Wala sing Tiayon Apang Kompleto Para sa Pag-alagad sa Dios
“Ang nagapakasal sa iya palangasaw-on nagahimo sing maayo, apang ang wala nagapangasawa nagahimo sing maayo pa.”—1 CORINTO 7:38.
1. Paano mapamatud-an nga isa ka pagpakamaayo ang pag-asawahay?
WALA ginapaabot ni Jehova nga ang nahauna nga tawo magpabilin nga diminyo. Sa baylo, ang Dios nagtuga sing tiayon para kay Adan, ang manug-umpisa sang tawhanon nga rasa. (Genesis 2:20-24; Binuhatan 17:26) Kag daw ano ka ginpakamaayo nga pag-asawahay yadto! Nag-aman ini sing makaupod, nagpaposible sang pagbuligay sang isa kag isa, isa ka dungganon nga kahimusan sa pagpatubas sing mga anak, kag nag-amot sing daku sa kalipay sang tawo. Ti, bisan ang imol kag ginapigus sarang makatigayon sang indi sarang mabakal sang kuarta—ang gugma sa pag-asawahay!—Ambahanon ni Solomon 8:6, 7.
2, 3. (a) Ano ang ginsiling sang isa ka relihioso nga publikasyon nahanungod sa pagkabuhi nga diminyo kag pagminyo? (b) Sing Makasulatanhon, paano dapat tamdon ang pag-asawahay?
2 Walay sapayan, ginatamod sang iban ang pag-asawahay sa lain nga paagi. Siling sang isa ka relihioso nga publikasyon: “Ang pagkabuhi nga diminyo isa ka eklesiastiko nga sugo sa Nakatundan nga Simbahan nga ginpatuman sa mga klerigo nga nagadumili sa mga minyo nga maordenan kag sa mga yara sa balaan nga mando nga magminyo. Nagalakip ini sang obligasyon nga himuon ang himpit nga pagkaputli sa idalom sang panumpa. Ang mga rason para sa sini amo: nga yadtong gin-ordenan magaalagad sa Dios upod ang labi ka nahiusa nga katuyuan (1 Cor. 7:32), kag nga ang pagkabuhi sing putli nagatuman sang kahimtangan sang pagkaulay, nga mas balaan kag mas mataas sang sa pag-asawahay. Sa BT [Bag-ong Testamento] ang wala sing tiayon ukon ulay nga kahimtangan ginakabig nga mas mataas nga pagtawag sang sa pagminyo.”—The Catholic Encyclopedia, gintipon ni Robert C. Broderick.
3 Posible gid bala nga ang ginapatuman nga pagkabuhi nga diminyo ‘mas balaan kag mas mataas sang sa pag-asawahay’? Indi suno sa “Bag-ong Testamento,” nga nagasiling sa Katolikong Jerusalem Bible: “Ang Espiritu nagasiling sing hayag nga sa ulihi nga mga tion ang iban magatalikud sa pagtuo kag magapakamaayo sa pagpamati sa nagapatalang nga mga espiritu kag mga doktrina nga naghalin sa mga yawa; kag ang kabangdanan sini amo ang kabutigan nga ginasugid sang mga salimpapaw nga ginhirohan ang ila mga konsiensia: magasiling sila nga ang pag-asawahay ginadumilian, kag magahatag sing sugo nahanungod sa paglihi sa mga pagkaon nga gintuga sang Dios nga kalahamut-an nga may pagpasalamat sang tanan nga nagatuo kag nakahibalo sang kamatuoran.” (1 Timoteo 4:1-3) Sa pagkamatuod, ang pag-asawahay isa ka dulot halin sa Dios, kag maayo ini.—Rut 1:9.
4. Nahanungod sa 1 Corinto 7:38, anong mga pamangkot ang nagautwas?
4 Bisan pa nga ang pag-asawahay isa ka dulot halin sa Dios, si apostol Pablo nagsulat: “Ang nagapakasal sa iya palangasaw-on nagahimo sing maayo, apang ang wala nagapangasawa nagahimo sing maayo pa.” (1 Corinto 7:38) Ngaa nagsiling si Pablo nga maayo pa ang magpabilin nga diminyo? Dapat bala magbatyag nga dikompleto ang isa ka diminyo nga tawo? Kag mangin makapaladya bala ang pagkadiminyo?
