Pagkadiminyo—Isa ka Makapaladya nga Dalanon sang Kabuhi
“Hilway sia sa pagpamana sang buot niya, lamang sa Ginuo. Apang malipayon pa sia kon magpadayon subong nga amo sia.”—1 CORINTO 7:39, 40.
1. Minyo man kita ukon indi, ano ang utang naton kay Jehova?
SI Jehova nagakabagay sang bug-os kalag nga pagsimba sang tanan nga dedikado sa iya. Minyo man ukon diminyo, dapat naton higugmaon ang Dios upod ang aton bug-os nga tagipusuon, kalag, hunahuna, kag kusog. (Marcos 12:30) Matuod, ang diminyo nga Cristiano mas diutay sing mga tublag sang sa mga minyo. Apang mangin malipayon gid bala ang diminyo nga alagad ni Jehova?
2, 3. (a) Sa kahulugan, ano ang ginsiling ni Pablo sa 1 Corinto 7:39, 40? (b) Ano nga mga pamangkot ang nagakabagay binagbinagon?
2 Si apostol Pablo nagasabat sing huo. Nahanungod sadtong minyo anay apang nagbalhin ang kahimtangan, nagsulat sia: “Ang asawa nahigtan samtang buhi ang iya bana. Kon ang bana mapatay, hilway sia sa pagpamana sang buot niya lamang sa Ginuo. Apang malipayon pa sia kon magpadayon subong nga amo sia suno sa akon panghunahuna. Kag nagahunahuna ako nga yari sa akon ang espiritu sang Dios.”—1 Corinto 7:39, 40.
3 Bangod ginapakita ni Pablo nga mangin malipayon ang mga diminyo, sin-o ang ayhan makatarunganon nga makabinagbinag sa pagpabilin nga wala sing tiayon, sa dimagkubos sa pila ka tion? Ano ang nagaamot sa kalipay sang wala sing tiayon nga mga Cristiano? Sa pagkamatuod, paano mangin makapaladya nga dalanon sang kabuhi ang pagkadiminyo?
Makapaladya nga Tinuig sang Pagkadiminyo
4. Ano ang nagakatabo sa tinuig sang lamharon nga pamatan-on nga lalaki kag babayi?
4 Ang maalam nga si Hari Solomon naglaygay: “Dumduma man ang imo Dakung Manunuga sa mga adlaw sang imo pagkapamatan-on, sa wala pa mag-abot ang malaut nga mga adlaw [sang pagkatigulangon], ukon magpalapit ang mga tuig nga magsiling ka: ‘Wala ako sing kalipay sa ila.’” (Manugwali 12:1) Ang tinuig sang pagkapamatan-on sang lalaki kag babayi sa kabilugan amo ang tion sang daku nga kapagsik kag mapagros nga panglawas. Nagakaigo, nian, nga gamiton ining mga kinaiya sa pag-alagad kay Jehova nga wala sing tublag! Dugang pa, ining una nga mga tuig amo ang tion sa pagtigayon sing eksperiensia sa kabuhi, sa pagpalambo sing kalig-onan. Apang isa man ini ka panag-on nga ang mga pamatan-on sang kalibutan nagaeksperiensia sang impatwasyon. Halimbawa, binagbinaga ang resulta sang isa ka surbey nga nagahilabot sa 1,079 ka tawo sa ulot sang pangedaron nga 18 kag 24. May yara sila promedyo nga pito ka “romantiko nga mga eksperiensia” kag nagsiling nga ang ila karon nga ginabatyag amo ang matuod nga paghigugma, indi impatwasyon.
