdumon nga si Jesucristo naglaygay sa iya mga sumulunod nga magpaubos. Ginsilingan niya anay sila: “Ang bisan sin-o nga magpaubos sang iya kaugalingon subong sining bata nga diutay, sia amo ang labing daku sa ginharian sang langit.” (Mateo 18:4) Kag si disipulo Santiago nagsulat: “Paubsa ang inyo kaugalingon sa atubangan ni Jehova, kag bayawon niya kamo.” (Santiago 4:10; Roma 12:3) Apang ang pagtigayon sang mapainubuson nga panimuot wala nagakinahanglan nga pakadiutayon sining mga lalaki ang importansia sang ila hilikuton subong mga gulang kag ministeryal nga mga alagad. Mahimu sila magpaubos kag magapanguna gihapon sa mga hilikuton sa pag-alagad. Indi gid nila dapat pagkalimtan ang mapuslanon nga mga katuyoan nga ginahatag sang ila hilikuton, kag dapat nila pirme dumdumon ang ila obligasyon, kay Jehova kag sa ila Cristianong mga kautoran, kag himuon ang labing maayo sa pagtuman sang ila mga katungdanan.

³ Ang nahiusa nga hilikuton sa tunga sang mga Saksi ni Jehova karon mapaanggid sa paghiusa sang lawas sang tawo. Sa kamatuoran, ginpaanggid ni apostol Pablo ang espirituwal nga lawas ni Cristo sa lawas sang tawo nga ginahuman sang madamung mga katapo. Apang para sa kaayohan sang tanan, ang tanan nga mga katapo sang lawas nagapangabudlay sing tingob. (1 Corinto 12:12-31) Kag, sa pagkamatuod, ang gintangdo nga mga gulang kag ministeryal nga mga alagad pagpakamaayo sa katawhan ni Jehova, kay ining mga lalaki nagapauswag sang nahiusa nga hilikuton sang Cristianong kongregasyon karon. (Ipaanggid ang Colosas 2:18, 19.) Ang dedikado nga mga lalaki nga katapo sang kongregasyon nga nagapanikasog sa pagsakdag sa kahimusan sang organisasyon ni Jehova paagi sa “paghandum sa palangakoan sang manugtatap” nagahimu sing importante nga bulig sa Cristianong paghiusa kag pagpauswag sang intereses sang Ginharian. (1 Timoteo 3:1) Apang una sa tanan, paano ang isa ka Cristianong lalaki makalipikar nga mangin ministeryal nga ­alagad?

“Pagtilawan Anay”

⁴ Ginsilingan ni apostol Pablo ang iya kaupod nga manugpangabudlay nga si Timoteo kon ano ang ginakinahanglan sa wala pa ang mga lalaki matangdo subong ministeryal nga mga alagad. Lakip sa sini, si Pablo nagsulat: “Sila man pagtilawan anay, ugaling mangin ministro sila, kon sila mangin disalawayon.” (1 Timoteo 3:10) Nagaupang ini sa pagtangdo sa indi kalipikado nga mga lalaki, yadtong wala nakasugata sa pila ka mga kinahanglanon sang Kasulatan. Magahatag man ini sing tion sa paghibalo sang mga motibo sang mahimu nga mangin ministeryal nga mga alagad. Sa pagkamatuod, ining mga lalaki wala ginapahulag sang handum nga matigayon ang kabantogan, kay magapakita ina sang pagkaindi mapainubuson. Sa baylo, bilang pagkilala sa katunayan nga ang dedikasyon sang Cristiano sa Dios bug-os kag nagalakip sa tanan, ang isa ka utod dapat mangin handa sa pag-alagad sa bisan ano nga kapasidad sa diin nakita ni Jehova nga nagakaigo sia gamiton sa Iya organisasyon. Huo, ang mahimu nga mangin ministeryal nga mga alagad dapat nga mangin handa sa pag-alagad kaangay sa matutom nga si Isaias, nga nagsiling: “Yari ako! Ipadala ako.”—Isaias 6:8.

