Pagtipig sa Kabuhi sa Tion sang Tiggulutom
1. Anong maalamon nga aksion ang ginhimo ni Jose sa tion sang mga tuig sang kabuganaan, kag ano ang resulta?
SA GILAYON nga matangdo sia subong manugdumala sa kalan-on, ginlibot ni Jose ang duta sang Egipto. Naorganisar na niya sing maayo ang mga butang sang tion nga magsugod ang mga tuig sang kabuganaan. Ang duta bugana nga nagpatubas! Gintipon ni Jose ang mga kalan-on gikan sa latagon sang tagsa ka siudad, kag ginatago ini sa siudad. “Nagsupot [sia] sing uyas sing tama kadamo subong sang balas sang dagat, tubtob nga gin-untatan niya sa pagsukob, kay indi na masukob.”—Genesis 41:46-49.
2. Sa anong personal nga pagsakripisyo nakatigayon ang katawhan sing ikabuhi?
2 Ang pito ka tuig sang kabuganaan natapos, kag nagsugod ang tiggulutom subong gintagna ni Jehova—tiggulutom indi lamang sa Egipto kundi “sa bug-os nga kadaygan sang duta.” Sang ang gingutman nga katawhan sa Egipto nagsugod sa pagsinggit kay Paraon sing tinapay, si Paraon nagsiling sa ila: “Kadto kamo kay Jose. Himua ang iya isiling sa inyo.” Ginpadalawat ni Jose ang uyas sa mga Egiptohanon tubtob nga naubos ang ila kuwarta. Nian ginbaton niya ang ila mga kasapatan bilang bayad. Sang ulihi, ang katawhan nagkadto kay Jose, nga nagasiling: “Bakla kami kag ang amon duta tungod sa kalan-on, kag mangin alagad kami kag ang amon duta ni Paraon.” Gani ginbakal ni Jose ang tanan nga duta sang mga Egiptohanon para kay Paraon.—Genesis 41:53-57; 47:13-20.
Aman Para sa Espirituwal nga Pagkaon
3. Ano nga ahensya ang gintagna ni Jesus para sa pag-aman sing kalan-on sa nagakaigo nga tion?
3 Subong nga ang uhay nga ginpanagtag ni Jose nagkahulugan sing kabuhi sa mga Egiptohanon, ang matuod nga espirituwal nga kalan-on kinahanglanon man sa pagsakdag sa mga Cristiano nga nangin mga ulipon ni Jehova bangod sang ila pagdedikar sa Iya paagi sa Daku Pa nga Jose, si Jesucristo. Sa tion sang iya ministeryo sa duta, gintagna ni Jesus nga ang iya hinaplas nga mga sumulunod amo ang magadala sing salabton sa pagpanagtag sining mga aman. Nagpamangkot sia: “Sin-o gid bala ang matutom kag mainandamon nga ulipon nga ginpadumala sang iya agalon sa iya panimalay, sa paghatag sa ila sing pagkaon sa nagakaigo nga tion? Malipayon yadtong ulipon nga kon mag-abot ang iya agalon masapwan sia nga nagahimo sing subong.”—Mateo 24:45, 46.
4. Paano ang aman nga ginahimo sang “ulipon” nga klase karon nagatumbas sa gin-organisar sang adlaw ni Jose?
4 Ang matutom nga nagkalabilin sining “mainandamon nga ulipon” nga klase karon nagahimo sang ila Makasulatanhon nga labing masarangan sa pagpat-od nga ang dedikado nga mga saksi ni Jehova, subong man ang interesado nga mga tawo sang kalibutan, nagabaton sing makasakdag-kabuhi nga espirituwal nga kalan-on. Ining salabton ginakilala subong isa ka balaan nga katungdanan kag ginahimo subong isa ka balaan nga pag-alagad kay Jehova. Dugang pa, ang “ulipon” nag-organisar sing mga kongregasyon kag gin-amanan ini sila sing literatura sa Biblia sa kadamuon nga sila may bugana nga “binhi” sang Ginharian nga inugsabwag sa publiko sa latagon nga gintangdo sa ila. Amo ini ang katumbas sa adlaw ni Jose, sang gintipon niya ang katawhan sa mga siudad kag gin-amanan sila sing uyas indi lamang agod kaunon nila kundi agod isab-ug man nila para sa tig-alani sa ulihi.—Genesis 47:21-25; Marcos 4:14, 20; Mateo 28:19, 20.
