Kon Paano Ka Makaeksperiensia sing Balaan nga Paghidait sing Labi Pa
“Kabay kuntani nga nagpamati ka sa akon mga sugo! Nian ang imo paghidait nangin subong kuntani sang suba, kag ang imo pagkamatarong nangin subong sang mga balud sang dagat.”—ISAIAS 48:18.
1. Ano ang kinahanglanon agod maeksperiensiahan naton ang paghidait sing dugang pa?
ANG mga nagapakigbahin sing tayuyon sa pagtuon sang kongregasyon sa Biblia paagi sa bulig sining magasin nagakilala sa balor sang paghidait nga ginahatag sang Dios, kag luyag nila ina nga paghidait. Walay duhaduha nga ang kalabanan nagaagom sini. Apang indi tanan nagaeksperiensia sini sing labi pa sa kuntani maeksperiensiahan nila. Ngaa amo sini? Nahanungod sa mga may balaan nga paghidait, si Jehova nagasiling: “Ako, si Jehova, amo ang imo Dios, ang Isa nga nagatudlo sa imo sa kapuslanan, ang Isa nga nagatuytoy sa imo sa dalanon nga laktan mo. Kabay kuntani nga nagpamati ka sa akon mga sugo! Nian ang imo paghidait nangin subong kuntani sang suba, kag ang imo pagkamatarong nangin subong sang mga balud sang dagat.”—Isaias 48:17, 18.
2. (a) Ano ang ginapakita sang ekspresyon nga “nagpamati”? (b) Pila sa mga sugo sang Dios ang dapat naton pamatian? (1 Juan 5:3)
2 Sing hayag, ang bisan sin-o makabenepisyo gikan sa pagtambong sa mga miting diin ginahambalan naton ang Biblia. Apang yadto lamang ang nagapamati sa mga sugo ni Jehova, personal nga nagaaplikar sini kag nagapahisuno sa sini, ang tunay nga nagaagom sing matuod nga paghidait. May mga bahin bala nga dapat mo ini himuon sing labi pa? (2 Pedro 1:2) Indi bastante para sa aton nga pamatian ang pila sa mga kinahanglanon sang Dios apang ipahigad yadtong nasapwan naton nga indi kombeniente ukon mas mabudlay. Sang gintinguhaan sang Yawa nga sulayon si Jesucristo tungod sa iya makagud nga panghunahuna, si Jesus malig-on nga nagsabat: “Nasulat na, ‘Indi lamang sa tinapay mabuhi ang tawo, kundi sa tagsa ka pulong nga nagaguwa sa baba sang Dios.’”—Mateo 4:4.
3. Ano nga bahin sang aton kabuhi ang ipahisuno naton sa mga dalanon ni Jehova agod tunay kita nga may bugana nga paghidait?
3 Ang mga sugo sang Dios nagahilabot sa tagsa ka bahin sang aton kabuhi. Una sa tanan, nagadalahig ini sa aton kaangtanan kay Jehova. Nian nagaapektar ini sa aton punto-de-vista sa iya kitaon nga organisasyon kag sa Cristianong ministeryo, sa paagi nga ginatratar naton ang mga katapo sang pamilya, kag sa aton pagpakig-angot sa mga tawo sang kalibutan. Yadtong hanuot nga nagapamati sa mga sugo ni Jehova sa sining tanan nga butang amo ang ginapakamaayo sang bugana nga paghidait. Binagbinagon naton ang pila ka butang nga magabulig sa aton sa pag-eksperiensia sina sing personal.
Ang Bisan Diin Bala Sining mga Bagay Nagakinahanglan sang Igtalupangod Naton?
