Balaan nga Paghidait Para sa mga Tinudluan ni Jehova
“Ang tanan mo nga anak tudluan ni Jehova, kag mangin daku ang paghidait sang imo mga anak.”—ISAIAS 54:13.
1, 2. Sa ano nasandig ang aton pag-agom sing paghidait?
PAGHIDAIT! Daw ano ka halandumon ini! Apang ang rekord sang katawhan nagapakita nga indi ini mahidaiton. Ngaa amo sini?
2 Ang pag-agom sing paghidait suod nga naangot sa pagtahod sa awtoridad. Kag sin-o ang labing mataas nga awtoridad sa uniberso? Ang Manunuga, si Jehova nga Dios. Busa ang nahamut-an nga kaangtanan upod sa iya kinahanglanon sa paghidait. (Salmo 29:11; 119:165) Kon inang labing importante nga kaangtanan mabugto, imposible nga matigayon ang matuod nga paghidait upod sa Dios, upod sa isigkatawo, ukon sa sulod nimo.—Isaias 57:21.
Kon Ngaa ang Kalibutan Wala sing Paghidait
3. Paano nahalitan ang kaangtanan sang katawhan sa Dios?
3 Subong sang nahibaluan naton, wala madugay pagkatapos sang kaagahon sang tawhanon nga maragtas nga ang espiritu nga anak sang Dios nagrebelde batok kay Jehova. Ang pagrebelde isa ka pagpakig-away. Inang manugguba sing paghidait, nga nakilal-an si Satanas nga Yawa, nagsugyot kay Eva nga indi pagtugutan ang kasugoan sang Dios nga mag-upang sa iya sa paghimo sang butang nga sa banta niya para sa kaayuhan niya. Ginpatiku sang Yawa ang kamatuoran sa pagpahunahuna sa iya nga ginadingotan sia sing pila ka butang nga maayo sa pagsunod sa Dios. Ang ganyat yara sa kakagud, sa ako anay nga panimuot. Sang ulihi ginbuylogan sia sang iya bana sa malinapason nga paggawi, kag subong resulta, ang tanan nila nga kaanakan nalatnan sina nga espiritu.—Genesis 3:1-6, 23, 24; Roma 5:12.
4, 5. (a) Tubtob diin nagmadinalag-on si Satanas sa pag-impluensia sa panghunahuna sang katawhan? (b) Ano ang epekto sini sa mga panikasog sang tawo nga matigayon ang paghidait?
4 Indi lamang diutay nga bahin sang katawhan ang nagasikway sa balaan nga kasugoan. Ang Kasulatan nagasugid sa aton nga si Satanas “nagapatalang sa bug-os napuy-an nga duta.” (Bugna 12:9) Ang iban nga tawo sobra ka malinapason, nagapakita sing bug-os nga dipagtahod sa Dios kag sa ila isigkatawo; ang iban indi tanto. Apang si Satanas tuman ka madinalag-on sa pag-impluensia sa panghunahuna sang katawhan sa bagay nga si apostol Juan nakasiling: “Ang bug-os nga kalibutan yara sa gahom sang malauton.” (1 Juan 5:19) Nagapati man ang mga tawo kon bala ang Yawa nagaluntad ukon wala, ginahimo nila ang luyag nila. Ginatuman nila sia, gani sia ang ila gumalahom. Subong resulta, ang katawhan nahamulag sa Dios, nga may kaawayon sa iya. Sa sina nga palibot, katingalahan bala nga ang tawhanon nga mga panikasog nga matigayon ang paghidait napaslawan?—Colosas 1:21.
5 Apang, nagadugang nga kadamuon sang katawhan gikan sa tanan nga pungsod ang nagaeksperiensia sang balaan nga paghidait, paghidait nga naghalin sa Dios. Paano ini natabo?
Ang Makaalayaw nga Paghidait nga Ginahatag sang Dios
6. (a) Ano nga pagpadaku ang ginabutang sang Biblia sa paghidait? (b) Paagi kay sin-o posible para sa aton nga maagom ang paghidait nga ginahatag sang Dios?
6 Sa Roma 15:33 si Jehova nagakaigo nga ginalaragway subong “ang Dios nga nagahatag sing paghidait.” Kutob sa ginsuguran, tuyo sang Dios nga ang tanan niya nga tinuga magaagom sing paghidait. Kapin sa 300 ka beses nga ginpatuhoyan sang iya inspirado nga Pulong, ang Biblia, ang paghidait. Ginaathag sini nga si Jesucristo amo ang “Prinsipe sang Paghidait.” (Isaias 9:6, 7) Sia ang gintangdoan sang Dios sa pagbungkag sa mga buhat sinang bantog nga manugguba sang paghidait, si Satanas nga Yawa. (1 Juan 3:8) Kag paagi sa “Prinsipe sang Paghidait” posible para sa kada isa sa aton nga maagom ang makaalayaw nga paghidait nga ginahatag sang Dios.