5. Nahanungod sa pag-asawahay, anong personal nga mga pamangkot ang nagakaigo nga binagbinagon sang isa ka pamatan-on?
5 Ginapakita sang mga estadista sang pagbulagay, diborsio, kag naguba nga pamilya ang pagkadinagakabagay sang temprano nga pag-asawahay. Sa baylo nga magdali sa pag-date, pagpangaluyag, kag pagpakasal, maalamon nga hunahunaon sing positibo sang pamatan-on nga mga Cristiano ang nahanungod sa kon paano nila magamit sa dimagkubos ang ila una nga mga tuig sa wala sing tublag nga pag-alagad kay Jehova. Kon nagabinagbinag sang imo kahimtangan subong pamatan-on, ayhan mapamangkot mo ang imo kaugalingon sing mga pamangkot subong sini: Hamtong na bala ako sa emosyon kag handa na sa paghunahuna sing serioso nga magpakasal? May bastante na bala ako nga eksperiensia sa kabuhi agod mangin maayo nga tiayon? Masarangan ko bala ang mga responsabilidad sang pag-asawahay kag ayhan sang isa ka pamilya nga may kabataan? Nahanungod sa akon dedikasyon kay Jehova, indi ko bala dapat ihatag sa iya ang enerhiya kag kusog sang pagkapamatan-on nga wala sing mga tublag may kahilabtanan sa pag-asawahay?
Mga Padya sang Putli nga Pagkadiminyo
6, 7. (a) Ano ang pila ka bentaha nga ginaagom sang diminyo nga mga Cristiano? (b) Sa sini nga bahin, ano ang ginsiling sang isa ka wala sing tiayon nga misyonero sa Aprika?
6 Ang wala sing tiayon nga mga Cristiano nagaagom sing kahilwayan sa mga tublag kag makasapo sing ‘bugana nga hilikuton sa buluhaton sang Ginuo.’ (1 Corinto 7:32-34; 15:58) Sa baylo nga ihugod ang igtalupangod sa isa ka indibiduwal sang tuhay nga sekso, ang diminyo nga tawo may dugang nga kahigayunan sa pagpasangkad sang Cristianong gugma sa madamo sa kongregasyon, lakip ang mga tigulang kag ang iban pa nga nagakinahanglan sing mahigugmaon nga bulig. (Salmo 41:1) Sing masami, ang mga diminyo may madamo nga tion sa pagtuon kag sa pagpamalandong sa Pulong sang Dios. (Hulubaton 15:28) Mas daku ang ila kahigayunan nga mapalambo ang suod nga kaangtanan kay Jehova, nagatuon sa pagsalig sa iya kag sa pagpangayo sang iya panuytoy. (Salmo 37:5; Filipos 4:6, 7; Santiago 4:8) Ang wala sing tiayon nga lalaki nga nag-alagad kay Jehova sing tinuig subong isa ka misyonero sa Aprika nagsiling:
7 “Simple ang pangabuhi sa Aprikano nga mga minuro sa sulod sining mga tinuig, nga wala sing tuman kadamo nga mga tublag sang modernong sibilisasyon. Bangod wala sining mga tublag, may nagakaigo ako nga kahigayunan sa pagtuon kag sa pagpamalandong sa Pulong sang Dios. Naghimo ini sa akon nga mabakud. Huo, ang misyonero nga pagkabuhi isa gid ka pagpakamaayo kag pangamlig batok sa materyalismo. Sa matahom nga kagab-ihon sa tropiko may yara nagakaigo nga tion sa pagpamalandong kag sa pagbinagbinag sang mga pagpanuga ni Jehova kag magsuod sa iya. Ang akon labing daku nga kalipay nagaabot kada gab-i nga ang akon hunahuna nagabugtaw pa, kag samtang nagaisahanon ginahinguyang ko ang pila ka tion sa idalom sang mabituunon nga kalangitan nga nagalakat kag nagapakighambal kay Jehova. Naghimo ini sa akon nga mas suod kay Jehova.”
8. Nahanungod sa pagkadiminyo, ano ang ginsiling sang isa ka wala sing tiayon nga utod nga babayi nga may madamong tinuig nga pag-alagad sa ulong-talatapan sang Sosiedad?
8 Talalupangdon man amo ining komento sang isa ka diminyo nga utod nga babayi nga nag-alagad sing madamong tinuig sa ulong talatapan sang Watch Tower Society: “Ginpili ko ang diminyo nga pagkabuhi sa akon pag-alagad kay Jehova. Nangin masinulub-on bala ako? Indi gid. Sa pagkamatuod, ang mga higayon nga ako nagaisahanon amo ang isa sang pinakahamili. Nagapakighambal ako kay Jehova sa pangamuyo. Makapamalandong ako kag makatuon sing personal nga wala sing tublag. . . . Daku ang naamot sang pagkadiminyo sa akon kalipay.”