⁵ “Ang ministeryal nga mga alagad subong man kinahanglan nga mangin serioso, indi duha sing hinambalan, indi palainum sang alak, indi dalok sang dibunayag nga daug,” paathag ni Pablo. (1 Timoteo 3:8) Bisan pa nga ang iban nga ministeryal nga mga alagad mahimu nga bata pa, indi sila mga pamatan-on kag dapat mangin “serioso.” Dapat nila tamdon ang importante nga mga bagay sing serioso. (Ipaanggid ang Hulubaton 22:15.) Dapat sila mangin masaligan kag matutom, indi mga lalaki nga nahuyog sa pagpasapayan sa ila mga responsabilidad. Sa baylo, dapat sila mangin masaligan, nga nagahimu sang ila mga katungdanan sing serioso. Sa pagkamatuod, ano ang labi pa nga kabalak-an sing serioso sang sa balaan nga pag-alagad kay Jehova? Isa ina ka bagay sang kabuhi kag kamatayon—para sa ila kag para sa iban. (Ipaanggid ang 1 Timoteo 4:16.) Dugang pa, sa pagsiling nga ang ministeryal nga mga alagad indi dapat mangin “duha sing hinambalan,” buot silingon ni Pablo nga dapat sila mangin bunayag, matinuoron, indi tsismoso, salimpapaw, ukon balingag.—Hulubaton 3:32.

⁶ Ang maayo nga pagkatimbang kinahanglan sa personal nga pagkabuhi sang mga lalaki nga kalipikado mangin ministeryal nga mga alagad. Maathag nga buot silingon ni Pablo nga dapat nila likawan ang pagpahubog, kakagud, kag ang pagkadibunayag sang magsiling sia nga indi sila dapat “mangin palainum sang alak,” ukon “daluk sang daug.” Dapat likawan sining Cristianong mga lalaki ang paghatag bisan sang impresyon nga interesado gid sila katama sa kalipayan ukon sa materyal nga mga butang. Dapat nila pirme panikasogan nga unahon sa ila kabuhi ang espirituwal nga mga butang. Magabulig ini sa ila nga huptan ang “matinlo nga konsiensia” sa atubangan sang ila isigkatawo kag, labi sa tanan, sa itololok sang Dios.—1 Timoteo 3:8, 9.

⁷ Ang mabug-at nga mga responsabilidad nga ginahatag sa ministeryal nga mga alagad wala pagtuyoa para sa mga pamatan-on. Ining mga lalaki ginapatuhoyan sa Kasulatan subong yara sa edad nga mahimu minyo na kag may pamilya. Sa idalom sina nga mga kahimtangan, dapat nila “dumalahan sing maayo ang ila mga anak kag ang ila mga panimalay.” (1 Timoteo 3:12) Nagakahulugan bala ini nga ang isa ka pamatan-on indi mahimu nga mangin ministeryal nga alagad kon indi sia anay mangasawa kag magpamilya? Indi, indi gid. Sa katunayan, ang indi niya pagdali sa pagminyo nga wala sing nagakaigo nga paghanda ukon sa wala pa makakita sing nagakaigo bautismado nga palangasaw-on nagapakita sang kadaku sang pagkahamtong nga kinahanglan agod maatipan sing maayo ang personal nga mga bagay kag ang mas serioso nga mga responsabilidad sa kongregasyon.

⁸ Si Pablo nagsiling nga “ang mga nagaalagad sing maayo subong mga ministro nagahiagum sa ila kaugalingon sing maayo nga tindog kag dakung kasidla sa paghambal sa pagtuo nga yara kay Cristo Jesus.” (1 Timoteo 3:13) Isa ka paagi nga mapakita nila ang kinahanglanon nga “dakung kasidla” amo ang pagpakigbahin sing aktibo sa pagbantala ‘sining maayong balita sang ginharian.’ (Mateo 24:14) Nahibaloan nila nga ginapaambitan nila upod sa mga gulang ang responsabilidad nga pangunahan ang pagbantala sa pamalaybalay kag pakigbahinan ang iban pa nga dagway sang pag-alagad. (Binuhatan 5:42; 20:20, 21) Samtang ang malaut nga sistema ni Satanas madasig nga nagahinampot sa iya katapusan, ang hilikuton nga pagbantala mas labi nga hilingagawon. Busa, dapat ipakita sang ministeryal nga mga alagad ang pagkahilingagawon sang hilikuton nga pagbantala sang Ginharian sa atubangan sang kongregasyon paagi sa pagpahamtang sing ekselente nga personal nga halimbawa sa pag-alagad sa latagon.

