Ang Determinasyon Nagbulig sa Akon nga Magmadinalag-on

Gin-asoy ni Joseph A. Oakley

MAKALILIPAY gid nga sang 1950 isa ako sang 123,707 nga nagtambong sa internasyonal nga kombension sang mga Saksi ni Jehova sa Yankee Sta­dium sa Siudad sang Nueva York sa Estados Unidos! Kag daw ano nga pribilehiyo nga pagkatapos sadto nakaeskwela ako sa ika-16 nga klase sang Gilead nga eskwelahan sa pagmisyonero sa up­state nga Nueva York!

Sa tapos sang gradwasyon ginpadala ako upod sa grupo sang pareho ko nga mga taga-Aus­tralia, subong misyonero sa Pakistan. Nag-abot kami didto sang tig-ilinit sang 1951. Ang una nga tuig nagdala gid sing mabudlay nga mga pagtilaw.

Ang isa sini amo ang mamala, yab-ukon nga init, nga tuhay gid sa kabugnaw sang nabagatnan nga Victoria kag Tasmania sa Aus­tralia nga akon ginapuy-an. Nian yara ang tipos, jaun­dice, kag iban pa nagadugay nga balatian nga nagtapik sa amon tanan nga bag-o mag-abot. Ang isa sang amon bata pa nga kaklase napatay sadtong una nga tuig.

Ang isa pa ka pagtilaw amo ang kaimulon kag tuhay nga pagkabuhi. Wala magdugay sa tapos sang pag-abot namon, gin-asayn ako subong isa ka nagalakbay nga ministro, nga nagakinahanglan sing malawig, mamingaw nga mga paglakbay sa mga tren kag kon kaisa pagtulog sa plataporma sang estasyonan sang tren.

Apang ang isa pa ka pagtilaw amo ang indi pagsapak sa amon mensahe sang Ginharian sa tunga sang kalabanan Muslim nga pumuluyo. Kag isa man ka matuod gid nga pagtilaw ang pagpabutyag sining mensahe sa mabudlay, bag-o nga hambal, ang Urdu nga hambal.

Daw kahapos gid nga mag-untat kag magpauli. Kinahanglan gid ang malig-on nga determinasyon agod magpabilin. Nalipay ako nga ang akon anay mga eksperiensia nakabulig sa akon sa paglandas sa mga pagtilaw sing madinalag-on.

Mga Eksperiensia nga Nagdihon sang Akon Kabuhi

Ginpadaku ako sa uma nga mga 11 milyas (18 km) sa guwa sang Gee­long, isa ka siudad malapit sa baybay sa estado sang Victoria sa Aus­tralia. Sang isa ka adlaw sang Abril 1935, samtang nagaduaw ako sa banwa, nakighambal sa akon si Miss Hudson kag ginpalig-on niya ako nga magtambong sa isa ka pamulongpulong sa Biblia. Nabalaka ako sa bug-os nga semana bangod nanaad ako sa sining sinsero kag dedikado nga tigulang nga matambong ako. Indi ko gid luyag magkadto, apang indi ko sia mapaslaw.

Gani pag-abot sang tion, gintuman ko ang akon panaad kag naglakat nga nagaduhaduha gihapon. Sa akon kakibot, naluyagan ko gid ang miting nga nagsugod ako sa pagtambong sing regular. Ang akon naton-an nagkombinse sa akon nga nasapwan ko ang kamatuoran, kag ginbawtismohan ako sa isa ka asambleya nga ginhiwat sa Gee­long sadto gihapon nga tuig.

Pila ka bulan sang ulihi, duha ka makugi nga mga payunir nga babayi ang naglakat sing kapin sa isa ka milya (1.6 km) latas sa katamnan agod malab-ot ang amon uma. Ang nakapahamuot sa akon amo ang ila pagtuo kag kakugi. Nadumduman ko nga ginpamangkot ko sila kon sa diin sila matulog sadto nga gab-i, kay ginsambit nila nga manugpakadto sila sa isa ka bag-o nga teritoryo sa diutay nga banwa sang Bac­chus ­Marsh, mga 35 milyas (56 km) ang kalayuon.

“Indi pa namon mahibal-an, apang mangita kami sing matulugan antes magsirom,” sabat nila. “Kon indi kami makakita, mahimo kami sang amon tolda.”

Pasado na sa alas kuatro sadto, kag ang mga adlaw malip-ot kag matugnaw. Nagsiling ako sa akon kaugalingon: ‘Amo gid ini ang pagpayunir!’ Bangod sini nakahunahuna man ako sa akon kaugalingon: ‘Ano ang ginahimo ko diri sa uma, nga mga milya ang kalayuon gikan sa mga tawo? Ano ang nagapugong sa akon nga mangin payunir nga ministro kaangay sining pamatan-on nga mga babayi? Lamharon pa ako kag mapagros man. Kon mahimo nila ini, ngaa abi indi ko mahimo?’ Sadto gid namat-od ako nga indi madugay mapayunir man ako.