4. (a) Ngaa ang pagkamay pagtuon sa Biblia sa puluy-an ukon pagkadto sa Kingdom Hall indi garantiya nga kita may paghidait upod sa Dios? (b) Ano ang ginalakip sa pagtuo kay Jesucristo? (Juan 3:36)
4 Ginsugdan mo bala sining karon lang ang pagtuon sang Biblia upod sa mga Saksi ni Jehova? Ukon ayhan nagapakig-upod ka bala sa lokal nga kongregasyon sa pila na ka bulan ukon tuig? Kon amo, walay duhaduha nga nasapwan mo ang kalipay sa pagtigayon sing ihibalo tuhoy sa mga katuyoan sang Dios nga nabuksan sa atubangan mo. Apang ang kamatuoran nga ang isa ka tawo naluyag sa pagtuon sang Biblia sa puluy-an ukon nalipay sa pagkadto sa Kingdom Hall wala nagapamatuod nga sia may paghidait upod sa Dios. Kita tanan natawo sa sala, kag ang paghidait upod sa Dios posible para sa aton paagi lamang kay Jesucristo. (Isaias 53:5; Binuhatan 10:36) Ang pasapayan nga pagpati lamang kay Jesus wala nagahatag sina nga paghidait. Kinahanglan nga apresyahon naton sing personal ang pagkinahanglan naton sang gawad, ang pagtuo sa balor sang halad ni Jesus, kag nian ang paghatag sing pamatuod sina nga pagtuo paagi sa pagtuman sang iya mga sugo. (Santiago 2:26) Ang isa sa mga sugo nga ginhatag ni Jesus samtang yari sa duta amo nga ang mga mangin mga disipulo niya dapat mabawtismuhan sa tubig. (Mateo 28:19, 20) Ikaw bala natugmawan bilang simbulo sang imo dedikasyon kay Jehova paagi kay Jesucristo?
5. Ngaa ang dedikasyon kag bawtismo importante sa aton pagkamay paghidait upod sa Dios?
5 May butang bala sa imo kabuhi nga nagadiskwalipikar sa imo para sa bawtismo? Kon nahibaluan mo nga may yara, ukon kon sa imo pagtuon nahibaluan mo nga amo sini ang kaso, indi magpalantang sa pagtadlong sang mga bagay. Hibalua nga ang bisan ano nga panimuot ukon paggawi nga magadiskwalipikar sa isa para sa bawtismo isa man ka sablag sa iya pagpakighidait sa Dios. Maghulag upod ang kadagmit samtang may kahigayunan pa. Subong sang ginapakita sang 1 Pedro 3:21, yadtong ginhatagan sing maayong konsiensia ni Jehova nga Dios magadedikar anay sang ila kaugalingon sa iya sa sadsaran sang pagtuo sa halad ni Cristo, magapabawtismo bilang simbulo sina nga dedikasyon, kag magahimo sang kabubut-on sang Dios. Nian ang paghidait nga nagaupod sa maayong konsiensia bangod sang pagtigayon sang kalahamut-an nga tindog sa atubangan sang Dios mangin ila; indi ini posible sa iban nga paagi. Sa pagkamatuod, pamuno lamang ini.
6. Ngaa ang aton panimuot sa mga miting sa kongregasyon may kahilabtanan sa aton pag-agom sing paghidait?
6 Masunod, binagbinaga ang imo pagkatayuyon sa pagtambong sa mga miting sa kongregasyon kag ang imo pagpakigbahin sa sini subong sang masarangan mo. Ini bala nga mga miting may lugar sa imo kabuhi nga wala mo ginapahanugutan nga maupangan sang kalibutan ukon sang iban pa personal nga mga hilikuton? Nagahanda ka bala para sa mga miting kag ginakabig nga pribilehiyo ang pagpakigbahin? Ini nga mga butang may pat-od man nga kahilabtanan sa pag-agom sing paghidait sang isa. Ngaa? Bangod ang espiritu sang Dios yara sa iya nagatipon nga katawhan, kag ang paghidait amo ang bunga sina nga espiritu. (Galacia 5:22) Sa sining mga miting nga ginabuligan kita sa paghangop sa mga kinahanglanon ni Jehova, kag kinahanglan naton ini agod himuon kon ano ang kalahamut-an sa iya mga mata. Diri man kita makatuon kon paano pauswagon ang paghidait sa aton mga kaangtanan sa isigkatawo—sa kongregasyon, sa balay, sa eskwelahan, kag sa aton palamugnan. Ang aton mga miting isa sa pangunang mga paagi diin ginatudluan kita ni Jehova, kag subong sang ginapakita sang Kasulatan, ang mga tinudluan ni Jehova amo ang nagaagom sang bugana nga paghidait.—Isaias 54:13.