Ginbuligan sang Bug-os Tion nga Pag-alagad

⁹ Bangod sang pagkahilingagawon sang aton ital-ital nga tion, madamung Cristianong mga lalaki kag mga babayi ang nagsulod sa bug-os tion nga pag-alagad. Madamu, nga ginatawag mga payunir, ang nagahinguyang adlaw-adlaw sing promedyo nga duha kag lima ka oras sa pagbantala nga hilikuton, kag ang iban sa ila subong mga misyonero sa mga pungsod sa luwas. Ang iban nagaalagad sing bug-os tion sa ulong-talatapan ukon mga sanga talatapan sang Watch Tower Society sa bug-os nga duta. Ang ila pag-alagad tuboran sang kalipay kag kaawayan para sa ila kag para sa ila ginaalagaran. Kag sa madamung hitabo ang eksperiensia sa bug-os tion nga pag-alagad nakabulig sa mga lalaki nga palambuon ang mga kalipikasyon nga kinahanglanon sa pag-alagad sa kongregasyon sing mapuslanon subong ministeryal nga mga alagad.

¹⁰ Ang isa anay ka ministeryal nga alagad, nga karon isa na ka gulang sa isa ka kongregasyon sa Berlin, Alemanya, nagsiling tuhoy sa hilikuton nga pagpayunir nga ginhimu niya sang tinuig nga nagligad sang pamatan-on pa sia: “Masiling ko nga amo yadto ang tikang nga wala ko gid paghinulsuli. Ginpakamaayo ako ni Jehova. Ang akon kaangtanan upod sa iya nangin labi ka suod.” Huo, kaangay sang linibolibo pa nga iban, natukiban sini nga utod nga lalaki nga ang bug-os tion nga pag-alagad nagapatudok sang relasyon sang isa kay Jehova kag nagapadasig sang pag-uswag padulong sa Cristianong pagkahamtong.

¹¹ Ang isa pa ka madugay na nga payunir nagpaathag kon paano sia nabuligan sang bug-os tion nga pag-alagad. “Nagkalma ako kag nangin mas timbang kon tuhoy sa paghimu sing padasudaso nga mga desisyon,” siling niya. “Mas malipayon ako kag nangin mas mapasibusibuon sa pagpakig-angot sa lainlain nga sahi sang mga tawo.” Indi bala nga amo ini ang pila sa mga kinaiya nga kinahanglan sang mga lalaki nga maluyag mag-alagad subong ministeryal nga mga alagad?

¹² Ang pagpakigbahin sa bug-os tion nga pag-alagad, kon ginapahanugotan sang Makasulatanhon nga mga responsabilidad, magabulig subong makatilingala nga kahigayunan para sa Cristianong mga lalaki nga mangin ‘natilawan anay.’ Ang iban nakahimu sina nga pag-alagad sing permanente, ang iban sing panalagsa. Sarang ini mahimu sang mga pamatan-on kon bakasyon sa eskwelahan, kag sang mga may edad kon panag-on sang bakasyon ukon iban pa nagakaigo nga tion sa bug-os nga tuig. Siempre pa, ang pagpakigbahin sa bug-os tion nga pag-alagad nagakinahanglan sing timbang kag maayo nga pagplano. Ini nga mga ikasarang kinahanglan sang isa ka ministeryal nga alagad kag magabulig sa iya nga matuman ang iya mga katungdanan. Ano nga mga katungdanan?