Determinado sa Pagpabilin sa Akon Desisyon

Batok gid ang akon amay sa akon paglakat kag pagpili sang bug-os tion nga pagbantala upod sa mga Saksi ni Jehova. Nangin superintendente sia sang Sun­day ­school sa sulod sang mga 30 ka tuig kag naugot sa mga Saksi. Apang, nangin 21 anyos ako, kag ang akon iloy wala mamatok sang ginsugid ko sa iya ang akon mga plano. Gani, sang ulihi, ang petsa nga Hunyo 30, 1936, gintalana nga amo ang adlaw sang akon paglakat.

Ginpangabay sang akon amay ang pila ka kilala nga mga negosyante nga palas-ayon ako gikan sa sining “wala data nga butang” subong amo ang pagtawag niya sa sini. Gintinguhaan gid sining mga tawo nga hayluhon ako sa pagpabilin sa balay, nga ginagamit ang tanan nga sahi sang argumento, subong sang: ‘Pakahuy-an mo lamang ang relihion sang imo pamilya.’ ‘Magabuylog ka sa indi kilala kag wala gid ginabaton nga grupo.’ Kag, ‘Ano ang garantiya mo nga may pinansial ka nga supurta?’

Ining paghaylo—nga ayhan may maayong katuyoan—nagpadayon sa sulod sang mga semana. Apang, sing makatilingala, sa dugang nga pagpalas-ay nila sa akon, dugang pa nga nangin determinado ako nga magbuylog sa ranggo sang mga payunir.

Nag-abot ang Hunyo 30, matugnaw kag mamadlos! Ginkarga ko ang tanan ko nga butang sa akon motorsiklo kag nagbiyahe padulong sa Mel­bourne, mga 40 milyas (64 km). Gin-agda ako nga magpanghikot upod sa isa ka grupo sang mga payunir didto. Ang isa ka bag-o gid kag may katuyoan nga kabuhi nagbukas karon sa akon, apang madamo sing pagtilaw.

Determinado nga Nag-atubang sa Pagpamatok

Sadto nga mga adlaw ang daku nga paagi sa pagpalapnag sang mensahe sang Ginharian amo ang paggamit sing mga salakyan sa pagpalayag sang narekord sa plaka nga mga pamulongpulong sa Biblia sang presidente sang Watch Tower Society, nga si J. F. Ruth­er­ford. Sa mga lima ka tuig, ako ang nagpalakat sang isa sining “mga salakyan,” isa ka nasangkapan nga salakyan nga nakilal-an sa tanan nga duog subong ang “Red Ter­ror.”

Ang matahom nga tingog ni Utod Ruth­er­ford nga nagaguwa sa trompa “matam-is” gid para sa pila ka nagapangita sing kamatuoran, apang para sa mga nagapamatok sa kamatuoran, daw hilo yadto. (Ipaanggid ang 2 Corinto 2:14-16.) Kon kaisa, ginapapiswitan ako sang hose sang garden, ukon ginabato ang salakyan.

Apang, sa pihak nga bahin, naganyat gid ang iban sa lektura ni Utod Ruth­er­ford nga nagabuyagyag sang kabutigan sang relihion. Halimbawa, ang isa ka manggaranon nga tawo nangabay sing isa ka kopya sang tagsa ka plaka sang pamulongpulong ni Ruth­er­ford kag sang tagsa ka libro nga ginsulat niya. Sang ginduaw namon ang iya daku nga balay, daw indi ko madala yadtong tanan nga plaka kag libro. Nalipay gid ang tawo sa pagtigayon sini, kag sadto gid nagsulat sia sing tseke nga ang kantidad £15 (sadto $70). Amo yadto ang pinakadaku nga napahamtang ko!

Sang 1938 gin-iskedyul si Utod Ruth­er­ford nga magduaw sa Aus­tralia kag maghatag sing lektura sa Biblia sa Syd­ney, New ­South ­Wales, Town Hall. Isa ako sa mga naglibot sa mga kalye sang Syd­ney paagi sa ­sound car, nga nagaanunsyo sang manug-abot nga pagduaw. Ang “Red Ter­ror” pinasahi nga ginsangkapan para sa anum ka semana nga programa kay may daku nga pasayod sa duha ka kiliran sang salakyan. Ining mabaskog nga hilikuton ginpamatokan gid.

