“Ang mga Butang nga Napahayag Aton”
“Ang mga butang nga tinago iya ni Jehova nga aton Dios, apang ang mga butang nga napahayag aton.”—DEUTERONOMIO 29:29.
1, 2. (a) Ngaa kinahanglan gid sang katawhan ang pagpahayag ni Jehova? (b) Ano ang dapat nga mangin panimuot naton tuhoy sa impormasyon nga ginhatag ni Jehova?
KON ang isa ka tawo yara sa minahan kag may mapa nga nagapakita sang banas paguwa sa minahan, mahanduraw mo bala kon daw ano ka mahalungon nga ton-an niya ina nga mapa kag sundon ang tanan nga panuytoy sini? Ukon hunahunaa ang isa nga nagamasakit sang indi mabulong nga balatian. Mahanduraw mo bala ang iya daku nga interes sa pagsunod sa tanan pinakaulihing natukiban sa medisina nga nagahatag sing paglaum nga magaayo sa ulihi? Bueno, ang masubo nga katunayan amo nga yara kita sa sinang duha ka kahimtangan. Nagapuyo kita sa kalibutan nga madamo sing siod nga makapatay sa aton kag nagakapatay kita bangod sang indi mabulong nga balatian sang ginpanubli nga pagkadihimpit. (1 Juan 2:15-17; Roma 7:20, 24) Ang Dios lamang ang makabulig sa aton sa paghibalo sang mga siod kag sa paglikaw sini kag sia lamang ang makaayo sang aton pagkadihimpit. Kag sia lamang. Amo ina kon ngaa kinahanglan naton ang mga pagpahayag ni Jehova.
2 Amo man ina kon ngaa ang manunulat sang tolon-an sang Hulubaton naglaygay: “Ilingig ang imo igdulungog kag pamatii ang pulong sang maalam, kag ituhoy ang imo tagipusuon sa akon ihibalo.” (Hulubaton 22:17) Amo man sini ang aton mabasa sa Hulubaton 18:15: “Ang tagipusuon sang mahinantupon nagaagom sing ihibalo, kag ang igdulungog sang maalam nagapangita sing ihibalo.” Indi naton mahimo talikdan ang bisan ano nga ihibalo nga ginahatag ni Jehova.
Ang Ginpahayag nga mga Tinago ni Jehova
3. Anong mga pagpahayag tuhoy sa iya katuyoan ang ginhimo ni Jehova kanday Adan kag Eva?
3 Sing malipayon, si Jehova mahinangpunon katama sa pagpahayag sang ihibalo. Kutob sang panahon sang pagpanuga, amat-amat nga ginhatag ni Jehova sa iya mga sumilimba ang tanan nga mga impormasyon nga kinahanglan nila sa idalom sang lainlain nga mga kahimtangan. (Hulubaton 11:9; Manugwali 7:12) Sang primero, ginpaathag niya nga ang duta kag ang kasapatan magapasakop kanday Adan kag Eva kag sa ila mga kaliwatan. (Genesis 1:28, 29) Apang, ginsulay ni Satanas sanday Adan kag Eva nga magpakasala, kag nangin mabudlay mahibaloan kon paano ang balaan nga katuyoan matuman sa kahimayaan sang Dios. Apang, sa gilayon, ginsugdan ni Jehova nga ipaathag ang mga bagay. Ginpahayag niya nga, sa ulihi, may yara matarong nga kaliwat ukon “binhi,” nga magasumpakil sa binuhatan ni Satanas kag sang iya mga sumulunod.—Genesis 3:15.
4, 5. Anong dugang nga pagpahayag ang ginhimo ni Jehova, kag sin-o ang mga alagyan nga gingamit niya?
