‘Hatagi Ini sing Duog’
1 Isa ka bes, sang nagapakighambal sa mga disipulo tuhoy sa pag-asawahay, ginpatuhuyan ni Jesus ang pagkadiminyo subong ‘isa ka dulot.’ Nian, sia nagsiling: “Sia nga makahatag sing duog sa sini maghatag sing duog sa sini.” (Mat. 19:10-12) Pila ka tuig sang ulihi, si apostol Pablo nagsulat tuhoy sa mga bentaha sang pagkadiminyo kag nagpalig-on sa iban nga sundon ang iya halimbawa. (1 Cor. 7:7, 38) Madamo karon ang ‘nagahatag sing duog’ sa pagkadiminyo kag nakabenepisyo sa mga bentaha sini. Ano ang pila sini?
2 Pag-alagad nga “Wala Sing Tublag”: Nahangpan ni Pablo nga ang pagkadiminyo nagahatag sa iya sing kahigayunan nga maalagad si Jehova nga “wala sing tublag.” Amo man sa karon, ang di-minyo nga utod nga lalaki makaaplay sa Ministerial Training School, kag ang isa nga di-minyo masami nga hilway sa pagpayunir, sa pagtuon sing iban nga lenguahe, sa pagsaylo kon diin may mas daku nga kinahanglanon, sa pag-alagad sa Bethel, ukon sa iban pa nga pinasahi nga mga pribilehiyo sa pag-alagad. Mahimo nga may madamo sia nga tion kag mga kahigayunan nga makatuon kag makapamalandong sing maayo kag makapakigsugilanon kay Jehova sing tinagipusuon sa pangamuyo. Ang di-minyo masami nga may madamo nga tion sa pagbulig sa iban. Ining tanan nga hilikuton para sa “kaugalingon nga kapuslanan” sang isa.—1 Cor. 7:32-35; Binu. 20:35.
3 Ining walay tublag nga pag-alagad sa Dios may bugana nga mga padya. Pagkatapos sang 27 ka tuig sa Kenya, ang isa ka di-minyo nga utod nga babayi nagsulat: “Kadamo gid sang mga abyan kag sang mga hilikuton! Ulupod kami sa paghimo sing mga butang [kag] nagaduaw sa isa kag isa. . . . Bangod di-minyo, nagamit ko ang dugang ko nga kahilwayan sa pagpabilin nga masako sa ministeryo, kag nagpahalipay pa gid ini sa akon.” Sia nagpadayon: “Sa sulod sang mga tinuig labi nga nagsuod ang akon kaangtanan kay Jehova.”
4 Paghatag Sing Duog sa Sini: Si Jesus nagsiling nga ang motibo sa pagpalambo sa dulot sang pagkadiminyo dapat “bangod sa ginharian sang mga langit.” (Mat. 19:12) Subong sang iban nga dulot, dapat gamiton sing nagakaigo ang pagkadiminyo agod ini mangin makalilipay kag mapuslanon. Paagi sa paghimulos sang mga kahigayunan nga mahatag sang pagkadiminyo kag paagi sa pagsalig kay Jehova para sa kaalam kag kusog, madamo sang di-minyo nga mga tawo ang nakahangop sang balor sang paghatag sing duog sa sini.