Paghupot sang Paghiusa sa Ulot sang mga Gulang kag Ministeryal nga mga Alagad

WALA lamang madugay pagkatapos sang Pentecostes 33 C.E., isa ka problema ang nag-utwas sa bag-o lang matukod nga Cristianong kongregasyon. Isa ka kahimusan ang ginpatok agod maatipan ang imol nga mga balo. Apang pagligad lamang sang pila ka tion “nagkumod ang Gresyahanon nga mga Judiyo batok sa mga Hebreohanon bangod napatumbayaan ang ila mga balo sa adlaw-adlaw nga pagpanagtag.”​—⁠Binuhatan 6:⁠1.

Ining mga reklamo nakalab-ot sa palamatin-an sang mga apostoles. “Gani gintawag sang napulog-duha ang kadam-an sang mga disipulo sa ila kag nagsiling: ‘Indi kalahamut-an para sa amon nga bayaan ang pulong sang Dios agod managtag sing pagkaon sa mga lamesa. Busa, mga kauturan, pangita kamo sing pito ka ginpamatud-an nga mga lalaki gikan sa tunga ninyo, puno sang espiritu kag kaalam, agod matangdo namon sila sa sining kinahanglanon nga buluhaton.’ ”​—⁠Binuhatan 6:​2, 3.

Nagailustrar ini sang isa ka importante nga prinsipio sang organisasyon sa sulod sang Cristianong kongregasyon. Ang pila ka responsable nga mga tawo ginagamit sa pagtatap sa rutina nga mga butang, samtang ang iban nagatatap sang mas mabug-at nga espirituwal nga mga buluhaton. May yari ini sulundan. Sa dumaan nga Israel, si Aaron kag ang iya mga kaliwat gintangdo sa pag-alagad subong mga saserdote sa paghimo sing mga halad sa Dios. Apang, si Jehova nagsugo nga buligan sila sang mga Levinhon paagi sa ‘pagtatap sa tanan nga gamit sang layanglayang nga tilipunan.’ (Numeros 3:​5-10) Sa kaanggid, ang mga manugtatap sa karon ginabuligan sang ministeryal nga mga alagad.

Ang Katungdanan sang mga Gulang kag sang Ministeryal nga mga Alagad

Ginabalay sang mga Kasulatan ang mataas nga mga kalipikasyon para sa mga gulang kag sa ministeryal nga mga alagad. (1 Timoteo 3:​1-10, 12, 13; Tito 1:​6-9) Indi sila magkompetinsiahanay kundi nagapangabudlay para sa isa ka tulumuron​—⁠ang pagpabakod sa kongregasyon. (Ipaanggid ang Efeso 4:​11-13.) Walay sapayan, magkatuhay nga mga hilikuton ang ginahimo nila sa kongregasyon. Sa 1 Pedro 5:2, ang mga manugtatap ginasugo: “Bantayi ang panong sang Dios nga ginatatap ninyo, indi sa pilit, kundi sa kinabubut-on; ni indi bangod sa gugma sa dibunayag nga daug, kundi may kalangkag.” Manabat sila sa Dios sa kon paano nila ginatuman ining sagrado nga tulin.​—⁠Hebreo 13:⁠17.

Kamusta ang ministeryal nga mga alagad? Wala ginasugo sang Kasulatan nga mangin subong sila ka sangkol sa ila ikasarang sa pagtudlo. Ang ila mga katungdanan tuhay diutay gikan sa iya sang mga gulang. Sang nahaunang siglo C.E., walay duhaduha nga may yara madamong butang nga materyal, rutina, ukon di-makawiwili ang kinaugali nga nagakinahanglan sing igtalupangod, ayhan lakip ang pagbakal sang materyal para kopyahan sang mga Kasulatan ukon bisan ang paghimo mismo sang pagkop⁠ya.

Sa karon, ang ministeryal nga mga alagad nagapadayon sa pagtuman sang nanuhaytuhay nga importante nga mga hilikuton sa sulod sang kongregasyon, subong sang pagtatap para sa kwenta kag mga teritoryo sang kongregasyon, pagpanagtag sing mga magasin kag mga libro, kag pagmentinar sa Kingdom Hall. Ang iban nga ministeryal nga mga alagad nga may ikasarang mahimo gani gamiton sa pagtudlo, kon kaisa sa pagdumala sing mga Pagtuon sa Libro sang Kongregasyon, pagdumala sing mga bahin sa mga Miting sa Serbisyo, kag paghatag sing mga pamulongpulong publiko.