Mga Katungdanan sang Ministeryal nga mga Suluguon

¹³ Bisan pa nga ang Binuhatan 6:1-6 wala naaplikar sing direkta sa pagtangdo sa ministeryal nga mga alagad, ang ginasiling didto nagapakita sang sahi sang hilikuton ukon kinaugali sang mga katungdanan nga ginatangdo sing kinaandan sa ministeryal nga mga alagad. Indi agod tudloan ang masigka tumuluo kundi agod ipanagtag ang pagkaon, ang “pito ka lalaki nga maayo sing kadungganan” nga ginpili anay naghilway sa mga apostoles agod ‘ihugod ang ila kaugalingon sa pangamuyo kag sa pag-alagad sa pulong.’ Paagi sa pag-atipan sa kaanggid nga mga katungdanan karon, ang ministeryal nga mga alagad nagahatag sa mga gulang sing dugang nga tion para atipanon kag tudloan ang “panong sang Dios.”—1 Pedro 5:2, 3.

¹⁴ Nahanungod sa mga katungdanan sang ministeryal nga mga alagad, ang libro nga Or­ga­nized to Ac­com­plish Our Mi­nis­try nagasiling: “Ang isa ka ministeryal nga alagad mahimu tangdoan nga tatapon ang literatura sang kongregasyon, nagapahapos para sa aton tanan nga makuha ang literatura nga kinahanglan naton para sa aton personal nga kagamitan kag para sa pag-alagad sa latagon. Ang iban makatatap sa mga magasin sang kongregasyon. Ang iban pa matangdo sa mga katungdanan nga huptan ang mga rekord subong sang kuenta sang kongregasyon ukon sa pagtangdo sang teritoryo, ukon magamit sila sa pag-uyat sang mga mikropono, pagtatap sa kasangkapan sa tunog ukon ­sound, pagdipara sa plataporma ukon ayhan pagbulig sa mga gulang sa iban pa nga mga paagi. Daku nga hilikuton ang pagmentinar sang Kingdom Hall kag ang paghupot sini nga matinlo, gani ang ministeryal nga mga alagad masami nga ginakinahanglan sa pagbulig atipan sina nga mga responsabilidad. Ang ministeryal nga mga alagad ginatangdo man nga mag-alagad subong mga at­tendants, nga nagaabiabi sa mga bag-ohan kag nagabulig mentinar sang kahim-ong sa mga miting sa kongregasyon.”—Mga pahina 57-8.

¹⁵ Ang bisan sin-o lang bala nga utod nga may praktikal nga ikasarang makahimu sina? Indi, kay ang “mga lalaki nga maayo sing kadungganan” nga ginpili sadto anay sa nahaunang siglo nga Jerusalem “puno sang espiritu kag kaalam,” ukon “praktikal kag mahunahunaon sa espirituwal.” (Binuhatan 6:3, Phillips) Bisan pa nga sila may mga edad na sa tunga sang katawhan ni Jehova, gintangdo sila sa mga hilikuton nga kaanggid sa ginahimu sang ministeryal nga mga alagad karon. Gani kon ang karon nga ministeryal nga mga alagad magahimu sang ila mga katungdanan sing epektibo, dapat sila mangin “praktikal kag mahunahunaon sa espirituwal.” Samtang masaku sila sa mga detalye sang organisasyon, ang ila panguna nga interes amo dapat ang mag-alagad sa katawhan sa mapuslanon sa espirituwal nga mga paagi.

