Bulig sa Paghimo sing Maalamon nga mga Desisyon
SI Alice nagdesisyon sing dimaalamon nga may malain nga resulta. “Nagbulag ako kay Jehova kag sa iya organisasyon,” siling niya. Bisan pa nga nagbalik sia sang ulihi, nagkinahanglan ini sa iya sing 13 ka tuig nga himuon ina—“masubo nga mga tuig” ang tawag niya sini.
Indi dapat pakanubuon sang isa ka Cristiano ang katalagman sang paghimo sing sayop nga mga desisyon may kahilabtanan sa iya pag-alagad sa Dios. Ang sayop nga mga desisyon indi hungod nga ginahimo sa tapos mabinagbinag ang nagakaigo nga mga kamatuoran. Kon kaisa ginahimo ini pasad sa duna nga mga reaksion. Tubtob mangibabaw ang mga emosyon sa isyu kag ang dihimpit nga tagipusuon dinagakaigo nga nagaimpluensia sa ikasarang sa paghunahuna, magaresulta ang tanan nga sahi sang halit kag kasubo.
Sa pagkamatuod, “ang tagipusuon labi ka malimbungon sang sa bisan ano.” (Jeremias 17:9) Apang, ang Biblia nagasiling sa aton kon paano amligan ang aton kaugalingon. “Kay ang kaalam magasulod sa imo tagipusuon,” siling sini, “kag ang paghantup magatipig sa imo.” (Hulubaton 2:10, 11) Apang paano naton mapasulod ang kaalam sa aton tagipusuon?
Magtuon Gikan sa Nagligad
Tilawi ini. Ibutang ang imo kaugalingon sa lugar sang dumaan nga mga alagad sang Dios nga nag-atubang sing mabudlay nga mga kahimtangan kaanggid sang imo. Pananglitan ang kahimtangan sa sulod sang lokal nga Cristianong kongregasyon nagatublag sa imo. Hunahunaa ang kaanggid nga kahimtangan nga ginsambit sa Biblia.
Kamusta ang nahaunang-siglo nga Cristianong kongregasyon sa Corinto? Handurawa nga katapo ikaw sang kongregasyon sang Corinto. Duha ukon tatlo ka tuig na ikaw nga Cristiano. Daw ano nga kalipay nga mahibaluan ang ihibalo sang kamatuoran sa 18 ka bulan nga pagtener didto ni Pablo! Apang sa karon, may malain nga natabo.
Ang huyog sa paghuman sing mga grupo-grupo nagtuga sing pagbinahinbahin sa kongregasyon kag nagabutang sa katalagman sang paghiusa sini. (1 Corinto 1:10, 11) Ang pagtugut sang imoral nga paggawi nagabutang sa katalagman sang espiritu sini. (1 Corinto 5:1-5) Ang dayag nga pagsumbong sang mga dipaghangpanay sa ulot sang mga katapo sang kongregasyon sa mga hukmanan sang kalibutan nagahalit sa maayo nga reputasyon sini.—1 Corinto 6:1-8.
Nagahanduraw gihapon nga yara ikaw sa dumaan nga Corinto, nabalaka ikaw nga ang iban nga katapo sang kongregasyon pirme nagabangig sa diutay lamang nga mga butang. (Ipaanggid ang 1 Corinto 8:1-13.) Nasubuan ka bangod sang nakita mo nga pinuyas, kahisa, kaakig, kag kagamo. (2 Corinto 12:20) Sa pagkamatuod, natublag ka bangod sang pila nga bugalon nga nagapabudlay sang Cristianong pagkabuhi. (1 Corinto 4:6-8) Nasakitan ikaw mamati nga ginaduhaduhaan pa sang iban ang posisyon kag awtoridad ni apostol Pablo, dimakatarunganon nga nagasumbong, kag nagahikay sa iya bangod sang iya pagkaditalunsay subong humalambal. (2 Corinto 10:10; 12:16) Nabalaka ikaw nga ang hayag nga nagapauswag sang personal nga mga opinyon magapaluya sang pagtuo sang kongregasyon sa sadsaran sa doktrina.—1 Corinto 15:12.
Gin-atubang sing Desisyon
‘Indi ini dapat matabo,’ panghayhay mo. ‘Ngaa wala ini ginatadlong sang mga gulang? May butang gid nga sayop.’