Ang Sentro sang Cristianong Kabuhi
5. Ano ang dapat nga mangin sentro sang Cristianong kabuhi?
5 Ang pag-alagad kay Jehova dapat mangin ang sentro sang aton Cristianong kabuhi, diminyo man ukon minyo. Ang balaan nga pag-alagad nga ginahimo sing malipayon sa Dios nagahatag sing pamatuod sang aton pagkasuod sa iya subong ang Unibersal nga Soberano. Ang bug-os tagipusuon nga pagkamatinumanon kag makugi nga pagpakigbahin sa Cristianong ministeryo amo ang mga paagi nga mapakita ina nga pagkasuod. (1 Juan 5:2, 3; 1 Corinto 9:16) Sarang mahimo ang ministeryo kag iban pa matinumanon nga mga buhat nahisuno sa balaan nga kabubut-on kon ang isa diminyo.
6. Minyo man ukon diminyo, ang makugi nga ministeryo nagahimo sa aton sa paghimo sang ano?
6 Ginahimo karon sang mga ebanghelisador ang hilikuton nga pagbantala sang Ginharian sa kadayawan ni Jehova. Kag minyo man kita ukon diminyo, ang makugi nga ministeryo nagahatag sa aton sing kahigayunan nga ihugod sa dimagkubos ang iban sang aton personal nga mga kinaiya kag mga dulot sa pag-alagad sa Dios. Apang dapat naton palambuon kag kontrolon ang aton mga sirkunstansia agod ang ministeryo indi mabutang sa lugar nga kubos ka sentro sa aton kabuhi. Dapat naton ‘anay pangitaon ang Ginharian.’ (Mateo 6:33) Makalilipay ang magkonsentrar sa balaan nga mga interes sa baylo sang personal lamang nga mga interes.
Kompleto Para sa Ministeryo
7. Ano nga halimbawa ang nagapakita nga ang diminyo nga Cristiano mangin kompleto para sa ministeryo?
7 Ang mga Cristiano sarang mangin kompleto para sa ministeryo diminyo man ukon minyo sila. Gani ang pagkadiminyo isa ka sadsaran nga wala gid man nagakinahanglan sing pagbag-o. (Ipaanggid ang 1 Corinto 7:24, 27.) Wala ginaugyunan sang Pulong sang Dios ang pagtamod sang iban nga tribo nga indi malab-ot sang isa ka tawo ang iya bug-os nga pagkahamtong kon indi sia magminyo. Si Jesucristo napatay nga diminyo, kag ang espirituwal nga nobya sa langit amo lamang ang asawa nga gin-awtorisar ni Jehova kay Jesus. (Bugna 21:2, 9) Apang, ang Anak sang Dios, bisan pa diminyo subong isa ka tawo, amo ang pinakadaku nga halimbawa sang isa ka tawo nga kompleto para sa ministeryo.
8. Subong sang ginapakita ni Pablo, ano ang ginapahanugot sang pagkadiminyo?
8 Sa pagkamatuod, ang pagkadiminyo nagahatag sing daku pa nga personal nga kahilwayan kag tion para sa ministeryo. Nagarekomendar sang pagkadiminyo, si Pablo nagsiling: “Buot ko nga kamo mahilway sa mga paghimud-os. Ang diminyo nagahimud-os sa mga butang nga iya sang Ginuo, kon paano ang pagpahamuot sa Ginuo. . . . Kag ang babayi nga diminyo, kag ang dalaga, nagahimud-os sa mga butang sang Ginuo.” (1 Corinto 7:32-34) Naaplikar ini sa diminyo nga mga Cristiano kag sa mga nagminyo anay apang nagbag-o na ang mga kahimtangan, nga nagpabalik sa ila sa pagkadiminyo.—Mateo 19:9; Roma 7:2, 3.