7. (a) Ano ang ginalakip sang hatag-Dios nga paghidait? (b) Ngaa indi ini butang nga dapat naton hulaton tubtob ang daan nga sistema madula kag matigayon naton sa ulihi ang kahimpitan?
7 Daw ano ka makatilingala nga paghidait ini! Labi pa ini sang sa pagkawala sing inaway. Ang Hebreong tinaga nga sha·lohmʹ, nga masami ginabadbad nga “paghidait,” nagakahulugan sing kapagros, kabuganaan, kag kaayuhan. Ang paghidait sang Dios nga ginapanag-iyahan sang matuod nga mga Cristiano pinasahi sa bagay nga wala ini nasandig sa ila palibot. Wala ini nagakahulugan nga ang dimaayo nga palibot wala nagaapektar sa ila. Apang may yara sila nasulod nga kusog nga nagahimo sa ila sa paglikaw sa pag-amot sa kagamo paagi sa pagbalus kon nagahilabot ini sa ila. (Roma 12:17, 18) Bisan pa nga ang isa mahimo nga nagamasakit sa pisikal ukon pigado sa materyal, mahimo gihapon sia nga mangin mapagros kag mabuganaon gikan sa espirituwal nga punto-de-vista kag sa amo maagom ang kalipay nga ginahatag sang Dios. Sing hayag, ang paghidait nga ginaeksperiensia nila mapasangkad kon ining makagud nga kalibutan madula, kag magatudok ini kon ang bug-os nga katawhan magaagom sing kahimpitan. Apang ang balaan nga paghidait nga posible karon mismo isa ka malinong nga kahimtangan sang hunahuna kag tagipusuon, isa ka nasulod nga kahimtang sang kalinong walay sapayan sang kon ano ang nagakatabo sa guwa. (Salmo 4:8) Naghalin ini gikan sa nahamut-an nga kaangtanan upod sa Dios. Daw ano ka hamili nga pagkabutang!
Mga Anak nga Tinudluan ni Jehova
8. Sin-o ang una nga magaagom sini nga paghidait upod sa Dios paagi kay Jesucristo?
8 Sin-o ang may amo sina nga paghidait bangod sang pagkatinudluan ni Jehova kag pagpamati sa iya mga sugo? Bilang sabat, ang Biblia nagapatuhoy sang aton igtalupangod una sa mga nagahuman sa espirituwal nga Israel. Ginapatuhoyan sila sa Galacia 6:16, diin aton mabasa: “Ang paghidait kag kaluoy mangin sa tanan nga nagalakat sa sining sulundan, sa Israel sang Dios.” Amo ini sila ang 144,000 nga ginpili sang Dios nga makig-ambit sa langitnon nga kabuhi kaupod ni Jesucristo.—Bugna 14:1.
9. Ano ang “kasugoan sang pagginawi” nga ginabuylog sa pag-agom sang espirituwal nga Israel sing paghidait?
9 Sadto anay sang nahaunang siglo, ang mga yara sa espirituwal nga Israel nagatuon sang sadsaran nga kamatuoran, ang “talaksan sang pagginawi,” nga direkta nga naangot sa ila pag-agom sang paghidait. Importante nga mahantupan nila ining talaksan sang pagginawi. Sa kapin sa 15 ka siglo, si Jehova naggamit sang Mosaikong Kasugoan sa pagpahamtang sang mga landong sang maayong mga butang nga magaabot. Apang pagkatapos sang mahalaron nga kamatayon ni Jesucristo, ang mga kinahanglanon sang Mosaikong Kasugoan wala na gintuman. (Hebreo 10:1; Roma 6:14) Napadayag ini paagi sa desisyon sang Cristianong nagadumala nga hubon sa Jerusalem sa hulusayon sang pagsirkunsidar. (Binuhatan 15:5, 28, 29) Ginpadaku liwat ini sa inspirado nga sulat sa mga taga-Galacia. Ang maayong butang nga ginlandong sang Mosaikong Kasugoan ginpatuman. Sing mapailubon ginpatudok ni Jehova sa mga hunahuna kag mga tagipusuon sang hinaplas nga mga sumulunod ni Cristo ang importansia sang Iya dibagay nga kaluoy nga ginpabutyag paagi kay Cristo. Paagi sa pagtuo sa sini nga aman, paagi sa paggawi nahisuno sa sini, maagom nila ang paghidait nga indi gid anay posible para sa makasasala nga katawhan.—Galacia 3:24, 25; 6:16, 18.
