Makamamatay nga Tiggulutom sa Tion sang Kabuganaan

“Ang akon mga alagad magakaon, apang kamo gutumon.”—ISAIAS 65:13.

1, 2. (a) Sa ano nga palaligban napaslawan ang panikasog sang mga pungsod? (b) Sa anong realistiko nga paglaum nagatudlo ang Biblia?

ANG makahaladlok nga tiggulutom nagapadulong sa bug-os nga kalibutan! Nagkomento tuhoy sa sini nga krisis, ang editoryal sa The Boston Globe nagsiling: “Ang kalibutan nga may halos isa ka bilyon ka tawo nga nagapuyo sa bibi sang pagkagutom dapat mangita sing mga paagi nga buligan ang pinakaimol nga mga pungsod sa pagtigayon sing butang nga halos pareho sa kabuganaan nga ginaani sang pinakamanggaranon nga mga pungsod.” Apang, bisan ang ginatawag nga abanse sa teknolohiya nga mga pungsod indi makapangangkon nga sila bug-os nga puwera sa kakulang sing kalan-on. Sila man napaslawan sa paghimo sing programa sa pagpat-od nga ang tanan nila nga banwahanon mapakaon. Ang ginatawag nga mga humanist nga nagakabalaka sa kaayuhan sang katawhan nagapanikasog sa paglubad sa nagagrabe nga palaligban. May yara bala solusyon?

² Ang ginbalikwat sa ibabaw nga editoryal nagbaton: “Ang labing makapasubo nga bahin sang kakulang sing kalan-on . . . amo nga ang kalibutan may ikasarang gid sa pagpakaon sa tanan.” Apang nagagrabe gihapon ang tiggulutom kag pagkagutom. Ngaa subong sini? Ang aton mahigugmaon nga Manunuga bugana nga nag-aman para sa binilyon ka tawo sang duta. Sang ginhanda ang duta subong puluy-an sang tawo, ginhimo niya ini nga may ikasarang sa pagpatubas sing bugana, nga sobra sa kinahanglanon sang tanan. (Salmo 72:16-19; 104:15, 16, 24) Bisan sa sining mabudlay nga mga tion, ginapasalig kita nga ang aton Daku nga Manug-aman magahatag sing supisyente nga kalan-on para sa ila nga nagapangita sa husto nga Tuburan. Paagi sa Isa nga iya ginhatag subong amo ang daku nga Administrador sa Kalan-on, sia nagasiling sa aton: “Padayon . . . nga pangitaa anay ang ginharian kag ang pagkamatarong [sang Dios], kag ining tanan nga iban pa nga butang [ang materyal nga mga kinahanglanon sang kabuhi] idugang sa inyo.”—Mateo 6:33; 1 Juan 4:14.

Makamamatay nga Tiggulutom

3. Ano ang tiggulutom nga may labing daku nga kahulugan, kag paano ini gintagna?

³ Ang may labing daku nga kahulugan sa duta karon amo ang makapasubo nga tiggulutom sa espirituwal. Talangkod ini nga may kaangtanan sa kakulang sing paghidait. Ang katawhan nagadalangdalang, nagasalasala sa pagpangita sing dalan paguwa. Ginpasulat sang labing gamhanan nga Dios ang iya manalagna tuhoy sini nga kahimtangan sang nagligad nga madamong siglo, nga nagasiling: “‘Yari karon! Magaabot ang mga adlaw,’ nagasiling ang Soberanong Ginuong Jehova, ‘nga magapadala ako sing tiggulutom sa duta, indi tiggulutom sa kalan-on, kag sing kauhaw, indi sa tubig, kundi sa pagpamati sa mga pulong ni Jehova. Magadalangdalang sila kutob sa dagat pa dagat, kag kutob sa aminhan tubtob gid sa sidlangan. Magadalagan sila pakadto-pakari sa pagpangita sang pulong ni Jehova, apang indi nila makita ini.’”—Amos 8:11, 12.