7. Ano nga pagtatap sa mga butang nga nahinun-anonan sa aton mga miting ang kinahanglan?
7 Ang naangot sing suod nga punto nga nagakabagay sing igtalupangod amo ang amat-amat nga pag-aplikar sa aton personal nga kabuhi sang kon ano ang naton-an naton. Indi naton luyag nga mangin kaangay sang mga Israelinhon nga siling ni Jehova ‘nagapamati liwat kag liwat apang wala nagahangop.’ (Isaias 6:9) Dugang pa, luyag bala naton nga mangin kaangay sadtong ginalaragway ni Jehova kay Ezequiel—mga tawo nga nagapamati sa manalagna ni Jehova apang wala nagahimo sang kon ano ang ginasiling niya bangod ginpakamaayo nila nga himuon ang ila dimatinlo ukon materyalistiko nga mga kailigbon? (Ezequiel 33:31, 32) Sa kabaliskaran, yadtong magatipon sa balay ni Jehova sa aton adlaw kag magatigayon sang iya kahamuot ginalaragway subong nagasiling: “Magtukad kita sa bukid ni Jehova kag sa balay sang Dios ni Jacob; kag tudluan kita niya sang iya dalanon, kag magalakat kita sa iya mga banas.” (Miqueas 4:2) Kon ginadumdom gid naton ang instruksion nga ginabaton naton sa aton mga miting, kon sa tagsa ka miting ginapain naton sa dimagkubos ang isa ka punto nga kinahanglan naton sing personal kag nian pangabudlayan ini, anihon naton ang mahidaiton nga bunga. Subong sang ginsiling ni Jesus sa Lucas 11:28: “Malipayon ang mga nagapamati sa pulong sang Dios kag nagatuman sini!”
8. Paano kita personal nga makabenepisyo sa pagpakigbahin sa pag-alagad sa latagon tubtob sa bug-os nga ginapahanugot sang aton kahimtangan?
8 Ang isa sa mga butang nga ginapadaku sa aton mga miting amo ang importansia sang pagpakigbahin sing bug-os sa pagbantala sang Ginharian sang Dios kag sa pagbulig sa iban nga mangin mga disipulo. (Mateo 24:14; 28:19) Daw ano ka importante ining mga hilikuton sa imo kabuhi? Kon ginapamatian gid naton sing maayo ang ginasiling ni Jehova sa aton paagi sa iya Pulong kag paagi sa iya organisasyon, nahibaluan naton nga amo ini ang labing importante nga hilikuton nga ginahimo karon sa duta. (Bugna 14:6, 7) Kag kilala ini nga kamatuoran nga yadtong yara sa bug-os tion nga pag-alagad—subong man yadtong, bisan indi makapayunir, tunay nga makugi sa ministeryo—amo ang sa tunga naton nga malipayon sing talalupangdon. Ang paghidait nga ginaagom nila indi kaangay sang isa ka tulo lamang sang tubig, kundi subong sang ginasiling ni Jehova, ini mangin “kaangay sang suba.” (Isaias 48:18) Amo bala sina ang ginaeksperiensia mo? Kita tanan makaeksperiensia sina.
9. Ano ang magabulig sa aton agod mahuptan ang aton hatag-Dios nga paghidait bisan pa kon aton maeksperiensiahan ang tuman nga kabudlayan?