5. (a) Anong pinasahi nga igtalupangod ang ginapatuhoy sang “ulipon” sa mga kinahanglanon sang panimalay sa tion sang krisis? (b) Paano ang “pag-awas” sang espirituwal nga mga aman sang 1986 kon ipaanggid sa mga aman sang tion ni Jose?
5 Bisan pa ginadumilian ang pagbantala sa publiko kag ginahingabot ang mga Saksi ni Jehova, ginatamod sang ‘matutom nga ulipon’ ining pag-aman sing espirituwal nga kalan-on subong isa ka balaan nga salabton. (Binuhatan 5:29, 41, 42; 14:19-22) Sa tion sang kalamidad, subong sang mga bagyo, baha, kag linog, ginapat-od sang “ulipon” nga ang pisikal kag espirituwal nga mga kinahanglanon sang panimalay sang Dios ginaaman. Bisan ang mga yara sa mga kampo konsentrasyon regular nga nalab-ot sang naimprinta nga pulong. Ang pungsudnon nga mga dulunan wala ginatugutan sa pagpugong sa ilig sang espirituwal nga kalan-on sa mga nagakinahanglan sini. Ang padayon nga pag-aman nagakinahanglan sing kaisog, pagtuo kay Jehova, kag sa masami daku nga pagkamaideyahon. Sa bug-os nga kalibutan sang 1986 lamang, ang “ulipon” nakapatubas sing nagaawas nga 43,958,303 ka Biblia kag nahapinan sing matig-a nga mga libro, subong man sing 550,216,455 ka magasin—sa pagkamatuod “tama kadamo subong sang balas sang dagat.”
Balos, Silot, Ukon Kaluoy?
6, 7. (a) Paano ang tiggulutom nagresulta sa pagyaub sang napulo ka utod sa amay ni Jose sa atubangan niya? (b) Sa anong mga paagi gintilawan karon si Jose?
6 Sang ulihi ang tiggulutom nakalab-ot sa duta sang Canaan. Ginpadala ni Jacob ang napulo ka utod sa amay ni Jose sa Egipto agod magdalawat sing uyas. Apang wala niya pagpaupda si Benjamin, ang lamang nga utod ni Jose sa amay kag iloy, kay nahadlok sia nga basi siling niya “may malain nga mahanabo sa iya.” Sanglit si Jose ang nagapadalawat, ang iya mga utod nagkadto sa iya kag nagyaub sa atubangan niya. Bisan pa wala nila makilala ang ila utod, nakilal-an sila ni Jose.—Genesis 42:1-7.
7 Nadumduman karon ni Jose ang iya mga damgo anay nahanungod sa ila. Apang ano ang iya himuon? Matimalos bala sia? Sa tion sang ila daku nga pagkinahanglan, patawaron bala niya ang ginhimo nila anay sa iya? Ano ang tuhoy sa kasubo nga gin-antos sang iya amay? Dapat bala ini kalimtan? Ano karon ang ginabatyag sang iya mga utod nahanungod sa daku nga sala nga ila nahimo? Gintilawan man si Jose sa sini nga butang. Magahisanto bala ang iya himuon sa panimuot nga ipakita sa ulihi sang Daku Pa nga Jose, si Jesucristo, subong ginlaragway sa 1 Pedro 2:22, 23: “Sia wala magpakasala, wala sing limbong sa iya baba. Sang ginpasipalahan sia, wala sia magbalos sa pagpasipala. Sang nag-antos sia, wala sia magpamahog, kundi gintugyan niya ang iya kaugalingon sa nagahukom sing matarong.”
8. Ano ang nagatuytoy kay Jose, nga nagailustrar sang ano tuhoy kay Jesus kag sa iya mga disipulo?
8 Sanglit nakita ni Jose ang pagpangamot ni Jehova sa lakat sang mga hitabo, mahalungon nga gintuman niya ang kasuguan kag mga prinsipio sang Dios. Sa amo man nga paagi, si Jesus pirme nga nangin handa sa ‘paghimo sang kabubut-on sang iya Amay’ samtang nagahatag sia sing kabuhi nga walay katapusan sa ‘tanan nga nagatuo sa iya.’ (Juan 6:37-40) Subong “mga embahador nga salili kay Cristo,” ginatuman man sang iya hinaplas nga mga disipulo ang ila balaan nga salabton sa “paghambal sa katawhan sang tanan nga pulong nahanungod sini nga kabuhi.”—2 Corinto 5:20; Binuhatan 5:20.