9. Paano ginapakita sang halimbawa ni Jesus nga ang pagkadiminyo wala nagahimo sa isa nga dikompleto para sa Cristianong ministeryo?
9 Ang pagtigayon sing pagkahamtong sa pisikal, sa kaisipan, kag sa espirituwal nagaresulta sa pagkakompleto para sa pag-alagad sa Dios. Si Jesucristo wala magkinahanglan sing tiayon agod mangin kompleto para sa katungdanan nga Pangulong Ministro sang Dios kag sing isa nga paagi sa iya ihatag ang aman. (Mateo 20:28) Bangod diminyo, hilway si Jesus nga ihugod ang iya bug-os nga kusog sa iya ministeryo. Ang iya pagkadiminyo tuhay gid katama sa Judiyong batasan, diin ang pagminyo kag mga kabataan ginapadaku. Walay sapayan, si Jesus sangkol sing bug-os sa pagtapos sang ginhatag sa iya sang Dios nga hilikuton. (Lucas 3:23; Juan 17:3, 4) Busa, ang pagkadiminyo wala nagahimo sa isa nga dikompleto para sa Cristianong ministeryo.
Ang mga Minyo “Nabahinbahin”
10. Bangod sang “isa ka unod” nga wagkus, ano ang ginsiling ni Pablo nahanungod sa mga minyo kon ipaanggid sa mga diminyo?
10 Kon ipaanggid sa mga diminyo, ang minyo nga mga Cristiano dapat maghimo sang ministeryo upod ang pagkilala sa ila “isa ka unod” nga wagkus. (Mateo 19:5, 6) Bangod sina nga wagkus kag sang madamo nga responsabilidad sini, si Pablo nagsiling nga ang mga minyo “nabahinbahin.” Nagsulat sia: “Buot ko nga kamo mahilway sa mga paghimud-os. Ang diminyo nagahimud-os sa mga butang nga iya sang Ginuo, kon paano ang pagpahamuot sa Ginuo. Apang ang tawong minyo nagahimud-os sa mga butang sang kalibutan, kon paano ang pagpahamuot sa iya asawa, kag ang iya mga handum nabahinbahin. Kag ang babayi nga diminyo, kag ang dalaga, nagahimud-os sa mga butang sang Ginuo, kon paano ang pagpakabalaan sa lawas kag sa espiritu. Apang ang may bana nagahimud-os sa mga butang sang kalibutan, kon paano ang pagpahamuot niya sa iya bana. Ini ginasiling ko sa inyo kaugalingon nga kapuslanan, indi sa pagpugong sa inyo, kundi sa pagpauswag sang maayong kahusayan kag sa pagdangat sang inyo dinabahinbahin nga pagkatutom sa Ginuo.”—1 Corinto 7:32-35.
11. Ano ang ginapakita ni Pablo sa 1 Corinto 7:32-35?
11 Sing maathag, para sa labi ka wala sing tublag nga pagkabuhi, ginrekomendar ni Pablo ang pagkadiminyo. Sia mismo isa ka balo nga wala na mangasawa liwat. (1 Corinto 9:5) Bisan sa ano man nga hitabo, nahibaluan niya ang mga paghimud-os nga nabuylog sa pagkabuhi nga minyo sa sining kalibutan. Ginpakita niya ang daku nga kahilwayan nga matigayon sang diminyo nga mga Cristiano kag kon paano ang mga interes sang minyo nga mga tumuluo nabahinbahin sa undanon kag espirituwal nga mga butang. Ang tawo nga minyo wala sing bug-os nga awtoridad sa iya lawas, kay ang iya tiayon isa ka unod kaupod niya kag busa may kinamatarong sa iya lawas. (1 Corinto 7:3-5) Bangod sini, husto ang ginsiling ni Pablo nga ang diminyo nga Cristiano mahimo mangin balaan, kon sayuron, bug-os nga napain kag natigana para gamiton sing direkta ni Jehova nga Dios, lunsay sa lawas kag sa espiritu.