4, 5. (a) Ngaa indi makita sang iban ang Dios bisan pa ginapangita nila sia? (b) Paano si Jesus tuhay sa relihiosong mga lider sang iya adlaw? (Mateo 15:1-14)

⁴ Apang, may yara bala dalan paguwa sa mabudlay nga kahimtangan? Si apostol Pablo nagasabat sing huo, nga nagapalig-on sa aton paagi sa mga pulong: “Ang Dios nga naghimo sang kalibutan . . . nagpat-od sang gintangdo nga mga panag-on kag sang mga dulunan sang puluy-an sang mga tawo, agod nga pangitaon nila ang Dios, kon kapkapon nila sia kag makita sia, bisan pa, sa kamatuoran, indi sia malayo sa tagsatagsa sa aton.”—Binuhatan 17:24-27.

⁵ Kon ang Dios ‘indi malayo sa tagsatagsa sa aton,’ ngaa nga madamo ang nagapangapkap sa iya, apang indi makakita sa iya? Bangod ginapangita nila sia sa sayop nga mga duog. Pila sa nagatawag sang ila kaugalingon nga mga Cristiano ang personal nga nagakonsulta sa tolon-an sang Cristianismo, ang Balaan nga Biblia? Pila sa ginatawag nga “mga manugbantay” ang nagagamit sang Pulong sang Dios sa pagtudlo sa “mga karnero”? (Ipaanggid ang Ezequiel 34:10.) Ginsilingan ni Jesus ang bugalon nga relihiosong mga lider sang adlaw niya nga wala nila nahibaluan ang “Kasulatan ukon ang gahom sang Dios.” (Mateo 22:29; Juan 5:44) Apang, nahibaluan ni Jesus ang Kasulatan kag gintudlo niya ini sa katawhan, nga iya ginkaluy-an “kay napilasan sila kag nag-aplaag subong sang mga karnero nga wala sing manugbantay.”—Mateo 9:36.

Paano nga Isa ka Tion sang Kabuganaan?

6. Tuhoy sa espirituwal nga kabuganaan, paano ginapasalig ni Jehova ang iya mga alagad?

⁶ Ginapasalig kag ginapalig-on ni Jehova ang sinsero nga nagatinguha sa pagkilala sa iya. Sa pagsabdong sa dimatuod nga relihiosong mga manugbantay, sia nagsiling paagi sa iya manalagna nga si Isaias: “Yari karon! Ang akon mga alagad magakaon, apang kamo gutumon. Yari karon! Ang akon mga alagad magainom, apang kamo uhawon. Yari karon! Ang akon mga alagad magakalipay, apang pakahuy-an kamo.” (Isaias 65:13, 14) Apang paano ang Dios nagaaman sing kabuganaan para sa iya mga alagad? Ano ang dapat himuon naton agod makaambit kita nga may kalipay sa iya aman para sa pagtipig sa kabuhi, walay sapayan sang espirituwal nga tiggulutom karon?

7. Anong dumaan nga drama ang mahigugmaon nga gin-aman sa pagpalig-on sa aton karon?

⁷ Sanglit ang kaluwasan nasandig sing bug-os sa aton paghibalo sang mga kinahanglanon sang Dios kag paghikot nga may pagtuo sa sini, dapat kita magdangop sing malipayon sa Pulong sang Dios, nga nagatinguha nga mahibaluan ang iya kabubut-on para sa aton kag mahantop ang iya paagi sang pagpakig-angot sa aton. (Juan 17:3) Sa sini nga katuyuan, binagbinagon naton karon ang isa ka drama sa Biblia nga nagaanggid sa nagakahanabo karon. Ang sentro nga karakter sa sini nga drama amo ang patriarka nga si Jose. Subong nga si Jehova naghimo sing maalamon nga aman para sa Iya katawhan paagi kay Jose, Sia man mahigugmaon nga nagatuytoy sa mga nagapangita sa Iya karon.—Ipaanggid ang Roma 15:4; 1 Corinto 10:11, foot­note sa Ref­er­ence Bi­ble (); Galacia 4:24.

Si Jose, Manugtipig sing Kabuhi

8, 9. (a) Anong mga pagkaanggid ang makita naton sa ulihi nga mga tion para kay Jose kag para kay Jacob kag kay Paraon? (b) Paano kita mahimo madalahig sa katumanan?