9 Apang, ang aton pagpamati sining tanan nga laygay wala nagahimo sa aton nga kabalan sa mga pag-ipit sa kabuhi sa karon nga sistema sang mga butang. Apang bisan ano man kabudlay ang mga kahimtangan, ginapasalig kita sang Dios sang iya mahigugmaon nga bulig kon magaliso kita sa iya. (1 Pedro 5:6, 7) Naton-an bala naton nga pangayuon ang bulig kag panuytoy ni Jehova sa tanan nga butang nga ginahimo naton, hilway nga nagaliso sa iya sa pangamuyo kag, sa tapos mahimo ang aton masarangan sa mabudlay nga mga kahimtangan, nagatugyan sang aton mga lulan kay Jehova, masinaligon nga nagabilin sini sa iya? (Hulubaton 3:5, 6; Salmo 55:22) Mainit kita nga ginapalig-on sa Filipos 4:6, 7: “Dili kamo maghimud-os sa bisan ano, kundi sa tagsa ka butang sa pangamuyo kag pag-ampo nga may pagpasalamat ipakilala sa Dios ang inyo mga pangabay; kag ang paghidait sang Dios nga nagalabaw sa tanan nga paghangop, magatipig sang inyo mga tagipusuon kag inyo mga painoino sa kay Cristo Jesus.” Daw ano ka makatilingala nga aman ina! Naton-an mo bala nga makabenepisyo sing bug-os gikan sa paghidait sang Dios nga ginhimo nga posible?
Padayon nga Himud-osan ang Paghidait
10. Sa tapos mapangita ang paghidait, ano ang kinahanglan sa bahin naton?
10 Kon kita may paghidait na, indi naton dapat ini pagpatumbayaan. Ang makugi nga panikasog kinahanglanon agod mahuptan ini. Sa amo ang 1 Pedro 3:10, 11 nagasiling: “Ang buot maghigugma sang kabuhi kag magtan-aw sing mga adlaw nga maayo, . . . magpangita sia sang paghidait kag magsunod sini.” Bangod nahimud-osan ang isa ka tulumuron kag natigayon ang paghidait, binuang para sa isa nga pasapayanan ina nga tulumuron. Sa tapos matinguhaan kag matigayon ang paghidait, dapat kita magbantay batok sa mga butang nga magaupang sa sini. Labi pa sa sina, dapat naton himud-osan sing aktibo ang mga butang nga nagaamot sa paghidait.
11. (a) Ano nga panimuot ang mahimo nga magabutang sa katalagman sang aton kaangtanan kay Jehova? (b) San-o kita tunay nga mangayo sing bulig sa Dios kon tuhoy sa mga pagsulay? (Mateo 6:13)
11 Kon aton natigayon ang paghidait upod sa Dios paagi sa iya gin-aman, dapat kita maghalong nga indi pag-upangan ina nga kaangtanan paagi sa pagbalik sa paghimo sing sala. Sa pagkamatuod, bangod kita tanan dihimpit, kita tanan nagapakasala. Apang may katalagman kon ang isa magapakamatarong sa iya kaugalingon sang mga panimuot kag mga buhat nga ginapakamalaut sang Dios. Indi lamang kita makapakido sang aton abaga kag makasiling, “Amo gid ako sina.” (Roma 6:16, 17) Dapat naton hinulsulan ang sala nga nahimo sa baylo nga pakamatarungon ini, kag nian dapat kita mangayo sing kapatawaran sa Dios sa sadsaran sang aton pagtuo sa halad ni Jesus. Dapat man naton ton-an ang magpangayo sing bulig sa Dios sa wala pa makahimo sing sala, sa baylo nga tinguhaan awayon sing isahanon ang inaway, sa ulihi magapalupig, kag nian magapangayo sing kapatawaran. Paagi sa bulig sang Dios, madinalag-on nga aton masuklub “ang bag-ong personalidad nga gintuga suno sa kabubut-on sang Dios sa matuod nga pagkamatarong kag katutom.”—Efeso 4:20-24.
12. (a) Agod maagom ang kalipay, anong iban pa nga kaangtanan ang nagakinahanglan sing igtalupangod? (b) Ano ang ginakinahanglan sa aton sa sining bahin?