10. (a) Ang espirituwal nga Israel nagaeksperiensia sang katumanan sang anong saad nga narekord sa Isaias 54:13? (b) Paano ang pagdisiplina ni Jehova sa ila nangin rason sa pag-eksperiensia nila sing paghidait?
10 Ang mga yara sa espirituwal nga Israel nakaeksperiensia sang katumanan sang daku nga saad nga narekord sa Isaias 54:13. Didto ang Dios mismo nagsiling sa iya katulad-asawa nga organisasyon sang matutom nga espirituhanon nga tinuga: “Ang tanan mo nga anak tudluan ni Jehova, kag mangin daku ang paghidait sang imo mga anak.” Sa pagkamatuod, ang iya pangunang Anak amo si Jesucristo mismo, nga ginpanganak subong Mesias sang ginhaplasan sia sang balaan nga espiritu sang 29 C.E. Apang ang langitnon nga “babayi” ni Jehova may madamo pa nga anak—144,000 nga iban pa nga nangin ikaduha nga bahin sang binhi nga gintagna sang Genesis 3:15. Si Jehova nagsaad nga sia mangin Daku nga Instruktor sining tanan nga mga anak. Gintudluan niya sila sang kamatuoran nahanungod sa iya kaugalingon kag sa iya mga katuyoan. Ginsugiran niya sila kon paano sia alagaron. Kon kaisa, dapat niya sila disiplinahon. Kinahanglanon ini kon mapaslawan sila sa pagpamati sa iya Pulong. Ang disiplina mabudlay batunon. Apang mapainubuson nila nga ginkilala ang pagkinahanglan nila sini kag naghimo sing kinahanglanon nga mga pagbag-o, kag ang disiplina naghatag sang maayo nga mga resulta—“mahidaiton nga bunga, nga amo, ang pagkamatarong.”—Hebreo 12:7, 11; Salmo 85:8.
“Ang Dakung Kadam-an” Gintudluan sang Dalanon sang Dios
11. (a) Sin-o pa ang gintudluan ni Jehova sa aton adlaw? (b) Paano nila ginapakita nga nagakabagay sila sa paglaragway nga makita sa Isaias 2:2, 3, kag upod ang anong epekto sa iban?
11 Sa aton adlaw, ang espirituwal nga Israel indi lamang ang grupo nga ginatudluan ni Jehova. Sang nagligad nga tunga ka siglo, ginpatuhoy man ang igtalupangod sa iban. Si Isaias inspirado sa pagsulat nahanungod sa ila sa kapitulo 2, bersikulo 2 kag 3: “Mahanabo sa ulihing mga adlaw nga ang bukid sang balay ni Jehova tukuron sa putukputukan sang kabukiran, kag pakataason sa ibabaw sang kabakoloran; kag magaduguk sa iya ang tanan nga pungsod.” Huo, ang mga nagabaton sang pagsimba sa lamang matuod nga Dios nagahatag sa sini sing labing mataas nabayaw nga duog sa ila kabuhi. Busa talalupangdon ini subong ginpakataas labaw sa tagsa ka iban pa nga sahi sang pagsimba nga ginahimo anay nila kag sa diin ang kalibutan sa palibot nila padayon nga nagahimo. Ang katawhan sang tanan nga pungsod nakapanilag sini. Nakita nila nga, walay sapayan sang mga kinahanglanon nga ginapangayo sang kalibutanon nga mga awtoridad ukon pagkalapnag sang dicristianong mga buhat sang kalibutan, ang mga nagasimba kay Jehova nagahimo sang ila kaangtanan upod sa iya nga labaw sa bisan ano pa. Nakita man sang mga manugpanilag ang bunga nga ginapatubas sini sa kabuhi sina nga mga sumilimba, kag madamo ang naluyag sa pagpakigbahin sa matuod nga pagsimba. Gani kapin sa tatlo ka milyon ka tawo ang nagasiling karon sa iban: “Kari kamo, magataklad kita sa bukid ni Jehova, sa balay sang Dios ni Jacob; kag tudluan niya kita sang iya mga dalanon, kag magalakat kita sa iya mga banas.”—Tan-awa ang Zacarias 8:23.
