Ang Bag-o nga Bahin sang Balaan nga Kaalam
“ANG Dios nagsiling kay Moises: ‘AKO AMO AKO.’ Kag nagsiling sia: ‘Amo ini ang isiling mo sa katawhan sang Israel, “SI AMO AKO nagpadala sa akon sa inyo.”’” (Exodo 3:14) Ginpaathag ni Jehova kay Moises nga antes sini bisan ang Iya mga alagad wala makahangop sa bug-os nga kahulugan sang Iya ngalan. Sia ang Dios sang katuyuan kag pirme nagatuman sang iya kabubut-on. Kon ginapangayo sang mga sirkunstansia, sarang niya mabalhin ang iya metodo agod matuman ang iya katuyuan. Amo sia sina ka maalamon!
Wala pag-apresyaha ni Satanas ang kahulugan sang ngalan sang Dios. Nahibaluan niya ang nahanungod sa kahoy sang kabuhi sa katamnan sang Eden. Kon gintuytuyan niya sanday Adan kag Eva sa sini, mahimo ini magabutang kay Jehova sa duha ka pililian: tumanon ang iya pulong nga ang sala magakahulugan sang kamatayon nila ukon tumanon ang iya pulong tuhoy sa kahoy sang kabuhi. (Genesis 2:9; 3:1-6) Bisan ano ang matabo, si Satanas pat-od nga mapaslawan.
Ginsugdan karon sang Dios nga ipasundayag ang kaalam nga wala ginahulat sang iya espiritu nga mga anak kag wala anay mabuyagyag sa ila. (Ipaanggid ang Efeso 3:10.) Ginsugdan niya ang mga serye sang mga pahibalo kag mga hitabo nga sa sulod sang malawig nga panag-on sang tion makatilingala nga magapasundayag sang iya dakung kaalam kag sang iya ikasarang sa pagtuman sang iya dayon nga katuyuan, nga amo ang pagpuno sa duta sing malipayon, maunungon nga mga tawo nga mahimo mabuhi sing dayon sa Paraiso. (Genesis 1:27, 28) Sa liwat kag liwat sarang mapatiku sang Dios ang mga panikasog ni Satanas nga magpasilabot.
Ang Balaan nga Tinago Ginapaathag
Sa gilayon pagkatapos sang nahaunang pagrebelde, ang Dios naghulag. Ginpamatbatan niya ang nakasala nga mag-asawa kag ginlig-on ang iya pagpahanugot sang kamatayon bangod sang pagkadimatinumanon. Kamusta ang pagkaon nanday Adan kag Eva gikan sa kahoy sang kabuhi? “Nian si Jehova nga Dios nagsiling: ‘Yari karon ang tawo nangin subong sang isa sa aton sa pagkilala sang maayo kag malaut, kag karon basi nga idab-ut niya ang iya kamut kag magkuha man sang kahoy sang kabuhi kag magkaon kag magkabuhi sing dayon,—’ Busa si Jehova nga Dios nagtabog sa iya gikan sa katamnan ang Eden.”—Genesis 3:17-23.
Sa sini nga tion ginhimo man sang Dios ang papel sang Ebanghelisador, ukon Manugbantala sang maayong balita. Ginbungat niya ang nahaunang tagna: “Si Jehova nga Dios nagsiling sa man-ug: . . . ‘Butangan ko sing kaawayon sa tunga mo kag sang babayi kag sa tunga sang imo binhi kag sang iya binhi. Sia magadugmok sang imo ulo kag dugmukon mo ang iya tikod.’” (Genesis 3:14, 15) Mga siglo sang ulihi si apostol Pablo nagpaathag: “Kay ang [tawhanon nga] tinuga nasakop sa kaluyahon, indi sa iya kaugalingon nga kabubut-on kundi sa kabubut-on sadtong nagsakop sa iya sa paglaum.”—Roma 8:20.
Huo, pagkatapos sina ang tawo walay mahimo nga nakadena sa kamatayon nga napanubli kay Adan, apang ang Dios nagpahayag sang iya katuyuan agod luwason ang matinumanon nga kaanakan ni Adan. Apang, ano ang “paglaum”? Paano niya maluwas ang katawhan kag masakdag gihapon ang iya pamatbat nga kamatayon sa sala? Amo ini ang tinago nga kaalam sang Dios; nagadalahig ini sa “balaan nga tinago nga nalipdan gikan sa nagligad nga sistema sang mga butang kag gikan sa nagligad nga kaliwatan.” (Colosas 1:26; 1 Corinto 2:7, 8) Bisan pa wala mahangpi sang mga matutom anay ang tinago, nagalaum sila nga sa bisan paano luwason sila sang Dios. Ti, bisan ang mga anghel nalangkag sa paghibalo kon paano tumanon ni Jehova ang iya katuyuan! (1 Pedro 1:10-12) Nahangpan mo bala ining balaan nga tinago?