9, 10. (a) Ano karon ang ginhimo ni Jose, kag ngaa? (b) Paano si Jose nagpakita sing kaawa nga mapaanggid sa ipakita ni Jesus?
9 Wala sa gilayon magpakilala si Jose sa iya mga utod. Sa baylo, nagpakighambal sia sa ila sing matigdas paagi sa isa ka manugbadbad, nga nagasiling: “Mga espiya kamo!” Sanglit ginsambit nila nga may manghod sila nga lalaki, ginpangayo ni Jose nga pamatud-an nila ang ila pagkamaminatud-on paagi sa pagdala man sa iya sa Egipto. Nabatian ni Jose ang ila paghambalanay sing mahinulsulon nga ining mga natabo mahimo gid nga balos sa ila pagbaligya sa iya, si Jose, sa pagkaulipon. Nagtalikod si Jose kag naghibi. Apang, ginpagapos niya si Simeon subong bihag tubtob nga nagbalik sila nga kaupod si Benjamin.—Genesis 42:9-24.
10 Wala magtimalos si Jose sa sala nga ginhimo sa iya. Luyag niya mahibaluan kon bala ang ila paghinulsol matuod gid, gikan sa alibutod sang ila tagipusuon, agod pakitaan sing kaluoy. (Malaquias 3:7; Santiago 4:8) Upod ang mainawaon nga panimuot, nga kaanggid sa ipasundayag ni Jesus, wala lamang ginpuno ni Jose ang ila mga sako sing uyas kundi gin-uli pa niya ang ila kuwarta, sa baba sang sako sang tagsatagsa. Dugang pa, ginhatagan niya sila sing balon para sa ila paglakbay.—Genesis 42:25-35; ipaanggid ang Mateo 11:28-30.
11. (a) Sang ulihi, napilitan si Jacob sa paghimo sing ano, kag ngaa nagsugot sia sang ulihi? (b) Paano ang Roma 8:32 kag 1 Juan 4:10 nagapasalig man sa aton sang gugma sang Dios?
11 Sang ulihi, naubos na nila ang kalan-on nga ila gindalawat sa Egipto. Ginpangabay ni Jacob ang siam ka anak nga magbalik kag magdalawat sing dugang pa. Sang primero, nagpakiluoy sia tuhoy kay Benjamin, nga nagasiling: “Indi magdulhog ang akon anak upod sa inyo, kay ang iya utod patay na, kag sia lamang ang nabilin. Kon matabo ang malain sa iya sa dalanon, papanaugon ninyo ang akon mga uban nga may kasubo sa Sheol.” Apang, sa tapos sang daku nga paghaylo kag pagtanyag ni Juda nga mangin responsable kay Benjamin, paganot nga nagsugot si Jacob nga paupdon sa ila ang bata nga lalaki.—Genesis 42:36–43:14.
12, 13. (a) Paano gintilawan ni Jose ang iya mga utod agod mahapayag ang panimuot sang ila tagipusuon? (b) Paano ang resulta naghatag kay Jose sing sadsaran sa pagpakita sing kaluoy?
12 Sang makita ni Jose nga nag-abot si Benjamin upod sa iya mga utod, gin-agda niya sila sa iya balay, nga sa diin naghanda sia sing sinalusalo. Para kay Benjamin, ginhatagan niya sia sing bahin nga labaw sing lima ka pilo sa bahin sang iban niya nga mga utod. Nian ginhimo ni Jose ang katapusan nga pagtilaw sa iya mga utod. Sa liwat, gin-uli niya ang tanan nila nga kuwarta sa ila indibiduwal nga mga sako, apang ginbutang niya ang iya pinasahi nga tagayan nga pilak sa baba sang sako ni Benjamin. Sang makalakat sila, ginpalagas niya ang iya tulugyanan sa pagsumbong sa ila sing pangawat kag pangitaon ang iya tagayan sa ila mga sako. Sang makit-an ini sa sako ni Benjamin, ginkusnit sang mag-ulutod ang ila panapton. Ginpabalik sila agod mag-atubang kay Jose. Nagpakiluoy si Juda, nga ginatanyag ang iya kaugalingon nga mangin ulipon sa baylo ni Benjamin agod nga ang bata makapauli sa iya amay.—Genesis 43:15–44:34.