⁸ Subong manugtipig sing kabuhi, si Jose nga anak ni Jacob nagtungod sing daku nga papel. May ginalaragway bala ini sa ulihi nga mga tion? Bueno, binagbinaga ang pagbatas ni Jose sa indi makatarunganon nga pagtrato sa iya sang iya mga utod, ang iya paglandas sa mga pagtilaw sa iban nga pungsod, ang iya dimationg nga pagtuo, ang iya paghupot sing integridad, kag ang pagbayaw sa iya sa isa ka posisyon subong maalam nga administrador sa isa ka tion sang malaglagon nga tiggulutom. (Genesis 39:1-3, 7-9; 41:38-41) Indi bala kita makakita sing kaanggid sa dalanon sang kabuhi ni Jesus?

⁹ Sa tion sang kabudlayan, si Jesus nangin Tinapay sang kabuhi sa tunga sang kalibutan nga ginagutom “sa pagpamati sa mga pulong ni Jehova.” (Amos 8:11; Hebreo 5:8, 9; Juan 6:35) Sa ila pagpakig-angot kay Jose, si Jacob kag si Paraon nagapahanumdom sa aton kay Jehova kag sa iya ginahimo paagi sa iya Anak. (Juan 3:17, 34; 20:17; Roma 8:15, 16; Lucas 4:18) May iban pa nga naghikot sa sining matuod sa kabuhi nga drama, kag binagbinagon naton ang ila mga bahin nga may interes. Wala sing duhaduha nga pahanumdumon kita sang aton pagsandig sa Daku Pa nga Jose, si Cristo Jesus. Nagapasalamat gid kita nga ginatipigan niya kita gikan sa makamamatay nga tiggulutom sa sining naga­gra­be nga “katapusan nga mga adlaw”!—2 Timoteo 3:1, 13.

Ang Drama Nagapasundayag

10. (a) Paano ginhanda si Jose para sa responsable nga papel nga iya tungdan? (b) Anong mga kinaiya ang ginpasundayag niya sang pamatan-on sia?

¹⁰ Sang adlaw ni Jose, wala sing tawo nga makahibalo sing abanse kon ano ang ginatigana ni Jehova para sa Iya katawhan. Apang sang tion nga gintawag si Jose sa pagtuman sang iya importante nga papel, ginhanas na sia ni Jehova kag ginhimpit tuhoy sa iya mga kalipikasyon. Tuhoy sa iya pagkapamatan-on, ang kasaysayan nagasiling: “Si Jose, nga nagapanuigon sing napulog-pito ka tuig, nagapahalab sang panong upod sa iya mga utod, sia pamatan-on kaupod sa mga lalaking anak ni Bilha kag ni Zilpa, mga asawa sang iya amay. Kag si Jose nagdala sa ila amay sing malain nga balita nahanungod sa ila.” (Genesis 37:2) Nagpakita sia sing katutom sa mga interes sang iya amay subong nga si Jesus man nagpakita sing dimationg nga katutom sa pag-atipan sang panong sang iya Amay sa tunga sang “wala sing pagtuo kag malaut nga kaliwatan.”—Mateo 17:17, 22, 23.

11. (a) Ngaa gindumtan si Jose sang iya mga utod sa amay? (b) Ano ang kaanggid nga kahimtangan nga nagdalahig kay Jesus?

¹¹ Ang amay ni Jose, nga si Israel, naghigugma sa iya sing labi pa sa tanan niya nga mga utod nga lalaki kag ginpaboran sia paagi sa pagpahimo sing malaba kag guray-guray nga panapton para sa iya. Bangod sini, ang mga utod sa amay ni Jose “nagsugod sa pagdumot sa iya, kag indi sila makahambal sa iya sing mahidaiton.” Dugang pa nga nakakita sila sing rason sa pagdumot sa iya sang magdamgo sia sing duha ka damgo nga ginpatpat niya sa ila nga nagakahulugan nga sia magagahom sa ila. Sa kaanggid nga paagi, ang mga lider sa tunga sang mga Judiyo nagdumot kay Jesus bangod sang iya katutom, sang iya makahalaylo nga pagpanudlo, kag sang maathag nga pagpakamaayo ni Jehova sa iya.—Genesis 37:3-11; Juan 7:46; 8:40.