12 Sa pagkamatuod, ang pag-agom sing paghidait nagadalahig man sing kaangtanan sa iban nga katawhan. Ang matuod nga mga Cristiano nagaalagad sa Dios subong bahin sang isa ka organisasyon; yara sila sa “pagpakig-upod sang mga kauturan.” (1 Pedro 2:17) Subong sang ginsiling ni Jesus nga matuod sa iya mga sumulunod, talalupangdon sila bangod sang ila gugma sa isa kag isa. (Juan 13:35) Apang wala sing isa sa ila ang himpit. Bangod sang aton kaugalingon nga pagkadihimpit kag sadtong iya sang iban, dapat kita mangamuyo sing hanuot sa pila ka kahimtangan kag mangabudlay sing lakas nga malubad ang mga palaligban. Ang Hebreo 12:14 nagalaygay sa aton: “Tinguhaa ninyo ang pagpakighidait sa tanan nga tawo.” Kag sa aton kaangtanan sa aton Cristianong kauturan nga mga lalaki kag mga babayi, yara ang pinasahi nga obligasyon nga magpadayon sa pagtinguha sang paghidait. Sing prangka, ang 1 Tesalonica 5:13 nagasiling: “Magmahidaiton sa isa kag isa.” Nagakahulugan ina indi lamang sa pag-untat sa pagbalus kundi nga mangin aktibo nga manugpauswag sang paghidait, nagahimo sang nahaunang tikang agod mapasag-uli ang paghidait kag handa nga magpaubos tungod sa paghidait.—Efeso 4:1-3.
13. (a) Sa pagpauswag sang paghidait upod sa mga ditumuluo, ano ang mahimo naton himuon, apang paano naton mapasundayag nga ang paghidait upod sa Dios amo ang una? (b) Paano posible para sa aton ang may paghidait kon may kagamo sa palibot naton?
13 Apang, sa guwa sang kongregasyon indi tanan maluyag nga magmahidaiton. Gani, sing realistiko, ang Roma 12:18 nagalaygay: “Kon mahimo, sa masarangan ninyo, magpakighidait sa tanan nga tawo.” Apang ang aton panikasog sa pagpauswag sing paghidait wala nagalakip sang pagkompromiso kon tuhoy sa matarong nga mga kinahanglanon ni Jehova. Mahimo naton bag-uhon ang tion nga himuon ang pila ka butang, apang nahibaluan naton nga dimaalamon ang indi magtambong sa mga miting sa kongregasyon ukon mag-untat sa pagpakigbahin sa pag-alagad sa latagon agod mahuptan ang paghidait upod sa tiayon ukon mga himata. Kag nahibaluan naton nga si Jehova indi mahamuot sa pagbuylog naton sa didiosnon nga mga buhat upod sa mga kaupod sa trabaho ukon mga kabutho agod matigayon ang ila kahamuot. Ginakilala naton nga ang matuod nga paghidait iya lamang sadtong una sa tanan nagaagom sing paghidait upod sa Dios, sa mga nagahigugma sang kasugoan ni Jehova kag nagalakat sa iya mga dalanon. Amo ina ang paghidait nga ginapakabahandi naton labaw sa tanan. (Salmo 119:165) Matuod, sa palibot naton mahimo nga may kagamo. Ang mga ditumuluo mahimo magabaisay kag magainaway sa isa kag isa; mahimo sila magahimo sing malain sa aton bangod sang aton pagtuo. Apang nahibaluan naton kon paano kita gintudluan sang Pulong sang Dios sa paggawi sang aton kaugalingon. Paagi sa padayon nga pagsunod sa dalanon nga nahisuno sa matarong nga mga dalanon ni Jehova, wala kita ginadingotan sang paghidait nga amo ang labing importante.—Ipaanggid ang Salmo 46:1, 2.
14. Bisan pa personal kita nga nagaeksperiensia sing kapipit-an, ano ang nagahimo sini nga posible para sa aton nga padayon nga mahuptan ang nasulod nga kakalma kag masanag nga palaabuton?