12. Bangod wala sing tiayon, ano ang mahimo sang diminyo nga tawo?
12 Ang espiritu, ukon panghunahuna, sang diminyo nga Cristiano nagapahulag sa iya sa aktibo kag wala sing tublag nga pag-alagad sa Ginharian sang Dios. Bangod wala sing tiayon nga nagaangkon sing bahin nga pagkontrol sa iya lawas, masunod niya ang espiritu, ukon huyog, sang iya hunahuna kag tagipusuon. Sarang sia magpakasampaton sa pag-alagad kay Jehova upod ang konsentrasyon sang lawas kag hunahuna. Gani ang diminyo nga lalaki ukon babayi nagatinguha sa pagpahamuot lamang sa Ginuo upod ang daku nga kahilwayan sa kaugalingon. Indi kita makasupak sa ginsiling ni Pablo, kay nakita ni Jehova nga nagakabagay ini isulat sa pagtudlo sa aton.
Dikompleto Bala ang Tawo nga Minyo?
13, 14. Anong sayop nga dalanon ang nagapaliw-as sa “isa ka unod” nga wagkus kag magahimo sa tawo nga minyo nga dikompleto para sa Cristianong ministeryo?
13 Bangod sang sayop nga ideya nga daku pa ang mahimo nila sa pag-alagad sa Dios, mahimo nga ibutang sang iban nga minyo nga mga Cristiano ang ila pag-asawahay sa daw indi importante nga lugar sa kabuhi. Halimbawa, ayhan ang asawa magasugod sa pagpanghikot sing hilway sa iya bana sa importante nga mga paagi. Ayhan ang bana mangin masako sa mga hilikuton sa kongregasyon. Sa sina nga kahimtangan, ayhan magahinakop sila nga maayo ang ginahimo nila sa pag-alagad kay Jehova. Apang, sa pagkamatuod, ayhan nagahimo sila sang dalanon nga liw-as sa “isa ka unod” nga wagkus. Busa, indi ina kalahamut-an kay Jehova.
14 Sa katunayan, ang pagliw-as sa “isa ka unod” nga wagkus nagahimo sa tawo nga minyo nga dikompleto para sa Cristianong ministeryo. Ang pagminyo wala nagadugang sa ministeryal nga pagkakompleto kundi nagabuhin sang personal nga igtalupangod nga mahatag sa ministeryo. (Ipaanggid sa Lucas 14:16, 17, 20.) Apang, kon luyag sang mga minyo pahamut-an ang Dios kag mangin kompleto subong iya mga ministro, dapat sila magkabuhi suno sa ila mga obligasyon sa pag-asawahay.
Wala sing Tiayon Tungod sa Ginharian
15. (a) Ano nga kinaiya ang dapat palambuon sang diminyo nga mga Cristiano? (b) Anong sadsaran nga punto nahanungod sa pag-asawahay kag pagkadiminyo ang ginsiling ni Pablo sa 1 Corinto 7:36, 37?
15 Samtang ang minyo nga mga alagad ni Jehova dapat magkabuhi suno sa ila mga obligasyon sa pag-asawahay, dapat palambuon sang diminyo nga mga Cristiano ang pagkakontento sa ila wala sing tiayon nga pagkakompleto. Subong sang ginsiling ni Pablo: “Nagasiling ako sa mga diminyo kag sa balo nga mga babayi nga maayo sa ila kon magpadayon sila nga diminyo subong sa akon [nga diminyo]. Nahigtan ka bala sa isa ka asawa? Dili ka maghimulat sa pagpanginpalus. Nakapalus ka bala sa isa ka asawa? Dili ka magpangasawa.” (1 Corinto 7:8, 27) Upod ang bulig ni Jehova, subong diminyo, palambua ang malig-on nga kahimtangan nga ginapaposible ni Jehova. Ang bisan ano man nga pagbag-o sa tindog indi dapat mangin butang nga napamat-uran na nga daan, nga isa lamang ka batasan ukon reaksion sa pag-ipit sang katubotubo. Sa baylo, dapat ini mahanabo bangod sang Makasulatanhon nga pagkakinahanglanon, kay si Pablo nagsiling: “Kon ang bisan sin-o nagahunahuna nga wala sia nagagawi sing nagakaigo sa iya pagkaulay, kon lampas na sia sa kapagsik sang pagkapamatan-on, kag ginakinahanglan nga mangin amo ini, maghimo sia sang buot niya; wala sia makasala. Magpakasal sila. Apang ang malig-on sa iya tagipusuon, nga walay kinahanglan, kundi may gahom sa iya kaugalingon nga kabubut-on kag nakahimo sini nga pamat-od sa iya tagipusuon, sa paghupot sa iya kaugalingon nga pagkaulay, nagahimo sia sing maayo.”—1 Corinto 7:36, 37.