¹⁶ Sanglit ang ministeryal nga mga alagad dapat mangin mahunahunaon sa espirituwal, kon kaisa ginagamit sila sa hilikuton nga ginahimu sing kinaandan sang mga gulang. Ang Or­ga­nized to Ac­com­plish Our Mi­nis­try (mga pahina 58-9) nagapaathag: “Kon wala sing sampat nga mga gulang sa pagdumala sa Pagtinuon sa Libro sang Kongregasyon, magamit ang iban sang mas kalipikado nga ministeryal nga mga alagad subong mga konduktor sa pagtinuon agod tatapon ang gintangdo nga mga grupo. Mahatagan sila sing bahin sa Miting sa Serbisyo kag Eskwelahan sang Teokratikong Ministeryo kag matangdo nga magpamulongpulong publiko sa lokal nga kongregasyon. Ang iban nga mga pribilehiyo mahatag sa iban nga ministeryal nga mga alagad kon may yara partikular nga kinahanglanon kag kalipikado sila sa sina nga asaynment.—Ipaanggid ang 1 Pedro 4:10.”

¹⁷ Ang isa sang “pito ka mga lalaki nga maayo sing kadungganan” sang panahon sang Biblia amo si “Esteban, ang tawo nga puno sang pagtuo kag balaan nga espiritu.” (Binuhatan 6:5) Antes mapatay subong matutom nga martir, si Esteban naghatag sing makapulukaw nga panaksi sa atubangan sang Judiyong Sanhedrin. Basaha ang kasaysayan, kag makombinse ka nga isa sia ka mahunahunaon sa espirituwal, isa ka talalupangdon nga saksi nga mabinatunon sa panuytoy sang balaan nga espiritu sang Dios kag handa sa paghatag sang iya kabuhi sa pag-alagad kay Jehova. (Binuhatan 6:8–7:60) Kon isa ikaw ka ministeryal nga alagad, ginahimu mo bala ang imo mga katungdanan sa kongregasyon kag sa pag-alagad sa latagon sing subong ka serioso sa ginhimu anay ni Esteban sa iya mga responsabilidad kag sa iya pribilehiyo nga ihambal ang kamatuoran?

Paano Sila Nagatinguha nga Mangin Kalipikado?

¹⁸ Madamung ministeryal nga mga alagad ang nagapahamtang sing maayo nga halimbawa sa Cristianong pagkabuhi, nagatuman sang ila mga katungdanan sa kongregasyon sing tuman kaayo, kag nagapanguna sa pag-alagad sa latagon. Ang ila hilikuton ginaapresyar sing daku sang mga masigka sumilimba kag indi magapabilin nga indi mapadyaan ni Jehova, kay ang Hebreo nga mga Cristiano ginpasalig: “Ang Dios indi dimatarong nga malimot sang inyo binuhatan kag sang gugma nga ginpakita ninyo tungod sa iya ngalan, nga nag-alagad kamo sa mga balaan kag nagaalagad pa.”—Hebreo 6:10.

¹⁹ Walay sapayan, ang tagsa ka ministeryal nga alagad mahimu mamangkot sa iya sa kaugalingon: Paano ko ginatinguhaan nga malab-ot ang Makasulatanhon nga mga kinahanglanon? Nagaamot gid bala ako sa paghiusa sang kongregasyon? Ginatatap ko bala sing maayo kag sing mapisan ang gintangdo sa akon nga katungdanan? Kag nagapahamtang bala ako sing maayo nga halimbawa sa pag-alagad sa latagon? Ang iban nga ministeryal nga mga alagad nakasugata sing mga problema sa pagtinguha nga mangin kalipikado sa kon ano ang ginakinahanglan sa ila. Gani, hinun-anonan naton ang pila sining mga problema. Magabulig ini sa tagsa ka ministeryal nga alagad nga “pamatod-an kon ano ang iya kaugalingon nga binuhatan.” (Galacia 6:4) Magapadugang man ini sang apresasyon sang iban sa mga pagpangabudlay sa gugma nga ginahimu sining mga lalaki nga nagahatag sing mapuslanon nga mga katuyoan sa tunga sang mga Saksi ni Jehova kag matuod nga pagpakamaayo sa katawhan sang Dios.

Mapaathag Mo Bala?

◻ Paano ang ministeryal nga mga alagad isa ka pagpakamaayo sa katawhan ni Jehova?

◻ Paano mabuligan sang bug-os tion nga pag-alagad ang mga utod nga maluyag mangin ministeryal nga mga alagad?