Bayaan mo bala ang kongregasyon sang Corinto, nagahinakop nga mas maayo kon alagaron mo ang Dios sa iban nga lugar? Ukon magapamat-od ka bala nga mas maayo nga indi na makig-upod sa mga masigka Cristiano? Tugutan mo bala ini nga mga problema nga magadula sang imo kalipay kag sang imo pagsalig nga si Jehova nga Dios kag si Jesucristo amo ang nagadumala sang mga butang? Palambuon mo bala ang mamulayon kag palayamo nga espiritu, nga bangdan sang imo pagduhaduha sa mga motibo sang mga masigka Cristiano? Magahinay ka bala sa pagbantala nga hilikuton, nagapangatarungan nga indi gid man importante ang pagtuytoy sa mga interesado sa kongregasyon?
Nagatamod sang kahimtangan nga wala sing ginadampigan sa karon, mahapos para sa imo ang magsiling nga ang imo desisyon amo ang pagpabilin nga matutom sa kongregasyon sang Dios, walay sapayan sang mga dikahimpitan sini. Apang kon ginaatubang sing kaanggid nga kahimtangan karon, sarang mo bala mahuptan ang maathag nga hunahuna kag kalma nga tagipusuon? Magapamat-od ka bala karon subong sang ginbanta mo nga ipamat-od mo kon nabuhi ka anay didto?
Pagbenepisyo Gikan sa Maalam nga Laygay
Ang taga-Corinto nga mga Cristiano nga naghimo sing maalamon nga desisyon amo yadtong nagpabilin nga suod sa kongregasyon. Ang ila balatyagon kaangay sang iya ni Pedro sang tinuig antes. Sang ang iban nga disipulo nagbiya sa pagpakig-upod kay Jesus, si Pedro nagsiling: “Ginuo, kay sin-o bala kami makadto? Ikaw may mga pulong sang kabuhi nga walay katapusan; kag kami nagatuo kag nagakilala nga ikaw ang Balaan sang Dios.” (Juan 6:68, 69) Sing hayag, paagi lamang sa pagpabilin nga suod sa organisasyon sang Dios nga makabenepisyo kita gikan sa iya laygay.
Sa bag-ong mga kongregasyon, kaangay sa iya sadto sang Corinto, kinaandan nga ang tawhanon nga pagkadihimpit ginabangdan sang problema nga mahimo nagakinahanglan sing paghatag sang makusog nga laygay. Apang sang nagalaygay sa taga-Corinto nga mga Cristiano, gindumdom ni Pablo nga ang kalabanan sa ila “mga hinigugma” gihapon. (1 Corinto 10:14; 2 Corinto 7:1; 12:19) Wala niya pagkalimti nga si Jehova dibagay nga nagakaluoy kag nagapatawad sa mga nagahulag sa Iya panuytoy.—Salmo 130:3, 4.
Sa pagkamatuod, bangod ang Cristianong kongregasyon nagaganyat sang tanan nga sahi sang tawo, ang iban mas madugay maghulag sa sining panuytoy sang sa iban. Matuod ini sa nanuhaytuhay nga rason. Ang iban nga mga pagbag-o mas mabudlay himuon sang sa iban. Kag ang tagsa ka indibiduwal nagalainlain sa ikasarang sa lawas kag hunahuna, palibot, ginhalinan, kag mga sirkunstansia. Gani maalamon nga likawan ang mangin sobra ka mamulayon kag dumdumon nga ang “gugma nagatabon sa kadam-an nga mga sala”! (1 Pedro 4:8) Sa pagkamatuod, kon si Jehova kag ang iya Anak handa sa pagpatawad sa tawhanon nga pagkadihimpit kag pagkadihamtong sa ila kongregasyon, indi bala nga dapat man naton ipadayag ina nga espiritu?—1 Corinto 13:4-8; Efeso 4:1, 2.