9. Ano ang pila sa mga pribilehiyo sa pag-alagad ang naagom sang diminyo nga Cristiano?
9 Sarang man mabaton sang diminyo ang mga pribilehiyo sa pag-alagad nga mahimo indi bukas sa mga minyo nga may mga salabton sa pamilya. Halimbawa, ayhan yara ang kahigayunan nga mag-alagad sing bug-os tion subong payunir sa lugar diin daku ang pagkinahanglan sing mga manugbantala sang Ginharian. Ukon ang diminyo nga pamatan-on nga lalaki mahimo nga may pribilehiyo sa pag-alagad subong katapo sang panimalay Bethel sa ulong talatapan ukon sanga talatapan sang Watch Tower Society. Ang pamatan-on nga diminyo nga babayi mahimo nga magabuylog sa mga may edad nga diminyo nga utod nga babayi sa payunir nga pag-alagad sa ila tumandok nga kongregasyon ukon sa iban nga may teritoryo nga dapat tuptupan. Ngaa indi hambalan ina nga mga posibilidad upod sa manugtatap sa sirkito? Subong diminyo nga Cristiano, gamita ang imo kaugalingon para sa dugang nga pag-alagad sa kadayawan ni Jehova, kag pakamaayuhon niya ikaw sing bugana.—Malaquias 3:10.
Mga Halimbawa Gikan sa Nagligad
10. Sin-o ang panguna nga halimbawa sang wala sing tiayon nga alagad ni Jehova, kag sa banta mo, ngaa may bentaha ang iya pagkadiminyo?
10 Ang una nga halimbawa sang diminyo nga alagad ni Jehova amo si Jesucristo. Bug-os gid sia nga nahugod sa paghimo sang kabubut-on sang Dios. “Ang akon kalan-on amo ang paghimo sang kabubut-on sang nagpadala sa akon kag ang pagtuman sang iya buluhaton,” siling ni Jesus. (Juan 4:34) Tuman gid sia kasako—sa pagbantala, sa pag-ayo sang balatianon, kag iban pa! (Mateo 14:14) Si Jesus may matuodtuod nga interes sa katawhan kag komportable sa atubangan sang mga lalaki, mga babayi, kag kabataan. Sa pagkamatuod, naglakbay sia sa iya ministeryo, samtang ang iban nag-upod sa iya sa iban nga okasyon. (Lucas 8:1-3) Apang daw ano kabudlay kuntani yadto nga hilikuton kon gin-updan sia sang asawa kag magagmay nga kabataan! Sing dimapangduhaduhaan, ang pagkadiminyo bentaha sa bahin ni Jesus. Sa karon, ang diminyo nga Cristiano makatigayon man sina nga mga bentaha, labi na kon gintawag sa pagbantala sang mensahe sang Ginharian sa nabaw-ing ukon makatalagam nga mga lugar.
11, 12. Anong maayong halimbawa ang ginahatag para sa diminyo nga mga babayi nga nagaalagad kay Jehova karon?
11 Apang nasapwan man sang iban ang pagkadiminyo nga praktikal kag makapaladya. Boluntaryo nga ginhimo sang anak nga babayi ni Jefte ang sumpa sang iya amay paagi sa pagpabilin nga diminyo sa isa ka katilingban nga naghatag sing daku nga pagpadaku sa pag-asawahay kag mga kabataan. Nalipay sia sa iya pag-alagad kay Jehova, kag talalupangdon nga ginpalig-on sia sing tayuyon sang iban. Ti, “ang babayi nga mga anak sang Israel nagakadto tuigtuig sa paghatag sing komendasyon sa babayi nga anak ni Jefte nga Galaadnon sing apat ka adlaw sa tuig”! (Hukom 11:34-40) Sing kaanggid, dapat hatagan sing komendasyon kag palig-unon sang minyo nga mga Cristiano kag sang iban pa ang diminyo nga mga babayi nga nagaalagad sing maisugon kay Jehova karon.
12 Ang apat ka ulay nga mga anak nga babayi ni Felipe “nagpanagna.” (Binuhatan 21:8, 9) Ining diminyo nga mga babayi mahimo nga nakatigayon sing daku nga kalipay sa ila aktibo nga pag-alagad sa kadayawan ni Jehova. Sing kaanggid, madamong pamatan-on nga diminyo nga mga babayi karon ang may makapaladya nga pribilehiyo sa pag-alagad subong mga payunir, ukon bug-os tion nga mga manugbantala sang Ginharian. Sa pagkamatuod, nagakabagay sila nga hatagan sing komendasyon subong bahin sang ‘daku nga hubon sang mga babayi nga nagabantala sang maayong balita.’—Salmo 68:11.