Bangod sang mabaskog nga pag-ipit sang relihion, ginkanselar ang permiso para sa Town Hall sang Sydney. Ang akon asaynment karon amo ang paggamit sang ­sound car sa pagpapirma sang mga pangabay sa pagprotesta. Nagduaw kami sa dalagku nga grupo sang mga trabahador sa tion sang ila pahuway sa panyaga kag, walay sapayan sang pagpamatok sa madamo nga duog, nagmadinalag-on kami sa pagtigayon sing ginatos ka pirma pabor sa kahilwayan sa paghambal. Sa kabilugan linaksalaksa ka pirma ang natigayon sa bug-os nga pungsod. Apang walay sapayan nga ginpakita ining daku nga pangabay sa konseho sang Syd­ney, gindumili gihapon ang Town Hall.

Apang, subong pirme nagakatabo, nagpanghikot ini para sa kaayuhan sang katawhan ni Jehova. Ang Syd­ney ­Sports ­Grounds amo dayon ang gin-arkilahan, kag bangod sang lapnag nga publisidad nga gintuga sang pagpamatok, ang tumalambong sa pamulongpulong ni Utod Ruth­er­ford nagtimbuok sa mga 12,000 suno sa pagbanta sang polisiya. Sanglit 5,000 lamang ang makapungko sa Town Hall, ang pagpamatok nagresulta sa kapin pa sa doble nga kadamuon sang mga tawo nga nakapamati sa pamulongpulong!

Determinasyon sa Tion sang Pagdumili

Sang magdabdab ang Inaway Kalibutanon II sang 1939, nagbaskog ang pagpamatok. Nian, sang Enero 1941, ang hilikuton sang mga Saksi ni Jehova gindumilian sa bug-os nga Aus­tralia. Nagapayunir ako sadto sa Mel­bourne kag nagapuyo sa bodega sang mga literatura sang Sosiedad.

Isa ka adlaw anum ka dalagku nga mga polis sang Com­mon­wealth ang nag-abot didto kag gin-atubang ang alagad sang bodega nga si Jack ­Jones kag ako. Ginhatagan ako sing lima lamang ka minuto sa pagguwa sa akon kuwarto sa ibabaw. Natilawan mo na bala nga mamutos sang imo mga pagkabutang sa lima ka minutos? Wala pa ako makatapos sang magsulod sa kuwarto ang polis kag ginpanghaboy sa bintana ang akon tanan nga bayo nga nabilin kag ang mga kasangkapan.

Apang, wala mapadulog sang pagdumili ang amon hilikuton. Ginagamit ang Biblia lamang, nagpadayon kami sa pagbantala sa balay kag balay kag sa paghiwat sing regular nga mga miting sa Mel­bourne. Sang 1942, ang ikaduha nga tuig sang pagdumili, ginpatawag ako liwat sa Syd­ney, sini nga tion agod magbulig sa pag-organisar sang hilikuton sa pito ka kongregasyon sang mga Saksi ni Jehova didto.

Ang puluy-an Bethel sa Syd­ney ginaukupahan sadto sang mga opisyales sang Com­mon­wealth nga pangulohan. Gikan sa isa ka daku nga balay nga duha sing panalgan kag pila lamang ka bloke ang kalayuon, ginplano namon ang tanan nga hilikuton sa pag-organisar. Ang akon tulumanon amo ang pagduaw sa tagsa ka kongregasyon sang Syd­ney kag, paagi sa motorsiklo nga may side­car, idul-ong ko ang mga balayan para sa mga miting kag ang iban pa nga mga butang nga kinahanglanon sa paghupot sang mga kongregasyon nga organisado kag nagapadayon.

Pag-alagad sa Tasmania

Sang ginbawi ang pagdumili sang Hunyo 1943, ginpadala ako sa pagbulig nga kay-uhon liwat ang bogeda sang mga literatura sa Mel­bourne. Nian, sang 1946, gintangdo ako sa pag-alagad subong nagalakbay nga alagad sa kauturan (karon, manugtatap sa sirkito) sa isla nga estado sang Tasmania sa Aus­tralia. Ang Tasmania isa ka matahom kag bakulod nga isla nga ginatabunan sang yelo ang madamo nga bukid sini sa daku nga bahin sang tuig.

Sang mag-alagad ako subong nagalakbay nga manugtatap, may pito lamang ka kongregasyon kag pila ka naligwin nga mga grupo sa bug-os nga isla. Sa ulot sang mga pagduaw sa mga kongregasyon, nagpayunir ako sa diutay nga banwa nga ginhingalanan Mole ­Creek. Masingki nga ginpamatukan didto ang mga Saksi sa tion sang inaway. Apang sini nga tion nag-ugdaw na ini, kag ang pila ka tawo nga napahamtangan ko sing mga literatura nangin dedikado nga mga Saksi sang ulihi.

Didto ako sa Tasmania, sang 1950, sang mabaton ko ang pangagda nga mag-eskwela sa ika-16 nga klase sang Gil­ead. Sa tapos sang gradwasyon, subong nasambit ko na kaina, ginpadala ako sa Pakistan.

