Ang Espiritu nga Ginapakamaayo ni Jehova

“ANG Ginuo mangin kaupod sa espiritu nga inyo ginapakita. Ang iya dibagay nga kaluoy mangin sa inyo nga katawhan.” Paagi sa sining mga pulong, ginhinakpan ni Pablo ang iya ikaduha nga sulat kay Timoteo. (2 Timoteo 4:22) Daw ano nga kalipay ang ginhatag sining komendasyon kay Timoteo kag sa iya mga kaupod—sa paghibalo nga sila nagpakita sing espiritu nga ginapakamaayo ni Jehova!

Apang ano gid ang espiritu nga ginapakamaayo ni Jehova? Ano gid ang mga kinaiya sang mga tawo nga may yari sining espiritu? Kag paano man naton mapakita ining espiritu kag mabaton ang pagpakamaayo ni Jehova?

Agod makabulig sa pagsabat sining mga pamangkot, balikan naton ang tion ni Moises. Ang mga Israelinhon didto sa kahanayakan. Nakigkatipan si Jehova sa ila paagi sa Kasuguan nga katipan, kag karon ginatudluan niya sila kon paano sia simbahon. Nagalakip ini sing pagtukod sing madaladala nga kayangkayang nga tilipunan nga magakinahanglan sing madamo nga bulawan, bilidhon nga mga materyalis, kag lantip nga trabaho. Ang kahigayunan sa paghatag sing boluntaryo nga mga dulot sa pagsuplay sang ginakinahanglan nga mga materyalis kag trabaho ginpresentar sa pungsod sa sining mga pulong: “Ang bisan sin-o nga may maalwan nga tagipusuon, padalha sia sing dulot kay Jehova, nga amo, ang bulawan kag pilak kag saway kag asul nga hilo kag mamulamula nga purpura nga delana . . . Kag pakari-a ang tagsa ka tawo nga sampaton nga yara sa inyo kag ipahimo ang tanan nga nasugo ni Jehova, nga amo, ang tabernakulo, ang iya layanglayang kag ang iya tabon.”—Exodo 35:5-19.

Ano ang ginhimo sang pungsod sa sining kahigayunan? Ang nabilin nga bahin sang kapitulo 35 nagasugid sa aton nga ang mga tawo ‘nga ang ila tagipusuon nagpahulag sa ila’ kag ‘ang ila espiritu nagtiklod sa ila’ naghatag sing mga amot kag maukod nga nagpangabudlay nga nagpakita nga ginpakabahandi nila ining kahigayunan nga ginbutang sa atubangan nila. (Bersikulo 21, 22, 26) Ang ila sabat amo ang kapitulo 36, bersikulo 6, nga nagasugid sa aton nga “si Moises nagsugo kag ginpabantala nila ini sa bug-os nga dulugan, nga nagasiling: ‘Dili na ang bisan sin-ong lalaki ukon babayi maghimo sing bisan ano pa nga buluhaton nga sa dulot sa santuaryo.’ Gani ginpunggan ang katawhan sa pagdala.” Huo, dapat sila punggan! Wala maggamit si Jehova sing nagapamilit nga taktika sang ginpahatag niya ang pahibalo: “Ang bisan sin-o nga may maalwan nga tagipusuon . . . ” Ang resulta amo nga ang pungsod nagpakita sing kinabubut-on nga espiritu, kag nagdala ini sing mga pagpakamaayo sa porma sang daku nga kalipay, subong man sang pag-amlig kag pagtuytoy ni Jehova sa tanan nga ila ginhimo.

Mga tinuig sang ulihi, ang amo gihapon nga espiritu ginpakita liwat. Natabo ini sang maghikot si Hari Ezequias nga ipasag-uli ang putli nga pagsimba sa Israel. Ang rekord nagasugid sa aton nga, sang ginhatagan sing kahigayunan, “ang kongregasyon nagsugod sa pagdala sing mga halad kag mga halad sa pagpasalamat, kag subong man ang tagsatagsa nga may kinabubut-on nga tagipusuon, sing mga halad nga sinunog.” Ang resulta? “Kag si Ezequias nagkasadya kag ang bug-os nga katawhan bangod sang naaman sang Dios nga sa katawhan, kay ang butang nahimo sa padali.”—2 Cronica 29:31-36.