Kon ang mga gulang kag ministeryal nga mga alagad magapangabudlay sing nahiusa, ang mga kinahanglanon sang kongregasyon​—⁠espirituwal kag organisasyonal⁠—​matatap sa timbang nga paagi. Nian ang mga katapo sang kongregasyon malipayon, mabakod, kag mapatubason sa espirituwal. Dumduma ang ginsulat ni Pablo sa mga hinaplas sa Efeso: “Bangod ginbilog nga may paghiusa kag ginhimo nga magbuligay paagi sa tagsa ka lutalutahan nga nagahatag kon ano ang kinahanglanon, suno sa pagpanghikot sang kada bahin sa nagakaigo nga takus, nagapatubo sang lawas para sa kalig-unan sang iya kaugalingon sa gugma.”​—⁠Efeso 4:⁠16.

Ang mga gulang kag ministeryal nga mga alagad dapat manikasog sa pagpalambo sang kaanggid nga paghiusa, kon sayuron, paghisugtanay, pag-ugyunay, pagbuligay, kag paghangpanay. Walay sapayan, ina nga paghiusa indi matigayon sing awtomatiko. Dapat ini palambuon kag amligan sing maayo.

Kon Ano ang Sarang Mahimo sang mga Gulang

Ang isa ka importante nga tikang amo ang pagkilala nga ang kaangtanan sang isa ka gulang sa isa ka ministeryal nga alagad indi kaangay sang isa ka agalon sa isa ka ulipon ukon sang isa ka amo sa isa ka empleyado. Kon diin may yara matuod nga paghiusa, ginatamod sang mga gulang ang ministeryal nga mga alagad subong mga masigka-ministro sang Dios. (Ipaanggid ang 1 Corinto 3:​6-9.) “Sa pagpakita sing kadungganan sa isa kag isa manguna kamo,” siling sang Roma 12:10. Busa likawan sang mga gulang nga tratahon ang ministeryal nga mga alagad sa mga paagi nga daw makapanubo ukon makahuluya. Ginapalig-on nila, sa baylo nga ginadugmok, ang nagakaigo nga pagmatumato. Ang pagtratar sa ministeryal nga mga alagad nga may pagtahod nagapauswag sang labing maayo nga mga kinaiya sa ila kag nagabulig sa ila sa pagkalipay sa ila hilikuton sa kongregasyon.

Dapat man dumdumon sang mga gulang nga ang ila katungdanan nga bantayan ang panong sang Dios nga ginatatap nila nagalakip sa mga kauturan nga nagaalagad subong ministeryal nga mga alagad. Matuod, inang responsable nga mga lalaki ginapaabot nga mangin hamtong nga mga Cristiano. Apang, kaangay sang iban pa sa panong, nagakinahanglan sila sing personal nga igtalupangod sa tion kag tion. Ang mga gulang dapat mangin interesado sing hanuot sa ila espirituwal nga pagtubo.

Halimbawa, sang makilala ni apostol Pablo ang pamatan-on nga si Timoteo, nahantop niya sa gilayon ang potensiyal ni Timoteo kag “ginpabutyag ang handom nga maupod niya sa paglakat ini nga lalaki.” (Binuhatan 16:⁠3) Si Timoteo nag-alagad subong kaupod ni Pablo sa paglakbay, nakabaton sing hamili nga paghanas subong resulta. Ti, mga tinuig sang ulihi nakasulat si Pablo sa mga Cristiano sa Corinto: “Pinadala ko sa inyo si Timoteo, bangod hinigugma kag matutom ko sia nga Anak sa Ginuo; kag ibutang niya sa inyo hunahuna ang akon mga paagi may kaangtanan kay Cristo Jesus”!​—⁠1 Corinto 4:⁠17.

Mga gulang, nasugdan na bala ninyo nga gamiton ang bug-os nga potensiyal sang ministeryal nga mga alagad sa inyo kongregasyon? Ginabuligan bala ninyo sila sa pag-uswag paagi sa paghatag sa ila sing personal nga paghanas sa pagpamulongpulong sa publiko kag sa pagpanalawsaw sa Biblia? Gin-agda mo bala ang mga kalipikado sa pag-upod sa imo sa mga pagduaw sa pagbantay (shepherd­ing call)? Nagapangabudlay bala kamo kaupod nila sa ministeryo sa latagon? Sa parabola ni Jesus nahanungod sa mga talanton, ang agalon nagsiling sa iya matutom nga mga alagad: “Maayo gid, ulipon nga maayo kag matutom!” (Mateo 25:23) Maalwan man bala kamo sa pagdayaw kag sa paghatag sing komendasyon sa ministeryal nga mga alagad nga maugdang nga nagahimo sang ila mga asaynment sa maayo nga paagi? (Ipaanggid ang Hulubaton 3:27.) Kon indi, magabatyag bala sila nga ang ila hilikuton wala ginaapresyar?