◻ Ngaa ang ministeryal nga mga alagad dapat nga “praktikal kag mahunahunaon sa espirituwal”?

◻ Paano ang matutom nga si Esteban isa ka matahom nga halimbawa para sa ministeryal nga mga alagad karon?

[Mga Pamangkot sa Pagtinuon]

1. Sin-o ang nagabulig sa pagpasalig sa kalipay kag paghiusa sa kongregasyon?

2. Ano ang dapat nga panimuot sang mga gulang kag ministeryal nga mga alagad, apang ano ang indi nila dapat pagkalimtan?

3. Sa ano mapaanggid ang nahiusa nga hilikuton sa tunga sang mga Saksi ni Jehova, kag paano mapauswag sang dedikado nga mga lalaki ina nga paghiusa kag pag-uswag sang mga intereses sang Ginharian?

4. (a) Ngaa ang mahimu nga mangin ministeryal nga mga alagad “pagtilawan anay”? (b) Ano ang dapat nga handa himuon sining mga lalaki?

5. (a) Ano nga mga kinahanglan para sa ministeryal nga mga alagad ang ginapahamtang sa 1 Timoteo 3:8? (b) Ano ang buot silingon sang mangin “serioso”? (c) Ano ang buot silingon ni Pablo sa pagsiling nga ang ministeryal nga mga alagad dapat nga mangin “diduha sing hinambalan”?

6. Ano ang pila ka mga paagi sa diin ang ministeryal nga mga alagad dapat magpakita sing pagkatimbang?

7. (a) Ngaa sarang masiling nga ang mga katungdanan sang ministeryal nga mga alagad wala pagtuyoa para sa mga pamatan-on? (b) Ano ang ginapakita sang pagkadiminyo sang isa ka ministeryal nga alagad tuhoy sa iya?

8. May kaangtanan sa 1 Timoteo 3:13 kag Mateo 24:14, ano nga responsabilidad ang iya sang ministeryal nga mga alagad?

9. Bangod sang pagkahilingagawon sang aton tion, ano nga pag-alagad ang ginhimu sang madamu nga mga Cristiano?

10, 11. Subong ginpakita sang personal nga mga ekspresyon nga ginsitar diri, paano makabenepisyo ang mga lalaki nga maluyag mangin ministeryal nga alagad sa bug-os tion nga pag-alagad?

12. (a) Ano nga mga kahigayunan ang yara agod makigbahin sa bug-os tion nga pag-alagad? (b) Ano nga mga ikasarang ang kinahanglanon sa pagpakigbahin sa bug-os tion nga pag-alagad nga magabulig sa ministeryal nga mga alagad nga matuman ang iya mga katungdanan?

13. Ano ang ginapakita sang Binuhatan 6:1-6 tuhoy sa sahi sang hilikuton nga ginatangdo sa ministeryal nga mga alagad?

14. Anong lainlain nga mga katungdanan ang matangdo sa ministeryal nga mga alagad?

15. (a) Agod mag-alagad sing epektibo subong ministeryal nga mga alagad, ano ang kinahanglan luwas sa praktikal nga ikasarang? (b) Bisan pa nga ginatatap sang ministeryal nga mga alagad ang lainlain nga mga butang, ano dapat ang panguna nila nga kabalak-an?

16. Kon wala sing sampat nga mga gulang sa kongregasyon, sa anong katungdanan matangdo ang ministeryal nga mga alagad?

17. Ano nga sahi sang tawo si Esteban, kag anong mga pamangkot ang ginapautwas sini nahanungod sa ministeryal nga mga alagad?

18. Ano ang masiling naton nahanungod sa hilikuton sang madamung ministeryal nga mga alagad, kag sa ano sila makasalig?

19. (a) Anong mga pamangkot ang mahimu ipamangkot sang tagsa ka ministeryal nga alagad sa iya kaugalingon? (b) Ngaa mapuslanon nga hinun-anonan ang mga problema nga gina­eks­periensiahan sang pila ka ministeryal nga mga alagad?