Gintubos Paagi sa Gawad
Sing amat-amat sa sulod sang mga siniglo, si Jehova nagdugang sing impormasyon sa iya orihinal nga saad. Ginsaad niya kay Abraham nga matutom ang binhi nga paagi sa sini magahalin ang mga pagpakamaayo para sa tanan nga matinumanon nga katawhan. (Genesis 22:15-18) Paagi kay Jacob ginbuyagyag niya nga ang binhi mangin isa ka hari gikan sa tribo sang Juda. (Genesis 49:10) Sa sini nga tion ang diosnon nga mga tawo nagtuo sa pagbanhaw sa minatay, bisan pa wala nila mahangpi sing bug-os kon paano ini mahanabo. (Job 14:14, 15; Hebreo 11:19) Sang ulihi, ang Dios nanaad kay David nga ang nagapakari nga Hari, ukon Mesias, mangin kaliwat ni David kag magahari tubtob sa walay katubtuban.—2 Samuel 7:16.
Ang tanan nga mga manalagna nagdugang sing mga bahin sang paghangop sa balaan nga tinago, apang indi makita sang mga tawo ang bug-os nga laragway. Sang ulihi, ang tion sang pagluntad sang Mesias nag-abot, kag nian, sa ulihi gid man, ining nanuhaytuhay katama nga kaalam sang Dios nangin labi kaathag. Nasentro ini kay Jesucristo kag sa paghatag sang iya himpit tawhanon nga kabuhi subong katumbas nga gawad para sa katawhan. Sa sina nga sadsaran, ang iban sa mahimayaon nga katuyuan ni Jehova paagi sa Ginharian magasunod. Nahangpan mo bala ang gawad?
Sa Roma kapitulo 5 kag 6, si Pablo nagahatag sing matahom nga paathag sa sini. Sa Roma 5:12 ginapaathag niya ang aton napanubli nga sala kag kamatayon. Padayon nga ginpakita niya kon paano ang epekto sang isa lamang ka sala sang himpit nga si Adan kag pagkawasi sang kabuhi para sa iya kaanakan sarang matimbangan sang isa pa ka himpit tawhanon nga kabuhi. Napamatud-an ina nga amo ang kabuhi sang “tawo si Jesucristo.” (Bersikulo 15-21; tan-awa man ang 1 Timoteo 2:5, 6.) Ngaa maaman ni Jesus ini nga gawad? Bangod Anak sia sang Dios, si Jesus “matutom, walay kasawayan, walay dagta, nagapahain sa mga makasasala.” (Hebreo 7:26; Lucas 1:32, 33) Indi na kinahanglan nga tinguhaan naton ipaathag ang detalye sang mga genetiko sang pagkabun-ag ni Jesus. Ginpasalig ni anghel Gabriel sa iloy ni Jesus, nga si Maria, kag sa aton, nga wala sing butang nga imposible sa Dios. (Lucas 1:37) Gani si Jesus, bisan natawo gikan sa isa ka babayi nga kaliwat ni Adan, Anak sang Dios—isa gid ka himpit nga tawo. Ang iya dugo, ukon kabuhi, takus sing labi pa sa dugo sang dimaisip nga mga sapat nga ginhalad sang Aaronikong mga saserdote sang Israel sa templo sang Jerusalem. Sia amo ang “Kordero sang Dios nga nagakuha sang sala sang kalibutan.”—Juan 1:29; 3:16.
Sarang bala mahimo sang Dios ini nga kahimusan paagi kay Jesus kag sa gihapon mangin makatarunganon? Kon ginbanhaw sang Dios ang iya Anak pa kabuhi sa ikatlo nga adlaw, ano ang natabo sa gawad? Ginapasalig sa aton ni Pablo nga ang Dios makatarunganon. Sundi ang iya pangatarungan: “Apang paagi sa kaluoy ginpakamatarong sila sa walay bayad [kay ini libre], sa pagtubos nga yara kay Cristo Jesus. Kay ginpakita sia sang Dios nga dayag nga nagatagumatayon subong halad sa pagpasag-uli nga himuslan paagi sa pagtuo. Magabindikar ini sa iya kaugalingon nga katarungan (kay sa iya pagbatas, ginkalimtan sang Dios ang mga sala anay sang tawo)—agod bindikahon ang iya katarungan sa karon nga tion, kag ipakita nga sia mismo matarong, kag ginahimo man niya nga matarong ang mga nagatuo kay Jesus.” (Roma 3:24-26, An American Translation) Karon, ano ang buot silingon sini? Nga si Jesus, subong himpit, unod-kag-dugo nga tawo, aktuwal nga napatay subong tawo kag nagapabilin nga patay subong tawo sing dayon. Napatay sia “sing makaisa subong tawo sang ginhalad niya ang iya kaugalingon.” (Hebreo 7:27) Gani ang gawad importante. Si Jesus napatay sa unod; sa ikatlo nga adlaw “ginbuhi [sia] sa espiritu.”—1 Pedro 3:18.