Pagpakasal kag Pamilya

Sang didto ako sa Pakistan sing anum ka tuig, ginpakaslan ko si Edna ­Marsh, nga nag-alagad subong misyonero sa Hapon. Nagbuylog sa akon si Edna, kag nagbukas kami sing bag-o nga puluy-an sang misyonero sa Quet­ta, nga nahamtang sa mataas nga rehiyon sang Pakistan. Nagtener kami sing duha ka tuig sa Quet­ta, apang sang manug-abot ang amon una nga anak, namat-od kami nga magbalik sa Aus­tralia. Ano karon ang yara sa amon palaabuton?

Wala gid kami magduhaduha kon sa diin kami mapuyo kag kon sa diin padakuon ang amon pamilya. Nanaad ako nga kon makabalik gid man ako gikan sa pag-alagad sa luwas mabalik ako sa Tasmania. Apang, namigado kami, kag malaka ang trabaho para sa 45 anyos. Apang namat-od kami nga indi pagtugutan ang sekular nga trabaho nga mag-upang sa amon sa mga miting sa kongregasyon kag sa pag-alagad sa latagon.

Paagi sa maluluy-on nga bulig sang espirituwal nga kauturan, nakapatindog ako sang akon kaugalingon nga negosyo nga pagpaninlo sang mga bintana. Sa kapin sa 20 ka tuig, wala gid ako makawasi sing isa ka miting ukon pag-alagad sa latagon bangod sang paghimo sang sekular nga trabaho, bisan pa kon kaisa kinahanglan gid ang determinasyon agod pamatukan ang tanyag nga mga trabaho kag ang ekstra nga kuwarta. Sa amo napadaku namon ang amon duha ka anak sa dalanon sang kamatuoran kag sa pagtigayon sing regular nga bahin sa tanan nga hilikuton sa Ginharian.

Ang amon mga anak dalagku na karon kag wala na nagadepende sa amon. Sila nga duha malig-on sa kamatuoran, ang amon anak nga babayi pila ka tuig nga nagpayunir antes mamana. Ang amon anak nga lalaki kag ang iya asawa manuglakat agod mag-alagad sa kon diin daku pa ang pagkinahanglan sa payunir.

Isa ka Makapaladya nga Kabuhi

Kasan-o lang ginduaw ako sang isa ka madugay na nga abyan nga amo ang una nga tawo nga nagtindog sa kamatuoran sa banwa sang Quet­ta sa Pakistan. Sa tapos sang miting sa amon Kongregasyon sang Laun­ces­ton diri sa Tasmania, ginsugiran niya ang kongregasyon nga sing makaduha ginpasiling niya sa suluguon nga wala sia sa balay sang magduaw ako. Apang, sang ulihi, sang makita ko sia sa hardin kag indi na sia makalikaw, nagsugod sia sa pagpamangkot sing mga pamangkot, kag sang ulihi nagbaton sang pagtuon sa Biblia. Ginsaysay niya nga nagapasalamat gid sia nga nagpakita ako sing determinasyon paagi sa pagbatas sa sadtong mabudlay nga asaynment sa Pakistan.

Sang pila ka tuig antes sini, sa isa ka kombension sa Syd­ney, nagdalagan sa akon ang isa ka pamatan-on nga babayi kag ginhakos ako sing hugot. Bangod nakibot ako, nagsiling ako nga nagsala sia. “Wala,” sabat niya, “indi bala ikaw si Joe Oak­ley? Ikaw kag si Alex Mil­ler nagtuon upod sa amon pamilya sa Lahore, Pakistan, kag karon ang akon iloy kag utod nga babayi kag ako yara sa kamatuoran kag nagapuyo sa Sydney.”

Ang mga eksperiensia kaangay sini nakaamot gid sa kaayawan nga nakahimo ako sing bug-os nga pagpakigbahin sa pagwali sing Ginharian. Daw ano kaayo nga makita ang pagpakamaayo sang Dios sa hilikuton! Sang una ako nga mag-alagad diri sa Tasmania sang 1946, siam ang manugbantala sang Ginharian sa bug-os nga siudad sang Laun­ces­ton. Sa karon may yara tatlo ka kongregasyon, nga ang tagsa may kapin sa 90 ka manugbantala!

Sa pagkamatuod, gikan sa makaalayaw nga mga eksperiensia sang akon kapin sa 50 ka tuig sang Cristianong pag-alagad, makasiling ako nga wala sing pagpangalag-ag nga ang determinasyon nakabulig sa akon nga magmadinalag-on.

[Laragway sa pahina 24]

Ang sound car nga gingamit sa pagbantala sang mensahe sang Ginharian sa Sydney

[Laragway sa pahina 25]

Si Joe Oakley upod sa diutay nga kongregasyon sa Quetta, Pakistan, sang ang amon bag-o nga Kingdom Hall ginbuksan sang Disiembre 15, 1955