13 Nakombinse na karon sang pagbag-o sang tagipusuon sang iya mga utod, indi na makontrol ni Jose ang iya balatyagon. Sa tapos mamanduan ang tanan, wala labot sa iya mga utod, nga magguwa, si Jose nagsiling: “Ako si Jose nga inyo utod, nga ginbaligya ninyo sa Egipto. Apang dili kamo karon magkalisod kag magkaakig sa inyo kaugalingon bangod nga ginbaligya ninyo ako diri; kay ang Dios nagpadala sa akon sing una sa inyo sa pagtipig sing kabuhi . . . sa pagtipig nga sa inyo sing mabilin sa duta kag sa pagbuhi nga sa inyo paagi sa daku nga pagkaluwas.” Nian nagsiling sia sa iya mga utod: “Dalidali kamo kag taklad sa akon amay kag isiling sa iya, ‘ . . . Kari sa akon. Dili ka magpalantang. Kag magapuyo ka sa duta sang Gosen, kag . . . didto saguron ko ikaw, kay may lima pa ka tuig nga tiggulutom; basi nga mag-imol ka kag ang imo panimalay, kag ang tanan nga imo.’”—Genesis 45:4-15.
14. Anong makalilipay nga balita ang ginpaalinton kay Jacob?
14 Sang mabatian ni Paraon ang balita nahanungod sa mga utod ni Jose, ginsilingan niya si Jose nga magkuha sing mga karo sa duta sang Egipto agod dalhon ang iya amay kag ang bug-os niya nga pamilya sa Egipto bangod ang labing maayo nga bahin sang duta mangin ila. Sang mabatian ang tanan nga natabo, ang espiritu ni Jacob naumpawan kag nagtuaw: “Tuman na! Si Jose nga akon anak buhi pa! Magakadto ako kag makigkita sa iya sa wala pa ako mapatay!”—Genesis 45:16-28.
Bugana ang Espirituwal nga Kalan-on
15. Sa kay sin-o kita karon nagapaabot sing espirituwal nga kalan-on, kag paano kita ginapasalig sing kabuganaan?
15 Ano ang kahulugan sining tanan para sa aton karon? Mabinalak-on pirme sa aton espirituwal nga kinahanglanon, nagalaum kita sa Isa nga daku pa sa maluluy-on nga si Paraon sang tion ni Jose. Amo sia ang Soberanong Ginuong Jehova nga nagaaman sing kalan-on kag tuytoy sa sining madulom nga mga adlaw sang isa ka kalibutan nga ginagutom sa kamatuoran sang Biblia. Nagapanikasog kita para sa mga interes sang iya Ginharian, nga subong bala ginadala ang tanan naton nga ikapulo sa iya tambubo. Daw ano kaalwan nga ginbuksan niya sa aton “ang mga talambuan sang langit,” ginabubo ang pagpakamaayo “tubtob nga wala na sing masudlan”!—Malaquias 3:10.
16. (a) Sa diin lamang masapwan karon ang nagatipig-sing-kabuhi nga “kalan-on”? (b) Paano ang pagsab-ug sing “uyas” para sa ginagutom nga katawhan ginpasangkad?