13. Paano ginailustrar sang kaso ni Pablo nga ang pagkadiminyo mangin makapaladya nga dalanon sang kabuhi?
13 Nasapwan ni apostol Pablo ang pagkadiminyo nga maayo. Naglakbay sia sing linibo ka kilometro sa iya ministeryo kag nag-atubang sing daku nga kabudlayan, madamong katalagman, wala sing tulog nga kagab-ihon, makapaluya nga pagkagutom. (2 Corinto 11:23-27) Sa walay duhaduha, ini tanan mahimo nga mas mabudlay kag makasulubo kon minyo kuntani si Pablo. Dugang pa, mahimo nga wala gid niya matigayon ang iya pribilehiyo subong “apostol sa mga pungsod” kon may ginasagud sia nga pamilya. (Roma 11:13) Walay sapayan sang mga pagtilaw nga gin-atubang niya, napamatud-an ni Pablo nga ang pagkadiminyo nangin makapaladya nga dalanon sang kabuhi.
Modernong-adlaw nga mga Halimbawa
14. Anong mga eksperiensia ang naagihan sang mga colporteur, nga ang kalabanan sa ila wala sing tiayon?
14 Kaangay ni Pablo kag sang iban pa diminyo nga unang mga Cristiano, madamo nga katawhan sang Dios ang nakigbahin sa colporteur nga hilikuton (kutob sang 1881 padayon) ang mga diminyo nga wala sing ginasagud nga pamilya. Kinabubut-on sila nga nagkadto sa wala masunari nga mga siudad, mga banwa, kag mga uma, nga nagapangita sadtong may maayo sing tagipusuon kag nagpahamtang sa ila sing literatura sa Biblia. Nagalakbay sila paagi sa tren, bisekleta, kalesa, ukon awto. Sa kalabanan, malipayon sila nga naglakat sa pamalaybalay. (Binuhatan 20:20, 21) “Kon kaisa ginabayluhan nila [ang literatura sa Biblia] sing mga patubas sa uma, mga manok, habon kag bisan ano lang, nga magamit nila kag mabaligya sa iban,” panugiron sang isa ka saksi ni Jehova, nga nagdugang: “Kon kaisa, sa malaka sing balay nga lugar, nag-upod sila sa mga mangunguma kag mga rantsero sa bug-os nga gab-i, kag kon kaisa nagtulog sa mga kugon . . . Ining mga matutom [nga kalabanan sa ila diminyo] nagpadayon sa madamo nga tinuig tubtob nga nagtigulang sila.” Sa pagkamatuod, naghambal ang isa sa ila tungod sa madugay na nga mga colporteur sa kabilugan sang magsulat sia: “Mga pamatan-on kag malipayon kami sa pag-alagad, nga nalipay sa paggamit sang amon kusog nga nagaalagad kay Jah.”
15. Para sa madamong wala sing tiayon nga mga payunir, ano nga ganhaan nga nagapadulong sa mas daku nga hilikuton ang ginbuksan sang nagligad nga mga 45 ka tuig?
15 Madamong mga payunir, ukon bug-os tion nga mga manugbantala sang Ginharian, sang ulihi nga mga tion ang mga wala man sing tiayon. Masunson sila nga nagpanaksi sa nabaw-ing nga mga lugar, nagbulig sa pag-umpisa sing bag-ong mga kongregasyon, kag nag-agom sing iban pa nga mga pagpakamaayo sa pag-alagad kay Jehova. Para sa iban sa ila, ang makakulunyag nga ganhaan nga nagapadulong sa mas daku nga hilikuton ginbuksan sang ang Watchtower School of Gilead nagsugod sa pagpanghikot sang 1943 samtang nagadabdab ang Inaway Kalibutanon II. (1 Corinton 16:9) Huo, madamo sadtong diminyo nga mga payunir ang nakabaton sing misyonero nga paghanas sa Gilead School kag sang ulihi nagpalapnag sang mensahe sang Ginharian sa bag-ong mga teritoryo. Wala ginaupangan sang mga salabton sa pag-asawahay, gingamit nila ang ila kaugalingon sa pag-alagad kay Jehova, kag ang iban sadtong una nga mga gradwado diminyo gihapon kag aktibo sa misyonero nga latagon ukon sa iban pa nga bahin sang bug-os tion nga pag-alagad.