Ang komunikasyon kinahanglanon man sa isa ka nahiusa nga kaangtanan sa pagpanghikot. (Ipaanggid ang Hulubaton 15:22.) Ang mga katungdanan indi dapat itangdo ukon kuhaon sa dimakatarunganon ukon padasudaso nga paagi. Dapat hambalan sang mga gulang sing mapinangamuyuon kon paano sarang magamit sing labing maayo ang mga ikasarang sang isa ka utod nga lalaki sa kongregasyon. (Ipaanggid ang Mateo 25:15.) Kon nagatangdo, ang isa ka utod dapat tudluan sing maayo sa kon ano gid ang ginakinahanglan sa iya. “Kon wala sing malantipon nga panuytoy,” paandam sang Hulubaton 11:​14, “ang katawhan nagakapukan.”

Indi labing maayo nga silingan lamang ang isa ka utod nga lalaki nga buslan ang isa pa ka alagad sa pag-uyat sang departamento sang kwenta, magasin, ukon literatura. Kon kaisa ang bag-o gintangdo nga alagad nagapanubli sing madamong di-husto ukon di-kompleto nga mga rekord. Makapaluya gid sang buot! “Ang tanan nga butang himuon sing nagakaigo kag mahusay,” panuytoy sang 1 Corinto 14:40. Ang mga gulang dapat magmatumato sa paghanas sa mga kauturan, sa pagsugid sa ila sang mga paagi sang kongregasyon kag sa pagpahamtang mismo sing halimbawa sa pagsunod sina nga mga paagi. Halimbawa, dapat himuson sang mga gulang nga ang kwenta sang kongregasyon pagaawditon kada tatlo ka bulan. Ang pagpatumbaya sa sinang importante nga kahimusan mahimo magdul-ong sa mga problema kag magapaluya sang pagtahod sang ministeryal nga mga alagad para sa mga instruksion sang organisasyon.

Apang pananglitan ang isa ka utod nga lalaki daw nagapatumbaya sa pag-uyat sa isa ka partikular nga asaynment? Sa baylo nga gilayon sia nga kuhaon gikan sa iya asaynment, dapat ini hambalan sang mga gulang upod sa iya. Ayhan ang problema amo ang kakulang sing paghanas. Kon ang utod padayon nga nabudlayan sa pag-uyat sa iya asaynment, ayhan mas maayo sia sa iban nga asaynment.

Sarang man mapasanyog sang mga gulang ang paghiusa paagi sa pagpakita sing pagkamapinaubuson. Ang Filipos 2:3 nagapalig-on sa mga Cristiano nga “dili maghimo sang bisan ano gikan sa pagkamaiyaiyahon ukon pagpadayawdayaw, kundi nga may pagpaubos sang hunahuna nga ginakabig ang iban nga labaw sa imo.” Busa ang isa ka gulang dapat magatinguha sa pagkooperar kon ginatudlo sia sang attendant nga maglingkod sa isa ka pulungkuan sa tilipunan, indi mangatarungan nga bangod sia isa ka gulang, indi sia kinahanglan magtuman. Ayhan ginasunod lamang sang attendant ang panugda nga maglingkod sa lainlain nga mga bahin sang tilipunan, bisan pa nga dapat niya dumdumon nga wala sing pagsulundan nga dapat ini himuon sang tanan.⁠a Dapat likawan sang isa ka gulang ang dikinahanglanon nga pagpamatok sa mga desisyon nahanungod sa mga butang nga gintangdo sa isa ka ministeryal nga alagad.

Ang Ministeryal nga mga Alagad Nagapangabudlay Para sa Paghiusa

“Ang ministeryal nga mga alagad dapat man mangin serioso,” siling ni apostol Pablo. (1 Timoteo 3:⁠8) Ang pagtamod sing serioso sa ila mga asaynment​—⁠subong bahin sang ila balaan nga pag-alagad⁠—​daku sing mahimo agod matapna ang pagdaku sang mga tension. Kon ikaw isa ka ministeryal nga alagad, ginahimo mo bala ang imo mga katungdanan nga may kapagsik? (Roma 12:​7, 8) Ginahunahuna mo bala ini sing maayo agod mangin lantip ka sa paghimo sang imo mga katungdanan? Masaligan ka bala? Nagapakita ka bala sing kinabubut-on nga espiritu kon tuhoy sa mga asaynment? Ang isa ka ministeryal nga alagad sa isa ka pungsod sa Aprika nagatatap sang tatlo ka lainlain nga mga asaynment sa kongregasyon. Ang iya panimuot? “Ti, nagakahulugan lamang ini sing dugang pa nga kapisan,” siling niya, “kag ang kapisan wala nagapatay sa imo.” Sa pagkamatuod, yadtong nagahatag sang ila kaugalingon nagaagom sing labing daku nga kalipay.​—⁠Binuhatan 20:⁠35.