16. (a) Ano ang buot silingon sang mangin “lampas na sa kapagsik sang pagkapamatan-on”? (b) Sa ano dapat mangin kombinsido ang Cristiano nga magpabilin nga diminyo?
16 Busa ginpakita ni Pablo nga indi sayop ang magminyo kon ang isa nagagawi sa paagi nga indi suno sa ginabaton nga maayo nga talaksan sang iya pagkadiminyo, bisan pa nga sa walay duhaduha ang apostol wala nagapatuhoy sa grabe nga sala. Subong sang ginsiling niya sing una, “Maayo pa ang magpangasawa sang sa masunog sa kailigbon sang unod.” (1 Corinto 7:9) Sa pagkamatuod, ginapatuhuyan niya ang pagminyo sa idalom sang sirkunstansia nga ang isa “lampas na sa kapagsik sang pagkapamatan-on,” nga lampas sa tion nga ang interes sa sekso masingkal. Kon ang hamtong nga indibiduwal “may gahom sa iya kaugalingon nga kabubut-on” kag nakapamat-od sing malig-on sa iya tagipusuon nga magpabilin nga diminyo, nagahimo sia sing maayo. Ang madinalag-on nga pagkadiminyo wala nagakahulugan sing pagpugong sa dalayon kag halos nagapangibabaw nga handum sa pagminyo kag sa pagkabuhi nga may pamilya. Sa baylo, ang Cristiano nga nagpakamaayo sa pagpabilin nga diminyo dapat mangin kombinsido sing bug-os sa tagipusuon nga ang pagpabilin nga diminyo nagakabagay sa iya kag dapat mangin handa sa pagpanikasog sa kon ano ang kinahanglanon agod huptan ina nga kahimtang sang pagkaputli. Ang Cristiano nga nagahimo sina may diutay nga tublag kag mas daku nga kahilwayan sa pag-alagad sa Ginuo.
17. Suno kay Jesus, ngaa ang iban nagpabilin nga diminyo?
17 Ang diminyo nga mga Cristiano mabuligan sa pagpabilin nga diminyo kon palambuon nila ang panghunahuna ni Jesucristo. Bisan pa diminyo sia sa isa ka kultora nga nagapadaku sang pagminyo, ginkonsentrar niya ang iya tion kag mga dulot sa iya indi na maliwat nga ministeryo. Kaangay ni Jesus, ang diminyo nga Cristiano magakalipay sa dulot sang pagkadiminyo nga ginahatag sang Dios sa mga makasarang sa pagbaton sini. Nahanungod sini, si Jesus nagsiling: “Indi ang tanan nga tawo makabaton sining pulong, kundi yadtong mga ginhatagan sini. Kay may mga tawo nga eunuco sa ila pagkatawo, kag may mga eunuco nga ginhimo sang tawo sing subong, kag may mga eunuco nga naghimo sang ila kaugalingon sing subong bangod sa ginharian sang langit. Ang makasarang sa pagbaton sini, magbaton sia.”—Mateo 19:11, 12.