4 Ayhan ang mahinadlukon sa Dios nga mga lalaki kag mga babayi madamo sing pamangkot nahanungod sina nga Binhi. Sin-o sia? San-o sia magaabot? Paano ang katawhan makabenepisyo sa iya? Samtang nagaligad ang siniglo, ginhatag ni Jehova ang dugang nga pagpahayag nahanungod sa iya mga katuyoan, kag sang ulihi ginsabat niya ining tanan nga pamangkot. Sa wala pa ang Anaw, gin-inspirar niya si Enoc nga itagna ang nahanungod sa nagapakari nga kalaglagan sang binhi ni Satanas. (Judas 14, 15) Mga 2,400 ka tuig sa wala pa ang aton Kumon nga Dag-on, gintugyan niya kay Noe ang pagpahayag nga ang tawhanon nga kabuhi kag dugo balaan—ang kamatuoran nga mangin panguna nga importante kon mag-abot ang ginsaad nga Binhi.—Genesis 9:1-7.
5 Pagkatapos sang adlaw ni Noe, ginpahayag ni Jehova ang importante nga ihibalo paagi sa iban pa matutom nga mga patriarka. Sang ika-20 ka siglo B.C.E., naton-an ni Abraham nga ang ginsaad nga Binhi mangin isa sang iya kaliwat. (Genesis 22:15-18) Ining saad nangin hamili nga pagkabutang ni Isaac nga anak ni Abraham kag ni Jacob (sang ulihi gintawag nga Israel) nga iya apo. (Genesis 26:3-5; 28:13-15) Nian, paagi kay Jacob, ginpahayag ni Jehova nga ini nga Binhi, “Silo,” mangin gamhanan nga gumalahom nga matawo sa linya sang iya anak nga si Juda.—Genesis 49:8-10.
6. Sang ika-16 ka siglo B.C.E., sin-o ang nangin alagyan para sa “mga butang nga napahayag,” kag ano ang pila ka bag-ong mga butang nga naton-an nila?
6 Sang ika-16 ka siglo B.C.E., ginhimo ni Jehova ang kaanakan ni Israel nga isa ka pungsod. Kay sin-o ipahayag ang dugang nga kamatuoran? Ginsabat ni Moises ini nga pamangkot sa sining mga pinamulong sa sinang bag-o nga pungsod: “Ang mga butang nga tinago iya ni Jehova nga aton Dios, apang ang mga butang nga napahayag aton kag sa aton mga anak tubtob sa tion nga dinapat-od.” (Deuteronomio 29:29) Huo, sang mabun-ag ini sang 1513 B.C.E., ang pungsod sang Israel nangin ang alagyan “nga gintugyanan sang balaan nga pinamulong sang Dios.” (Roma 3:2) Kag madamo gid ina nga pinamulong! Ang Dios naghimo sing katipan sang Kasugoan sa mga Israelinhon, nga nagahatag sing kahigayunan nga mangin isa ka pungsod sang mga saserdote kag mga hari. (Exodo 19:5, 6) Ang Kasugoan naglakip sang isa ka koda sang pagginawi nga nagbulig sa ila sa pagkilala kag paglikaw sa mga siod sang sala kag sang isa man ka sistema sang mga halad nga naggamit sang balaan nga dugo sang mga sapat sa pagtabon sang ila mga sala sa maayo nga paagi.
7, 8. (a) Anong dugang nga impormasyon ang ginpahayag ni Jehova nahanungod sa nagapakari nga Binhi? (b) Paano gin-amligan ang “mga butang nga napahayag,” kag sin-o ang nagpahayag sing nagakaigo nga paghangop sa sina nga butang?
7 Samtang nagalakat ang tion, si Jehova naghatag sing dugang nga pagpahayag nahanungod sa Binhi. Paagi sa salmista, ginpahayag sang Dios nga ang mga pungsod magasikway sa iya Binhi apang ina nga Binhi magamadinalag-on sa bulig ni Jehova. (Salmo 2:1-12) Paagi kay Isaias, ginpahayag niya nga ang Binhi mangin ang “Prinsipe sang Paghidait” kag magaantos man sia tungod sa kasal-anan sang iban. (Isaias 9:6; 53:3-12) Sang ikawalo ka siglo B.C.E., ginpahayag ni Jehova ang duog nga matawhan sang Binhi kag, sang ikan-um ka siglo B.C.E., ang orasan para sa iya ministeryo.—Miqueas 5:2; Daniel 9:24-27.
