“Kilalaha ang Amo nga Sahi sang mga Tawo”
INDI maayo ang kahimtangan sa kongregasyon sang Corinto. May makakulugmat nga kaso sang imoralidad, kag may pagbinahinbahin sa tunga sang mga kauturan. Ang iban may mabug-at nga personal nga mga problema ukon may mga pamangkot nga dapat sabton. Ang iban nga mga kauturan nagademandahay sa korte; ang iban nagapanghiwala pa gani sang pagkabanhaw.
Nagautwas man ang mabug-at nga mga pamangkot. Dapat bala magpabilin upod sa ila ditumuluo nga mga bana ang mga yara sa nabahinbahin sing relihioso nga mga panimalay, ukon dapat bala sila magbulagay? Ano bala ang katungdanan sang mga utod nga babayi sa kongregasyon? Nagakaigo bala kaunon ang karne nga ginhalad sa mga idolo? Paano dapat hiwaton ang mga miting—lakip na ang Panihapon sang Ginuo?—1 Corinto 1:12; 5:1; 6:1; 7:1-3, 12, 13; 8:1; 11:18, 23-26; 14:26-35.
Pat-od gid nga nabalaka sa kaayuhan sang ila mga kauturan sa sinang natublag sa espirituwal nga palibot, sanday Acaico, Fortunato, kag Estefanas naglakbay sa pagduaw kay apostol Pablo sa Efeso. Dugang sa sinang makatulublag nga balita, mahimo nga gindala nila kay Pablo ang isa ka sulat halin sa kongregasyon nga may mga pamangkot nahanungod sining mga butang. (1 Corinto 7:1; 16:17) Pasad sa matigayon nga pamatuod, ining tatlo ka utod indi lamang amo ang nabalaka sa kahimtangan. Sa katunayan, nakabaton na sing balita si Pablo halin sa “mga sa balay ni Cloe” nga may binangig nga nagaluntad sa tunga sang mga katapo sang kongregasyon. (1 Corinto 1:11) Sa walay duhaduha, ang report sang mga mensahero nakabulig kay Pablo nga matigayon ang mas maathag nga paghangop sa kahimtangan, nga makapamat-od kon anong laygay ang ihatag, kag kon paano masabat ang mga pamangkot nga ginpautwas. Daw subong bala nga ang sulat nga nakilal-an naton karon subong Nahaunang Corinto amo ang sabat ni Pablo, nga gintuytuyan sang balaan nga espiritu sang Dios. Sanday Acaico, Fortunato, kag Estefanas mahimo nga amo ang nagdala sang sulat.
Sin-o sanday Acaico, Fortunato, kag Estefanas? Ano ang matun-an naton paagi sa pagtuon sa kon ano ang ginasiling sang Kasulatan nahanungod sa ila?
Ang Panimalay ni Estefanas
Ang panimalay ni Estefanas amo ang “nahaunang mga bunga” sang ministeryo ni Pablo sa Romanong probinsia sang Acaya, Nabagatnan nga Gresya, sang mga tuig 50 C.E., kag ginbawtismuhan sila ni Pablo mismo. Ayhan, ginkabig sila ni Pablo nga huwaran, isa ka hamtong nga nagapalig-on nga impluwensia para sa mga taga-Corinto. Mainit niya sila nga gindayaw bangod sang ila hilikuton tungod sa kongregasyon: “Karon hanuot ko kamo nga ginalaygayan, mga kauturan: Nahibaluan ninyo nga ang panimalay ni Estefanas amo ang nahaunang mga bunga sa Acaya kag nagpanugyan sila sang ila kaugalingon sa pag-alagad sa mga balaan. Kabay nga padayon kamo nga magpasakop sang inyo kaugalingon sa amo nga sahi sang mga tawo kag sa kada isa nga nagakooperar kag nagapangabudlay.” (1 Corinto 1:16; 16:15, 16) Wala ginasugid kon sin-o gid ang nagahuman sang “panimalay” ni Estefanas. Ang ekspresyon mahimo lamang magkahulugan sa mga katapo sang pamilya apang mahimo man maglakip sa mga ulipon ukon mga empleyado. Sanglit ang Acaico isa ka Latin nga ngalan nga tipiko sa isa ka ulipon, kag ang Fortunato tipiko sang isa ka hilway nga tawo, gindahumdahom sang pila ka komentarista nga ang duha mahimo nga mga katapo man sina nga panimalay.
Ano man ang kahimtangan, ginkabig ni Pablo ang panimalay ni Estefanas nga huwaran. Ang mga katapo sini ‘nagpanugyan sang ila kaugalingon sa pag-alagad sa mga balaan.’ Mahimo nga nahangpan sang panimalay ni Estefanas nga may hilikuton nga dapat himuon para sa kaayuhan sang kongregasyon kag boluntaryo nga ginbaton ining pag-alagad subong isa ka personal nga responsabilidad. Ang ila handum nga himuon inang pag-alagad sa mga balaan pat-od gid nga takus sang moral nga pagsakdag kag pagkilala.