16. Ano ang pamatuod nga nasapwan sang wala sing tiayon nga mga katapo sang panimalay Bethel ang pagkadiminyo nga isa ka makapaladya nga dalanon sang kabuhi?
16 Madamong wala sing tiayon nga mga Cristiano ang nag-alagad sing tinuig subong mga katapo sang panimalay Bethel sa ulong-talatapan sang Watch Tower Society ukon sa mga sanga sini sa iban nga bahin sang kalibutan. Nasapwan bala nila ang pagkadiminyo nga isa ka makapaladya nga dalanon sang kabuhi? Huo, sa pagkamatuod. Halimbawa, ang isa ka diminyo nga utod nga lalaki nga nag-alagad sa Brooklyn Bethel sa madamong tinuig nagkomento: “Ang kalipay nga makita ang minilyon ka magasin kag iban pa nga publikasyon nga nagadala sang mensahe sang Pulong sang Dios nga ginapalapnag tubtob sa kaukbungan sang duta isa na mismo ka makalilipay nga padya.” Pagkatapos sang mga 45 ka tuig nga pag-alagad sa Bethel, isa pa ka diminyo nga utod nga lalaki ang nagsiling: “Kada adlaw akon ginapangabay sa aton ginahigugma nga langitnon nga Amay sa pangamuyo ang bulig kag kaalam agod huptan ang akon kaugalingon nga mapagros kag mabakud sa espirituwal kag sa pisikal man agod padayon ko nga mahimo ang iya balaan nga kabubut-on. . . . Sa pagkamatuod, natigayon ko ang isa ka makalilipay, makapaladya kag ginpakamaayo nga dalanon sang kabuhi.”
Paghupot sing Putli nga Pagkadiminyo
17. Ano ang duha ka bulig sa paghupot sing putli nga pagkadiminyo?
17 Ang makapaladya nga kabuhi sang pagkadiminyo mapamatud-an gikan sa mga halimbawa sa Biblia kag sa modernong-adlaw. Sa pagkamatuod, sa bisan ano man nga panag-on sang imo kabuhi nga ginhinguyang sing diminyo, dapat ikaw ‘nakapamat-ud sing malig-on sa imo tagipusuon.’ (1 Corinto 7:37) Apang ano ang magabulig sa imo sa paghupot sang kaputli samtang diminyo? Ang pinakadaku nga Tuburan sang bulig amo si Jehova, ang “Manugpamati sang pangamuyo.” (Salmo 65:2) Gani himua nga batasan ang magpangabay sa iya sing masunson. “Magpadayon sa pagpangamuyo,” nga nagapangabay sang espiritu sang Dios kag sang iya bulig sa pagpasundayag sang mga bunga sini, nga nagalakip sang paghidait kag pagpugong sa kaugalingon. (Roma 12:12; Lucas 11:13; Galacia 5:22, 23) Subong man, upod ang mapangamuyuon nga panimuot, tayuyon nga hunahunaa kag pirme iaplikar ang laygay sang Pulong sang Dios.
18. Ano ang ginasiling sang 1 Corinto 14:20 nahanungod sa pagpabilin sang isa nga putli subong diminyo?
18 Ang isa pa ka bulig sa paghupot sing putli nga pagkadiminyo amo ang paglikaw sang bisan ano nga butang nga nagapukaw sang seksuwal nga kaibog. Sing maathag, nagalakip ini sang pornograpiya kag imoral nga kalingawan. Si Pablo nagsiling: “Magpakabata kamo sa kalautan; apang magpahamtong kamo sa ikasarang sa paghangop.” (1 Corinto 14:20) Indi pagtinguhai ang paghibalo ukon pag-eksperiensia sang malaut, kundi paagi sa bulig sang Dios maalamon nga magpabilin nga indi eksperiensiado kag wala sing hinalung-ong subong sang bata sa sini nga bahin. Sa amo man nga tion, dumduma nga ang seksuwal nga imoralidad kag ang sayop nga buhat indi nagakaigo sa panulok ni Jehova.