Daku gid ang imo mahimo agod mapasanyog ang paghiusa paagi sa pagkooperar sing bug-os sa mga gulang. “Mangin matinumanon kamo sa sadtong nagapanguna sa inyo kag mangin mapinasakupon,” siling sang Hebreo 13:​17, “bangod padayon sila nga nagapulaw tungod sa inyo mga kalag subong nga sila ang magahatag sing husay; agod himuon nila ini nga may kalipay kag indi nga may pagbakho, kay ini makahalalit sa inyo.” Matuod, ang mga gulang dihimpit nga mga tawo, kag mahimo nga mahapos makakita sing sala sa ila. Apang ang mamulayon nga panimuot nagapatubas sing dipagsalig. Mahimo ini magahalit sang imo kalipay kag may malain nga epekto sa iban sa kongregasyon. Busa ginhatag ni apostol Pedro ini nga laygay: “Kamo nga mga bataon, magpasakop kamo sa mga tigulang. Apang tanan kamo magpangwagkus sang pagpaubos sing hunahuna sa pagpakig-angot sa isa kag isa . . . Busa, magpaubos kamo sang inyo kaugalingon sa idalom sang gamhanan nga kamot sang Dios, agod nga bayawon niya kamo sa nagakaigo nga tion.”​—⁠1 Pedro 5:​5, 6.

Ina nga laygay ilabi na nga nagakaigo kon nagabatyag ka nga napasapayan para sa mga pribilehiyo sa pag-alagad. Ayhan ‘ginalab-ot mo ang palangakuan sang manugtatap,’ apang wala sing pagtangdo nga nahimo. (1 Timoteo 3:⁠1) Ang pagpaubos sing hunahuna makabulig sa imo sa paghupot sang “nagahulat nga panimuot.” (Panalabiton 3:24) Sa baylo nga magbatyag sing kaakig sa mga gulang​—⁠nga pat-od gid nga magahalit sa imo maayo nga kaangtanan⁠—​pamangkuta sila kon may mga bahin pa nga mahimo mo pauswagon. Ang imo matuod nga kahanda sa pagbaton kag sa pag-aplikar sa laygay walay duhaduha nga pagahangpon subong pamatuod sang espirituwal nga pagtubo.

Ang diosnon nga pagkamapinaubuson kag pagkaugdang magabulig sa isa ka ministeryal nga alagad sa paghupot sang iya pagkatimbang kon may yara sia tumalagsahon nga mga ikasarang ukon tinun-an kag sosyal nga mga bentaha. Daw ano ayhan ka makasululay para sa iya ang tinguhaan nga labawan ang mga gulang ukon ipatalupangod ang iya kaugalingon nga mga ikasarang! Ang Hulubaton 11:2 nagapahanumdom sa aton nga “ang kaalam yara upod sa mga maugdang.” Ang maugdang nga utod nga lalaki nakahibalo sang iya mga limitasyon. Handa sia sa pagpangabudlay sing mahipos sa likod kag sa paggamit sang iya mga ikasarang sa pagsakdag sa mga gulang. Ang pagkaugdang mahimo man nga makabulig sa iya sa paghantop nga bisan pa madamo sia sing tinun-an sa kalibutanon nga paagi, mahimo nga kulang gihapon sia sa importante nga mga bahin sing espirituwal nga kaalam kag paghantop​—⁠mga kinaiya nga mahimo magalabaw ang mga gulang.​—⁠1 Corinto 1:26–2:13; Filipos 1:⁠9.

Sing maathag, ang mga gulang kag ministeryal nga mga alagad may importante nga mga katungdanan. Sing tingob daku ang ila sarang mahimo agod mapalig-on ang tanan sa kongregasyon. Apang agod mahimo ini, dapat sila magpangabudlay sing tingob nga may paghiusa, “nga may bug-os nga pagpaubos sing hunahuna kag pagkamapailubon, nga may malawig nga pagbatas, nga nagapinaumuray sa isa kag isa sa gugma, nga hanuot nga nagapanikasog nga matuman ang pagkaisa sang espiritu sa nagahiusa nga higot sang paghidait.”​—⁠Efeso 4:​2, 3.

[Footnote]

[Mga piktyur sa pahina 27]

Ginatamod sang mga gulang ang ministeryal nga mga alagad, indi subong kubos, kundi subong mga masigkaministro sang Dios