16 Sa tuohan ni Jehova amo ang iya Administrador sa Kalan-on, nga karon nakalingkod sa trono nga Hari, ang ginhimaya nga si Jesus. (Binuhatan 2:34-36) Subong nga ginbaligya sang katawhan ang ila kaugalingon subong mga ulipon agod mabuhi, gani man ang tanan karon nga luyag mabuhi dapat magkadto kay Jesus, mangin mga sumulunod niya nga nakadedikar sa Dios. (Lucas 9:23, 24) Subong nga ginsugo ni Jacob ang iya mga anak nga magkadto kay Jose agod mangayo sing kalan-on, ginatuytuyan man ni Jehova ang mahinulsulon nga mga tawo sa iya hinigugma nga Anak, si Jesucristo. (Juan 6:44, 48-51) Ginatipon ni Jesus ang iya mga sumulunod pasulod sa katulad-siudad nga mga kongregasyon—kapin sa 52,000 sa bug-os nga kalibutan karon—nga sa diin ginapakaon sila sing bugana nga espirituwal nga kalan-on kag ginaamanan sing nagaawas nga “uyas,” subong “binhi” nga inugsab-ug sa latagon. (Genesis 47:23, 24; Mateo 13:4-9, 18-23) Handa nga mga manugpangabudlay ining mga saksi ni Jehova! Kapin kag kapin sa ila ang nagaboluntaryo para sa bug-os tion nga pag-alagad subong payunir, kag 595,896 sa ila ang nagapakigbahin, subong pinakamataas, sa sining isa ka pribilehiyo nga hilikuton sa isa ka bulan sang nagligad nga tuig. Isa ina ka promedyo nga kapin sa 11 ka payunir sa tagsa ka kongregasyon!
17. Ano pa nga matagnaon nga rekord ang may kaanggid sa paghiusa sang napulo ka utod sa amay ni Jose sa iya?
17 Talalupangdon nga ang tanan sang napulo ka utod sa amay ni Jose, nga karon naghinulsol sa ila mga panimuot kag mga buhat anay, ginhiusa sa iya sa Egipto, nga, upod sa Sodoma, nagalaragway sa kalibutan nga sa diin ginlansang si Jesus. (Bugna 11:8) Nagapahanumdom ini sa aton sang Zacarias 8:20-23, nga nagahingapos paagi sa paglaragway sa “napulo ka lalaki” nga nagasiling, “Magaupod kami sa inyo,” kon sayoron, sa hinaplas nga katawhan ni Jehova, nga sa karon nagkalabilin na lamang sini ang nagaalagad pa sa duta.
18. Ang pinasahi nga kahamuot nga ginpakita kay Benjamin nagaanggid sa ano sa modernong mga tion?
18 Apang, kamusta naman ang utod sa amay kag iloy ni Jose nga si Benjamin, nga bangod sang iya pagkatawo, napatay ang hinigugma nga asawa ni Jacob nga si Raquel? Si Benjamin pinasahi nga ginkahamut-an ni Jose, nga wala sing duhaduha nagbatyag sing pagkasuod sa iya bangod isa ang ila iloy. Wala sing duhaduha nga amo ini ang kabangdanan kon ngaa si Benjamin nakabaton sing lima ka pilo nga bahin sang ang tanan nga 12 ka mag-ulutod naghiusa sa una nga tion sa sinalusalo sa balay ni Jose. Indi bala si Benjamin nagakaigo nga nagalaragway sa nagkalabilin sang hinaplas nga mga Saksi karon, nga ang kalabanan sa ila nga nakalampuwas gintipon sa kiliran sang Ginuo kutob sang 1919? Ining “Benjamin” nga klase nakabaton gid sing pinasahi nga bahin gikan kay Jehova, kay ang iya ‘espiritu nagapanaksi upod sa ila espiritu.’ (Roma 8:16) Ini sila, gintilawan man tuhoy sa ila integridad samtang ang “mga karnero” sang Ginuo nagministeryo sa ila.—Mateo 25:34-40.
19. Anong pagkaanggid ang makita sa ulot sang pagsaylo sang mga panimalay sang Israel sa Gosen kag sa pagtipon sang katawhan sang Dios karon?
19 Makawiwili nga, sang ginhimos ni Paraon nga pasayluhon si Jacob kag ang iya mga panimalay sa Egipto, ang tanan nga lalaki nga “mga kalag” nga nagpuyo didto may kadamuon nga 70, nga resulta sang ginpamuad nga duha ka numero nga 7 kag 10. (Genesis 46:26, 27) Ining duha ka numero ginagamit nga may kahulugan sa bug-os nga Kasulatan, ang “7” masami nga nagapakita sing langitnon kag ang “10” dutan-on nga pagkakompleto. (Bugna 1:4, 12, 16; 2:10; 17:12) Nagaanggid ini sa kahimtangan karon, nga mahimo paabuton naton nga tipunon ni Jehova ang katapusan nga katapo sang iya pamilya sang mga Saksi pasulod sa iya “duta,” ang espirituwal nga paraiso nga sa diin nagakalipay kita karon. (Ipaanggid ang Efeso 1:10.) “Si Jehova nakakilala sang mga iya,” kag bisan sa karon ginapapuyo niya sila sa “labing maayo nga bahin sang duta,” subong sang Gosen anay sa teritoryo ni Paraon.—Genesis 47:5, 6; 2 Timoteo 2:19.