12. Paano yadtong ginsambit sa Isaias 2:2, 3, nakabenepisyo paagi sa pagtigayon sa Dios subong ila Instruktor, kag ano ang talalupangdon nga bahin sang instruksion ang ginhatag nila sa iya?
12 Hunahunaa lamang kon ano ang kahulugan sina—ang Dios amo ang ila Instruktor! Ang mga nagabaton sina nga instruksion kag tunay nga nagaapresyar sa tuburan sini wala ginasit-an sang dalayon nga mga palaligban sa kaisipan. Wala nila masapwan ang ila kaugalingon nga natunga sa duha ka opinyon ukon pililian nga lunsay wala maluyagi sa kon ano ang husto. Ang kamatuoran gikan sa Pulong sang Dios maathag gid. Kag ano ang ginapakita sang Isaias 2:4 subong talalupangdon nga bahin sang instruksion nga ginabaton nila? Nagadalahig ini sa kon paano maagom ang paghidait sa nagapinuyas nga pungsod. Busa, bisan ano man ang ginapili sang iban, ang mga tinudluan ni Jehova nagasalsal sang ila mga espada nga mangin mga arado kag sang ila mga bangkaw nga mangin galab nga inughagbas. Wala na sila nagatuon sang inaway.
13. Gikan sa anong ginhalinan naghalin ang “dakung kadam-an,” apang ano ang naghimo sa ila nga mangin sahi sang tawo nga amo sila karon?
13 Amo man ini ang grupo nga ginalaragway sa Bugna 7:9, 10, 14 subong mga nakalampuwas pasulod sa mahidaiton nga bag-ong duta sang Dios pagkatapos sang nagapakari nga “dakung kapipit-an.” Ang nakalampuwas nga “dakung kadam-an” naghalin sa tanan nga pungsod, tribo, katawhan, kag hambal. Madamo sa ila ang natungod anay sa mga grupo nga nagailinaway sa isa kag isa. Ang iban nagkabuhi anay sing makagud; apang, wala man nila maagom ang paghidait. Apang sila nga nagguwa karon gikan sa tanan nga pungsod mahigugmaon sa paghidait, nagapauswag sang paghidait nga katawhan. Kag ano ang naghimo sa ila nga mangin amo sina? Gintudluan sila ni Jehova.—Isaias 11:9.
Isa ka Pinasahi nga Sahi sang Paghidait
14. Sa ano napasad ang paghidait sang katawhan ni Jehova, kag paano nga amo sini?
14 Ang paghidait nga ginahatag ni Jehova sa iya katawhan pinasahi gid. Indi ini ang sahi sang butang nga nagaresulta kon ang maluya nga kasugtanan ginahimo sa ulot sang duha ka partido nga wala nagasalig sa isa kag isa. Wala ini nagadalahig sing mga kompromiso. Pasad ini sa pagkamatarong. (Isaias 32:17) Apang paano ina matuod sa paghidait nga nagadalahig sa dihimpit nga mga tawo? Subong mga makasasala, ano nga pagkamatarong ang ginaagom sang bisan sin-o sa aton? Bueno, paagi sa pagtuo maagom naton ang pagkamatarong nga ginapaposible paagi sa nagatumbas sa sala nga balor sang halad ni Jesus.
15. Sang dutan-on nga ministeryo ni Jesus, ano ang ginatudlo ni Jehova sa iya palaabuton nga mga anak nga importante sa paghidait?
15 Nagabulig ini sa aton sa pag-apresyar kon ano ang ginsiling ni Jesus nga narekord sa Juan 6:45-47. Didto nagapakighambal sia sa mga Judiyo nga indi suod sa iya subong ang Mesias kag gani nagakumud batok sa iya. Apang tuhoy sa iya mga disipulo nga nagsiling sia: “Nasulat na sa mga Manalagna [labi na, sa Isaias 54:13], ‘Kag tudluan sila tanan ni Jehova.’ Ang tagsatagsa nga nakapamati kag nakatuon sa Amay nagakari sa akon. Indi kay may tawo nga nakakita sa Amay luwas sia nga nagikan sa Dios; sia nakakita sa Amay. Sa pagkamatuod nagasiling ako sa inyo, Sia nga nagatuo may kabuhi nga walay katapusan.” Yadto nga mga disipulo nagbaton sang instruksion nga ginhatag sa ila ni Jehova. Napasuod sila kay Jesus. Sang ginsikway sang iban ang mga butang nga gintudlo niya kag ginsikway si Jesus, ang iya mga apostoles nagpabilin. Subong sang ginsiling ni Pedro: “Kami nagtuo kag nagkilala nga ikaw amo ang Isa nga Balaan sang Dios.” (Juan 6:69) Bangod sang ila pagtuo kay Jesucristo, posible para sa ila nga maagom ang mahidaiton nga kaangtanan upod kay Jehova nga Dios, ang kaangtanan nga nagadala upod sini sang pagsalig nga kabuhi nga walay katapusan.