Kon didto ka anay sa kongregasyon sang dumaan nga Corinto, ang pagpamati sa mahigugmaon apang malig-on nga laygay ni Pablo magapahanumdom sa imo nga si Cristo, subong ulo sang Cristianong kongregasyon, interesado gid sa kaayuhan sini. (Mateo 28:20) Mahimo ini magalig-on sang imo pagsalig sa saad ni Jesus nga huptan ang iya sumulunod nga nahiusa samtang nagahulag sila sa bulig nga ginaaman sang “matutom kag mainandamon nga ulipon.” (Mateo 24:45-47; Efeso 4:11-16) Huo, kag ang pinamulong ni Pablo mahimo nagbulig sa imo nga huptan ang kalipay kag kalig-onan bisan sa idalom sang mabudlay nga mga kahimtangan. Mahimo ka makasalig nga ang Dios magahatag sa imo sing kusog nga malandas ang bisan anong kabudlayan nga ginapahanugutan niya sing umalagi nga magluntad.
Wala ini nagakahulugan nga ang isa ka Cristiano wala sing himuon kon may malain nga matabo sa kongregasyon. Sadto anay sa Corinto, ang mga hamtong kaangay ni Estefanas, Fortunato, Acaico, kag ang iban gikan sa panimalay ni Chloe, naghulag. Ginsugiran nila si Pablo sang kahimtangan. (1 Corinto 1:11; 5:1; 16:17) Apang sang mahimo nila ini, masinaligon nga gintugyan nila ang bagay sa iya kamut. Ang kakugi sa pagkamatarong wala magtiklod sa ila nga mawasi ang pagsalig sa pagkaulo ni Cristo ukon ‘magsingkal kay Jehova.’—Hulubaton 19:3.
Ang aton kakugi sa pagkamatarong karon magapugong sa aton gikan sa pagbinagbinag sang ideya nga maghinay sa aton hatag-Dios nga katungdanan sa pagbantala sang maayong balita. Kon himuon ina, magapakita ina sang walay pag-ulikid sa kaayuhan sang iban kag indi paghimo sang luyag nga ipahimo sa aton ni Cristo. “Busa, mga kauturan ko nga hinigugma,” laygay ni Pablo, “magpakalig-on kamo, nga dimationg, nga nagabugana gihapon sa buluhaton sang Ginuo, sa nahibaluan ninyo nga ang inyo pagpangabudlay indi walay pulos sa Ginuo.”—1 Corinto 15:58.
Indi Mangin Ignorante sa mga Padugi ni Satanas
Ang mga problema sa kongregasyon kaangay sadtong sa Corinto mas mabudlay kon kaisa atubangon sang sa talangkod nga paghingabot. Ginahingalitan ni Satanas ina nga mga kahimtangan sa tuyo nga magahimo kita sing sayop nga mga desisyon nga magapahilayo sa aton kay Jehova. Apang ‘indi kita ignorante sa mga padugi ni Satanas.’—2 Corinto 2:11.
Ginsilingan ni Pablo ang taga-Corinto nga mga Cristiano nga makabenepisyo sila gikan sa pag-usisa sa rekord sang dumaan nga mga alagad sang Dios. “Karon ining mga butang nahanabo sa ila subong nga paandam,” siling niya tuhoy sa mga Israelinhon, “apang ginsulat sila sa pagtudlo sa aton nga naabutan sang katapusan sang sistema sang mga butang.” (1 Corinto 10:11) Makabenepisyo man kita karon gikan sa pag-usisa sing maayo sa rekord sang dumaan nga Cristiano. Halimbawa, mabinagbinag naton ang natabo sa Corinto. Ang pagpamalandong kon paano kita magahimo sing husto nga desisyon sadto anay magabulig sa aton nga likawan ang paghimo sing sayop nga mga desisyon karon.
Pagkatapos sang 13 ka “masubo nga mga tuig” nga pagbulag, si Alice nagsiling tuhoy sa iya nahaunang miting sa Kingdom Hall: “Nahadlok ako maghambal basi magahibi ako. Komportable ako—komportable gid. Indi ako makapati.” Gani mangin determinado, walay sapayan sang mga problema nga magautwas, nga magpabilin sa imo maalamon nga desisyon nga indi pagbayaan ang organisasyon ni Jehova! Ang imo mga pagpakamaayo kaupod sang katawhan sang Dios mangin madamo. Kag wala ini sing katapusan.—Hulubaton 2:10-15, 20, 21.
Paagi lamang sa pagpabilin nga suod sa organisasyon ni Jehova nga makabenepisyo kita gikan sa iya laygay