8 Sang ulihi, ang “mga butang nga napahayag” gintipon sa 39 ka tolon-an sang Hebreong Kasulatan. Apang sa madamong hitabo, nahauna lamang ina nga tikang. Ang mga butang nga nasulat masami nga mabudlay hangpon, bisan sadtong gingamit sa pagsulat sini! (Daniel 12:4, 8; 1 Pedro 1:10-12) Apang, sang nag-abot sang ulihi ang kasanagan, wala ini nagdepende sa manugpatpat nga mga tawo. Subong sa bahin sang matagnaon nga mga damgo, “ang pagpatpat iya sang Dios.”—Genesis 40:8.
Isa ka Bag-o nga Alagyan
9. Ngaa nadula sang undanon nga Israel ang pribilehiyo nga mangin alagyan sang “mga butang nga napahayag,” kag san-o ini natabo?
9 Sang si Jesucristo yari sa duta, ang Israel amo gihapon ang alagyan sang Dios. Ang bisan sin-o nga maluyag sa pag-alagad kay Jehova dapat makigbuylog sa iya pinili nga pungsod. (Juan 4:22) Apang ginpakita ni Moises nga ang pribilehiyo nga mangin tulugyanan sang “mga butang nga napahayag” nagahatag man sing mga responsabilidad. Nagsiling sia: “Ang mga butang nga napahayag aton kag sa aton mga anak tubtob sa tion nga dinapat-od, agod nga himuon naton ang tanan nga pulong sini nga kasugoan.” (Deuteronomio 29:29) Inang “tion nga dinapat-od” natapos sang 33 C.E. Ngaa? Bangod, subong isa ka pungsod, ang mga Judiyo wala ‘makahimo sang tanan nga pulong sang kasugoan.’ Napaslawan sila labi na sa pag-abiabi sa Binhi, kay Jesucristo, bisan pa nga ang Kasugoan, sa katunayan, “nangin manugtuytoy tubtob kay Cristo.” (Galacia 3:24) Bangod sini nga kapaslawan, si Jehova nagpili sang iban nga alagyan para sa “mga butang nga napahayag.”
10. Ano ang bag-ong alagyan para sa pagpahayag ni Jehova?
10 Ano ining bag-o nga alagyan? Ginpakilala ini ni Pablo sa mga taga-Efeso sang magsulat sia nga “paagi sa kongregasyon ang sarisari nga kaalam sang Dios mapakilala, suno sa dayon nga tinutuyo nga ginhimo niya kay Cristo Jesus nga aton Ginuo.” (Efeso 3:10, 11) Huo, ang Cristianong kongregasyon, nga natawo sang Pentecostes 33 C.E., ang gintugyanan sang bag-ong “mga butang nga napahayag.” Subong isa ka grupo, ang hinaplas nga mga Cristiano nag-alagad subong “matutom kag mainandamon nga ulipon” nga gintangdo sa pag-aman sing espirituwal nga pagkaon sa nagakaigo nga tion. (Mateo 24:45) Ang mga Cristiano karon “mga tulugyanan sang balaan nga mga tinago sang Dios.”—1 Corinto 4:1.
11, 12. Anong pila ka makatilingala nga pagpahayag ang ginhimo paagi sining bag-o nga alagyan?
11 Ang sentro nga katunayan sining bag-ong “balaan nga mga tinago” amo nga si Jesucristo, ang ginsaad nga Binhi, nagluntad na. (Galacia 3:16) Si Jesus amo ang “Silo,” ang isa nga may kinamatarong sa paggahom sa katawhan, kag si Jehova nagtangdo sa iya nga Hari sang Ginharian nga sa ulihi magapasag-uli sini nga duta nga Paraiso. (Isaias 11:1-9; Lucas 1:31-33) Si Jesus amo man ang gintangdo nga Mataas nga Saserdote ni Jehova, nga naghatag sang iya walay dagta, himpit nga kabuhi subong gawad para sa katawhan—ang labing makatilingala nga pag-aplikar sa prinsipio sang pagkasagrado sang dugo. (Hebreo 7:26; 9:26) Gani, ang nagatuo nga katawhan may paglaum nga matigayon liwat inang himpit tawhanon nga kabuhi nga gindula ni Adan.—1 Juan 2:1, 2.