Ang mga Cristiano Nagapakita sing Husto nga Espiritu

Makita man bala naton ang pareho nga espiritu sang kinabubut-on nga pagsakripisyo sang kaugalingon sa Cristianong mga panahon? Talupangda kon ano ang ginsulat ni Pablo nahanungod sa taga-Filipos nga mga Cristiano sa Filipos 1:3-5: “Ginapasalamatan ko pirme ang akon Dios sa tagsa ka tion nga ginadumdom ko kamo sa akon tanan nga pangamuyo tungod sa inyo, samtang ginahalad ko ang akon pangamuyo nga may kalipay, bangod sang naamot ninyo sa maayong balita kutob sang nahaunang adlaw tubtob karon.” Sa anong mga paagi ang taga-Filipos nga mga Cristiano talalupangdon sa ila ‘amot sa maayong balita’? Ang masunod nga mga bersikulo nagapakita nga indi lamang sila nagpahisuno sing kinabubut-on sang ila dalanon sang pagkabuhi sa mga prinsipio sang Biblia agod pauswagon ang maayong balita kundi makugi man sila sa ila pagbantala kag pagpanudlo sing maayong balita sa iban.

Nga ang tanan nga Cristiano dapat magpakigbahin sing kinabubut-on sa pagbantala nga hilikuton sa sining mga paagi ginpadaku sa Hebreo 13:15: “Paagi sa iya maghalad kita pirme sa Dios sing halad sang pagdayaw, nga amo, ang bunga sang mga bibig nga nagatu-ad sa publiko sang iya ngalan.” Gani ang pagbantala sang tagsa ka Cristiano sing maayong balita amo ang yabi nga paagi nga makapakita kita sing kinabubut-on nga espiritu nga nagapakilala sa matuod nga mga sumilimba ni Jehova karon. Dugang pa, ang mga Cristiano ginapahanumdom nga indi gid sila “malimot sa paghimo sing maayo kag sa pagpanagtag sang yara sa imo, kay sa amo nga mga halad nahamuot ang Dios.”—Hebreo 13:16.

Ang taga-Filipos nga kauturan nagpakita sining kinabubut-on nga espiritu sa isa pa ka paagi. Sa kapitulo 4 ginasambit ni Pablo ang pila ka okasyon nga ginbuligan nila sia sa pinansial nga paagi, amo kon ngaa nag-uswag ang pagbantala sing maayong balita. (Filipos 4:14-17) Sa amo gin-ilog nila ang maayong huwaran sang una nga mga sumilimba ni Jehova. Maathag nga ila ginpadunggan si “Jehova paagi sa [ila] hamili nga mga pagkabutang.” (Hulubaton 3:9) Nagapakita bala kita sina man nga espiritu kon mapaatubang kita sa kaanggid sina nga mga kahigayunan?

Ang Nahamut-an nga Espiritu Hayag Karon

Ginapakita sang Salmo 110 nga madamo ang magapakita sini man nga maayong espiritu sang kinabubut-on nga pagsakripisyo sang kaugalingon sa katapusan nga mga adlaw sining sistema karon nga ang kalabanan nga katawhan interesado lamang sa “akon.” Ginasugiran kita sa bersikulo 3 nga, sa tapos maggahom ang Mesias sa Ginharian sang 1914, ang katawhan sang Dios ‘magahalad sang ila kaugalingon sing kinabubut-on’ kag ang mga nagahimo sina mangin subong kadamo sa “tun-og.” Nagmatuod bala ini?

Sang Abril 1881 ang The Watchtower nag-imprinta sing apelasyon sa 1,000 ka manugbantala nga magsulod sa bug-os tion nga pagbantala nga hilikuton. Ginpadaku sang guwa sang Mayo 1881 nga ang mga nagapakigbahin sa sining hilikuton dapat amo sila ang “nagapanghikot para sa langitnon nga suweldo.” Sa sulod sang apat ka tuig, kapin sa 300 ang nagsabat—talalupangdon bangod sang diutay nga kadamuon sang dedikado nga mga Cristiano nga naangot sa Watch Tower Society sadtong tion.