“Ginpaumpawan Nila ang Akon Espiritu kag ang Inyo”
Walay sapayan nga nabalaka si Pablo nahanungod sa kahimtangan sa Corinto, ang pag-abot sang tatlo ka mensahero nagtib-ong sa iya. Si Pablo nagasiling: “Nagakalipay ako sa pag-abot ni Estefanas kag ni Fortunato kag ni Acaico, kay ginpun-an nila ang inyo pagkawala diri. Kay ginpaumpawan nila ang akon espiritu kag ang inyo.” (1 Corinto 16:17, 18) Nagabinagbinag sang mga kahimtangan, ang pisikal nga pagkanahamulag sa mga taga-Corinto mahimo nga nangin ginhalinan sang pagkabalaka ni Pablo, apang bisan nga wala ang bug-os nga kongregasyon nabuhinan ini sang nag-abot karon ang ila mga tinugyanan. Ang ila report mahimo nga naghatag kay Pablo sang bug-os nga larawan sang kahimtangan kag nagdula sang dimagkubos sang pila sang iya mga kahangawa. Ayhan indi gid man gali ini subong kalain sangsa paghunahuna niya.
Suno kay Pablo, ang misyon sang tatlo wala lamang magpaumpaw sang iya espiritu kundi nagtib-ong man sang espiritu sang kongregasyon sang Corinto. Walay duhaduha nga naumpawan sila mahibaluan nga ginpaathag sing maayo sang ila mga tinugyanan ang tanan nga bahin sang kahimtangan kay Pablo kag makapauli sila nga dala ang iya laygay.
Gani si Estefanas kag ang iya duha ka kaupod mainit nga ginrekomendar bangod sang ila mga pinangabudlayan tungod sang mga taga-Corinto. Daku gid ang apresasyon ni Pablo sa sining mga lalaki nga sa pagpauli nila makaaman sila sing pagpanguna sa nabahinbahin nga kongregasyon sang Corinto. Ang apostol nagalaygay sa mga kauturan: “Padayon kamo nga magpasakop sang inyo kaugalingon sa amo nga sahi sang mga tawo kag sa kada isa nga nagakooperar kag nagapangabudlay. . . . Kilalaha ninyo ang subong sina nga sahi sang mga tawo.” (1 Corinto 16:16, 18) Inang mabakod nga mga rekomendasyon maathag nga nagapakita sang bug-os nga pagkamainunungon sining mga lalaki walay sapayan sang mga kahuol sa sulod sang kongregasyon. Ang subong sina nga mga tawo dapat pakamahalon.—Filipos 2:29.
Ang Matutom nga Kooperasyon Nagapatubas sing Maayong mga Resulta
Wala gid sing duhaduha sa sini, ang suod nga kooperasyon upod sa organisasyon ni Jehova kag sa mga tiglawas sini nagapatubas sing maayong mga resulta. Sang ginsulat ni Pablo ang nakilal-an karon subong Ikaduhang Corinto, sa gilayon pagkatapos sang nahaunang sulat, mas maayo na ang kahimtangan sang kongregasyon. Ang padayon mapailubon nga pagpanghikot sang mga kauturan kaangay nanday Acaico, Fortunato, kag Estefanas, subong man ang pagduaw ni Tito, nagpatubas sing maayong epekto.—2 Corinto 7:8-15; ipaanggid ang Binuhatan 16:4, 5.
Ang mga katapo sang modernong-adlaw nga mga kongregasyon ni Jehova mahimo makabenepisyo paagi sa pagpamalandong sa malip-ot nga paghinambit sa sining matutom nga mga lalaki sa Kasulatan. Halimbawa, ang nagapadayon nga kahimtangan sa sulod sang kongregasyon indi gilayon malubad bangod sang pila ka rason kag ginatunaan sang pagkabalaka sang mga kauturan. Ano ang dapat himuon? Iluga sanday Estefanas, Fortunato, kag Acaico, nga wala mag-isol sa ila responsabilidad agod pahibaluon si Pablo sang kahimtangan kag nian masinaligon nga nagtugyan sang mga butang sa kamot ni Jehova. Wala gid nila pagtugutan nga ang ila kakugi sa pagkamatarong magapahulag sa ila nga magpanghikot sing hilway ukon ‘maakig kay Jehova.’—Hulubaton 19:3.
Ang mga kongregasyon iya ni Jesucristo, kag sa iya nagakaigo nga tion, subong sa Corinto, magapanghikot sia sa paglubad sa bisan anong mga kabudlayan nga mahimo nga nagabutang sa katalagman sang ila espirituwal nga kaayuhan kag paghidait. (Efeso 1:22; Bugna 1:12, 13, 20; 2:1-4) Sa karon, kon sundon naton ang maayong halimbawa nga ginpakita nanday Estefanas, Fortunato, kag Acaico kag padayon nga magpangabudlay sa pag-alagad sa aton mga kauturan, maunungon man naton nga masakdag ang kahimusan sang kongregasyon, mapabakod ang aton mga kauturan, kag ‘mapukaw sila sa gugma kag maayong mga buhat.’—Hebreo 10:24, 25.