Ginhimo Nila ang Kabubut-on ni Jehova

Isa ka Kinabubut-on nga Dulot sa Pagpauswag sang Putli nga Pagsimba

ANG mga Israelinhon nakasaksi sang gahom sa pagluwas ni Jehova. Nakita nila ang mga tubig sang Dagat nga Mapula nga napihak sing milagruso, nagpahanugot sa ila nga makatabok sa mamala nga duta kag makapalagyo gikan sa hangaway sang Egipto. Sa pihak sang dagat, nakita nila gikan sa malayo samtang yadto man nga mga tubig naglunod sa mga nagalagas sa ila. Ginluwas ni Jehova ang ila kabuhi!—Exodo 14:21-31.

Apang, makapasubo nga ginpasapayanan sang pila ka Israelinhon ang ginhimo sang ila Dios. Sang si Moises didto sa Bukid Sinai, ginhatag nila ang ila mga alahas nga bulawan kay Aaron kag nagpamilit nga maghimo sia sing idolo agod ila simbahon. Sang nagbalik si Moises, nakita niya ining kadam-an sang mga rebelde nga nagakaon, nagainom, nagasaot, kag nagayaub sa tinday nga baka nga bulawan! Sa sugo ni Jehova mga 3,000—ayhan amo ang panguna nga nagsugyot sang pagrebelde—ang ginpamatay. Sadto nga adlaw, ang katawhan sang Dios nakatuon sing importante nga leksion nga dapat ihatag kay Jehova ang eksklusibo nga debosyon.—Exodo 32:1-6, 19-29.

Wala madugay pagkatapos sini nga hitabo, naghanda si Moises sa pagtuman sa sugo sang Dios nga patindugon ang tabernakulo, isa ka masulusaylo nga kayangkayang sa pagsimba. Ining proyekto sa pagtukod magakinahanglan sing malahalon nga materyales kag lantip nga mga manugpangabudlay. Diin ini magahalin? Kag ano ang matun-an naton gikan sa sini nga kasaysayan sang Biblia?

Pag-amot sing Materyales kag Kasampaton

Paagi kay Moises, si Jehova nagsugo sa mga Israelinhon: “Kuha kamo sing amot para kay Jehova. Ang tagsa nga may maalwan nga tagipusuon magdala sini subong amot kay Jehova.” Ano nga sahi sang amot? Lakip sa mga butang nga ginlista ni Moises amo ang bulawan, pilak, saway, hilo, tela, panit, kahoy, kag bilidhon nga mga bato.—Exodo 35:5-9.

Ang mga Israelinhon may labaw sangsa ginakinahanglan nga pagkabutang agod makaamot sing subong sina kaalwan. Dumduma, sang nagbiya sila sa Egipto, nagdala sila sing mga butang nga human sa bulawan kag pilak, upod ang madamo nga panapton. Sa pagkamatuod, “ginhublasan nila ang mga Egiptohanon.”a (Exodo 12:35, 36) Sang nagligad, handa sa paghatag ang mga Israelinhon sang ila mga alahas agod himuon nga idolo para sa butig nga pagsimba. Ipakita bala nila karon nga sila subong kalangkag sa pagdulot sa pagpauswag sang matuod nga pagsimba?

Talupangda nga wala magpatuman si Moises sing pat-od nga kantidad nga dapat ihatag sang kada isa, kag wala man sia nagpakonsiensia agod palig-unon ang paghatag. Sa baylo, nagpangabay lamang sia sa “tagsa nga may maalwan nga tagipusuon.” Maathag nga nagbatyag si Moises nga indi kinahanglan piliton ang katawhan sang Dios. Nagasalig sia nga ang kada isa magahatag sang tanan niya nga masarangan.—Ipaanggid ang 2 Corinto 8:10-12.

Apang, indi lamang materyales nga amot ang kinahanglanon sa proyekto nga pagtukod. Nagsiling man si Jehova sa mga Israelinhon: “Pakariha ang tanan nga maalam sing tagipusuon sa tunga ninyo kag ipahimo ang tanan nga ginsugo ni Jehova.” Huo, ining proyekto nga pagtukod nagakinahanglan sing lantip nga pagpangabudlay. Sa pagkamatuod, ang “tanan nga sahi sang buluhaton”—lakip ang paggutib sa kahoy, pagpanday sa metal, kag paghimo sing hiyas—kinahanglanon agod mahuman ini nga proyekto. Siempre, si Jehova ang magatuytoy sa mga kinaadman sang mga manugpangabudlay, kag ang kadayawan tungod sang kadalag-an sa proyekto bagay lang gid nga magkadto sa iya.—Exodo 35:10, 30-35; 36:1,2.

Malangkagon nga nagsabat ang mga Israelinhon sa pangagda nga ihatag ang ila pagkabutang kag ang ila kalantip. Ang rekord sang Biblia nagasiling: “Nag-abot sila, ang tagsatagsa nga napahulag sang iya tagipusuon, kag nagdala sila, ang tagsatagsa nga napahulag sang iya espiritu, sing amot kay Jehova para sa paghuman sang kayangkayang nga tilipunan kag para sa tanan nga pag-alagdan sini kag para sa balaan nga mga panapton. Kag nag-inabot sila, ang mga lalaki kaupod sang mga babayi, ang tagsa nga may maalwan nga tagipusuon.”—Exodo 35:21,22.

Leksion Para sa Aton

Ang daku kaayo nga hilikuton sang pagbantala sing maayong balita sang Ginharian sang Dios ginahimo karon paagi sa kinabubut-on nga mga amot. Masami nga sa porma ini sang kuwarta. Sa iban nga mga kahimtangan, ginagamit sang Cristianong mga kauturan nga lalaki kag babayi ang ila bugana nga eksperiensia sa pagbulig tukod sing mga Kingdom Hall, mga Assembly Hall, kag mga pasilidad sang sanga. Nian yara ang hilikuton nga ginahimo sa kapin sa isa ka gatos ka puluy-an Bethel sa bug-os nga kalibutan, hilikuton nga nagakinahanglan sing nanuhaytuhay nga kasampaton. Ang tanan nga handa sing tinagipusuon nga naghatag sinang mga dulot makapat-od nga indi pagkalimtan ni Jehova ang ila lakas nga pagpangabudlay!—Hebreo 6:10.

Naaplikar man ini sa aton pagpakigbahin sa Cristianong ministeryo. Ang tanan ginapalig-on nga magbakal sing tion agod makapakigbahin sing makugihon sa pagbantala. (Mateo 24:14; Efeso 5:15-17) Ginahimo ini sang iban subong bug-os tion nga mga manugbantala, ukon mga payunir. Bangod sang mga kahimtangan, indi masarangan sang iban ang paghinguyang sing daku nga tion sa ministeryo subong payunir. Bisan amo sina, ginakahamut-an man sila ni Jehova. Subong sang mga amot para sa tabernakulo, wala si Jehova nagapatuman sing pat-od nga kantidad nga dapat ihatag sang kada isa. Apang, ang iya ginapatuman amo nga ang tagsa sa aton mag-alagad sa iya sa aton bug-os nga tagipusuon, kalag, hunahuna, kag kusog. (Marcos 12:30) Kon ginahimo naton ina, mapat-od naton nga padyaan niya kita tungod sang kinabubut-on naton nga mga dulot sa pagpauswag sang matuod nga pagsimba.—Hebreo 11:6.

[Footnote]