12. (a) Ngaa nabalaka si Jacob nahanungod sa kaayuhan sang iya mga anak nga lalaki? (b) Anong pagkaanggid ang makita naton sa ulot sang dalanon ni Jose kag sang iya ni Jesus?

¹² Sang ulihi, ang mga utod ni Jose nagapahalab sing mga karnero malapit sa Siquem. Ang amay ni Jose nabalaka gid bangod didto ginlugos ni Siquem si Dina, amo kon ngaa si Simeon kag si Levi, upod ang ila mga utod nga lalaki, nagpatay sa mga lalaki sadto nga siudad. Ginpalakat ni Jacob si Jose agod tan-awon ang ila kahimtangan kag magreport sa iya. Walay sapayan nga akig ang iya mga utod sa iya, naglakat sa gilayon si Jose agod pangitaon sila. Sa kaanggid nga paagi, malipayon nga ginbaton ni Jesus ang tulumanon nga ginhatag sa iya ni Jehova diri sa duta, bisan pa magakahulugan ini sing daku nga pag-antos sa tion sang paghimpit sa iya subong Pangulo nga Ahente sang kaluwasan. Sa iya pagbatas, daw ano kaayo nga huwaran si Jesus para sa aton tanan!—Genesis 34:25-27; 37:12-17; Hebreo 2:10; 12:1, 2.

13. (a) Paano ginpautwas sang mga utod sa amay ni Jose ang ila dumot? (b) Sa ano mapaanggid ang kasubo ni Jacob?

¹³ Nakita sang napulo ka utod sa amay ni Jose nga nagapadulong sia. Sa gilayon nagsilabo ang ila kaakig batok sa iya, kag nagplano sila sa pagwala sa iya. Sang primero ginplano nila nga patyon sia. Apang si Ruben, bangod sang kahadlok nga sia ang manabat subong panganay, naghaylo sa iya nga ihulog si Jose sa mamala nga buho, nga nagalaum nga mabalik sia sa ulihi kag luwason sia. Wala magdugay, ginhaylo ni Juda ang iya mga utod nga ibaligya sia subong ulipon sa pila ka Ismaelnon nga nagapadulong upod ang ila mga kamelyo. Nian ginkuha sang mag-ulutod ang malaba nga panapton ni Jose kag gintum-oy sa dugo sang lalaki nga kanding kag ginpadala ini sa ila amay. Sang gin-usisa ini ni Jacob, sia nagtuaw: “Bayo ini sang akon anak! Isa ka sapat nga talunon ang nagtukob sa iya! Sa wala sing duhaduha ginkusnit si Jose!” Pat-od nga si Jehova nagbatyag sing kaanggid man nga kasubo sa pag-antos ni Jesus samtang ginatuman niya ang iya tulumanon sa duta.—Genesis 37:18-35; 1 Juan 4:9, 10.

Si Jose sa Egipto

14. Paano kita makabenepisyo sa sining dumaan nga drama?

¹⁴ Indi kita dapat maghinakop nga ang mga katumanan sang dramatiko nga mga hitabo nga nagdalahig kay Jose natabo sa sibu gid nga kronolohiko nga pagpasunod. Sa baylo, makasapo kita sa sini sing mga serye sang mga sulundan nga para sa pagtudlo kag sa pagpalig-on sa aton karon. Subong ginasiling ni apostol Pablo: “Ang tanan nga nasulat sadto anay ginsulat sa pagtudlo sa aton, agod nga paagi sa aton pagbatas kag pagpabakod sang mga Kasulatan may paglaum kita. Karon kabay nga ang Dios nga nagapalig-on kag nagapabakod maghatag sa inyo sing panghunahuna nga subong sang kay Cristo Jesus, agod nga sa tingob mahimaya ninyo sa isa ka tingog ang Dios kag Amay sang aton Ginuong Jesucristo.”—Roma 15:4-6.