12 Ining ginsaad nga Binhi amo man ang manugpatunga, nga nagpahanabo sang isa ka bag-ong katipan sa ulot sang iya mga sumulunod kag sang iya langitnon nga Amay nga nagbulos sa daan nga katipan sang Kasugoan. (Hebreo 8:10-13; 9:15) Bangod sining bag-ong katipan, gintal-usan sang Cristianong kongregasyon ang pungsod sang undanon nga Israel, nangin espirituwal nga Israel, ang espirituwal nga “binhi ni Abraham” kaupod ni Jesus, kag mga tulugyanan sang “mga butang nga napahayag.” (Galacia 3:29; 6:16; 1 Pedro 2:9) Dugang pa—butang nga wala mahunahuna sang mga Judiyo—ang mga Gentil gin-agda nga mangin bahin sinang bag-ong espirituwal nga Israel! (Roma 2:28, 29) Sing tingob, ang Judiyo kag di-Judiyo nga espirituwal nga mga Israelinhon gintangdoan nga maghimo sing mga disipulo ni Jesus sa bug-os nga duta. (Mateo 28:19, 20) Busa, ang “mga butang nga napahayag” nakatigayon sing pungsodnon nga bahin.
13. Paano gin-amligan ining bag-ong “mga butang nga napahayag” para sa palaabuton nga mga kaliwatan?
13 Sang ulihi, ining “mga butang nga napahayag” paagi sa Cristianong kongregasyon ginrekord sa 27 ka tolon-an sang Cristianong Griegong Kasulatan nga nagkompleto sang kanon sang inspirado nga Biblia. Apang sa liwat, yari sa sining mga tolon-an ang madamong mga tagna nahanungod sa katuyoan ni Jehova nga mga siniglo lamang sa ulihi mahangpan sing bug-os. Sa liwat, ang mga manunulat sang Kasulatan sa katunayan nagaalagad sa mga kaliwatan nga wala pa mabun-ag.
“Ang mga Butang nga Napahayag” Karon
14. Pagkatapos sang dakung apostasya, san-o liwat ginsilak ni Jehova ang kapawa sa “mga butang nga napahayag”?
14 Sang mapatay ang mga apostoles, ang dakung apostasya nag-utwas sa tunga sang nagaangkon nga mga Cristiano, subong sang gintagna. (Mateo 13:36-42; Binuhatan 20:29, 30) Nagsunod didto ang malawig nga siniglo nga ang paghangop sa “mga butang nga napahayag” nagdulom, bisan pa nga wala pagpabay-i ni Jesus yadtong nagtinguha nga magpabilin nga matutom. (Mateo 28:20) Apang, si Jesus nanaad nga ining kahimtangan indi magapadayon. Sa konklusion sang sistema sang mga butang, ang mga malauton kag ang mga matarong pagapainpainon liwat, kag ang ‘mga matarong magasidlak subong sang adlaw sa ginharian sang ila Amay.’ (Mateo 13:43) Subong sang gintagna ni Daniel, sa ‘panag-on sang katapusan, ang matuod nga ihibalo magabugana.’ (Daniel 12:4) Ang kapawa magasilak liwat sa “mga butang nga napahayag.”
15. Ngaa ang mga relihion sang Cristiandad indi takus nga mangin alagyan para sa pinakaulihi nga paghangop sa “mga butang nga napahayag”?
15 Kutob sang 1914, nagakabuhi kita sa tion sang konklusion sining sistema sang mga butang. Gani, importante nga hibaluon kon sin-o ang ginagamit ni Jehova karon subong alagyan para sa sining bag-ong espirituwal nga kapawa. Sa pagkamatuod, wala niya ginagamit ang establisado nga relihion sang Cristiandad. Napamatod-an sila nga indi luyag sa pagbiya sa sayop nga mga panudlo nga natipon sadtong dakung apostasya. Karon, ang kalabanan sang ila mga lider tudok na kaayo sa mga tradisyon kag mga kredo amo kon ngaa indi sila bukas sa bag-o nga ihibalo, ukon naapektohan sila sang pangalag-ag amo kon ngaa ginaduhaduhaan nila bisan ang pagkainspirado sang Biblia kag ang pagkamapuslanon sang iya mga talaksan sa moral.