14 Sa katapusan nga gab-i sa wala pa sia mapatay, ginsilingan ni Jesus ang iya matutom nga mga apostoles: “Ini napamulong ko sa inyo, agod nga kamo may paghidait sa akon. Sa kalibutan may kapipit-an kamo, apang magpakalig-on kamo! nadaug ko ang kalibutan.” (Juan 16:33) Huo, nagaeksperiensia kita sing kapipit-an. Subong mga Cristiano, nagaagom kita sing lainlain nga sahi sang paghingabot. Nagaeksperiensia kita sing inhustisya, kag madamo ang nagaantos sing malubha nga balatian. Apang ang balaan nga paghidait nagasakdag sa aton sa sining tanan. Bangod gintudluan kita ni Jehova, nahibaluan naton kon ngaa ginahingabot ang mga Cristiano. Wala kita nagaduhaduha kon ngaa may inhustisya kag kon ngaa nagaantos kita sing balatian. Nahibaluan man naton kon ano ang yara sa palaabuton. Nahibaluan naton nga subong resulta sang matutom nga pagkabuhi ni Jesus kag sang iya mahalaron nga kamatayon, ang kaluwasan pat-od gid. Dugang pa, nahibaluan naton nga bisan ano man nga problema ang ginaatubang naton karon, makaliso kita sa Dios sa pangamuyo upod ang pagsalig nga mahigugmaon sia nga nagaulikid sa aton kag magasakdag sa aton paagi sa iya espiritu.—Roma 8:38, 39.
15. Paano nga ang paghidait nga ginapaposible ni Cristo indi kaangay sang kon ano ang ginatanyag sang kalibutan?
15 Sing nagakaigo, si Jesus nagsiling sa Juan 14:27: “Ang paghidait ginabilin ko sa inyo, ang akon paghidait ginahatag ko sa inyo. Indi subong sang paghatag sang kalibutan ang paghatag ko sa inyo. Dili malisang ang inyo mga tagipusuon, ukon mahadlok.” Matuod gid ini—ang kalibutan wala sing kaanggid nga paghidait nga ginahatag sang Dios paagi kay Jesucristo. Nagahimo ini sa aton nga makusog sa atubangan sang mga kahimtangan nga magahimo sa iban nga madulaan sang tanan nga paglaum.
16. (a) Ano nga palaabuton ang yara sa unahan sadtong tunay nga nagapakabahandi sa paghidait nga ginahatag sang Dios? (b) Paano naton mapakita nga ginapakabahandi naton ina nga paghidait?
16 Daw ano ka makatilingala nga palaabuton ang nagahulat para sa tanan nga nagaagom karon sing paghidait nga naghalin sa Dios kag nagahatag sing importansia nga nagakabagay sa sini sa ila kabuhi! Sa dili madugay ang kalibutan nga may kaawayon sa Dios madula. Ang tanan nga tinuga sa ulihi mangin bug-os nga nahiusa sa paghidait paagi sa matarong nga mga kinahanglanon sang Soberano sa Bug-os nga Uniberso. Kabay nga ang aton pasalamat sa sining matahom nga palaabuton magapahulag sa aton nga magpangabudlay nahisuno sini karon. Kabay nga kita tanan magapamati sing maayo sa instruksion ni Jehova kag magapatudok sing malig-on sang iya mga sugo sa aton tagipusuon agod higugmaon naton sing matuod ang iya mga dalanon kag himuon ang iya ginasugo. Subong sang ginasiling sang Hulubaton 3:1, 2: “Anak ko, indi pagkalimti ang akon kasugoan, kundi magbantay ang imo tagipusuon sang akon mga sugo, kay ang kalawigon sang mga adlaw kag katuigan sang kabuhi kag ang paghidait idugang nila sa imo.”
Repaso nga mga Pamangkot
◻ Suno sa Isaias 48:18, ano ang kinahanglanon agod may bugana kita nga paghidait?
◻ Paagi sa paghimo sang anong mga butang nga maeksperiensiahan naton ang balaan nga paghidait sing dugang pa?
◻ Ano ang ginapaabot sa aton agod mahuptan ang paghidait upod sa aton kauturan nga mga lalaki kag mga babayi?
◻ Paano naton mahuptan ang paghidait bisan pa ginalibotan sang mga ditumuluo?
[Laragway sa pahina 16]
Bawtismo
[Mga Laragway sa pahina 17]
Regular nga pagtambong sa miting
Pag-aplikar sang naton-an naton
[Mga Laragway sa pahina 18]
Pagpakigbahin sing bug-os sa pag-alagad sa latagon
Pagtugyan sang aton mga lulan kay Jehova