15. Ngaa nag-uswag ang panimalay ni Jose kag ni Potipar?

¹⁵ Gindala si Jose sa Egipto, kag ginbaligya sia didto sa isa ka Egiptohanon nga nagahingalan kay Potipar, ang pangulo sang bantay ni Paraon. Nag-upod si Jehova kay Jose, nga nagpadayon sa pagkabuhi suno sa maayong mga prinsipio nga gintudlo sa iya sang iya amay, bisan pa malayo sia sa panimalay sang iya amay. Wala pagbiyai ni Jose ang pagsimba kay Jehova. Ang iya agalon, si Potipar, nag-apresyar sa talalupangdon nga mga kinaiya ni Jose kag ginpadumala sia sa iya bug-os nga panimalay. Ginpakamaayo ni Jehova ang panimalay ni Potipar bangod kay Jose.—Genesis 37:36; 39:1-6.

16, 17. (a) Paano naatubang ni Jose ang dugang pa nga pagtilaw sa integridad? (b) Ang eksperiensia ni Jose sa bilangguan nagapakita sang ano nga pagtuytoy sa mga butang?

¹⁶ Didto sadto nga ang asawa ni Potipar nagtinguha sa paghaylo kay Jose. Padayon nga nangindi sia sa iya. Sang isa ka adlaw ginbuyutan niya ang panapton ni Jose, apang nakapalagyo si Jose kag ang iya panapton nabilin sa kamot sang asawa ni Potipar. Sa atubangan ni Potipar, ginsumbong niya si Jose nga may imoral nga tuyo, kag ginpabilanggo ni Potipar si Jose. Sa sulod sang isa ka tion gingapos sia sing salsalon. Apang sa bug-os nga mga kabudlayan nga iya naeksperiensiahan sa bilangguan, si Jose nagpadayon sa pagpamatuod nga sia isa ka tawo nga may integridad. Sa amo, ginpadumala sia sang manugbantay sang bilangguan sa tanan nga bilanggo.—Genesis 39:7-23; Salmo 105:17, 18.

¹⁷ Sa pagligad sang tion, ang puno sang mga manugtagay sing alak kag puno sang mga manugtinapay ni Paraon nagpaakig sa iya kag ginbilanggo. Ginpaatipan sila kay Jose. Sa liwat, ginmaniobra ni Jehova ang mga butang. Ang duha ka opisyal sang harianon nga panimalay nagdamgo nga nagpalibog sang ila ulo. Sa tapos mapadaku nga ang “mga pagpatpat iya sang Dios,” ginsugid sa ila ni Jose kon ano ang kahulugan sang ila mga damgo. Kag suno gid sa ginsugid ni Jose, pagligad sang tatlo ka adlaw (sang kaadlawan ni Paraon) ang manugtagay ginbalik sa iya katungdanan, apang ginbitay ang puno sang mga manugtinapay.—Genesis 40:1-22.

18. (a) Paano nadumduman si Jose? (b) Ano ang mga damgo ni Paraon?

¹⁸ Bisan pa nangabay si Jose sa manugtagay nga makighambal kay Paraon para sa iya, duha ka tuig pa ang nagligad antes nadumduman sang tawo si Jose. Kag nadumduman lamang niya si Jose bangod sang duha ka makalilibog nga damgo ni Paraon sa isa ka gab-i. Sang wala sa salamangkero nga mga saserdote sang hari ang makapatpat sang ila kahulugan, ginsugiran sang manugtagay si Paraon nga si Jose makapatpat sing mga damgo. Gani ginpatawag ni Paraon si Jose, nga mapainubuson nga nagtudlo sa Tuburan sang matuod nga pagpatpat, nga nagasiling: “Ang Dios magapahibalo sing kaayuhan kay Paraon.” Nian ginsaysay sang manuggahom sang Egipto ang mga damgo kay Jose, subong ang masunod:

“Nagtindog ako sa pangpang sang suba sang Nilo. Kag gikan sa suba sang Nilo may nagtakas nga pito ka baka, matambok kag matahom, kag naghalab sila sa katabun-akan sang Nilo. Kag ang iban nga pito ka baka nagtakas sa ulihi nila, huyos kag tama kalaw-ay kag kagalkal. Wala ako sing nakita nga kaangay sa ila kalaw-ayon sa bug-os nga duta sang Egipto. Kag ang mga baka nga kagalkal kag malaw-ay nagkaon sang pito nga nahaunang mga baka nga matambok. Apang sang nakaon nila sila indi makilala nga nakaon nila sila, kay sila malaw-ay pa, subong sang una. . . .