20. Walay sapayan sang espirituwal nga tiggulutom karon, ngaa dapat kita magkalipay?
20 Sang adlaw ni Jose, ang mga tuig sang tiggulutom nagsunod sa mga tuig sang kabuganaan. Sa karon, dungan sila nga nagakatabo. Tuhay sa espirituwal nga tiggulutom sa duta nga wala nahamut-an ni Jehova, may yara bugana nga espirituwal nga kalan-on sa duog sang pagsimba ni Jehova. (Isaias 25:6-9; Bugna 7:16, 17) Huo, bisan pa may tiggulutom sa pagpamati sa mga pulong ni Jehova sa Cristiandad, subong gintagna ni Amos, ang pulong ni Jehova nagaguwa gikan sa langitnon nga Jerusalem. Nagapahalipay gid ina sa aton!—Amos 8:11; Isaias 2:2, 3; 65:17, 18.
21. (a) Ano ang aton daku nga pribilehiyo karon? (b) Dapat kita magpasalamat sa ano, kag paano naton mapabutyag ang aton mga pasalamat?
21 Sa karon, sa idalom sang pagtuytoy sang Daku Pa nga Jose, si Jesucristo, may daku kita nga pribilehiyo nga matipon pasulod sa tulad-siudad nga mga kongregasyon. Didto makapiesta kita sa bugana nga espirituwal nga kalan-on kag sa pagsab-ug man sing mga binhi sang kamatuoran kag ipalapnag ang maayong balita nga ang espirituwal nga kalan-on sarang matigayon. Ginahimo naton ini para sa kaayuhan sang tanan nga nagabaton sa kondisyon kag mga aman nga mahigugmaon nga ginhimos sang Soberanong Manuggahom, si Jehova. Ginapasalamatan gid naton ang aton Dios bangod sa iya pagdulot sa iya Anak, ang Daku Pa nga Jose, nga nagaalagad subong maalam nga Administrador sa espirituwal nga kalan-on! Sia ang gintugyanan ni Jehova sa paghikot subong Manugtipig sing kabuhi sa sining tion sang espirituwal nga tiggulutom. Kabay nga ang tagsatagsa sa aton magpakita sing kaukod sa paghalad sing balaan nga pag-alagad nga ginasunod ang iya huwaran kag sa idalom sang iya pagpangulo!
Makita Mo Bala ang Pag-anggid?
◻ Paano si Jose nag-anggid kay Jesus subong Administrador sa Kalan-on?
◻ Ano sa drama ni Jose ang mapaangay sa pagkamangin ulipon sa Dios paagi sa dedikasyon?
◻ Ano nga kinaiya ang ginpakita ni Jose kag ni Jesus subong isa ka huwaran para sa aton karon?
◻ Subong sang sa tion ni Jose, anong maid-id nga kahimusan para sa pagpanagtag sing kalan-on ang nagaluntad karon?
◻ Ang aton pagbinagbinag sini nga drama dapat magtiklod sa aton sa paghimo sing ano?
[Mga Laragway sa pahina 16, 17]
Sa kalibutan nga may espirituwal nga tiggulutom, ang Daku Pa nga Jose bugana nga nagaaman para sa tanan nga nagakadto sa iya nga may pagtuo
Subong nga ang napulo ka utod sa amay ni Jose nagpasakop sa iya, ang daku nga kadam-an nagakilala karon kay Cristo
Kaangay sang 70 ka kalag sang panimalay ni Jacob, ang kompleto nga numero sang “mga karnero” ni Jehova nagaabot sa isa ka maayo nga “duta”—ang espirituwal nga paraiso nga aton karon ginaagom
[Laragway sa pahina 18]
Ang modernong-adlaw nga Benjamin nga klase pinasahi nga ginkahamut-an ni Cristo, nga nagabaton sing bugana nga “kalan-on sa nagakaigo nga tion”