18. Ano ang nagapugong sa “mga eunuco” tungod sa Ginharian nga magminyo?
18 Wala magsiling si Jesus nga ang diminyo nga tawo superyor sang sa minyo nga tawo. Wala niya ginlaygay ang pagkadiminyo agod lamang magkabuhi nga wala sing ginapaligbi, kag pat-od nga wala niya ini ginarekomendar agod mapatungod sang diminyo nga tawo ang iya igtalupangod sa madamo nga tuhay sing sekso. Indi, kundi ang mga nagahimo sang ila kaugalingon nga “mga eunuco” tungod sa Ginharian matarong sa moral nga mga tawo nga nagahatag sing hulot para sa sini sa ila mga tagipusuon. Ano ang nagapugong sa ila sa pagminyo? Indi ang pila ka pisikal nga sablag kundi ang nagapangibabaw nga handum nga gamiton ang ila kaugalingon sing bug-os kon posible sa pag-alagad sa Dios. Importante ini nga pag-alagad labi na karon kutob sang ang Ginharian gintukod sa langit sang 1914 kag “ining maayong balita sang ginharian” dapat ibantala sa bug-os nga duta bilang panaksi sa wala pa madasig nga nagaabot ang katapusan sining ginpamatbatan nga sistema sang mga butang.—Mateo 24:14.
Dayawa ang Diminyo nga mga Cristiano
19. Nahanungod sa mga nagpabilin nga diminyo tungod sa Ginharian, ano ang dapat himuon sang tanan nga mga Cristiano?
19 Dapat dayawon kag palig-unon sang tanan nga mga Cristiano ang mga nagpabilin nga diminyo tungod sa Ginharian. Total, ang pagkadiminyo “nagakahulugan sing dalayon nga pag-alagad sa Ginuo nga wala sing tublag.” (1 Corinto 7:35) Maayo nga tudluan sang mga ginikanan ang ila mga kabataan kon ano ang ginasiling sang Biblia nahanungod sa diminyo nga kahimtangan kag sang mga bentaha sini sa pag-alagad kay Jehova. Sarang naton tanan mapalig-on ang wala sing tiayon nga mga masigka sumilimba kag indi gid dapat paluyahon ang ila pamat-od nga magpabilin nga wala sing tiayon tungod sa Ginharian.
20. Kon isa ikaw ka Cristiano nga wala sing tiayon, ano ang himuon mo?
20 Ang diminyo nga mga Cristiano sarang magkalipay subong kompleto nga mga ministro sang Dios. Sa sining ulihi nga mga tion, nalipay sila sa pagpakigbahin sa madagmit nga hilikuton sang pagbantala sang Ginharian. Busa, kon kamo diminyo, magkalipay nga gamiton ni Jehova subong kompleto kag wala sing tiayon nga Cristianong ministro. ‘Panikasugi ang inyo kaluwasan nga may kahadlok kag pagkurog, samtang nagasiga kamo subong mga sulu sang kalibutan, nga nagapanguyapot sing malig-on sa pulong sang kabuhi.’ (Filipos 2:12-16) Magkonsentrar sa mga interes sang Ginharian samtang nagapabilin kamo nga nahiusa sa internasyonal nga pag-ululutod sang mga Saksi ni Jehova kag nagahimo sang Cristianong ministeryo. Ang paghimo sini subong diminyo isa ka makapaladya nga dalanon sang kabuhi, subong sang makita naton.
Ano ang Imo Sabat?
◻ Ano ang dapat mangin sentro sang Cristianong kabuhi?
◻ Ngaa ang wala sing tiayon nga mga alagad ni Jehova mangin kompleto para sa Cristianong ministeryo?
◻ Sa anong paagi ang minyo nga tawo mangin dikompleto?
◻ Ano ang buot silingon sang mangin “eunuco” tungod sa Ginharian?
◻ Ngaa dapat naton palig-unon ang wala sing tiayon nga mga Cristiano?
[Laragway sa pahina 10]
Bisan pa diminyo, si apostol Pablo kompleto
[Laragway sa pahina12]
Si Jesus amo ang pinakapanguna nga halimbawa sang isa ka tawo nga kompleto para sa ministeryo
[Laragway sa pahina 15]
Ginahatagan mo bala sing komendasyon ang mga nagapabilin nga diminyo tungod sa Ginharian?