Ini gihapon nga espiritu padayon nga makita karon. Halimbawa, sang 1986 391,294 ka payunir (bug-os tion nga mga ministro) ang nagreport, sa promedyo kada bulan. Isa yadto ka 21.2-porsiento nga pag-uswag, ukon 68,473 ang kalabawon sang sa nagligad nga tuig! Apang, ining kinabubut-on nga espiritu indi limitado sa mga makahinguyang lamang sang ila bug-os nga tion sa pagbantala nga hilikuton.a

Madamo nga may iban pa Makasulatanhon nga mga salabton—subong sang pag-atipan sa pamilya, sa may sablag ukon tigulang nga mga ginikanan—kag sila nga ang ila lawas wala nagatugot sa ila nga makapakigbahin sa bug-os tion nga Cristianong ministeryo ang nagapakita man sini nga espiritu sang kinabubut-on nga pagsakripisyo sang kaugalingon nga kalahamut-an gid kay Jehova. Nagaathag ini kon marealisar sang isa nga ang kadakuon sang pagbantala sing Ginharian nga hilikuton sa kalabanan nga kadutaan aktuwal nga ginahimo sang mga ministro nga nagahinguyang sang daku nga bahin sang ila tion sa sekular nga trabaho ukon sa pag-atipan sa mga obligasyon sa pamilya ukon sa iban pa Makasulatanhon nga mga salabton. Dalayawon gid nga pagpakita sing espiritu nga ginapakamaayo ni Jehova.

Pagpakita sing Husto nga Espiritu sa Iban Pa nga Bahin sang Kabuhi

Subong sang sa adlaw ni Moises kag ni Eze­quias, ang mga kahigayunan sa pagpakita sing kinabubut-on nga espiritu nagaabot karon kon ang lokal nga mga kongregasyon magpatindog sing Kingdom Hall ukon iban pa nga pasilidad nga kaanggid sa sini. Kitaon bala ang amo man nga espiritu sa sina nga mga kaso? Huo, kitaon gid!

Pinasahi ini nga ginapakita sa bag-o nga metodo sang pagpatindog sing Kingdom Hall nga sa masami ginatawag nga quick­ly ­built King­dom Hall nga mga proyekto. Ginatosgatos ka Saksi ang magatipon kag magatrabaho kutob sa aga sang Sabado tubtob sa Domingo sang gab-i—ang iban nagatrabaho sa bug-os nga gab-i—agod matapos ang ginatawag sang mga pamantalaan nga “isa ka milagro sa talipuspusan sang semana.” Sa duog nga wala sing iban nga butang kundi semento sa Biernes, isa ka nahuman nga King­dom Hall para sa miting sa Domingo sang gab-i!b

Ang dalagku pa nga mga kahigayunan sa pagpakita sing kinabubut-on nga espiritu nagapresentar sang ila kaugalingon may kaangtanan sa pagtukod sing mga pasilidad sang sanga sa nanuhaytuhay nga kadutaan. Ang kadamuon sang boluntaryo gid nga trabaho nakaamot sa hilikuton nga ginahimo sa sining nanuhaytuhay nga mga proyekto nga daw indi mahanduraw. Dugang sa ginaamot nga mga trabaho sa pagkamatuod, yara pirme ang pinansial nga mga amot nga ginagamit sa pagbakal sing kinahanglanon nga mga materyalis. Sa masami gid, ang mga Saksi nagadonar sing kinahanglanon nga mga butang nga nagabuhin sing daku sang bili sa pagtukod.