16. Sin-o ang napamatod-an nga amo ang modernong-adlaw nga alagyan ni Jehova?
16 Si Jesus nagsiling nga ang Ginharian sang Dios pagakuhaon gikan sa mga Judiyo kag “ihatag sa pungsod nga nagapatubas sang iya mga bunga.” (Mateo 21:43) Sang nahaunang siglo, napamatod-an ini nga amo ang bag-ong Cristianong kongregasyon sang espirituwal nga Israel. Karon, may yara lamang isa ka grupo nga nagapatubas sang bunga nga kaangay sadtong iya sang dumaan nga kongregasyon. Ining espirituwal nga mga Israelinhon amo ang mga katapo sang “matutom kag mainandamon nga ulipon” nga klase sang Mateo 24:45-47. Kaangay sang nahaunang mga Cristiano, ining ulihing-adlaw nga mga Cristiano wala nahadlok sa ‘pagpasidlak sang ila kapawa.’ (Mateo 5:14-16) Kutob sang 1919, maisugon nila nga ginhimo ang hilikuton nga pagbantala sang maayong balita sang Ginharian sa bug-os nga kalibutan subong panaksi. (Mateo 24:14) Sanglit nagpatubas sila sang mga bunga sang Ginharian sang Dios, ginpakamaayo sila sing bugana ni Jehova paagi sa pagpahisuno sa ila sa tion sa “kaalam sang Dios.”—Efeso 3:10.
17, 18. Anong amat-amat nga paghangop ang ginpaposible ni Jehova paagi sa iya modernong-adlaw nga alagyan?
17 Gani, sang 1923 ang dakung tagna ni Jesus nahanungod sa mga karnero kag mga kanding nahangpan sing maayo, kag nahantupan nga ang bug-os nga kalibutan napaidalom sa paghukom. (Mateo 25:31-46) Sang 1925 ang dutan-on nga mga alagad sang Dios nangin tag-iya sang sibu nga paghangop sa Bugna kapitulo 12 kag nahantupan sing sibu kon ano ang natabo sa gintandaan nga tuig sang 1914. Sang 1932 ang ila paghangop nagdugang pa gid. Ginpahayag ni Jehova nga ang mga tagna may kahilabtanan sa pagpasag-uli sa mga Judiyo sa Jerusalem wala nagapatuhoy sa undanon nga Israel, nga madugay na napamatod-an nga indi matutom kag ginsikway, kundi sa baylo sa espirituwal nga Israel, ang Cristianong kongregasyon. (Roma 2:28, 29) Nian, sang 1935 ang gintadlong nga paghangop sa palanan-awon ni Juan tuhoy sa “dakung kadam-an” sa Bugna kapitulo 7 nagbukas sang itololok sang mga hinaplas sa dakung hilikuton sa pagtipon nga yara pa sa unahan nila.—Bugna 7:9-17.
18 Ginsugdan sini ang tugob-globo nga hilikuton sa pagbantala, subong nga ang pagtipon sa “mga butang sa duta” natuman sing hanuot. (Efeso 1:10) Sang 1939, samtang nagasilabo ang inaway sa Europa, ang hulusayon tuhoy sa neutralidad nangin labi pa gid kaathag sang sa nagligad. Sang 1950, ang “mga prinsipe” sang Isaias 32:1, 2 nakilal-an sing labi. Sang 1962 ang husto nga pagkilala sa “superyor nga mga awtoridad” nahangpan man sing labi kaathag gikan sa “mga butang nga napahayag.” (Roma 13:1, 2) Kag sang 1965 naathagan pa gid sing labi ang tuhoy sa dutan-on nga pagkabanhaw kag kon sin-o ang mahimo nga makabenepisyo sa sini.—Juan 5:28, 29.