16. (a) Sugod sang Pentecostes 33 C.E., paano nakabenepisyo ang mga sumulunod ni Jesus gikan sa aman nga ginhimo paagi kay Cristo? (b) Pagkatapos sadto, ano ang ginakinahanglan sa ila?
16 Sugod sang Pentecostes 33 C.E., ang mga benepisyo sang halad ni Jesus nagsugod nga maaplikar sa matutom nga mga sumulunod ni Jesus. Ang ginsulat sang ulihi ni Pablo sa Roma 5:1 nagmatuod sa ila: “Busa sanglit ginapakamatarong kita paagi sa pagtuo, may paghidait kita sa Dios paagi sa aton Ginuong Jesucristo.” Sang mabun-ag sila tanan mga kaliwat ni Adan. Subong mga makasasala, nahamulag sila sa Dios. Wala sing maayong buhat nga nahimo nila sing personal ang nakakanselar sang ila pinanubli nga sala. Apang paagi sa Iya dibagay nga kaluoy, ginbaton ni Jehova ang halad sang himpit tawhanon nga kabuhi ni Jesus tungod sa kaanakan ni Adan. Para sa mga nagatuo sa sining aman, nangin posible karon nga matigayon nila ang pagkamatarong kag maadoptar sang Dios subong mga anak nga may paglaum nga langitnon nga kabuhi. (Efeso 1:5-7) Apang ano ang labi pa nga ginakinahanglan sa bahin nila? Huo, dapat sila maglakat sa dalanon ni Jehova. Indi na sila dapat maghimo sing sala. Apang nahibaluan nila nga bisan ano man nga pagkamatarong ang yara sa ila resulta ini sang dibagay nga kaluoy sang Dios nga ginpabutyag paagi kay Cristo. Subong sang ginasiling sang kasulatan, ‘naagom [nila] ang paghidait sa Dios paagi kay Jesucristo.’
17, 18. (a) Ang “iban nga mga karnero” bala nagaagom sing paghidait upod sa Dios? (b) Anong dugang nga mga pamangkot ang dapat binagbinagon?
17 Ano naman ang mga ginapatuhoyan ni Jesus subong iya “iban nga mga karnero”? (Juan 10:16) Ginaagom bala nila ina nga paghidait upod sa Dios? Indi subong mga anak sang Dios, apang ang Colosas 1:19, 20 nagalakip sa ila subong mga nakabaton sang balaan nga paghidait. Nagasiling ini nga nakita sang Dios ang maayo paagi kay Cristo nga “paagi sa iya sa pagpasag-uli sang tanan nga butang sa iya kaugalingon nga nagapakighidait paagi sa dugo nga iya [Jesus] gin-ula sa usok sang pag-antos, bisan kon sila mga butang sa duta [kon sayuron, ang mga ginkahamut-an sang dayon nga kabuhi sa paraiso nga duta] ukon mga butang sa langit.” Ining may dutan-on nga paglaum ginpahayag nga matarong kag nagaagom sing paghidait upod sa Dios bisan karon, indi subong mga anak, kundi subong ‘mga abyan sang Dios,’ subong nga amo anay si Abraham. Daw ano ka nahamut-an nga kahimtangan ina!—Santiago 2:23.
18 Ikaw bala personal nga nagaagom sing paghidait? Naeksperiensiahan mo bala ini sing bug-os subong nga posible para sa mga tawo nga nagakabuhi sa sining labing importante nga tion sang maragtas? Sa masunod nga artikulo binagbinagon naton ang pila ka butang nga makabulig sa aton nga mapaposible ina.
Repaso nga mga Pamangkot
◻ Ngaa ang kalibutan wala sing paghidait?
◻ Ano nga paghidait ang ginahatag karon sang Dios?
◻ Sin-o ang magaagom sina nga paghidait?
◻ Paano ang pagkamatarong importante nga bahin sini nga paghidait?
[Laragway sa pahina 14]
“Ang tagsatagsa nga nakapamati kag nakatuon sa Amay nagakari sa akon”