Ang Bag-ong Katipan kag ang Bag-ong Tinuga
Karon nakita naton ang putukputukan nga bahin sang balaan nga tinago. Ang katutom ni Jesus tubtob sa kamatayon nagakalipikar sa iya nga mangin Mataas nga Saserdote kag Hari ni Jehova. Paagi sa iya ginpatulo nga dugo ginalig-on niya ang bag-ong katipan. Ining bag-ong katipan ang magapatubas sang langitnon nga mga kaupod nga magagahom kaupod ni Jesus subong mga hari kag mga saserdote. (Bugna 5:9, 10; 20:4, 6) Nagahuman sila sa isa ka bag-ong pungsod, “bag-ong tinuga,” kag importante gid ina!—Galacia 6:15, 16.
Binagbinaga: Ang Dios paagi kay Cristo Jesus nagpili sing tiglawas nga kadamuon gikan sa katawhan, lunsay mga lalaki kag mga babayi. Sarang niya sila mapahayag sing makatarunganon nga matarong kag matawag sila nga espirituwal nga mga anak. Sa gintalana nga tion sang Dios sa tapos sang ila kamatayon, ginabanhaw niya sila pakadto sa langit kag ginahatagan sila sing pagkadimamalatyon, subong sang pagpadya niya kay Jesus! (1 Pedro 1:3, 4) Daku gid ang iya pagsalig sa iya “bag-ong tinuga” kag sa ila katutom sa iya! Daw ano nga sabat sa isa nga nagasumbong sing butig sa ila sa atubangan ni Jehova! (Bugna 12:10) Bisan pa dimamalatyon kaupod ni Jesucristo, indi gid sila mangin dimatutom kay Jehova. Apang indi lamang amo sina.
Ang Paraiso nga Duta
Si Cristo Jesus, upod sa iya kaupod nga langitnon nga mga hari kag mga saserdote, magatatap nga ang katuyuan ni Jehova para sa tawo kag sa duta matuman sing bug-os sa iya Milenyo nga Paggahom. Nagaaplikar sang mga benepisyo sang gawad, banhawon ni Jesus ang patay kag magahimpit sa mga matutom sa tunga nila kag sa mga makalampuwas sa katapusan sining sistema ang mga butang. Sa amo man nga tion, ang duta pagahimuon nga paraiso. Ang tanan nga nagsikway anay sa katapusan nga panikasog ni Satanas sa pagpakamalaut sa ila pagahatagan sing himpit tawhanon nga kabuhi sing dayon. Si Satanas kag ang tanan sang iya malaut nga kadam-an pagalaglagon sing dayon. Ang paghidait kag paghiusa magapangibabaw sa tanan nga tinuga, nagabindikar sing bug-os sa pagkasoberano ni Jehova kag sa iya paggahom paagi sa gugma. Ang mga anghel kag mga tawo nakapasundayag sang matutom nga gugma sa ila Manunuga kag Dios.—Bugna, kapitulo 20.
Mahangpan naton karon sing labi pa ang balaan nga tinago. Nakita naton karon ang kaalam ni Jehova nga nagalabaw bisan sa iya mga desinyo sa pagpanuga sa kalibutan sang mga tanum kag mga sapat. May maayong rason kita sa pagsiling: “O pagkadalom sang kamanggaran kag kaalam kag ihibalo sang Dios! Pagkadimatungkad sang iya mga paghukom . . . Kay gikan sa iya kag paagi sa iya kag tungod sa iya ang tanan nga butang. Sa iya ang himaya sa gihapon. Kabay pa.”—Roma 11:33-36.
[Laragway sa pahina 7]
Ang epekto sang isa ka sala sang himpit nga si Adan kag ang pagdula sang iya kabuhi sarang matimbangan. Paano? Paagi sa isa pa ka himpit tawhanon nga kabuhi, ang iya ni Jesus