19. Paano napamatod-an nga nagakaigo nga manugtatap sang Pulong sang Dios ang “ulipon” nga klase ni Jehova karon?
19 Dugang pa, ang hinaplas nga Cristianong kongregasyon sa sining ika-20 ka siglo napamatod-an nga nagakaigo nga manugtatap sang Pulong sang Dios, ang nasulat nga tinipon sang “mga butang nga napahayag.” Ang tiglawas nga mga katapo sining kongregasyon nagbadbad sang Biblia pakadto sa modernong Ingles, kag, tubtob karon, ang New World Translation of the Holy Scriptures, mabasa sa 11 ka pamulong, nga may 40,000,000 ka kopya ang naimprinta na. Ang “ulipon” nga klase sang hinaplas nga mga Cristiano amo man ang nagapanguna sa pungsodnon nga programa sa pagtudlo kag nagabalhag sang napasad sa Biblia nga mga libro kag mga magasin. Nagaorganisar ini sang semanal nga mga miting, regular nga mga asambleya, kag lainlain nga mga eskwelahan—ang tanan gindesinyo sa pagbulig sa mga nagapangita sing kamatuoran nga matigayon ang sibu nga ihibalo sang “mga butang nga napahayag.” Sa pagkamatuod, “ang mga matarong” karon “nagasidlak subong sang adlaw” sa espirituwal nga kahulugan, nagapamatuod nga takus sa ila pagkatinugyanan.—Mateo 13:43.
Ang Aton Responsabilidad
20, 21. (a) Ano ang reaksion sang salmista sa napahayag nga Pulong ni Jehova? (b) Ano nga mga bagay ang pagabinagbinagon sa masunod nga artikulo?
20 Wala kita ginbilin ni Jehova nga wala sing mahimo sa minahan sining kalibutan. Sa baylo, ginhatag niya sa aton ang iya Pulong sa pagsuga sang aton banas kag sa pagbulig sa aton nga makalikaw sa espirituwal nga katalagman. (Salmo 119:105) Wala man kita ginbiyaan ni Jehova agod mapatay sa sala kag pagkadihimpit. Sa baylo, ginbuksan niya ang kahigayunan nga mabuhi sa walay katapusan sa paraiso nga duta kag ginpahibalo ang nahanungod sini nga kahigayunan nga matigayon sa gilayon. (Juan 17:3) Indi katingalahan nga ang salmista, nagahambal tuhoy sa “mga butang nga napahayag” sa iya adlaw, nagsiling: “O daw ano ang paghigugma ko sang imo kasugoan! Pamalandongan ko ini sa bug-os nga adlaw.”—Salmo 119:97.
21 Amo bala sini ang imo balatyagon tuhoy sa “mga butang nga napahayag” ni Jehova kag nahangpan sa aton adlaw? Gin-apresyar mo bala sing tudok ang mga kamatuoran nga naton-an mo? Nakita mo bala ang pagkamapuslanon sining kamatuoran sa pagbulig sa imo sa paghimo sing desisyon, sa paglikaw sa mga pagsulay kag sa pag-alagad kay Jehova? Daw ano ka daku nga tion ang ginahinguyang mo sa pagbasa kag pagtuon sining “mga butang nga napahayag”? May paagi pa bala nga mapauswag mo ang imo batasan sa pagtuon? Ini nga mga bagay pagabinagbinagon sa masunod nga artikulo.
Nadumduman Mo Bala?
◻ Antes sang tion ni Jesus, ano ang pila ka alagyan sang “mga butang nga napahayag”?
◻ Iya ni sin-o ang “mga butang nga napahayag” pagkatapos sang 33 C.E.?
◻ Ano ang pila ka importante nga pagpahayag ang ginhimo paagi sa sining bag-ong alagyan?
◻ Ngaa ang “mga butang nga napahayag” iya sang espirituwal nga mga Israelinhon karon?
◻ Paano ang hinaplas nga Cristianong kongregasyon napamatod-an nga takus nga manugtatap sang Pulong ni Jehova?
[Kapsion sa pahina 12]
Ang hinaplas nga Cristianong kongregasyon nangin ang bag-ong mga manugtatap sang mga pagpahayag ni Jehova
[Kapsion sa pahina 13]
Ang “ulipon” nga klase sang hinaplas nga mga saksi ni Jehova nag-alagad sing maayo subong manugtatap sang Pulong sang Dios
[Laragway sa pahina 10]
Ginapahayag ni Jehova ang importante nga ihibalo paagi sa matutom nga mga tawo sang nagligad