Ang isa ka halimbawa sini natabo sang ginatukod ang bag-o nga sanga sa Syd­ney, Aus­tralia. Didto, ang mga kauturan nga nagapuyo sa naaminhan nga bahin sang Queens­land naghanda kag nagpadala sa duog nga ginapatindugan sing apat ka semi­trail­er nga puno sing mga kahoy nga ginabanta nga nagabili sing halin sa $60,000 tubtob sa $70,000! Sang ginapatindog ang sanga, ang mga Saksi nga nagasakay sa mga bus naglakbay gikan pa sa Nakatundan nga Aus­tralia, 2,500 milya (4,000 km) ang kalayuon, agod maghimo sing boluntaryo nga hilikuton sing apat ka semana sa kada tion. Madamo sang lantip nga mga manugpangabudlay ang nagboluntaryo nga magtrabaho didto sing binulan kag iban sing isa ka tuig pa gani ukon kapin. Isa gid ini ka pagpakita sang pareho nga espiritu nga ginpakamaayo ni Jehova sing bugana gid sa bug-os nga mga siglo nga nagligad kag ina karon masami nga ginasulit sa iban nga kadutaan.

Ang dugang pa nga mga kahimtangan sa pagpakita sing kinabubut-on nga espiritu nagaabot kon ang mga Saksi nagatipon sa mga asambleya kag mga kombension. Ang kada isa sina nga asambleya nagakinahanglan sing madamo nga boluntaryo, sa masami mga binulan sa wala pa ini nga okasyon, agod masigurado nga ang tanan mangin talunsay kag maorganisar sing maayo. Kag kon mag-umpisa na ini, kon kaisa isa sa kada apat ka Saksi nga nagatambong ang magaboluntaryo sa pagbulig sa paghimo sang madamo nga kinahanglanon nga mga trabaho agod mangin makalilipay kag madinalag-on ang kombension. Ang hilikuton mahimo nga magadalahig sing pagserbe sing kalan-on ukon pagpaninlo. Mahimo nga ini isa ka hilikuton nga indi matalupangdan sang kalabanan sa nagatambong. Apang matalupangdan ini ni Jehova! Ginapadyaan niya ang nagatanyag sang ila kaugalingon sing kinabubut-on sa paghimo sang kinahanglanon. Ginaani mo man bala ang padya nga resulta kon ang mga Cristiano ‘paagi sa gugma nagapaulipon sa isa kag isa’ paagi sa boluntaryo nga pagtanyag sang inyo serbisyo sa tion sang asambleya? Nabinagbinag mo bala nga himuon ini subong isa ka pamilya?—Galacia 5:13.

Samtang ining pinasahi nga mga proyekto nagahatag sa aton sing maayong mga kahigayunan sa pagtanyag sang aton kaugalingon nga may amo sini nga espiritu sang pagkahanda, madamo pa sing iban nga mga kahigayunan sa pagpakita sing pareho nga espiritu kada adlaw kag kada semana. Halimbawa, sa tion nga matukod na ang King­dom Hall, nagapakigbahin ka bala sing bug-os sa pagpaninlo kag sa pagmentinar sini? Ginasakdag mo bala ang pagpanghikot sini paagi sa paghatag sing pinansial nga mga amot samtang ginapakamaayo ka ni Jehova sa materyal? Ginasakdag mo bala ang pagbantala nga hilikuton sa inyo pungsod paagi sa paghatag sing mga amot sa lokal nga sanga talatapan? Kag labi pa ka importante, ikaw bala regular nga nagapakigbahin sa hilikuton sang pagbantala sing maayong balita kag paghimo sing mga disipulo sa katawhan sa inyo duog? Wala gid sing makabulos sa aton personal nga bahin sa sining hilikuton nga ginpakita ni Jesus subong ang labing importante nga hilikuton nga tapuson sa karon, sa wala pa ang katapusan sining sistema.—Mateo 24:14; 28:19, 20; Binuhatan 1:8.

Ang tanan nga nagapalambo sining espiritu nga bugana nga ginapakamaayo ni Jehova nakapamatuod nga si Jehova “indi dimatarong nga malimot sang inyo binuhatan kag sang gugma nga ginpakita ninyo tungod sa iya ngalan.” Ikaw man, paagi sa pagpakita sining espiritu sang kinabubut-on nga pagsakripisyo sang kaugalingon, makapamatuod nga “ang pagpakamaayo ni Jehova—amo ina ang nagapamanggaranon, kag wala sia nagadugang sing kasubo sa sini.”—Hebreo 6:10; Hulubaton 10:22.

[Mga footnote]