“Sa tapos sadto nakita ko man sa akon damgo kag yari karon ang pito ka uhay nga nagaulhot sa isa ka dagami, matimsog kag maayo. Kag ang pito ka uhay, laya, kupos, kag ginpakigas sang salatan, nag-ulhot sa ulihi nila. Kag ang kupos nga mga uhay naghalunhon sang pito ka uhay nga maayo. Kag ginsugid ko ini sa mga salamangkero nga mga saserdote, apang wala sing bisan sin-o nga makapahayag sini sa akon.”—Genesis 40:23–41:24.

19. (a) Paano si Jose nagpakita sing pagkamapainubuson? (b) Anong mensahe ang ginpaalinton sang pagpatpat sa mga damgo?

¹⁹ Daw ano ka makatilingala nga mga damgo! Paano ini mapaathag sang bisan sin-o? Ginpatpat ini ni Jose, apang indi sa paghimaya sang iya kaugalingon. Sia nagsiling: “Ang damgo ni Paraon isa. Ang buot na himuon sang matuod nga Dios ginpakita niya kay Paraon.” Nian ginpahayag ni Jose ang gamhanan nga matagnaon nga mensahe sadtong mga damgo, nga nagasiling:

“Magaabot ang pito ka tuig sang dakung kabuganaan sa bug-os nga duta sang Egipto. Apang magaabot sa ulihi nila ang pito ka tuig nga tiggulutom, kag ang bug-os nga kabuganaan malipatan sa duta sang Egipto kag upuron sang tiggulutom ang duta. . . . Kag ang pagduha sang damgo ni Paraon nagakahulugan nga ang butang ginpat-od sang Dios, kag ang matuod nga Dios magapahanabo sini sa madali.”—Genesis 41:25-32.

20, 21. (a) Ano ang ginhimo ni Paraon sa paandam? (b) Sa sini nga punto, paano mapaanggid si Jose kag si Jesus?

²⁰ Ano ang mahimo ni Paraon sa sining nagapakari nga tiggulutom? Ginrekomendar ni Jose nga maghanda si Paraon paagi sa pagtangdo sing mainandamon kag maalam nga tawo sa ibabaw sang pungsod sa pagtago sang ikalima nga bahin sang patubas sang bugana nga mga tuig. Sini nga tion nakita na ni Paraon ang talalupangdon nga mga kinaiya ni Jose. Ginhukas ni Paraon ang iya singsing nga inugpat-in kag ginsuksok ini sa kamot ni Jose, sa amo gintangdo sia sa ibabaw sang bug-os nga duta sang Egipto.—Genesis 41:33-46.

²¹ Katloan ka tuig ang panuigon ni Jose sang magtindog sia sa atubangan ni Paraon, pareho sing edad kay Jesucristo sang ginbawtismuhan sia kag magsugod sang iya nagahatag-kabuhi nga ministeryo. Ang artikulo nga nagasunod magapakita kon paano si Jose gingamit ni Jehova sa paglaragway sa “Pangulo nga Ahente kag Manluluwas” ni Jehova sa tion sang espirituwal nga tiggulutom nga pinasahi nga nagapatuhoy sa aton adlaw.—Binuhatan 3:15; 5:31.

Paano Mo Sabton?

◻ Sa anong duha ka paagi isa ka katalagman ang tiggulutom karon?

◻ Anong maayong mga kinaiya ang ginpalambo ni Jose samtang upod sia sa iya mga utod sa amay?

◻ Ano ang maton-an naton gikan sa una nga mga eksperiensia ni Jose sa Egipto?

◻ Ang kabalaka ni Jehova para kay Jose kag sa naapektohan sang tiggulutom nga katawhan nagapasalig sa aton sing ano?

[Kahon sa pahina 13]

Ang isa ka kolumnista sa The Sunday Star (Toronto, Marso 30, 1986) nagsiling tuhoy sa ginatawag nga dalagku nga mga iglesia: “Daku ang ila kapaslawan sa pag-atipan sa daku nga pagkagutom sa espirituwal sang mga lalaki, mga babayi kag mga pamatan-on karon”