19. Ano nga kasulatan ang nagatudlo sa iban nga paagi nga magpabilin nga putli subong diminyo?
19 Mabuligan man kamo sa pagpabilin nga putli subong wala sing tiayon paagi sa pagbantay sang inyo mga kaupdanan. (1 Corinto 15:33) Likawi ang pagpakig-upod sa mga nagahimo sang sekso kag pagminyo nga amo ang dalagku nga bahin sang ila kabuhi kag sugilanon. Sa tanan nga paagi likawi ang malaw-ay nga linahog! Si Pablo naglaygay: “Ang pagkamakihilawason kag ang tanan nga kahigkuan ukon paghamkon dili gid paghingadlan sa inyo, subong nga nagakaigo sa mga balaan; magmangin walay binastos ukon binuang nga hinambal ukon malaw-ay nga linahog, nga indi nagakaigo, kundi hinonoo mga pagpasalamat.”—Efeso 5:3, 4.
Isa ka Makapaladya nga Palaabuton
20. Sa ano magaresulta ang paggamit sing labing maayo sang mga tinuig sang pagkadiminyo?
20 Ang paggamit sing labing maayo sang inyo mga tinuig subong wala sing tiayon nga Cristiano sa pag-alagad kay Jehova magaresulta sa karon nga kaayawan kag kalinong sa hunahuna. Nagaamot man ini sa inyo espirituwal nga pagkahamtong kag kalig-onan. Kon magpabilin kamo nga diminyo tungod sa Ginharian tubtob sa katapusan sining malaut nga sistema sang mga butang, indi pagkalimtan ni Jehova ang inyo nagasakripisyo sa kaugalingon nga mga panikasog sa balaan nga pag-alagad sa iya.
21. Kon ikaw magaminyo pagkatapos sang isa ka panag-on sang putli kag makapaladya nga pagkadiminyo, upod kay sin-o ayhan ikaw magapakasal?
21 Kon maukod nga ginapanikasugan ninyo ang mga interes sang Ginharian subong diminyo nga lalaki ukon babayi, maagom ninyo ang madamong pagpakamaayo. (Hulubaton 10:22) Nian kon magminyo man kamo sa ulihi sa kabuhi, magasulod kamo sa pag-asawahay upod ang mas daku nga eksperiensia kag bugana sa espirituwal nga ginhalinan. Dugang pa, paagi sa pagsunod sa laygay sang Kasulatan, pilion ninyo ang isa ka dedikado kag nagahupot sing integridad nga tiayon nga magabulig sa imo sa pag-alagad sing matutom sa Dios. Sa karon, masapwan ninyo ang pagkadiminyo nga isa ka makapaladya nga dalanon sang kabuhi sa pag-alagad sa aton mahigugmaon nga Dios, si Jehova.
Paano Mo Sabton?
◻ Sa tunga sang mga alagad ni Jehova, ano ang pila sa mga padya sang putli nga pagkadiminyo?
◻ Anong Makasulatanhon nga halimbawa ang nagapakita nga ang pagkadiminyo makapaladya?
◻ Sa modernong tion, ano ang aton mga halimbawa sang makapaladya nga pagkadiminyo?
◻ Ano ang magabulig sa isa ka Cristiano nga magpabilin nga putli samtang wala sing tiayon?
[Kahon sa pahina 19]
Mga Bulig sa Paghupot sing Putli nga Pagkadiminyo
◆ Pangamuyua sing tayuyon ang espiritu sang Dios kag ang iya bulig sa pagpakita sang iya bunga
◆ Binagbinaga kag iaplikar pirme ang laygay sang Pulong sang Dios
◆ Likawi ang pornograpiya kag imoral nga kalingawan
◆ Bantayi ang inyo mga kaupdanan
◆ Likawi ang dimatinlo nga hambal kag malaw-ay nga linahog
[Mga Laragway sa pahina 18]
Nasapwan sang anak nga babayi ni Jefte, ni apostol Pablo, kag sang iban nga mga alagad ni Jehova ang pagkadiminyo nga isa ka makapaladya nga dalanon sang kabuhi. Ikaw bala?